Mata 20
20
Karabu ata Kǝra Ndzǝr Kǝthlǝr akwa Fwaku ni
1“Kuhyikur nam atahyal ani apa thlakǝr fwaku nam tara lǝba kula-kula mbǝk ka bara ndzi ka dar kǝthlǝr akwa fwakǝrni. 2Sakatǝ tǝ dar tara thlanta kaka ndzǝr kǝthlǝr ni apǝri dzǝ ata nkyǝ tǝ dar dinariyus pathlu-pathlu akwa ɓuktsi, dzǝ ka hyanǝba tǝ dar akwa fwakǝrni.
3“Ata saka mǝdlɛ tsuwɛ dzǝ ka ɓakta lǝba ka wula ndzǝ yar laka ada hyati ata nya kasuku kura dar ada 'ya su. 4Dzǝ gha ala dar, ‘Gǝri yɛ mwaramɛ ka gǝri kǝthlǝr akwa fwakǝrna, ba Yi ata nkyǝ tǝ gǝri kǝlara sǝ nam kal-kal.’ 5Ani dar ka mwari.
“Dzǝ ka lǝba kadamwa apa saka kumɛ kapu sǝɗɛ tsuwɛ kǝrathlǝr tsǝtsi, ba saka makǝr antǝ dzǝ ka dzakti lǝba ka 'ya tsu apani. 6Kudzǝghɛ aka saka ntufu tsuwɛ dzǝ ka ɓakta mwari akwa nya kasuku dzǝ ka ɓui ndzǝ laka ada hyihyati. Dzǝ ka yu tǝ dar, ‘Kami tǝ gǝri ada hyihyati akwani sanga ɓuktsǝr tsǝtsi kura gǝri ada 'ya su?’
7“Dar ka sǝnau, ‘Kadǝbar ndɛ adi tara kǝtǝ tǝ yar ka agǝri wɛ.’
“Dzǝ ka nkǝrɛ ala dar, ‘Gǝri yɛ mwaramɛ akwa fwakǝrna.’
8 #
Fǝr 19:13; Mab 24:15 “Sakatǝ tǝhaku tara 'ya, thlakǝr fwaku ni ka nkǝrɛ ala mǝhyarni, ‘Kǝga ndzǝr kǝthlǝr ni, ka gǝ kyinta tǝ dar, baditsǝni aka ndzǝ nam aghǝli ka si ata kǝra ndzǝ nam tangkǝma.’
9“Ndzǝ nam tara baditsǝni kǝthlǝr ata saka ntufu nda ka si ba kǝlara ndɛ dlutsi dinariyus pathlu-pathlu. 10Ani sakatǝ ndzǝ nam tara baditsǝni kǝthlǝr tangkǝma ni, dar ada tǝmatsǝni apǝri dar ata ɓui hang. Ama kǝlara ndɛ akwa ntsa dar tsuwɛ kǝ dlutsi dinariyus pathlu-pathlu. 11Sakatǝ dar tara dlutsi tǝni, dar baditsǝni whuwhuni ata kǝra thlakǝr fwaku ni. 12Dar ka nkǝrɛ, ‘Ndzǝ yar nam tǝ ndǝ tara kǝl tǝ dar aghǝli ni, dar 'ya kǝthlǝr nǝr awur duku ɗiɗi, ba gǝ ka mǝrti tǝ dar kal-kal kaka yar nam tara sa bwanai tǝ yar 'ya kǝthlǝr tsǝrǝp tsǝtsi.’
13“Ama dzǝ ka sǝnau ala pathlu akwa ntsa dar, ‘Pazi, Yi adai ta 'ya su kura kal-kal ala gǝ wɛ. Gǝ ta lu apǝri gǝ ata 'ya kǝthlǝr akuya ka dinariyus pathlu wɛ? 14Dlu kwapar ngɛ ka gǝ tǝra. Yi ada bara la ndǝ ni nam tǝ Yi kǝlɛ ata dǝnta ni kal-kal aka nǝngɛ. 15Yi adi awa mǝzi ka 'ya sǝ nam tǝ Yi yiɗɛ aka kwaparna wɛ? Kǝna gǝ ada sǝlku kadǝbar tǝ Yi whuya?’
16 #
Mat 19:30; Mar 10:31; Luk 13:30 “Ani nǝr dǝnta ni ata ndzai nǝr tangkǝma, ba nǝr tangkǝma ni ata ndzai nǝr dǝnta.”
Yɛsu Ɓakta Ndǝrɛ ata Kǝra Ntǝrni
(Mar 10:32-34; Luk 18:31-34)
17Sakatǝ Yɛsu kaka ndzǝr nuwurni ata kǝra mwari alǝkwa Ursalima, dzǝ kǝgati ndzǝr nuwurni yarɛ kum kapu sǝɗɛ ni tǝ ngwam dzǝ ka nkǝrɛ ala dar, 18“Nda muri ata mwari alǝkwa Ursalima, ba ndǝ ata ɓǝlai Zǝr Ndɛ ni ala nggar fǝrist yarni ba malǝmǝr mabari yarni. Dar ata thlakǝr alari hakar tsa 19ba dar ata la tǝni ala ndzǝ kura Yahudi ka dar gura tǝni ba dlaɓu tǝni ba ka dar kukwanta tǝni. Ata vǝr nam makǝrkur dzǝ ata hyati aka mpikɛ!”
Kǝgyir Angǝra Madar
(Mar 10:35-45)
20Antǝ angǝra madar Zabadi ka si adzǝ Yɛsu dar kaka madarni, dzǝ ka zǝɗi, tǝ dzǝ ka kǝgyǝ tǝni.
21Yɛsu ka yu, “Sǝr mi tǝ gǝ ada bara?”
Dzǝ ka nkǝrɛ, “Ka gǝ lai ka zǝrǝrna pathlu ni ka dzǝ ndzai tǝbwar tsisǝma gǝ ba ka dukwari ni ndzai tǝbwar tsi aghya gǝ akwa kuhyikur ngɛ.”
22Yɛsu nkǝrɛ ala dar, “Gǝri ta zǝndi sǝ nam tǝ gǝri ada yu wɛ. Gǝri ata mǝzi ka sa akwa kapǝr bwanai nam tǝ Yi ata sa ya?”
Dar ka nkǝrɛ, “Yar ata mǝzi.”
23Yɛsu ka nkǝrɛ ala dar, “Dzǝri gǝri ata mǝzi ka sa akwa kapǝrna, ama nǝr ndzai tǝbwar tsisǝmawai wala tsi aghyawai, adi Yi ani ata la ndǝ wɛ. Vui yarni dar nǝr ndzǝ nam tǝ Babarna tara ɗǝmhǝi.”
24Sakatǝ ndzǝr nuwurni kumɛ ni tara ngati sǝ ǝni, ɗǝfa dar sǝwa ala madar mama sǝɗǝ yarni. 25#Luk 22:25,26Yɛsu kǝgati tǝ dar atakǝmaduku ka nkǝrɛ, “Gǝri zǝndi apǝri kuhyi yarɛ nǝr ndzǝ kura Yahudi ada tsanǝ kuhyikur ata kǝra dar, ba ndzǝ ngganggar dar ada 'ya wada ata kǝra dar. 26#Mat 23:11; Mar 9:35; Luk 22:26Ama nǝgǝri adi ahani wɛ. Ata vuiya ǝni, kǝlara ndǝ nam ada bara ka dzǝ ndzai ngga akwa ntsa gǝri kǝ ndzai ntsakǝr alari ka dzǝ ndzai zǝr kǝi, 27ba kǝlara ndǝ nam ada bara ka dzǝ ndzai tangkǝma kǝ ndzai ntsakǝr ka dzǝ ndzai fali— 28tsu apa tǝ Zǝr Ndɛ ta si akuya ka ndǝ dza 'ya alari kǝthlǝr wɛ, ama ka dzǝ dza 'ya kǝthlǝr ala ndzi, ba ka dzǝ hamnta mpikari akuya ka pǝli ndzǝ hang.”
Sǝli Ghyang Sǝɗɛ kǝ Wula Su
(Mar 10:46-52; Luk 18:35-43)
29Sakatǝ Yɛsu kaka ndzǝr nuwurni angwada tǝra ka ngyar Dzarikau, ndzǝ hang ka nu tǝni. 30Sǝli yar laka ghyang sǝɗɛ ada ndzai ata nya whalɛ, ba sakatǝ tǝ dar tara ngati apǝri Yɛsu angwada kwatsǝni, dar ka haɓǝti kuɗaha ka nkǝrɛ, “Thlaku, Zǝr Dauda, 'ya ala yar kǝtǝrdzi!”
31Hangkur ndzǝ ni ɗǝmnya ka nkǝrɛ ala dar ka dar ndzi kǝɗǝk, ama dar ada dzakti haɓǝti kuɗahu, “Thlaku, Zǝr Dauda, 'ya kǝtǝrdzi ala yar!”
32Yɛsu hyati ka kǝgati tǝ dar. Dzǝ ka yu tǝ dar, “Mǝ tǝ gǝri ada bara ka Yi 'ya ala gǝri?”
33Dar ka sǝnau, “Thlaku, yar ada bara ka ntsa yar mburntadzi.”
34Yɛsu ka 'ya kalhur ala dar dzǝ ka tsǝkwar ntsa dar. Tǝkǝma ntsa dar ka mburntadzi ba dar ka nuti tǝni.
Terpilih Sekarang Ini:
Mata 20: CKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©2023 Seed Company in collaboration with Language Developers and Bible Translators Association
