Madiu 5
5
Yesumi mo su runduna piri angele walisaya ei
1-2Gupuma Yesumi mo wenaalinu andapu andoma mo su runduna opasiaoma pua pirisaya. Gupisayandare nipuna kou nane raluaisimiya alinu epa piru kopali ainyalomare Yesumi nimu para angele mongeriaisaya.
Yesumi mo alinumi raname komale eina angele gurupa walisaya
(Luka 6:20-23)
3Godena aunu nimuna rupara waru na-rumbilia kone suaeme repaame raname komena. Go wenaaliri Godena Yaa Nane Wia Ki Rambuao-aya Ei nimuna ei.
4Koma suaeme mandana wenaalimi raname komena. Godeme nimuna pu konenu ma-puri palalia.
5Kuma pu-ao-aeme wenaalimi raname komena. Nimumi Godeme gula lea alenu milimi.
6Mendame enda reame komala ara pange ipa nala pia rupa Godeme paliminya kone suaya aunu puaeme repaame raname komena. Godeme nimuna rana pi aunu palia.
7Menda menda repara epepe aunu puma yarame kome aunu puaeme repaame raname komena. Godeme nimu repara pange yarame komelea.
8Godena aunu pape eina komea raname komo-aeme repaame raname komena. Nimuri Gode andeleme.
9Kuma pi rupa ao-paduameyanda ma-paliao aeme repaame raname komena. Godeme go repaa nipuna si wanenu dea.
10Godena rana pi aunu pimi eina rendaa midame alinumi raname komena. Go wenaaliri Godena Yaa Nane Wia Ki Rambuao-aya Ei nimuna ei.
11Nimi nina kou nane ralemenda nimi repara yayapi angele loma pange ewaisa pi angele loma rendaa guaeme repaa nimimi raname komalepape. 12Nimimi ora raname waru komalepape. Akepeare nimina yangi ora andaai Epeni nane wia.
Ambalande poropedi alinu pange go rupa rendaa alisimiya rupa pimili.
Aipa pange paa pi ei laapo mandana ape ei
(Maka 9:50; Luka 14:34-35)
13Gupuma Yesumi nimu para lalore, Nimiri go suna aipa mandana aeme, lisaya. Go aipa kodeandare wala na-ma-epealimi. Go aipare ora kodeandare wenaalimi kama nane rumbelemendare gore wenaalinumi rambua rambua pilimi, lisaya.
14Gupuma nimiri suna wenaali raayo para paa pi ei alape wenaali mandana aeme, lisaya. Wenaali mendame andaa anda kana rumuna edeandare go andaa andare kundiri pape-na-ya, lisaya. 15Ali mendame lamepa keoma kopo andaloma siape-na-ya. Go au pula pea rupare nipumi mo lamepa keo suaya lena keo siapeya. Mo lamepame paa piliandare mo anda para pimi wenaalinu raayo paa adea. 16Gupuma nimina paa pi ei pa waru pinya dapape lisaya. Go au pimi einu andenaya pange nimumi nimina epe au pimi einu andala ara nimina Apa yaa nane aya Godena bi minyasiada ara mo keo siaeme lamepa paa pia rupa nimina lamepa wenaali para paa waru alena dapape, lisaya.
Godena Rudule Angele Lea Ei walisaya ei
17Gupuma Yesu nipumi wala lalore, Nimi raayome neme go Mosesi nipumi Rudule Angele Lea Ei pange mo Godena poropedi alinumi mongeriaisimiya einu mupaluame na-epawa. Nimi para Godena angele ma-ana paluame epawa, lisaya. 18Pangalepa, neme nimi para ora angele lalo, go su yaa laapo pa ainyaloma mo Rudule Angele raayore yokape-na-ya. Go einare go su yaa laapo diadea dinare monde Godena Rudule Angelere peredea lisaya. 19Go einare ali apimi mo Rudule Angele raayo pangoma pualiapare enge Rudule Angele komea na-pangeleandare wenaali menda para go Rudule Angele na-pi ei rupa wadeandare gore nipumi Godena Yaa Nane Wia Ki Rambuao-aya Ei rupara onge ali alia, lisaya. Go einare ali menda apimi mo Rudule Angele pangoma pula ara wenaali menda para nipuna angele pangoma puaya rupa wadeandare go aliri so Godena Yaa Nane Wia Ki Rambuao-aya Ei rupara andaa ali alia, lisaya. 20Go einare pangalepae. Neme nimi para ora angele lalo. Nimimi mo Rudule Angele waloae alinu pange mo Parisi alinumi Gode nipuna rana pea ei para puaeme eiri angula pilimindare mo Godena Yaa Nane Wia Ki Rambuao-aya Ei ora andeleme, lisaya.
Wenaalina rono pange eina angele lisaya ei
21Go ei loma Yesumi gupi laya. Ambalande nimina kasuanu para Rudule Angele gurupa lea. Neme wena o ali menda na-lu komape, lea. Wena o ali mendame go au piliandare angele yokanali pulame karu pelea, loma lisaya. 22Go angele pangamepare ambia gosi neme nimi para angele rando rando lalo. Ali apimi nipuna ame para rono pangeleandare gore angele yokanali pulame karu pelea, lisaya. Ali menda apimi nipuna ame para lalore, Neere keyada ali ale deandare mo kalesoro alinu para ma-pelea, lisaya. Gurupa pange ali menda apimi nipuna ame para lalore, Neere kalu kole keyali deandare pa marea go ali nipuri repana lengaa roaya lena pelea, lisaya.
23-24Neeme Gode repara alinau pulame nipuna alinau puaeme pereaya lena repara ara nena ameme nee rapu rono pange ei kone wilindare gore nena alinau pulame pili ale mo aloda lee wilina siape. Gupuma rana komeasi puma nena ame rapu yanda paluma wala Gode repara nena adoame paaende ale epa alape.
25Gupuma ali mendame nee para angele yokanali pulame nee karu peleandare niipimi mo angele yokanali puae anda para ambe na-pelependare mo alina kone naare pa wia dina ma-lekeyape. Niipi laapome mo angele yokanali puae anda para pelependare go nena yanda runguli alimi nee mo angele yokanali puaeya ei pangoaya ali para ada, lisaya. Go einare mo angele yokanali pi ei pangoaya alimi nee wala mo endali ripinyi alinu para puama adeandare nimumiri nee dipula anda para ma-lopalimi lisaya. 26Gupuma neme nimi para ora angele lalo, neere go nena amenuna muni yangi raayo mo nena yanda runguli alinu para ambe na-ale eina loma neere mo dipula anda rupara naare raayo pa piruali lisaya.
Repaaya aepe ei ma-koyademe eina angele lea ei
27Gupuma Yesumi lalore, Nimimi go angele ambala pangamende, lisaya. Neme ali mendana wena pake na-nape, lisaya. 28Gurupa angele pangamepare ambia gosi neme nimi para mana angele menda lalo, lisaya. Ali apimi wena menda andoma pake nawe kone wiliandare gore nipumi go wenare nipuna kone para gole pake nala, lisaya. 29Go einare nena popeke nane leeme koae aunu ma-paluame piliare ambe yoko rumbape, lisaya. Neeme nena do mendane einu raayo yoko rumbelendare nena do raayome repana roaya nane na-ma-pelea lisaya. 30Go rupa nena popeke nane kimi koae aunu ma-paluame piliare gore ambe rungulu rumbape, lisaya. Go peapare nena do mendane einu alu paliandare gore nena do raayo go repana roaya nane na-pelea. Go peapare nena do sese punu kone wilindare gore nena do raayo repana ralae para pelea.
Alinumi wena gialuame rapo aeme eina angele lea ei
(Madiu 19:9; Maka 10:11-12; Luka 16:18)
31Gupuma Yesumi lalore, Ambaisenande ali mendame gurupa lea, lisaya. Ali apimi nipuna wena gialuame rapelendare gore nipuna wena para wape ambala puma aloma gi-ainyaloma lea, lisaya. 32Go peapare ambia nemere gupi lalo. Ali mendame were pake na-nenayapare gole gialiandare gore go alimi go au pia. Mo wename ali mendana anda peleandare gore mo nipuna ririna alimi go ali rapu pake ma-nada.
Wili mandaa mida eina angele lea ei
33Yesumi lalore, Go eiri nimimi ambala Rudule Angele menda pangamende, lisaya. Go rupa lalore, Nena la wi angele kone na-rungulape neeme Realina bi loma angele lale eiri ora pape loma lisaya. 34-35Go peapare ambia neme gupi lalo. Wili mandaa angele menda lalo ara yaa para masu na-lape. Akepeare go parare Gode aya andasuyale. Go su para masu pi na-lape. Akepeare go parare Gode nipuna ange lopaoma liru mida parayale. Diurusaleme andasu masu pi na-lo pipape. Akepeare go parare ande andaa Kini Alina ree andayale. 36Nena kalu masu ora lalo na-dapape. Akepeare nena kaluna aya iri menda yaako o busu na-ma-pali. 37Neemere E o Dia pi komea lape. Akepeare neeme de angele mendare koae remo repara piruma ipula.
Koae koae aunu pi ei wala ambuda ei
(Luka 6:29-30)
38Yesumi wenaali para lalore, Ambalande nimimi pangamende angele gurupa lea. Wena o ali mendame nena lee ma-koyaliandare gore neeme nipuna lee ma-koyape, lea, lisaya. Angele mendare gurupa lea. Wena o ali mendame nena angaa ma-koyaliandare gore neeme pange nipuna angaa ma-koyape, lea, lisaya.
39Go ambaisena angele laapore nimimi pangoma kone wimipare neme nimi para angele menda gurupa wadoa. Wena o ali mendame nee para rono pangala ara koae koae au piliandare neeme wala go wena o ali para yangi wala na-liiape, loma lisaya. Wala mo wena o ali mendame nee para ipuma nena popeke nane paena nipuna kimi diandare neeme wala yangi na-liiape. Nipumi nena koya nane pae pange liinya lape loma lisaya. 40Gupuma wena o ali mendame nena aka muma minyayanda nee angele yokanali puae anda para karu peleandare neeme nipu para nena kupa aka pange pakama alape, lisaya. 41Go peapare ali mendame lalore, Nee para nina ale menda ma-riaoma puri paloma nee para rundu pora maili mandana pu deandare gore neeme puri paloma maili laapo pa porana pope, lisaya. 42Gupuma wenaali mendame alenda menda nipu para alainyaloma epa konge deandare neeme nipu para alape, lisaya. Gupuma wena o ali mendame alenda menda nee para rundu menda mulame deandare gore neeme nipu para rundu ora alape, lisaya.
Yanda runguli alinu para pumi komala ei
(Luka 6:27-28,32-36)
43Ambalande angele gurupa lea. Neeme nena amesinu go reesi para aeme alinu para nimina pumi raname waru komalepape, lisaya. Nimimi nimina yanda runguli repaa alinu para rono pangoma gimi komea au pipape, loma lisaya. 44Nimimi go angele pangamepare ambia gosi neme nimi para angele rando menda lalo. Nimimi nimina yanda runguli wenaalinu para pumi komala ara komea pi lala ara nimina Apa yaa nane aya Gode para komea yainya pala pipape, lisaya. 45Gupilimindare nimina yaa nane aya Godena naki nongonu alimi e, lisaya. Gurupa nipumi nipuna epe naareme koae wenaali pange epe wenaali para pange naarenu ma-epao pange yai pange ma-epao-aya mo yai mo epe au pimi wenaali para pange mo koae au pimi wenaali para pange ma-epao-aya lisaya. 46Go peapare nimimi nimi para pumi komeleme anda ruru para komea pumi komala ara mo pa wenaalinu menda para pumi na-komelemendare gore Godeme nimi para akipi nonopi yangi giliapae, lisaya. Mo dakisi muni muaisimiya alinumi pange go aunu go rupa puaeme lisaya. 47Gupuma nimimi nimina amenu para ranae angele demendare gore nimimi mo wenaalinu menda lombai palimi, lisaya. Go peapare nimimi go angele dame eiri ale menda ree na-wi angele dame, lisaya. Mo Godena angele na-pangele wenaalinumi pange go aunu nimumi gurupa na-puaeme, lisaya. 48Go eiri nimina Apa Gode pange rendepona aya rupa ara alepape, lisaya.
Terpilih Sekarang Ini:
Madiu 5: POLENT23
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
