Luke 5
5
Peter, James ia ma John ekaukali Jesus
(Mat 4.18-22; Mrk 1.16-20)
1Kela heaho, Jesus ekuu ikai i kemoana Galilee noaoaꞌo keonohenua la, kena nakama la emumui aꞌe aia, pela ilono nakakala Keakua la. 2Vahola, Jesus uꞌike samonoui kela ekaukau kaunakai. Ia nakama memeiꞌa namonoui la ukuu iho nosolo naupena lakou la. 3Kena iko Jesus iꞌae iluna kemonoui Simon, kena ime aꞌe kama la ihanuu kemonoui la ikaha ma kaunakai. Kena Jesus enoho iluna kemonoui la noaoaꞌo keonohenua la.
4Keualoko Jesus nikakala nooki, kama la ume aꞌe Simon, “Hanuu kemonoui nei i keꞌina enoko la, kena upehi keupena aꞌoe na ma sehiiꞌa ekau.”
5Ia Simon ume aꞌe, “Kealiꞌi, kepo la hakoa makou pupui ma ikau niiꞌa, ia sehiiꞌa ekau. Ia poi aꞌoe me mai ipehi keupena nei, anau amepehi.”
6Keualoko nakama la upehi keupena lakou la, komaꞌi naiꞌa ekau iloko keupena la, nokapili masae. 7Kena nakama la ehaiauna aꞌe nasoa lakou iloko kelaa monoui io aꞌe nokonaꞌi lakou. Ko nasoa nakama la iuka naiꞌa la iluna namonoui la nopii, kapili iapulu.
8-9Simon Peter ia ma nakama memeiꞌa la hakoa umasalo kela naiꞌa lakou nipui la. Peter uꞌike naiꞌa la hakoa, kena ikoukuli imua Jesus nome aꞌe, “Haele ikaha manau, Kealiꞌi. Anau hekama haisala.” 10James laua ma John nakamakane kela Zebedee umasalo hoi. (James laua ma John nisoa laoi a Peter.) Ko Jesus ime aꞌe Peter, “Aꞌoe isemakaꞌu. Imuli, aꞌoe memamakau nakama.”
11Kena iko nakama la isolo aꞌe namonoui lakou la iuka. Vahola, nakama la ekiaꞌi namea lakou la hakoa, kena ikaukali Jesus.
Jesus ekonaꞌi kama lavea
(Mat 8.1-4; Mrk 1.40-45)
12Keualoko Jesus enoho iloko kemakaꞌina la, kela hekama elavea kemahana {leprosi} ehaele aꞌe noꞌike Jesus. Kinokama kama la ehaisanuꞌu hakoa. Kena kama la ekoukuli imua Jesus noainoa aꞌe kama la, “Kealiꞌi, poi aꞌoe eaunahie, aꞌoe ukonaꞌi mai anau ikaualeꞌa.”
13Kena Jesus eapaꞌe kelima aia nokaohi kama la, kena ime aꞌe, “Anau eaunahie kekonaꞌi aꞌoe ikaualeꞌa.” Vahola oia, kemahana {leprosi} la uoki. 14Kena iko Jesus ime aꞌe, “Aꞌoe isekakala aꞌe alakama pela anau ekonaꞌi aꞌoe. Haele nohuli aꞌe kinokama aꞌoe iꞌike kemaakua la, kena uau aꞌe kehamalu aꞌoe la, ikau ma nakama umaakala muli, poi hea Moses nikakala mai, ihuli aꞌe keonohenua la pela aꞌoe ukaualeꞌa.”
15Ia kelono kama la upalalaha naꞌina hakoa. Ia kena komaꞌi nakama uo aꞌe nohalono Jesus, ia nakama lavea la ehihai kama la ikonaꞌi lakou ikaualeꞌa. 16Ia niaina ma Jesus eapikia lo, kama la ehaele kahi i keꞌina kukuaha la noloku.
Kekama navae emake
(Mat 9.1-8; Mrk 2.1-12)
17Kela heaho, Jesus eaoaꞌo keonohenua la. NaFarasi lakou ma nakama polopolo nakuaa enoho ilaa hoi. Nakama la eo mai Jerusalem, ia ma namakaꞌina iloko Galilee laua ma Judea.
Keakua eau aꞌe namahi Jesus ikonaꞌi nakama lavea la. 18Kela hea nakama kemakaꞌina la esau aꞌe kekama navae emake kela emoe iluna kemoena aia la. Nakama la hamamahi isau aꞌe kama la ihamoe imua Jesus. 19Ia komaꞌi nakama umumui aꞌe kama la. Kena nakama la selavaa kesau kama navae emake la iloko hale nokae keꞌina Jesus enoho la. Kena iko nakama la iꞌae iluna nainaꞌi nokalaꞌi, kena ihakele iho kama navae emake la nohamoe imua Jesus.
20Keualoko Jesus uꞌike nakama la, kama la eailoa pela nakama la ehakina i aia, kena ime aꞌe kama navae emake la, “Anau esolo nahaisala aꞌoe la ikaha.”
21Kena nakama polopolo nakuaa ia ma naFarasi la ukakala solakou, “Oai kama nei? Kama nei ekakala poi aia Keakua. Keakua soia elavaa kesolo nahaisala ikaha.”
22Ia Jesus umakino hea nakama la ehakaꞌoko la, kena ime aꞌe, “Aiea okou ehakaꞌoko penaa iloko nahakumanava okou naea? 23Okou ehakaꞌoko pela ehainahie i keme aꞌe kama navae emake la, ‘Anau esolo nahaisala aꞌoe ikaha.’ Ia hainakaa i keme aꞌe kama la, ‘Kuu iluna nohaele.’ 24Kena anau ehuli aku okou pela {kama ekipu kama} eisi namahi aia iloko kemaalama nei i kesolo nahaisala ikaha.”
Kena Jesus eme aꞌe kama navae make la, “Anau eme aku aꞌoe, kuu iluna, ko kemoena aꞌoe na. Aꞌoe uhaele i hale aꞌoe la.”
25Saika la oia, kama la umasiꞌe iluna imua namaisu keonohenua la, kena iko kemoena aia nimoe la, nohaele i hale, kena ihamaha Keakua. 26Keonohenua la hakoa umasalo haeꞌo, kena ihamaha Keakua hoi, kena ime aꞌe, “Makou eꞌike namea kaualeꞌa keaho nei.”
Jesus eanaa aꞌe Levi ikaukali aia
(Mat 9.9-13; Mrk 2.13-17)
27Kena Jesus uhaele ikaha ma kehale la noꞌike kama aoao na{kakisi} emale ma Levi. Kama la enoho iloko keꞌina aoao na{kakisi} la. Kena Jesus ume aꞌe kama la, “Kaukali mai anau.” 28Ko Levi imasiꞌe iluna, kiaꞌi naheaꞌu aia la hakoa, kena ikaukali Jesus.
29Kena Levi epena keꞌai elahi iloko kehale aia. Ia komaꞌi nakama aoao na{kakisi}, ia ma alakama hoi enoho ilaa noꞌai. 30Kena naFarasi la ia ma nakama polopolo nakuaa la ehai aꞌe nakama kaukali Jesus la, “Aiea okou eꞌai ma nakama aoao na{kakisi} lakou ma nakama haisala laea?”
31Ia Jesus eme aꞌe nakama la, “Nakama selavea la meseo nomaka ke{tresa}. Kena nakama lavea la hihai io nomaka ke{tresa} la. 32Anau sehamai noanaa nakama kela ehakaꞌoko pela lakou ekonu kahi la. Emeia anau ehamai noanaa nakama kela eailoa pela lakou ehaisala la, ikiꞌe ikaha ma nahaisala lakou la.”
Keaoaꞌo Jesus vahonei
(Mat 9.14-17; Mrk 2.18-22)
33Ko nakama la ime aꞌe Jesus, “Nakama kaukali John la ehasese hiꞌai, ia eloku kahi, ehau poi nakama kaukali naFarasi la. Ia nakama kaukali aꞌoe la eꞌai, ia eunu oia.”
34Kena Jesus eme aꞌe nakama la, “Nakama ealu mia i keꞌai keꞌavana sekau kealoha kulana kekama hananiu la oinoho ma lakou. 35Ia keualoko alakama meiko kama hananiu la ikaha ma lakou, kena vahola, nakama la meihasese hiꞌai.”
36Kena Jesus eme aꞌe nakama la kakala hulihuli nei, “Sehikama amesae pamalo vahonei ikui kemepamalo vahonei la iluna pamalo kuai. Maikinimea kemepamalo la amemasae ikaha. Pamalo kuai la semau ma pamalo vahonei la.
37“Sehikama euku nahaupu mevale iloko kelo kuai, maikinimea kulana kealeve la mepia, kena kealeve la meihaa kelo kuai la nomahaa, ia kealeve la umanini puamu. 38Ia nahaupu la ekau keuku iloko nalo vahonei. 39Poi hekama eunu kealeve, kama la sehiunu nahaupu la. Kama la meme aꞌe, ‘Kealeve la ekaualeꞌa oia.’ ”
Terpilih Sekarang Ini:
Luke 5: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
