Mata 18
18
Ndǝ nam Ngga Ta sang akwa Kuhyikur nam Atahyal ni
(Mar 9:33-37; Luk 9:46-48)
1 #
Luk 22:24
Akwa saka nda ndzǝr nu yarni ka si adzǝ Yɛsu ka yuwɛ, “Wa dza ngga ta sang akwa kuhyikur Hyal?”
2Dzǝ ka kǝgati zǝr waza nkyiɗǝ laka ka hyanti tǝni akwa dabwa dar. 3#Mar 10:15; Luk 18:17Antǝ dzǝ ka nkǝrɛ, “Yi ada gha ala gǝri dzǝri, ma gǝri ta palidzi ka gǝri ndzai apa madausai yarni wɛ, gǝri adi ata saga lǝkwa kuhyikur nam atahyal ni wɛ. 4Kadǝbar ǝni, kǝlara ndǝ nam tara tǝrghǝl kǝrari apa zǝr waza ǝni dzǝ ani ngga ta sang akwa kuhyikur nam atahyal.
5“Ba kǝlara ndǝ nam tara dlu zǝr waza apa ǝni akwa thlǝmawai dzǝ dlutsi tǝra. 6Ama ma kǝlara ndǝ nam tara hau duku akwa ntsa waza yarni nam tara mbǝrsa akwa yɛ ka 'ya biku, ata ndzai kudzǝ alari ka ndǝ mbau burɛ nam ngga akwa wuyari ba ka ndǝ ntsǝghǝl tǝni akwa manda nam saɓǝl.
7“Bwasam ala dunya kadǝbar ka sǝ yarɛ nam ada hau ndzǝ akwa biku! Dzǝli sǝ yarni ntsakǝr ata si, ama bwasam ala ndǝ nam ata si atarni! 8#Mat 5:30Ma tsiya gǝ wala thlǝla gǝ ata hau tǝngɛ ka gǝ 'ya biku, thlanta ka gǝ ɗalnta tǝni. Akuya kudzǝ ala gǝ ka gǝ ɓui mpikɛ aka tsiya gǝ duku wala kadal ta ndǝ ta ɗalu tǝngɛ akwa u'u kura kuri aka tsiya gǝ sǝɗɛ wala thlǝla gǝ sǝɗɛ. 9#Mat 5:29Ba ma ntsa gǝ ata hau tǝngɛ ka gǝ 'ya biku, kwaɗǝba tǝni ka gǝ ɗalnta. Akuya kudzǝ ala gǝ ka gǝ ɓui mpikɛ aka ntsǝ duku ta tǝ ndǝ ɗalu tǝngɛ akwa u'u kura kuri aka ntsa gǝ sǝɗɛ.”
Karabu ata Kǝra Tǝma Tara Sa ni
(Luk 15:3-7)
10 #
Luk 19:10
“Ka gǝri 'ya hankal ta gǝri ta rutsǝni wala duku akwa ntsa waza yarni. Akuya Yi ada gha ala gǝri apǝri ndzǝr hyantǝr Hyal atahyal tatang dar ada wula kǝma Bana nam atahyal. [ 11Akuya Zǝr Ndɛ ni kǝ si ka dzǝ bara sǝ nam tara sa ka dzǝ mbati tǝni.]
12“Mǝ ɗǝngar gǝri? Ma ndɛ aka tǝma kumthlani pathlu, ba duku akwa ntsa dar ka sá, dzǝ adi ata ngyar nam mǝdlǝthlani kapu mǝdlǝ ni tsu ata gar yarni ka dzǝ mwari lǝka bara duku nam tara sa ni wɛ? 13Ba ma dzǝ ɓui tǝni, Yi ada gha ala gǝri dzǝri, dzǝ aka kutsari ata kǝra tǝma duku nda ta ata kǝra nam mǝdlǝthlani kapu mǝdlɛ nam kura ta sa ni. 14Tsu apani Tada gǝri nam atahyal adi ada bara ka kǝlara duku akwa ntsa waza yarni ka dzǝ sa wɛ.
Zǝr Mama nam Tara 'Ya Biku ala Gɛ
(Luk 17:3)
15 #
Luk 17:3
“Ma zǝrma 'ya biku ala gǝ, mwari adzǝni ka gǝ tsanti alari aibairiyirni, tsu akwa ɓwanga gǝri sǝɗɛ. Ma dzǝ kǝ sǝthlǝmɛ ala gǝ, zǝrma ni kǝ ndzai ɗuru ala gǝ. 16#Mab 19:15Ama ma dzǝ ta sǝthlǝmɛ ala gǝ wɛ, ka gǝ kǝtǝ ndǝ pathlu wala ndzǝ sǝɗɛ ka gǝri mwari adzǝni, ani ka ‘kǝlara ndǝrɛ ka ndǝ ngati atar sakǝida ni nǝr ndzǝ sǝɗɛ wala ndzǝ makǝr.’ 17Ma dzǝ ngǝla sǝthlǝmɛ ala dar, ka gǝ ghaba ala ikǝlizǝya; ba ma dzǝ ngǝla sǝthlǝmɛ wala ala ikǝlizǝya, ka gǝ mǝrti tǝni apa ndǝ kura ta zǝndi Hyal wala ndǝr dlu tsǝmɛ.
18 #
Mat 16:19; Yaw 20:23 “Yi ada gha ala gǝ dzǝri, kǝlara sǝ nam tǝ gǝ mbwai akwa dunya ata ndzai mbwa-mbwa atahyal, ba kǝlara sǝ nam tǝ gǝ mpǝlnta akwa dunya ata ndzai mpǝlmpǝli atahyal.
19“Kadamwa, Yi ada gha ala gǝri apǝri ma ndzǝ sǝɗɛ akwa ntsa gǝri akwa dunya tara mbwai ata kǝra kǝlara sǝ nam tǝ dar kǝgyɛ, ndǝ ata 'yati ala dar atar Bana nam atahyal. 20Akuya vui tǝ ndzǝ sǝɗɛ wala makǝr tara tsaɓtsǝnidzi atakǝmaduku akwa thlǝmawai, Yi akwa ntsa dar akwanda.”
Karabu ata Kǝra Zǝr Kǝi nam Kura aka Kǝtǝrdzi ni
21 #
Luk 17:3,4 Antǝ Bitrusu ka si adzǝ Yɛsu ka yu tǝni apǝri, “Thlaku, ka yiɗau tǝ Yi awa kyifǝnta ala zǝr mana ma dzǝ 'ya alai biku? Har ka murfwɛ ya?”
22 #
Bad 4:24
Yɛsu ka nkǝrɛ alari, “Yi ada gha ala gǝ, adi ka murfwɛ ɗiɗi wɛ, ama ka murfuthlani ka murfwɛ.
23“Kadǝbar ǝni, kuhyikur nam atahyal ni ani apa kuhyi laka nam ada bara tsǝgaba gǝnarni akwa tsiya madar kǝiyirni. 24Sakatǝ dzǝ tara baditsǝni tsɛ, ndǝ ka si alari aka ndǝ nam aka kimbǝlǝr ni nam kura dzǝ awa mǝzi ka kyinta pǝrta. 25Tǝng tǝ dzǝ adi ata mǝzi kyinta kimbǝl ni wɛ, thlakǝrni ka tsau apǝri dza ba mwalarni ba madarni ba sanga sǝ nam tǝ dzǝ akǝri ka ndǝ ɗǝlnta ka dzǝ kyinta kimbǝl ni.
26“Ama zǝr kǝi ni ka zǝɗi aka ɓungyɛ akǝma thlakǝrni ni. Ada kǝgyǝ tǝni apǝri, ‘Thlaku kǝtǝ kǝmar alai, ba Yi ata siya kyinta ala gǝ sanga su.’ 27Thlakǝr zǝr kǝi ni ka 'ya alari kalhur, dzǝ ka yafutsǝni alari kimbǝl ni, dzǝ ka ngyar tǝni ka tǝra.
28“Ama sakatǝ zǝr kǝi nda ka tǝra alǝba, dzǝ ka lǝka ɓui zǝr kǝi kǝmaní, nam tǝ dzǝ ada nu tǝni kimbǝl laka nkyiɗǝ laka. Dzǝ ka tsǝkumti wuyari ka nkǝrɛ alari, ‘Kyinta alai kimbǝlǝrna nam ata kǝra gǝ ni.’
29“Antǝ zǝr kǝi kǝmani ni ka zǝɗi aka ɓungyɛ akǝmari ka kǝgyǝ tǝni apǝri, ‘Kǝtǝ kǝmar alai, Yi ata siya kyinta ala gǝ.’
30“Ama dzǝ ka ngǝla. Ata vuiya ǝni, dzǝ ka mwari aka dza akwa fǝrsǝna tar ma dzǝ kyinta alari kimbǝlǝr ni. 31Sakatǝ zǝr kǝi damwa nda tara wula sǝ nam tara 'ya, ɗǝfa dar ka sǝwa kulɗa ba ka mwari ka gha ala thlakǝr dar sanga sǝ nam tara 'ya.
32“Antǝ thlaku ni ka kǝgati zǝr kǝi ni. Dzǝ ka nkǝrɛ alari, ‘Gɛ zǝr kǝi nam kǝmangar! Yi yafutsǝni ala gǝ sanga kimbǝlǝrna nam ata kǝra gǝ kadǝbar gǝ kǝgyǝ tǝra. 33Gɛ adi ata 'ya kǝtǝrdzi ala zǝr kǝi kǝma ngɛ tsu apa tǝ Yi tara 'ya ala gǝ wɛ?’ 34Ɗǝfa thlakǝrni ni ka sǝwa aka dǝna dzǝ ka la tǝni ala ndzǝr fǝrsǝna ka ndǝ mbwai tǝni ka dar lar bwanai, tar ma dzǝ kyinta sanga kimbǝl nam ata kǝrari ni.
35“Əni ani whal nam tǝ Bana nam atahyal ata 'ya ala kǝlara ndɛ akwa ntsa gǝri tar ma gǝri yafutsǝni ala zǝr mama gǝri nam akwa ɗǝfa gǝri.”
Terpilih Sekarang Ini:
Mata 18: CKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©2023 Seed Company in collaboration with Language Developers and Bible Translators Association
