Mata 12
12
Thlakǝr Vǝr Ghǝrbadzi ni
(Mar 2:23-28; Luk 6:1-6)
1 #
Mab 23:25
Akwa saka ǝnda Yɛsu mwari ka ɓǝlba ata fwakǝr uhyi yarɛ vǝr Sǝbdu ni nam tǝ ani Vǝr Ghǝrbadzi. Ndzǝr nuwurni yarɛ ada nga mi, ba dar ka baditsǝni ɓǝgǝl laka zangamǝr uhyi ka sǝmtɛ ka ɗɛ. 2Sakatǝ ndzǝr Farisi tara wula ǝni, dar nkǝrɛ ala Yɛsu, “Wulɛ! Ndzǝr nuwur ngɛ ada 'ya sǝ nam tǝ mabari kanti ta ndǝ ta 'ya ata vǝr Sǝbdu ni.”
3 #
1Sam 21:1-6
Yɛsu ka sǝnau ala dar, “Gǝri ta ghyǝngaba sǝ nam tǝ Dauda tara 'ya sakatǝ dzǝ kaka ndzǝ nam adzǝni tara nga mi? 4#Fǝr 24:9Dzǝ lǝkwa fǝr Hyal, kaka ndzǝ nam adzǝni ka sǝnya mantsǝkǝl nam tǝ ndǝ tara la Hyal, wala ta ndzai kal-kal ala mabari ka dar sǝmɛ wɛ, ama ɗiɗi ala ndzǝr kǝdlǝr sǝr Hyal. 5#Tsǝ 28:9,10Kǝna gǝri ta zǝndi akwa Mabari Musa apǝri ata vǝr Sǝbdu fǝrist akwa fǝr Hyal dar ɓǝlti vǝr nda ba dar ka ndzai kura biku wɛ? 6Yi ada gha ala gǝri apǝri, ndza ndǝ nam tara ngǝmba fǝr Hyal aka nggakur adai akwani. 7#Mat 9:13; Hau 6:6Ma gǝri dza zǝndi sǝ nam tǝ ndǝr yarɛ ni ada nkǝrɛ, ‘Kǝtǝrdzi ani tǝ Yi ada bara, adi kǝdlǝrsu wɛ,’ gǝri adi ata ntsani ndzi kura aka biku wɛ. 8Akuya Zǝr Ndɛ ni ani Thlaku nǝr vǝr Sǝbdu ni.”
9Antǝ Yɛsu kǝ hyati akwanda ka lǝkwa fǝr vǝkǝr sǝlaiyir dar, 10antǝ ndza ndǝ laka adai nam tǝ tsiyari satǝdzi. Antǝ ndzǝ laka adai akwanda nam ada bara ka dar bǝrkutsǝni Yɛsu ata kǝra 'ya sǝ nam kulɗa, antǝ dar yu tǝni apǝri, “Kǝ ndzai kal-kal akwa Mabari ka ndǝ mbǝti ndɛ akwa vǝr Sǝbdu ya?”
11 #
Luk 14:5
Yɛsu gha ala dar, “Wa akwa ntsa gǝri ma tǝmarni ɗu akwa kau dzǝgam akwa vǝr Sǝbdu kura dzǝ ata kǝlba tǝni? 12Ai ndǝ ngǝmba tǝma aka ɗakur. Akuya ǝni kǝ ndzai kal-kal akwa mabari ka ndǝ 'ya sǝ nam ɗaku akwa vǝr Sǝbdu.”
13Antǝ dzǝ ka nkǝrɛ ala ndǝ ni, “Murar tsiya gǝ.” Ani dzǝ ka murar tsiyari tǝ tsiyari ka dzakti ndzai kalang ga damwa tsu apa nam dukwari ni. 14Ama ndzǝr Farisi tǝra lǝba ka mwara ɗǝmhǝi dabari ata kǝrari apǝri ka dar tsi tǝni.
Hyal Tsarba Zǝr Kǝi
15Akuya tǝ Yɛsu tara zǝndi ndǝr nam tǝ dar tara ɗǝmhǝi ata kǝrari, antǝ dza ka tǝra ka ngyar vui nda. Ndzǝ hang ka nuti tǝni, ba dzǝ ka mbǝti sanga ndzǝ nam kura kalang. 16Ama dzǝ ka tsau ala dar apǝri ta dar ta gha ala ndzi damwa ata kǝrari mai. 17Əni akuya ka ghǝiyabadzi sǝ nam tǝ Hyal tara gha atar nabi Isaya:
18 #
Isa 42:1-4
“Ndza zǝr kǝiyirna nam tǝ Yi tsarba,
ndǝ nam tǝ Yi yiɗɛ, ndǝ nam tǝ Yi ada nga sǝɗarni;
Yi ata pukǝr Mambǝlǝrna ata kǝrari,
ba dzǝ ata siya nkǝrba hakarna nam dzǝri ala ndzǝ kura Yahudi.
19Dzǝ adi ata ɓwalnya wala 'ya ndǝr nam dzau wɛ;
ndǝ adi ata ngati kuɗahari ata kǝra whal wɛ.
20Kusar yiɗa-yiɗa má dzǝ adi ata ɓǝlnta wɛ,
pitǝla nam tara 'ya kudzǝghɛ aka nti ma, dzǝ adi ata padi wɛ,
tar ma dzǝ hau tǝ kal-kal sǝmkǝr.
21Akwa thlǝmari ani tǝ ndzǝ kura Yahudi ata hau tǝmatsǝniyir dar.”
Yɛsu ba Bɛlzǝbul
(Mar 3:20-30; Luk 11:14-23)
22Antǝ dar ka si alari aka ndǝ laka nam aka mambǝl nam kulɗa nam tǝ dzǝ ghyang ba ndǝl-ndǝl kanyar, ba Yɛsu ka mbǝti tǝni, ani ka dzǝ mǝzi ndǝrɛ ba wula su gyapu. 23Sanga ndzi ka ndatǝdzi ata kǝra sǝ nam tǝ Yɛsu tara 'ya, dar ka nkǝrɛ, “Adi ǝni ani Zǝr Dauda ni wɛ?”
24 #
Mat 9:34; 10:25 Ama sakatǝ ndzǝr Farisi tara ngati sǝ ǝni, dar ka nkǝrɛ, “Aka dǝnar Bɛlzǝbul ɗiɗi, zǝr kuhyir mambǝl nam kulɗa yarɛ, ani tǝ ndǝ ni ada kǝdlǝba mambǝl nam kulɗa yarɛ ni.”
25Yɛsu zǝndi sǝ yarɛ nam tǝ dar kwamtsǝni dzǝ ka nkǝrɛ ala dar, “Kǝlara kuhyikur nam tara ndǝghǝbadzi ada mpa kǝmani, ata kikilntadzi, ba kǝlara mǝlmɛ wala kǝi nam tara ndǝghǝbadzi ada mpa kǝmani dzǝ adi ata ndzai wɛ. 26Ma Satan ada kǝdlǝba Satan dzǝ ndǝghǝbadzi tǝ dzǝ ada mpa kǝrni. Mǝmi dzá tǝ kuhyikurni awa mǝzi ndzai? 27Ba ma Yi ada kǝdlǝba mambǝl nam kulɗa yarɛ aka dǝnar Bɛlzǝbul, aka dǝnar wa tǝ ndzǝr gǝri ada kǝdlǝba tǝ dar? Ani dzá dar ata ndzai ndzǝr 'ya haka ala gǝri. 28Ama ma Yi ada kǝdlǝba mambǝl nam kulɗa yarɛ atar Mambǝlǝr Hyal, antǝ kuhyikur Hyal ni kǝ si ata kǝra gǝri.
29“Wala kadamwa, mǝmi tǝ ndǝ laka awa livi akwa kǝiyir ndǝ nam aka dǝna ka faba kariyirni tar tangkǝma ma dzǝ mbwai ndǝ nam aka dǝna ni? Antǝ dzǝ ata mǝzi fati kǝiyirni.
30 #
Mar 9:40
“Kǝlara ndǝ nam kura yar atakǝmaduku, dzǝ dawarna, ba ndǝ nam kura yar ada tsaɓtsǝni su kaka yɛ, dzǝ ndǝr kikilnta. 31Ba Yi gha ala gǝri, kǝlara biku ba gha su kulɗa ata kǝra Hyal ndǝ ata kyifǝnta ala ndzi, ama gha su kulɗa ata kǝra Mambǝl ni adi ata kyifǝntadzi wɛ. 32#Luk 12:10Kǝlara ndǝ nam tara gha sǝ nam kulɗa ata kǝra Zǝr Ndɛ, ndǝ ata kyifǝnta alari, ama kǝlara ndǝ nam tara gha sǝ nam kulɗa ata kǝra Mambǝl Kartǝ ndǝ adi ata kyifǝnta alari wɛ, wala akwa zaman ǝni wala akwa zaman nam tsu ata si.
33 #
Mat 7:20; Luk 6:44 “Mǝrti fwɛ ka dzǝ 'ya ɗaku ba madarni ata 'ya ɗaku, wala mǝrti fwɛ ka dzǝ 'ya kulɗa ba madarni ata 'ya kulɗa, akuya ndǝ ata zǝndi fwɛ atar madarni. 34#Mat 3:7; 23:33; Luk 3:7; Mat 15:18; Luk 6:45Gǝri nam madar kyikǝhyɛ yarɛ, mǝmi tǝ gǝri nam ndzǝ kulɗa awa nkǝrɛ sǝ nam ɗaku? Akuya nya ada nkǝrba sǝ nam ghǝi-ghǝi akwa ɗǝfu. 35Ndǝ nam ɗaku ada sǝba aka sǝ yarɛ nam ɗaku akwa ntsa sǝ nam ɗaku nam ada vi akwa dza, ba ndǝ nam kulɗa ada sǝba aka sǝ yarɛ nam kulɗa nam ada vi akwa dza. 36Ama Yi ada gha ala gǝri apǝri, kǝlara labar ɓǝrtu nam tǝ ndzi ghaba dar ata tsǝnta akwa vǝrǝr haka ni 37akuya atar ndǝrǝr ngɛ antǝ gǝ ata siya ndzai aka dzǝrkur akwa haka, ba atar ndǝrǝr ngɛ antǝ haka ata siya nkai tǝngɛ ka gǝ ndzai ndǝ nam kulɗa.”
Parsu Tara Ɓui Yunana ni
(Mar 8:11-12; Luk 11:29-32)
38 #
Mat 16:1; Mar 8:11; Luk 11:16 Antǝ laka ndzǝr Farisi ba malǝmǝr mabari yarni nkǝrɛ alari, “Malǝm, yar ada bara ka yar wula parsu nǝr ndatǝdzi aka gǝ.”
39 #
Mat 16:4; Mar 8:12 Dzǝ ka sǝnau, “Ndzǝ nam kǝmangar ba ndzǝr badawi ada bara ka dar wula parsu nǝr ndatǝdzi! Ama wala duku ndǝ adi ata la dar wɛ, tar parsu nam tara ɓui Yunana. 40#Yun 1:17Akuya apa tǝ Yunana tara ndzai akwa kuta kulfa nam ngga, vǝr makǝr tsǝtsi aka vǝri, ani Zǝr Ndɛ ata ndzai akwa dai vǝr makǝr tsǝtsi aka vǝri. 41#Yun 3:5Ndzǝr Niniva ata hyati akwa vǝr haka kaka ndzǝr Zaman ǝni ba ka dar tsi kǝra dar; akuya dar tubi sakatǝ Yunana nkǝrba ala dar ndǝrǝr Hyal, ba kulini ndǝ nam ngga ta Yunana adai akwani. 42#1Kuh 10:1-10; 2Sǝt 9:1-12Kuhyimwala nǝr Siba ata hyati akwa vǝr haka ka tsi kǝra ndzǝr zaman ǝni; akuya dzǝ si akwa dǝntar Dunya ka dzǝ sǝthlǝmɛ ala bǝrkawakur Sulaimanu, ba kulini ndǝ nam ngga ta Sulaimanu ani akwani.
43“Ma sakatǝ mambǝl nam kulɗa kǝ sǝba akwa dzá ndɛ, dzǝ ada tǝra akwa vui yarɛ nam kura yimi adai tǝ dzǝ ada bara vui ghǝrbadzi ama ma dzǝ ta ɓui wɛ. 44Antǝ dzǝ ata gha, ‘Yi ata ɓakta si akwa kǝi nam tǝ Yi ngyar nda.’ Sakatǝ dzǝ si, dzǝ ɓui kura ndɛ akwa, tsartsari ndǝlang ba dzǝgudzǝgui. 45Antǝ dzǝ ata mwari ka fatsi akari mambǝl nam kulɗa yarɛ damwa nam kǝmangar ta dza murfwɛ, ba dar ata si ka ndzai akwa kǝi ni. Ba dǝntar ndzaiyir ndǝ ni ata 'ya kulɗa ta ndziyirni nam tangkǝma ni. Ani apani ata ndzai aka ndzǝ kǝmangar akwa zaman ǝni.”
Angǝra Yɛsu ba Madar Angǝri
(Mar 3:31-35; Luk 8:19-21)
46Sakatǝ Yɛsu tsu ata kǝra ndǝrɛ ala dlamiyir ndzi, angǝri kaka madar angǝri ada hyati abǝla, dar ada bara ka dar ndǝrɛ alari. 47Ndǝ laka nkǝrɛ alari, “Mamar ngɛ ba madar ma dar ada hyati abǝla, dar ada bara ndǝrɛ ala gǝ.”
48Dzǝ kalaktsǝni alari, “Wa ani mamarna, ba wa yarɛ ani madar mana?” 49Dzǝ ada tsan ndzǝr nuwurni, dzǝ ka nkǝrɛ, “Ndza mana ba madar mana yarɛ. 50Akuya kǝlara ndǝ nam ada 'ya sǝ nam tǝ Babarna nam atahyal yiɗɛ, dzǝ ani zǝr mana, aka nkwar mana ba mamarna.”
Terpilih Sekarang Ini:
Mata 12: CKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©2023 Seed Company in collaboration with Language Developers and Bible Translators Association
