Svun Mateo 3
3
Ja' li' yaloj ti lic yal a'yuc sc'op Riox ti Juan j'ac'-ich'vo'e
(Mc 1.1-8; Lc 3.1-9,15-17; Jn 1.19-28)
1C'alal i'ech' xa'ox jayibuc jabile, ti Juan j'ac'-ich'vo'e lic yal a'yuc sc'op Riox ta xocol balamil li' ta Judeae. 2Ja yech iyal chac li'i: «¡Ictaic xa spasel li c'usitic chopole yu'un chlic xa cuentainvanuc ti Rioxe!» ―Xi.
3Ti J'alc'op Isaiase iyalbe ono'ox sc'oplal ti Juane:
«Oy much'u tsots ch-avetaj ta xocol balamil:
Chapanbeic sbe ti Cajvaltique;
tuq'uibtasbeic li sbee.”» —Xi ono'ox.
4Ti Juane jalbil tsatsal cameyo sc'u'. Nucul xchuc xch'ut. Li sve'ele naca cochi' xchi'uc ajapom. 5Ti much'utic tey nacalic ta Jerusalene xchi'uc ti much'utic nacajtic ta sjunlej yosilal li Judeae xchi'uc ti much'utic tey nopol nacajtic ta uc'um Jordane tal ya'iic scotolic c'usi chal ti Juane. 6Ti much'utic iyalic ta jamal li smulique, i'ac'bat yich'ic vo' ta uc'um Jordán yu'un ti Juane.
7C'alal iyil ti Juane ti tey c'ot sc'anic ich'vo' epal jfariseoetic xchi'uc jsaduceoetique, yech iyalbe chac li'i: «¡Li vo'oxuque ja' achi'ilic li quiletel chonetique! ¿Much'u yalbeic ti chacolic ta tsatsal castico ti ta xtale? 8Ac'o vinajuc ta acuxlejalic ti mi ta melel asutesoj avo'onic ta stojol ti cajvaltique, 9mu me xanopic yech chac li'i: “Ja' jmuc'tatoticotic ti Abrahame”; yech'o un chicuxioticotic onox ta sbatel osil uc”, mu me xachiic. Ta melel chacalbeic, ti Rioxe xu' tsc'atajes ta smom Abraham li tonetic li'i. 10Tombil xa yeq'uelal ta yoc li te'etique yu'un chboje loq'uel scotol c'alal to yisim. Scotol li te'etic ti bu chopolic sate, chich' bojel, chich' chiq'uel. 11Li vo'one ja' no'ox chacac'be avich'ic vo' scuenta cha sutes o avo'onic. Yan li much'u ts'acal to ta xtale, más oy syu'el. Li vo'one mi ja'uc slicbel xonob, mu xitun o. Li stuque ja' chayac'be achi'inic ti Ch'ul Espiritue ti co'ol xchi'uc c'oq'ue. 12Ja' no'ox yech noxtoc li sjic'aobil trigoe tey xa stomoj ta sc'ob, ta xch'ubabe lec yav li smajobil strigoe. Li strigoe ta xch'ol ta stenal; li yoctaque ta xchic' ta c'oc yo' bu mu xtup' o taj jmoje.» —X'utatic yu'un ti Juane.
Ja' li' yaloj ti iyich' vo' ti Jesuse
(Mc 1.9-11; Lc 3.21-22)
13Ti c'alal yolel chac' ich' vo' ti Juane, ja'o iloc' tal ta Galilea ti Jesuse, tey ic'ot ta uc'um Jordán yu'un tsc'an ti ch-ac'bat yich' vo' yu'un ti Juane. 14Ti Juane mu ox sc'an xac'be yich' vo' ti Jesuse, xi iyalbee:
—Vo'ot chavac'bon quich' vo' ti yechuque, ma'uc yech smelol ti vo'on chacac'be avich' vo'e, ―xi ti Juane.
15Itac'av ti Jesuse:
—Taje mu to c'u jtu'untic, lavie ja' jts'acubtastic scotol ti c'usi tsc'an ti Rioxe. ―Xi ti Jesuse.
Yech'o un ti Juane ixch'un. 16Ti c'alal laj yich' vo' ti Jesuse, iloc' ta uc'um. Ja'o ijam li vinajele. Iyil iyal tal ti Ch'ul Espiritu yu'un ti Rioxe, tey ic'ot ta stojol. Co'ol xchi'uc paloma yilel. 17Ja'o oy much'u ic'opoj tal ta vinajel: «Li'i ja' Jch'amal, jc'anoj tajmec. Jun co'on yu'un.» ―Xi.
Terpilih Sekarang Ini:
Svun Mateo 3: LeqAC
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Sociedad Biblica de Mexico AC
