Etenda 25
25
Paulu aa thzekithsiwa mu kuta thza Fesitusi
1Ou kwa pitire mayuwa ahatu ku tunda pa kukuma kwenthzi mu Sesarea, Fesitusi wa kambamine ku thza ku Yerusalema. 2Akuru o mapurisita naendithsi o Majuda a ka kumithsire ku kwenthzi eamba yo na Paulu. 3A rombire Fesitusi ci a wa monithse thsihemo ku ka huthsa Paulu ku Yerusalema, inene kuma a cekire ku mundamena ci a mwipaere mu dikuñwa. 4Unone Fesitusi wa tawire ci: “Paulu po aa nyungiwa mu kamenga ku Sesarea, ni tamba ku hukako. 5Aendithsi enu a thze nange, ngeci ko i di eyi na epithsa, aa twethsa ku ka mu thzekithsera ko kuya.”
6Munyima thzo kwikarano mayuwa mutanu na ahatu nji o dikumi, Fesitusi wa urumukire ku thza ku Sesarea. Diyuwa edi dya randireko, wekarire mu thsipura thsenthzi mu kuta no ku tumina ci Paulu a retiwe. 7Paulu ou a na kumine, Majuda awa a tundire ku Yerusalema a mu thzingurukire no ku mu capa yoingi yoikuru, unone ka twethsire ku monithsa ci ya shemwa.
8Paulu ngou a ciamberire ci: “Kwithsa ethsi na nipithsera murao o Thsijuda nji Tembere, nji ku rwithsa Sesare.”
9Uno honi Fesitusi ko ku fota ku roerithsa Majuda wepurire Paulu ci: “Ene kenge nga o tawa ci tu kambame ku thza ku Yerusalema o ka thzekithsiwereko pa meho ange eyi eamba?”
10Unone Paulu wa ambire ci: “Mu kuta thza Sesare muno ni nemana, mo ni na roera ku ratweriwa. Kwithsa ethsi na ni pithsera Majuda, eci edi o na i cidimukera nawa nowe. 11Ngeci po na nipithsa no ku roera ku paiwa, ka ni kanine ku fa. Uno honi ngeci eyi a ni thzekithsera awa Majuda po kadi ya shemwa, kwithsa oyu na roera ku ni pa mu moko o. Naa cirombera ci a ka ni rature Sesare!”
12Munyima thzo ku i ciyongora no nthzango thzenthzi, Fesitusi ngou a ambire ci: “Pakuninga ci o na cirombera ku thza kwa Sesare, kenge o thza kwa Sesare!”
Paulu pa meho a Agiripa na Berenisi
13Munyima thzo mayuwa oapu, fumu Agiripa na Berenisi a kumine mu Sesarea ku na pa direma kwa Fesitusi. 14Pakuninga ci ekariremo mayuwa oangi, Fesitusi wa ambaurire na fumu Agiripa eamba ya Paulu. Wa ambire ci: “Kwaa di mukwerume kuno oyu naa thsii Felekisi mu kamenga. 15Ou na ni thzi ku Yerusalema, akuru o mapurisita naendithsi o Majuda na ka mu capa eamba no ku ni romba ci ni mu rature. 16Na ni ka wa tongwera ci ko thsithsemwa thso Thsiroma kadi ya ku tawa ku ratura munu o ku shime ku cishikaura o kwa na citanekera noyu mu thzekithsa ci nga a wane thsikati thso ku ciambera keyi a thzekithsiwa. 17Ou na keya kuno nange, ka na ni tamangera, unone mu diyuwa edi dya randireko nekarire mu kuta no ku tumina ci Paulu a retiwe. 18Awa a mu thzekithsa ou emanine ci a ambe, ka mu thzekithserire eamba yoimango eci edi na anekerire. 19Unone kuma a cikanyekire yo mangudi nenthzi keyi yo thsitawo thso neyi yo mukwerume oyu wa fa o dithzina dyo Yesu, oyu a ningire Paulu ci muyumi. 20Na kwangire dyo ku fotithsithsa enu yo kengeyo, ngou na mwipurire ci ngeci kenge nga a tawa ku thza ku Yerusalema ci i ka thzekiwereko. 21Uno honi Paulu ou a ciromberire ci a pakiwe kengeyo mu kamenga ci Sesare a ku tete thsiamba thsenthzi, na tuminine ci a nyungiwe kengeyo shime ou na ku mu tumithsera kwa Sesare.”
22Agiripa ngou a amberire Fesitusi ci: “Naa fota ci nga ni na u ciyuvera oyu mukwerume.”
Aye wa tawire ci: “Peunthza kenge wa ku u ciyuvera.”
23Diyuwa edi dya randireko, Agiripa na Berenisi a keyire o nunaera nene no ku nengena mu diambero naendithsi o mashwarare nakwerume o ku remekiwa omo mu mbongi. Ko thsiraerera thsa Fesitusi, Paulu wa retiwire. 24Ou a na kumine Paulu, Fesitusi wa ambire ci: “Fumu Agiripa namwe mu di muno mwahe, mu na mu mono oyu mukwerume! Majuda wahe ku Yerusalema no kuno ku Sesarea aa ootera ci ka a roerire ku yoya karo. 25Kwithsa ethsi na ni wana ethsi na epithsa thso ku roera ku paiwera munu, unone pakuninga ci naa cirombera ku thza kwa fumu shokuru, na ni hangura ku mu tumithsa ku Roma.
26“Unone kwithsa eyi ni na roera ku ñorera fumu Sesare keyi yoyu mukwerume. Mweyo, ni na mu reta ku kwenu mwahe, nene po kwa fumu Agiripa ci ku hura thzo ku mwipaura ni wane yo ku ñora. 27Inene naa mona ci ka ku roerire ku tumithsa thsinthzinda ko kukana ku ñora eyi na epithsa.”
Terpilih Sekarang Ini:
Etenda 25: mho
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©2023 The Seed Company