Matthew 17
17
Keakua uhuli aꞌe namahi aia i kinokama Jesus
(Mrk 9.2-13; Luk 9.28-36)
1Imuli eono naaho, Jesus eko Peter ia ma haihanau James laua ma John nokaꞌa lakou iluna kemouna. 2Kena nakama la eꞌike namahi Keakua ehuli aꞌe iloko kinokama Jesus. Namaisu Jesus emasina poi kelaa, kena naauꞌahu aia la emaꞌini ivaꞌiva lo. 3Koꞌokolu la uꞌila noꞌike Moses laua ma Elijah ilaa hoi, ekakala lakou ma Jesus. 4Kena iko Peter ime aꞌe Jesus, “Kealiꞌi, kaualeꞌa pela makou inei. Poi aꞌoe hihai, anau meihakuu koukolu nakamahale ma okou; kamahale aꞌoe, kamahale Moses ia kamahale Elijah.”
5Kulana Peter ekakala aꞌe nakama la, puleulehu eꞌivaꞌiva uꞌuhi nakama la, kena Keakua ekakala iho iloko puleulehu la ma, “Anau haikama laoi kaukama nei. Anau ehihai nakipukipu kama nei la hakoa. Okou ihalono aꞌe kama nei.”
6Keualoko koꞌokolu nakama kaukali la ulono Keakua ekakala iho, nakama la umakaꞌu kena ikoukuli nohamalu. 7Ia kena Jesus ehaele aꞌe nohapili nalima aia iluna nakama la, kena ime aꞌe “Masiꞌe iluna, okou isemakaꞌu.” 8Kena nakama la uꞌila aꞌe, kela Jesus soia oia.
9Kulana nakama la uo iho ilalo ma kemouna la, Jesus eme aꞌe, “Okou isehaꞌali aꞌe hea okou niꞌike la. Kali keualoko {kama ekipu kama} meola muli ikaha ma kemake.”
10Nakama kaukali la evasili aꞌe Jesus, “Aiea nakama epolopolo nakuaa la ekakala ma Elijah meihamai imua keMesaea laea?”
11Kena iko Jesus ime aꞌe, “Ekonu pela Elijah meihamai imua keMesaea nohakonu namea hakoa. 12Anau eme aku okou, hekama ehau poi Elijah la nakae mai avale. Ia keonohenua la oisemakino oai kama la. Kena nakama la ekahao sala kama la, ikaukali nakipukipu saꞌino lakou la. Ia nakama la meikahao sala {kama ekipu kama} nohalono lihu pela hoi.”
13Ia kena nakama kaukali la uailoa pela Jesus ukakala aꞌe nakipukipu John Baptist.
Jesus ehaise kipua saꞌino ikaha ma kaupeala
(Mrk 9.14-29; Luk 9.37-43)
14Kulana Jesus ia ma koꞌokolu la nivaꞌai iho nokili keonohenua la, hekama iloko keonohenua la uhaele aꞌe nohamalu imua Jesus. 15Kena kama la eme aꞌe, “Kealiꞌi haialoha mai kaupeala anau nei. Kama nei elavea peupeu, kena esina kahi iloko keahi ia ma kelokai la nopole, kena ehalono lihu haeꞌo. 16Kena anau ehakaꞌi aꞌe kaupeala anau nei i nakama kaukali aꞌoe la, ia nakama la selavaa kekonaꞌi kama nei ikaualeꞌa.”
17Kena Jesus ehai aꞌe nakama la, “Kaukama okou na ikau kehakina, ia okou evale oia. Anau enoho ma okou saika loloa haeꞌo, ia okou sehakina anau. Ko mai kaupeala na.” 18Kena iko Jesus ikakala hamakaꞌu aꞌe kipua saꞌino la, kena kipua la uhaele ikaha ma kaupeala la. Vahola oia, kaupeala la ukaualeꞌa.
19Kulana Jesus ninoho soia, nakama kaukali aia la eo aꞌe nome aꞌe kama la, “Aiea makou selavaa kehaise kipua la ikaha laea?”
20Kena iko Jesus ime aꞌe, “Okou selavaa kehaise kipua la ikaha, maikinimea okou sehakina hamaoni. Anau eme aku kehamaoni. Niaina ma nahakina okou esoliliꞌi poi kehua ke{masika}, okou elavaa keme aꞌe kemouna la, ‘Ene pela,’ kena kemouna la meꞌene. Kena namea hakoa meihainahie okou. 21Ia poi okou eloku mahi, ia ehasese hiꞌai, kena okou amelavaa kehaise kipua saꞌino na ikaha.”
Jesus ukakala hoi kanamake
(Mrk 9.30-32; Luk 9.43-45)
22Keualoko Jesus ma nakama kaukali aia la eꞌuku i Galilee, Jesus eme aꞌe nakama la, “Hekama meiau aꞌe {kama ekipu kama} i nakama haimahi 23nokaa kama la imake. Ia i keaho kanahakolu, kama la meola muli.” Kena nakama kaukali Jesus la ulono ualoha haeꞌo.
Jesus ehoꞌi aꞌe namoni hale kapu
24Jesus ma nakama kaukali aia la ukae Capernaum, kena iko nakama aoao namoni hale kapu la io aꞌe ia Peter, kena ime aꞌe, “Ea, keRabai okou la eaunahie kehoꞌi aꞌe sileni ikonaꞌi hale kapu?”
25Kena iko Peter ime aꞌe, “Ei.” Ia keualoko Peter eulu kehale Jesus enoho la, Jesus eme aꞌe kama la, “Simon Peter, aꞌoe ehakaꞌoko pehe? Nakuꞌu kemaalama nei meko nasileni lakou la ihee? Nakuꞌu la hihai iko nasileni keonohenua lakou la, ma iko nasileni naonohenua emao?” 26Kena Peter eme aꞌe, “Nasileni naonohenua emao la.”
Kena Jesus eme aꞌe Peter, “Kena keonohenua nakuꞌu la meseau aꞌe nasileni. 27Ia kaua sehihai nakama aoao namoni la ililoko kaua. Kena aꞌoe ihaele nomakau. Keiꞌa amaka aꞌoe mehuki, ko sileni iloko puꞌua keiꞌa la. Haele nohoꞌi aꞌe sileni la ekau ma kaua.”
Terpilih Sekarang Ini:
Matthew 17: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
