Luke 2
2
Kehanau iho Jesus
1Keualoko la, kela hekama emale ma Augustus o kekuꞌu hananiu i Rome. Kama la ehaunalia nakama heheaꞌu aia la ihamau namale naonohenua aia la hakoa iloko nalauniu {kaumani}, imakino aia keꞌoina nakama hakoa. 2Nakama la ekakaa nalauniu la, keualoko Quirinius nihamakua iloko Syria. 3Ia kena nakama hakoa ekaꞌa i namakaꞌina lakou nihanau la, nohamau namale lakou.
4Kena iko Joseph ihaele ikaha ma Nazareth, kemakaꞌina iloko Galilee, nohaele kemakaꞌina Bethlehem iloko Judea, kemakaꞌina kela David. Maikinimea kama la emamaoha iho i keꞌaha David. 5Joseph laua ma Mary uhanoa iꞌavana, kena koꞌolua la uo nohamau namale laua. Mary uhaikama, 6ia kena keualoko koꞌolua la ninoho i Bethlehem, Mary emamaoha, 7kena ihanau kelipou kanaka amaka aia. Mary eꞌahu kamaliꞌi la napamalo, kena ihamoe kamaliꞌi la iloko kama hale namanu*f1* laua enoho la, maikinimea nahale iloko kemakaꞌina la hakoa uꞌapi.
Nakama lolosi na{sipisipi} elono pela Jesus uhanau iho
8Kepo la, alakama enoho iloko napaupaꞌu kapili aꞌe Bethlehem nololosi na{sipisipi} lakou. 9Keualoko la, ke{enselo} Keakua ukuu aꞌe imua nakama la, kena namahi Keakua umasina iluna nakama la. Ia kena nakama la umakaꞌu haeꞌo. 10Ko ke{enselo} la ime aꞌe nakama la, “Okou isemakaꞌu, maikinimea anau ehamai nokakala aku kelono kaualeꞌa. Nakama hakoa kela elono nakakala nei meihihia lo. 11Keaho nei, Kealiꞌi okou la uhanau iho iloko Bethlehem, kemakaꞌina David. Kama la o keMesaea, kama kela meikonaꞌi okou. 12Ia okou meilave kememea la emoe iloko kama hale namanu, eꞌahu napamalo.”
13Vahola oia, komaꞌi na{enselo} kevaelani usuꞌui aꞌe ma ke{enselo} la nohamaha Keakua penei,
14“Makou ehamaha i aꞌoe Keakua i kevaelani.
Nakama kela aꞌoe hihai i kemaalama nei la meinoho laoi.”
15Kena iko na{enselo} la ikiaꞌi nakama lolosi namanu la, kena ivaꞌai muli i kevaelani. Ko nakama la ikakala solakou ma, “Kakou ikaꞌa Bethlehem nomaka kememea kela Keakua nikakala mai kakou la.”
16Kena iko nakama la ihakekele nokaꞌa ma iꞌike Mary laua ma Joseph, ma kememea kela emoe iloko kama hale namanu la. 17Ia keualoko nakama la niꞌike kememea la, nakama la uhaele kakala aꞌe nakama iloko kemakaꞌina la hea na{enselo} la nikakala aꞌe nakipukipu kememea la. 18Ia kulana nakama kemakaꞌina la nilono nakakala nakama lolosi namanu la, nakama la hakoa umasalo. 19Ia Mary eꞌumi semuu nakakala la iloko hakumanava aia. 20Kena iko nakama lolosi namanu la ivaꞌai keꞌina lakou la, kena ihamaha Keakua, maikinimea lakou eꞌike, ia elono namea kela ke{enselo} la nime aꞌe lakou.
21Keualoko kememea la ukae evalu naaho kemakua aia, nakama hamakua la eo aꞌe nohamakino kapukapu kamaliꞌi la. Kena namakua kamaliꞌi la esui kemale kama la Jesus. Kela kemale ke{enselo} la nime aꞌe a Mary, imua kaupu la nihaikama.
Joseph laua ma Mary eau aꞌe Jesus iloko hale kapu imaka Keakua
22Keualoko la, Mary laua ma Joseph uo i Jerusalem nohoꞌi aꞌe namanu imea Mary imakahua i kevahi nakuaa Moses. Kena koꞌolua la uko Jesus hoi nokaꞌa ma laua i hale kapu, iau aꞌe kememea la imaka Kealiꞌi, 23ihalono nakakala kela emau iloko nakuaa Keakua,
“Keualoko kelipou kanaka ehanau iho,
kamaliꞌi na ekapu i namaisu Keakua.”
24Kena Mary laua ma Joseph eau aꞌe nahoꞌi laua ikaukali nakuaa Keakua, “Hoꞌi aꞌe sapunua lupe ma sapunua leꞌia.”
Simeon eꞌike Jesus
25Kela hekama emale ma Simeon enoho i Jerusalem. Kama la ekonu kahi, ia hekama ehakina keloku. Kena Keanana Kapu enoho ma kama la. Kama la ehakina pela Keakua meiau iho kekama ikonaꞌi nakama Israel. 26Keanana Kapu la eme aꞌe Simeon pela Simeon meiꞌike keMesaea la, imua aia meimake. 27Kena Keanana Kapu la uhakaꞌi Simeon iloko hale kapu. Kena Mary laua ma Joseph uko aꞌe Jesus iloko hale kapu la, iau aꞌe kama la imaka Keakua, ikaukali nakuaa lakou imua. 28Kena iko Simeon iapaꞌe nosau kamaliꞌi la, kena ihamaha Keakua penei,
Nunc Dimittis
29“Keakua, anau heheaꞌu maꞌoe.
Ia vahonei aꞌoe esui kesao anau,
poi aꞌoe nikakala mai imua,
Ia anau selavaa kehakekele,
30Maikinimea anau uꞌike kama nei
kela aꞌoe ehaunalia iho ikonaꞌi makou.
31Aꞌoe nakanakana mai avale kama nei
imua namaisu naonohenua hakoa.
32Kama nei ehau poi heahi,
kela ekonaꞌi nakama enoho pouli imakino nakipukipu aꞌoe.
Kena ehamaha keonohenua aꞌoe, nakama Israel.”
33Joseph laua ma Mary umasalo haeꞌo hea Simeon ekakala ia Jesus. 34Kena iko Simeon ihakapu haimakua la, kena ime aꞌe ia Mary, “Komaꞌi nakama Israel meihalono lihu, maikinimea lakou ehakina kamaliꞌi na. Ia nakama la meimasiꞌe iluna ikaha ma kemake. Ia alakama meime aꞌe pela Keakua seau iho kamaliꞌi na. 35Kamaliꞌi na meihaꞌali aꞌe nahakaꞌoko nakama la. Ia aꞌoe meihalono lihu koaloha, ehau poi keiꞌai ekalo iloko hakumanava aꞌoe.”
Anna eꞌike Jesus
36Kela hehine umakua lo emale ma Anna enoho iloko hale kapu la, hekama iloko kemanava Phanuel, iloko haleaina Asher. Ia kehine la ehakae nakakala Keakua iloko kehale kapu la. Imua lo, kehine la enoho ma keꞌavana aia la nokae kauhiku nahekau, 37kena keꞌavana aia la umake. Kena kehine la unoho kaukuaha nokae kipuvalu ma haa nahekau kemakua aia. Keaho ma kepo, Anna enoho iloko hale kapu la iheheaꞌu ma Keakua, sehaele imaka hale. Kama la eloku kahi, ia hasese hiꞌai. 38Saika la, Anna ekuu imua keonohenua la nohamaha Keakua. Nakama la hakoa uhakina pela Keakua meikonaꞌi nakama i Jerusalem. Kena iko Anna ihaꞌali aꞌe nakama la nakipukipu Jesus.
Joseph laua ma Mary uvaꞌai muli kemakaꞌina lakou
39Joseph laua ma Mary uoki kepena namea hakoa kela Keakua nikakala iho iloko nakuaa aia la, kena uvaꞌai muli i Nazareth, kemakaꞌina laua iloko Galilee. 40Kamaliꞌi la usomo nomakua, kena uakamai, maikinimea Keakua elolosi hakaualeꞌa aia.
Jesus iloko hale kapu
41Hekau ma hekau, namakua Jesus ekaꞌa Jerusalem noꞌai keꞌai kePasova. 42Keualoko Jesus ukae sehui ma lua nahekau kemakua aia, kama la elavaa kekaꞌa lakou ma namakua aia la, ikau ma nakipukipu keꞌai kePasova la. 43Keꞌai la uoki, namakua Jesus la uvaꞌai muli kemakaꞌina lakou la, ia semakino pela kama la oinoho i Jerusalem. 44Emeia koꞌolua la ehakaꞌoko ma Jesus eo ma lakou, kena iholau keaho la hakoa. Kena keiahi la, koꞌolua la uo nomaka nahaleaina lakou ma nasoa lakou la nosee kama la, 45ia selave. Kena iko koꞌolua la ivaꞌai muli nosee kama la iloko Jerusalem.
46Kena imuli ekolu naaho, koꞌolua la ulave Jesus iloko hale kapu la, enoho ma naRabai la.*f2* Kama la ehalono nakakala nakama hamakua la, kena ivasisili aꞌe nakama la hoi. 47Ia keualoko nakama la elono kamaliꞌi la esui aꞌe navasili lakou la, nakama la umasalo haeꞌo. 48Ia keualoko namakua Jesus la uꞌike kama la, koꞌolua la umasalo hoi. Kena kina aia la ume aꞌe, “Aꞌoe emea pehe? Maua enanae haeꞌo kesesee aꞌoe.”
49Ia Jesus eme aꞌe, “Olua sekau kesesee anau. Olua namakino avale pela anau amenoho iloko kehale kamana anau nei.” 50Ia koꞌolua la semakino hea kama la eme aꞌe la. 51Kena iko Jesus ivaꞌai muli ma namakua aia la i Nazareth, ia ehalono koꞌolua la. Kina aia la eꞌumi semuu nakakala kamaliꞌi la iloko hakumanava aia. 52Kena Jesus emakua vave, kena eakamai hoi. Keakua ehihai nakipukipu kamaliꞌi la, ehau poi keonohenua la hakoa.
Terpilih Sekarang Ini:
Luke 2: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
