မဿဲ 1
1
ယေရှုခရစ်တော်၏ ဆွေစဉ်မျိုးဆက်များ
1အာဗြဟံနှင့် ဒါဝိဒ်မင်းတို့ထံမှ ဆင်းသက်တော်မူသော ယေရှုခရစ်တော်#1:1 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏ အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။၏ဆွေစဉ်မျိုးဆက်စာရင်းမှာ အောက်ပါအတိုင်းဖြစ်၏။
2အာဗြဟံ၏သားသည် ဣဇာက်ဖြစ်၏။
ဣဇာက်သား ယာကုပ်ဖြစ်၏။
ယာကုပ်၏သားများမှာ ယုဒနှင့် ညီအစ်ကိုများဖြစ်ကြ၏။
3ယုဒနှင့် ဇနီးတာမာတို့၏ သားများမှာ ဖာရက်နှင့်ဇာရတို့ ဖြစ်ကြ၏။
ဖာရက်သား ဟေဇရုံဖြစ်၏။
ဟေဇရုံသား အာရံဖြစ်၏။
4အာရံသား အမိနဒပ်ဖြစ်၏။
အမိနဒပ်သား နာရှုန်ဖြစ်၏။
နာရှုန်သား စာလမုန်ဖြစ်၏။
5စာလမုန်နှင့် ဇနီးရာခပ်တို့၏သား ဗောဇဖြစ်၏။
ဗောဇနှင့် ဇနီးရုသတို့၏သား သြဗက်ဖြစ်၏။
သြဗက်သား ယေရှဲဖြစ်၏။
6ယေရှဲသား ဒါဝိဒ်မင်းဖြစ်၏။
ဒါဝိဒ်မင်းနှင့် ဥရိယ၏ဇနီး ဗာသရှေဘတို့၏သား ရှောလမုန်ဖြစ်၏။
7ရှောလမုန်သား ရောဗောင်ဖြစ်၏။
ရောဗောင်သား အဘိယဖြစ်၏။
အဘိယသား အာသဖြစ်၏။
8အာသသား ယောရှဖတ်ဖြစ်၏။
ယောရှဖတ်သား ယဟောရံဖြစ်၏။
ယဟောရံသား သြဇိဖြစ်၏။
9သြဇိသား ယောသံဖြစ်၏။
ယောသံသား အာခတ်ဖြစ်၏။
အာခတ်သား ဟေဇကိဖြစ်၏။
10ဟေဇကိသား မနာရှေဖြစ်၏။
မနာရှေသား အာမုန်ဖြစ်၏။
အာမုန်သား ယောရှိဖြစ်၏။
11ဘေဘီလုံပြည်သို့ ဖမ်းဆီးခေါ်ဆောင်ခြင်းခံရချိန်၌ ယောရှိ၏သားများသည် ယေခေါနိနှင့် ညီများဖြစ်ကြ၏။
12ဘေဘီလုံမြို့သို့ ဖမ်းဆီးခေါ်ဆောင်ခြင်းခံရပြီးနောက်
ယေခေါနိသားသည် ရှာလသေလဖြစ်၏။
ရှာလသေလသား ဇေရုဗဗေလဖြစ်၏။
13ဇေရုဗဗေလသား အဗျုဒ်ဖြစ်၏။
အဗျုဒ်သား ဧလျာကိမ်ဖြစ်၏။
ဧလျာကိမ်သား အာဇော်ဖြစ်၏။
14အာဇော်သား ဇာဒုတ်ဖြစ်၏။
ဇာဒုတ်သား အာခိမ်ဖြစ်၏။
အာခိမ်သား ဧလုဒ်ဖြစ်၏။
15ဧလုဒ်သား ဧလာဇာဖြစ်၏။
ဧလာဇာသား မဿန်ဖြစ်၏။
မဿန်သား ယာကုပ်ဖြစ်၏။
16ယာကုပ်၏သားသည် မာရိ၏ခင်ပွန်း ယောသပ်ဖြစ်၏။
မာရိသည် ခရစ်တော်ဟု ခေါ်သော ယေရှု၏ မယ်တော်ဖြစ်၏။
17အထက်တွင်ဖော်ပြထားသော ဆွေစဉ်မျိုးဆက်များသည် အာဗြဟံမှ ဒါဝိဒ်မင်းအထိ ဆယ့်လေးဆက်၊ ဒါဝိဒ်မင်းမှ ဘေဘီလုံမြို့သို့ ဖမ်းဆီးခေါ်ဆောင်ခြင်းခံရချိန်အထိ ဆယ့်လေးဆက်၊ ထိုအချိန်မှ ခရစ်တော်အချိန်အထိ ဆယ့်လေးဆက်ဖြစ်၏။
ယေရှုခရစ်တော် မွေးဖွားလာတော်မူခြင်း
18ယေရှုခရစ်တော် မွေးဖွားလာတော်မူပုံမှာ ဤသို့ဖြစ်၏။ မယ်တော်မာရိနှင့် ယောသပ်တို့သည် လက်ထပ်ရန် စေ့စပ်ထား၏။ သို့သော်လည်း လက်ထပ်ပေါင်းသင်းခြင်းမပြုမီ မာရိသည် သန့်ရှင်းသောဝိညာဉ်တော်၏တန်ခိုးအားဖြင့် ကိုယ်ဝန်ဆောင်လေ၏။ 19ထိုအခါ ခင်ပွန်းလောင်းဖြစ်သူ ယောသပ်သည် သူတော်ကောင်းဖြစ်၍ မာရိကို အသရေမပျက်စေလိုသောကြောင့် စေ့စပ်ကြောင်းလမ်းခြင်းကို တိတ်တဆိတ်ဖျက်သိမ်းရန် ဆုံးဖြတ်၏။
20ထိုသို့ တွေးတောဆင်ခြင်နေစဉ် ထာဝရဘုရား၏ ကောင်းကင်တမန်တစ်ပါးသည် ယောသပ်ကို အိပ်မက်တွင် ကိုယ်ထင်ပြ၍ “ဒါဝိဒ်မင်း၏သား ယောသပ်… မာရိကို သင်၏ဇနီးမယားအဖြစ် လက်ထပ်ရမည့်အမှုအတွက် မတွန့်ဆုတ်နှင့်။ အဘယ်ကြောင့်ဆိုသော် သူ၏ ကိုယ်ဝန်သည် သန့်ရှင်းသောဝိညာဉ်တော်၏ တန်ခိုးကြောင့် ဖြစ်၏။ 21သူသည် သားယောက်ျားကို မွေးဖွားလိမ့်မည်။ ထိုသားသည် မိမိလူမျိုးတို့ကို သူတို့၏ အပြစ်များမှ ကယ်တင်မည့်သူ ဖြစ်သောကြောင့် သူ့ကို ယေရှုဟူ၍ မှည့်ခေါ်ရမည်” ဟု ဆိုလေ၏။
22ဤအရာအားလုံးသည် ပရောဖက်မှတစ်ဆင့် ထာဝရဘုရားမိန့်တော်မူခဲ့သော ဗျာဒိတ်တော်အတိုင်း ဖြစ်လာရန်ပင် ဖြစ်၏။ 23ဗျာဒိတ်တော်စကားမှာ “အပျိုစင်တစ်ဦးသည် ကိုယ်ဝန်ဆောင်၍ သားယောက်ျားကို မွေးဖွားလိမ့်မည်။ ထိုသားကို ဧမာနွေလဟု ခေါ်ဝေါ်ကြလိမ့်မည်”#1:23 ဟေရှာ ၇:၁၄။ ဟူ၍ ဖြစ်၏။ ဧမာနွေလ၏ အနက်အဓိပ္ပာယ်မှာ “ကျွန်ုပ်တို့နှင့်အတူရှိတော်မူသောဘုရားသခင်” ဟူ၍ ဖြစ်၏။
24ယောသပ်သည် အိပ်ပျော်ရာမှ နိုးသောအခါ ထာဝရဘုရား၏ ကောင်းကင်တမန် မှာထားသည့်အတိုင်း မာရိကို လက်ထပ်လေ၏။ 25သို့သော်လည်း သားမဖွားမီတိုင်အောင် မာရိနှင့် မဆက်ဆံဘဲနေ၏။ ထိုသား၏ အမည်ကို ယေရှုဟု မှည့်လေ၏။
Terpilih Sekarang Ini:
မဿဲ 1: BCB
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
