Matthew 15
15
Nakuaa Keakua ehananiu iluna nakipukipu nakama
(Mrk 7.1-13)
1NaFarasi ia ma nakama epolopolo nakuaa la eo ikaha ma Jerusalem nomaka Jesus, kena ime aꞌe kama la, 2“Nakama kaukali aꞌoe la sekaukali namakeala nakipuna kakou la. Nakama la eꞌai naꞌai, ia sesolo nalima lakou imakahua.”
3Kena iko Jesus ime aꞌe, “Okou sehalono nakuaa Keakua. Emeia okou ekaukali namakeala okou soꞌokou la oia. 4Keakua eme mai ma, ‘Hamaha kamana ia ma kina aꞌoe.’ Kama la eme mai hoi, ‘Pena hekama kakala saꞌino kamana aia la ia ma kina aia la, okou ukaa kama la imake.’ 5Ia okou eaoaꞌo aꞌe alakama ikakala aꞌe namakua lakou la ma, ‘Anau eisi namea iau aku olua. Ia ala nimea anau mehoꞌi aꞌe Keakua.’ 6Kena okou eaoaꞌo nakama la isehamaha namakua lakou la. Okou ekiaꞌi nakakala Keakua, ikaukali namakeala okou soꞌokou. 7Okou ekakala uhiuhi. Hea Isaiah ekakala aku imua ukonu,
8‘Nakama na emea ma lakou ehamaha i anau,
Ia nahakaꞌoko lakou emao haeꞌo ikaha manau.
9Nakama na ehamalumalu i anau,
Ia lakou hamalumalu vale oia.
Maikinimea nakama na epolopolo nakuaa nakama oia.’ ”
Namea kela emea kekama ihaisala
(Mrk 7.14-23)
10Jesus eanaa aꞌe keonohenua la io aꞌe, kena ime aꞌe, “Okou ihalono, imea okou iailoa laoi nakakala anau nei. 11Namea kela kekama epono iloko puꞌua aia semea kama la ihaisala. Kena namea kela esopo ikaha ma puꞌua kama la emea kama la ihaisala.”
12Nakama kaukali Jesus la uo nome aꞌe Jesus, “Aꞌoe eailoa pela naFarasi la uloko haeꞌo i nakakala aꞌoe la.”
13Kena Jesus eme aꞌe, “Poi Kamana anau i kevaelani la sekoli nalaꞌau, ia namela esomo solakou, kena namela meiꞌuhu ikaha. 14Okou isehakekele nakakala naFarasi la. Nakama na ehau poi nikama alemaka seni kela ehakaꞌi alakama alemaka seni nomaoha iloko kelua.”
15Peter eme aꞌe, “Haꞌali mai kehakaꞌoko nakakala hulihuli la.”
16Jesus eme aꞌe, “Ea, aꞌoe semakino? 17Okou seailoa nakakala anau? Naꞌai hakoa eo iloko puꞌua nokaꞌa iloko keopuu. Kena uoki, upesia. 18Ia nakakala kekama esopo iho ikaha ma kehakumanava aia la. Ia nakakala kama la elavaa kemea kama la ihaisala. 19Nakipukipu saꞌino esopo iho ikaha ma nahakumanava nakama. Kela hea nakama la ehakekele saꞌino, ia ekaa kama. Nakama la sekino naꞌavana lakou, kena ihai huli. Nakama la eailalao. Nakama la ekakala nukulaoi, kena iveuveꞌu alakama. 20Namea saꞌino la emea kekama ihaisala. Ia poi hekama eꞌai naꞌai, ia sesolo nalima aia nomakahua, kipukipu na mesemea kama la ihaisala.”
Jesus ekonaꞌi kehine enoho pouli
(Mrk 7.24-30)
21Jesus ma nakama kaukali aia uo ikaha ma keꞌina la, nokae keꞌina kapili aꞌe Tyre laua ma Sidon. 22Kela hehine enoho pouli enoho kapili keꞌina la. Kama la ehaele aꞌe Jesus, kena ianaa hamaloa, “Kealiꞌi, kemopuna David, haialoha mai anau. Kamaliꞌi hine anau la eisi kipua saꞌino iloko aia, kena ehalono lihu haeꞌo.”
23Ia Jesus sekakala aꞌe kehine la. Kena nakama kaukali aia la eainoa aꞌe i aia, “Me aꞌe kehine la ihaele ikaha, maikinimea kama la evaa vamuli kakou.”
24Ia Jesus eme aꞌe, “Keakua ehaunalia iho anau ikonaꞌi nakama Israel oia. Nakama la ehau poi nimanu sili.”
25Ia kehine la uhaele nokoukuli imua Jesus, kena ime aꞌe, “Kealiꞌi, konaꞌi mai anau.”
26Kena Jesus eme aꞌe, “Sekonu pela anau iko naꞌai nakamaliꞌi la uau aꞌe iꞌai napoi.”
27Ia kehine la eme aꞌe, “Ekonu Kealiꞌi. Ia napoi la elavaa keꞌai namanunu emaoha la, kela nakama hamakua lakou la seꞌai.”
28Kena Jesus eme aꞌe, “Kehakina aꞌoe eivi haeꞌo. Ia kena aꞌoe meꞌike hea aꞌoe hihai na.” Vahola oia, kamaliꞌi la ukaualeꞌa.
Jesus ekonaꞌi komaꞌi nakama
29Jesus ekaꞌa ikaha ma keꞌina la nohaele vakai i kemoana Galilee la. Kena kama la ehaele iluna kemouna nonoho ilaa. 30Kena naonohenua elahi eo aꞌe i aia. Nakama la ehakaꞌi nakama alemaka seni, ia ma nakama kela selavaa kekakala, ia ma nakama nalima epiꞌo. Kena isau nakama navae make, ia ma komaꞌi alakama hoi, nohamoe nakama la imua Jesus. Kena kama la ekonaꞌi nakama la hakoa nokaualeꞌa. 31Keonohenua la umasalo haeꞌo pela nakama selavaa kekakala la ukakala. Nakama nalima epiꞌo la ukonu. Ia nakama navae nimake la uhahaele, ia nakama naꞌalemaka lakou niseni la uꞌike muli. Kena iko nakama la hakoa ihamaha i Keakua kela ehamakua Israel.
Jesus ehanai hasimaka nakama
(Mrk 8.1-10)
32Jesus eanaa aꞌe nakama kaukali aia la, kena ime aꞌe, “Anau ealoha keonohenua nei, maikinimea nakama nei enoho manau koukolu aho, ia seisi naꞌai lakou meꞌai. Anau sehihai ihaunalia nakama hiꞌai la ikaha. Aoki alakama meponia nosina i keala.”
33Nakama kaukali Jesus eme aꞌe kama la, “Kakou umao haeꞌo ikaha ma namakaꞌina la, ia nakama la ekomaꞌi lo. Kakou meiko nahalaoa ihee, ikau ma kehanai keonohenua elahi nei?”
34Kena Jesus eme aꞌe, “Ehia nahalaoa okou eisi?” Nakama la eme aꞌe, “Kakou eisi kauhiku nahalaoa ma nikamaiꞌa.”
35Kena Jesus eme aꞌe keonohenua la inoho ilalo. 36Kena kama la eko kauhiku nahalaoa la ma nakamaiꞌa la, kena ihamaha Keakua. Kena Jesus ukohikohi nahalaoa la, iau aꞌe nakama kaukali aia la, ivavae aꞌe i keonohenua la. 37Nakama la hakoa eꞌai nopohu. Kena nakama kaukali la uhaele hanaopo nohao kauhiku naꞌeke namuli halaoa ekoe. 38Keꞌoina nakama eꞌai la ekae pela hasimaka nakanaka. Ia nahine, ia ma nakamaliꞌi lakou la eꞌai hoi.
39Jesus eme aꞌe keonohenua la ikaꞌa veihale, kena iꞌae kemonoui la nohulo i keꞌina kapili Magadan.
Terpilih Sekarang Ini:
Matthew 15: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
