Matthew 20
20
Kakala hulihuli nakama heheaꞌu iloko paupaꞌu
1“Kipukipu kenoholana kevaelani eme penei. Kela hekama ehamakua paupaꞌu aia la. Kahaka po, kama la uhaele nosesee nakama iheheaꞌu iloko paupaꞌu aia la. 2Kama hamakua la ia ma nakama heheaꞌu la hakina hakoa isui namoni ekau ma keheheaꞌu i keaho hokahi. Kena kama la ehaunalia nakama la noheheaꞌu iloko paupaꞌu aia la.
3“Keualoko kesivo kahaka, kama hamakua la uhaele i kesoa noꞌike nakama enoho ilaa, ehamalolo oia. 4Kena kama hamakua la eme aꞌe nakama la, ‘Amea okou ekaꞌa noheheaꞌu iloko paupaꞌu anau la, anau meisui aku okou namoni ekau ma keheheaꞌu okou la.’ Kena nakama la ukaꞌa noheheaꞌu iloko paupaꞌu kama la.
5“Keualoko kelaa la kea, ia ma kekolu keiahi, kama hamakua la uvaꞌai i kesoa nolave alakama iheheaꞌu iloko paupaꞌu aia la. 6Ia keualoko kelaa nikapili isulu, kama la uvaꞌai i kesoa la hoi nolave alakama enoho ilaa, kena ivasili aꞌe nakama la, ‘Hea okou ehai vanei na, kahao oia?’ 7Kena nakama la eme aꞌe, ‘Sehikama eme mai makou iheheaꞌu.’ Kena kama la ume aꞌe nakama la, ‘Okou io noheheaꞌu iloko paupaꞌu anau la.’
8“Keualoko kelaa la usulu, kekama hamakua paupaꞌu la ekakala aꞌe kekama lolosi nakama heheaꞌu paupaꞌu aia la, ‘Ana aku nakama heheaꞌu la nosui aku nakama la hakoa. Amaka nosui nakama kela anau niko mai keiahi nei, kena usui aku hanohaoki nakama la kela anau niko mai kahaka po la.’
9“Nakama kela niheheaꞌu hamuli la uo noko nasui lakou la. 10Kena nakama niheheaꞌu amaka uo noko nasui lakou la hoi. Nakama amaka la ehakaꞌoko pela nasui lakou la melaꞌa iluna ma nasui nakama heheaꞌu hamuli la. Ia nakama la esui hanakahi hakoa ma nakama hamuli. 11Keualoko nakama la niꞌike pela nasui lakou ehanakahi hakoa, kena nakama la ekaumaluu pela kama hamakua paupaꞌu la esekonu. Nakama la eme aꞌe, 12‘Nakama hamuli la eheheaꞌu kamasaika oia. Ia niaina kelaa la evela haeꞌo, makou heheaꞌu keaho nei hakoa. Ia nasui makou ehanakahi ma nakama heheaꞌu hamuli la.’
13“Kena iko kama hamakua paupaꞌu la ime aꞌe kama heheaꞌu amaka la, ‘Kausoa, anau sesaꞌino maꞌoe. Kaua hakina pela isui aꞌoe namoni kela ekau ma keheheaꞌu keaho hokahi. 14Ko namoni aꞌoe na, au haele i hale. Anau hihai iau aꞌe nasui nakama hamuli la ihanakahi ma okou hakoa. 15Anau elaoi nakama la. Kena hevahi anau kesui aku namoni anau la. Ia aꞌoe sekau kekamumu.’ ”
16Kena Jesus ehapaa aꞌe nakakala aia ma, “Nakama kela moulalo meihananiu. Ia nakama hananiu meikeiho ilalo.”
Jesus ukakala kanamake hoi
(Mrk 10.32-34; Luk 18.31-34)
17Kulana Jesus ia ma nakama kaukali aia la nio valoko keala la nokae Jerusalem, Jesus ekakala aꞌe nakama la solakou, 18“Halono mai. Kakou eo i Jerusalem. Kena hekama meiko {kama ekipu kama} nohaꞌali aꞌe i namaakua hamakua ia ma nakama epolopolo nakuaa la. Nakama la mehai aꞌe {kama ekipu kama} la, kena ikaa kama la imake. 19Nakama la meiau aꞌe kama la i nakama enoho pouli ikokousua kama la, ilili kia kama la, kena ikii kama la iluna {kolosi}. Ia keaho kanahakolu, kama la meimasiꞌe ikaha ma kemake.”
Kipukipu nakama hihai ihananiu
(Mrk 10.35-45)
20Keꞌavana Zebedee ma koꞌolua nakama laua la uo aꞌe nokoukuli imua Jesus noainoa aꞌe kama la.
21Kena iko Jesus ime aꞌe kehine la, “Hea aꞌoe hihai na?” Kena kehine la eme aꞌe, “Keualoko aꞌoe mehamakua kenoholana aꞌoe la, aꞌoe ikini koꞌolua anau nei ihamakua maꞌoe, kekama inoho kevahi laua aꞌoe, kena kelaa kama enoho kevahi selaua aꞌoe.”
22Ia Jesus eme aꞌe, “Aꞌoe semakino hea aꞌoe eainoa mai anau. Elavaa koꞌolua la keunu ke{kapu} anau meiunu la?” Kena koꞌolua la eme aꞌe, “Maua elavaa.”
23Kena iko Jesus ime aꞌe, “Olua meiunu ke{kapu} anau meiunu la. Ia emeia anau selavaa kekini oai meinoho i kevahi laua anau, ia oai meinoho i kevahi selaua anau. Kamana anau la soia mekanakana naꞌina koꞌolua la meinoho.”
24Keualoko kelaa sehui nakama kaukali la nilono nakakala koꞌolua la, nakama la uloko haeꞌo i haikaina la. 25Kena Jesus uanaa aꞌe nakama kaukali aia la ihaꞌuku aꞌe, kena ime aꞌe, “Nakama hananiu kela nakama enoho pouli la ehakanaka haeꞌo, kena hihai ihuli aꞌe namahi lakou i keonohenua. 26Ia okou isemea pena. Poi hekama okou hihai ihananiu, kama na ikau kekonaꞌi alakama. 27Ia poi hekama okou hihai ihananiu, kama na ikuu iho soia ilalo, ime mo kama heheaꞌu okou. 28{Kama ekipu kama} emea pela hoi. Kama la sehamai nohananiu nakama hakoa. Kama la ehamai nohoꞌi aꞌe keola aia. Kama la memake ihaakana komaꞌi nakama ikaha ma nahaisala lakou.”
Jesus ekonaꞌi nakama alemaka seni
(Mrk 10.46-52; Luk 18.35-43)
29Kulana Jesus ma nakama kaukali aia la nio ikaha ma kemakaꞌina Jericho, komaꞌi nakama eo vamuli lakou. 30Koꞌolua nakama alemaka seni enoho kevahi keala la. Ia kulana koꞌolua la ulono pela Jesus uhalaꞌa vamua laua, koꞌolua la eanaa aꞌe ma, “Kealiꞌi. Kemopuna kekuꞌu David, aloha mai maua.”
31Kena nakama keonohenua la uhai aꞌe koꞌolua la inoho semuu. Ia koꞌolua la uanaa aꞌe hamaloa ma, “Kealiꞌi, kemopuna kekuꞌu David, aloha mai maua.”
32Kena Jesus uhamau, kena ivasili aꞌe koꞌolua la, “Hea olua hihai anau ikonaꞌi olua na?”
33Kena iko koꞌolua la ime aꞌe, “Kealiꞌi, maua hihai iꞌike.”
34Jesus ualoha koꞌolua la, kena ihakili nalima aia iluna naꞌalemaka koꞌolua la. Vahola oia, koꞌolua la uꞌike, kena ikaukali Jesus.
Terpilih Sekarang Ini:
Matthew 20: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
