Jân 6
6
1Belombo těkabe tombango Jisus a kěkindi o mwidi mua manga ma Galili, ma jadi, na, ma Tibiriâs. 2Ka ebimba ea bato eněně ya vitě Mâ, ’kabojana ba yěněkindi belembo beaju be hakidi o mebědi. 3Jisus a betakindi o ukodi, ka Mâ‐a diya omě na beyokwedi beaju. 4Isango ja Jiu j‘ Ikunduwa, i diyakindi ja bě piělě. 5O Jisus a betakidě mihâ maju ka Mâ‐a yěně ebimba ea bato eněně ba vaka o Mâ‐a jadi, A vâki na Filip, na, Ho ka hamba lě pěmbě ove ijabu i ka jě? 6(A vâkind‘ ekae isulě jaju: ’kabojana mâ mětě A yowakiděte ka Mâ‐a ka hayě.) 7Filip a yavwanaki Mâ, na, Kama ja fula ibale ja pěmbě i ’bě twětwě na bâ, moto moto a nângâkâ vipupuhu. 8Eyokwedi ’aju yâkâ, Andru mwana nyangwě na Saimân Pitě, a vâki na ju, 9na, Mwana a nd‘ okava, a di na membunda mea pěmbě ya barli metano na bejaka behâlě bebale: ndi be ka ha lě nde o bato tě baitě ekaba ba jadi? 10Ka Jisus a vâ, na, Diyakiděni bato těkaba (Iboko tě i diyaki na mbusanga iitě mětě). Ka bamo ba diya o he ka tâjen itano o tango ’abu. 11Ka Jisus a nângâ membunda; o Mâ‐a diyakidi a vě akeva, ka Mâ‐a kaba na beyokwedi, na beyokwedi bea vě ba diyakudwě o he; a haki tepě bejaka nonaně nyang‘ ’abu e vahakidi. 12O bâ‐ba diyaki ba vula, A vâki na beyokwedi beaju, na, Yolakěni nguhu i ma dikana, ovaně nd‘ o elombo e ka měndě e nyange. 13Ka bâ‐ba yolě jâ ta, jomu ja belinga na belinga bebale bea londa na nguhu ja membunda mea pěmbě ya barli metano, i dikanakidi tomběngo ba jakidi. 14Jâ ndi ja bato tě o bâ‐ba yěněkidi elembo ya Jisus e hakidi, ja vâ, na, Pâkwěpâkwě ekaně ndi usâki tě u ka viyě o he.
15O Jisus a diyakidi A yowě na ba ’mbakind‘ o pâ ka nângâ Mâ na ngudi, o panga Mâ upolo, A věngěměki pě nala ukodi, mâ mětě dipâ.
16O kolo e diyaki ya pâ, beyokwedi beaju be kěkindi o manga, 17ka bâ‐ba vama o elende, ka bâ‐ba jabuwa o manga nala o mwidi mua Kapěrnaum. I diyakindi ja bě ivititi, ndi Jisus A diyaka pango o bâ‐ba jadi. 18Kâ manga ma bumba na tina y‘ upupě uněně u vungakidi. 19O bâ‐ba diyaki ba duka pani ka mabo ma fâlâng mabale na fâlâng itano naba mabo malalo, ba yěněkindi Jisus a tamwaka o manga, A bengakiyi piělě na elende: ka bâ‐ba banga. 20Nd‘ A vâki na bâ, na, A te ’Mba: o bangakeni. 21Jâ ndi jabu ja tândâ o nângâ Mâ o ’lende: elěngiaha tepě elende e pâkâ o he ’abu e kěkidi.
22Buhwa bo vitakidě, o bato ba těměkidi o mwidi upâkwě mua manga bu yěněkě elende epâkwě omě, kabo yâkâ ya beyokwedi e vamakidi, Jisus tepě A kěkě na beyokwedi beaju o ’lende, ndi beyokwedi beaju be kěkite dipâ; 23(ndi belende bepâkwě be vakiyend‘ oviya Tibiriâs piělě n‘ iboko viabu vi jaki pěmbě, o Upangiyi a diyakidi a vě akeva:) 24o bato ba yěněkidi na Jisus a ’bě omě tombe na beyokwedi beaju, ka bâ‐ba vama tepě o belende, ka bâ‐ba pâ o Kapěrnaum ba vahaka Jisus. 25O bâ‐a diyaki ba duwa Mâ o pělě ’pâkwě ya manga, ba vâki na ju, na, Rabai, o vaki lě okava nja ’gombe ě? 26Jisus a yavwanaki bâ ka Mâ‐a vâ, na, Mbi vâki n‘ inyěni pâkwěpâkwě mětě, na, Oa vahaki ’Mbani ’kabojana o yěněkindini belembo, ndi ’kabojana o jakindi membunda mea pěmbě n‘ inyěni na vulaka. 27O hakiyeni beja be nyangakě, ndi hakiyani beja be diyakě egombe yěhěpi, bea Mwana moto be ka věyě inyěni: ’kabojana Anyambě ya Hangwě a ndi Mâ lěnděngo male. 28Jâ ndi jabu ja vâ na ju, na, Ho hake lě na, ho haye behavu bea Anyambě? 29Jisus a yavwanaki bâ ka Mâ‐a vâ, na, Ehavu ’a Anyambě nd‘ ekae, na, Kamakidi Mâni uaju A di lomango. 30Ba vâki na ju, na, E lě nja nděmbo ě eâvě e levakidě, eahu e jadi e yěněkě, na hwě hwa kamidě âvě? O haka lě na? 31Bahangwě bahu ba ma jaki pěmbě o utove; pani ka yâ e di lěndwěngo, na, A věki bâ pěmbě e jakě ya viya o Hěvěn. 32Jâ ndi ja Jisus ja vâ na bâ, na, Mbi vâki n‘ inyěni pâkwěpâkwě mětě, na, Mosěs a věkě inyěni pěmbě tě e vakiyed‘ o Hěvěn; ndi Paia a věkěndi inyěni pěmbě ya pâkwěpâkwě e vakiyě o Hěvěn. 33Ikabojana pěmbě ’a Anyambě ndi Mâ‐a vakiyed‘ o Hěvěn, 34A věkě eměnâ o he. Ba vâki na ju, na, Upangiyi věkě hwě pěmbě těně egombe yěhěpi. 35Jisus a vâki na bâ, na, Umba ndi pěmbě ya ’měnâ: a ka viyě o ’Mba‐mbi jadi, a yoke nja; a kamakidě ’Mba, a yoke evělě. 36Ndi Mbi vâki n‘ inyěni, na, O ti ’Mbani yěněngo, ndi oa kamakiděni. 37Běhěpi ba Hangwě ba di ’Mba věngo ba ka pândi o ’Mba‐mbi jadi; a ka viyě tepě o ’Mba‐mbi jadi, 38Mba pumě mâ. Ikabojana Mbu hubaka oviya Hěvěn ka ha upango muamě mětě, kabo upango mua A lomaki ’Mba. 39Upango mua Hangwě a lomaki ’Mba nd‘ ekamu, na eaju e di ’Mba věngo yěhěpi ya nyange, ndi Mbi ka pumbudi pě yâ o buhwa boa madikanido. 40Upango mua A lomaki ’Mba nd‘ ekamu, na uěhěpi a yěněkě Mwana, na mâ‐a kamakidě Mâ, a na ’měnâ ya egombe yěhěpi: Mbi ka pumbudi mâ o buhwa boa madikanido.
41Jiu ba hâkâlânâkiyi Mâ ’kabojana A vâki, na, Umba ndi pěmbě e vakiyed‘ oviya Hěvěn. 42Ka bâ‐ba vâ, na, A ’bě Jisus ekaně mwan‘ ’a Josěf, ho dimbakiyi Hangwě na nyangwě? ndi e lě nde eaju e vâkě, na, Mbi hubakindi oviya Hěvěn? 43Jisus a yavwakindi ka Mâ‐a vâ na bâ, na, O hâkâlânâkiyeni inyi mětě n‘ inyi mětě. 44O ’bě na moto a ka viyě o ’Mba‐mbi jadi, kabo Hangwě a lomaki ’Mba a dula mâ: na Mbi ka pumbudi mâ o buhwa boa madikanido. 45E lěndwěngo o usâki, na, Bâ běhěpi ba ka yokudwi na Anyambě. Tina těně ya moto uěhěpi a di yokango na mâ tepě ndi yokuwango o pěl‘ ’a Hangwě, a vakandi o ’Mba‐mbi jadi. 46Hanga na moto ka moto a yěněngo Hangwě, kabo Mâ‐a di oa Anyambě, Mâ nd‘ a di yěněngo Hangwě. 47Mbi vâki n‘ inyěni pâkwěpâkwě mětě, na, A kamakidě ’Mba, a na ’měnâ ya egombe yěhěpi. 48Umba ndi pěmbě tě ya eměnâ. 49Bahangwě banyu ba ma jakandi mana o utove, ndi ba wendi. 50Ekaně ndi pěmbě e vakiyě o Hěvěn, e jadi oningě moto a jengě yâ, vâkâna a we pě. 51Umba ndi pěmbě e di mihâ, e vakiyed‘ o Hěvěn: oningě moto a jengě pěmbě těkaně, a ka diyandi egombe yěhěpi: pěmbě ’amě e ka věyě ndi mehoni meamě, imeamě me ka věyě o eměnâ ya he.
52Ka Jiu ba sâja bâ mětě na bâ mětě, na, Momo těkaně a l‘ a věkě hwě mehoni meaju ija na? 53Jisus a vâki na bâ, na, Pâkwěpâkwě mětě Mbi vâki n‘ inyěni, na, Oa diyeni na eměnâ oningě o jeni mehoni mea Mwana moto, n‘ inyěni oa mâtâni makiya maju. 54Uěhěpi a jakě mehoni meamě na mâ‐a mâtâkâ makiya mamě, a na eměnâ ya egombe yěhěpi: Mbi ka pumbudi mâ o buhwa boa madikanido. 55Ikabojana mehoni meamě me ndi beja pâkwěpâkwě, makiya mamě ma ndi imâtâ pâkwěpâkwě. 56A jakě mehoni meamě na mâ‐a mâtâkâ makiya mamě, a diyakandi o’Mba‐mbi jadi, Umba tepě o Mâ‐a jadi. 57Pani ka Hangwě e jadi, a lomaki ’Mba, n‘ Umba‐mbi diyaka na Hangwě: nonaně tepě a jakě ’Mba, a ka diyi n‘ Umba. 58Ekaně ndi pěmbě tě e vakiyed‘ o Hěvěn: hanga pani ka bahangwě banyu ba jakidi mana, ndi ba wendi: a ka jě pěmbě těkaně a ka diyandi egombe yěhěpi. 59A vâkindi belombo těkabe o sinegâg, o Mâ‐a yokwakidě o Kapěrnaum.
60Beyokwedi beaju beitě, o bâ‐ba yokakidi ekae, ba vâki, na, Ekaně ndi ndaga ekolo: a lě nja a ka yâlě o yoka yâ? 61O Jisus mâ mětě A yowudě na beyokwedi beaju be hâkâlânâkiyi yâ, A vâki na bâ, na, Ekae e numbakiděndi inyěni? 62E lě nde oningě oa yěněni Mwana moto A betaka o Mâ‐a diyakid‘ o vyo? 63I ndi Ilina i umwakidě; mehoni mea kovaka elombo: ndaga jamě i kalakě n‘ inyěni, i ndi ilina na eměnâ. 64Ndi o na bâkâ o inyeni o jadi ba ha kamakidě. Ikabojana Jisus a yowakiděte oviya jali ba ha kamakidě, na a ka kândidě Mâ. 65Ka Mâ‐a vâ, na, Ovaně nd‘ o ’Mba‐mbi vâki n‘ inyěni na o ’bě na moto a ka yâle o viya o ’Mba‐mbi jadi, kabo ya věwě mâ oviya Paia a jadi.
66Oviya ’gombe těeně beyokwedi beaju beitě be timbakindi na mbuhwa, bu jopaka pě na ju epâkwě njo. 67Jâ ndi ja Jisus ja vâ na jomu na bebale, na, Inyěni o ka vala tepěni? 68Ka Saimân Pitě a yavwana Mâ, na, Upangiyi ho ka vala lě o nja jadi? âvě ndi O di na ndaga ja eměnâ ya egombe yěhěpi. 69Ho kamiděngo, na hwě tepě yowěngo na Âvě ndi Kraist tě, Mwana Anyambě ya mihâ. 70Jisus a yavwanaki bâ, na, Mbu pânâk‘ inyěni jomu na babale, nd‘ umbâkâ o inyěni o jadi a ndi děvil? 71A kalakindi o pěl‘ ’a Judas Iskariât mwana ua Saimân: ikabojana mâ ndi mâně a ka kândě Mâ, a diyakite wa jomu na babale.
Terpilih Sekarang Ini:
Jân 6: BNG1895
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Published by the American Bible Society in 1895.
