मरकुस 16

यीशु केर जी उठेक

(मत्ती 28:1-8; लूका 24:1-12; यूहन्ना 20:1-10)

1जब यहूदी मनक आराम केर दिन बीत गेलक, तो मगदला गाँव केर मरियम, याकूब केर आयो मरियम आउर सलोमी बेस महकेक वाला चीजमन के यहूदी रीति केर मोताबिक यीशु केर काया उपरे लगाएक लगिन कीन लानलैं। 2उमन हफ्ता केर शुरु दिन बाड़ बिहाने कबर बटे गेलैं आउर बेइर निकलते हूवाँ पोंहइच गेलैं। 3आउर एक दोसर से कहत रहैं, “केहर हमरे लगिन कबर केर दुरा से पखना के लुढ़काई?” 4मगर जब उमन कबर बटे नजइर लगालैं, तो उमन देखलैं कि कबर केर दुरा से पखना लुढ़काल अहे! उ ढेइर हें बाड़ रहे। 5जब उमन कबर ठिना पोहोंचलैं आउर कबर केर भीतरे गेलैं तो एगो जवान आदमी के चमकीला चरका लुगा पिंधल भतखाइया बटे बइठल देखलैं, आउर ढेइर हैरान होलैं। 6उ आदमी उमन से कहलक, “हैरान ना होवा, तोहरेमन नासरत नगर केर रहेक वाला यीशु के खोजाथा, जे क्रूस उपरे चढ़ाल जाय रहे, उ जी उइठ हे। उ हिंयाँ नखे। देखा, एहे उ ठाँव हेके, जहाँ उमन उके राइख रहैं। 7मगर अब तोहरेमन जावा, पतरस आउर यीशु केर आउरो चेलामन के इ संदेश के बतावा, ‘यीशु तोहरेमन से आगे गलील परदेस जाई। हूवाँ तोहरेमन उके देखबा, जइसन कि उ तोहरेमन के आगे हें बताय देई रहे।’” 8इ सुनेक केर पाछे उमन कबर से बाहरे निकललैं आउर हूवाँ से भाइग गेलैं, काले कि उमन एतना डराय जाय रहैं कि उमन थरथराएक लगलैं आउर उमन केकरो से कोनों नी कहलैं, काले कि डरात रहैं।

मगदला गाँव केर मरियम केर यीशु के देखेक

(मत्ती 28:9,10; यूहन्ना 20:11-18)

9हफ्ता केर पहिला दिन बिहान होते हें यीशु जी उइठ के सोउब से आगे मगदला गाँव केर मरियम के देखाई देलक। यीशु उकर में से सात गो भूतमन के निकलाय रहे। 10उ यीशु केर चेलामन ठिना गेलक आउर उमन के बतालक कि कबर ठिना का होई रहे। उमन यीशु लगिन शोक मनात रहैं आउर काँदत रहैं। 11मगर उमन इ सुनलैं कि यीशु जी उइठ हे आउर इ उके देइख हे तो बिसवास नी करलैं।

दूई झन चेलामन केर यीशु के देखेक

(लूका 24:13-35)

12ओहे दिन यीशु केर दूई गो चेलामन यरुशलेम शहर से अपन घर जात रहैं। जे आसे-पासे हें रहे, उमन के यीशु देखाई देलक। मगर उमन उके तुरते चिन्हेक नी पारलैं, काले कि उकर रूप बदइल जाय रहे। 13मगर जब उमन के पता चललक कि उ यीशु रहे, तो उमन आउरो चेलामन के बताएक लगिन यरुशलेम शहर घूइर आलैं आउर उमन के बतालैं। मगर चेलामन उ मनक गोइठ उपरे हों बिसवास नी करलैं।

गारहों चेलामन केर यीशु के देखेक

(मत्ती 28:16-20; लूका 24:36-49; यूहन्ना 20:19-23; खा.चेला.का. 1:6-8)

14इकर पाछे यीशु अपन गारहों चेलामन के जे खाएक बाइठ रहैं, देखाई देलक। उ मनक कठोर मन के देइख के उमन के डाँटलक, काले कि जे आदमीमन उके जी उठेक केर पाछे देइख रहैं, उमन केर गोइठ उपरे चेलामन बिसवास नी काइर रहैं। 15तब यीशु उमन से कहलक, “तोहरेमन समूचा दुनिया में जावा आउर सोउब आदमीमन के इ शुभ समाचार के सुनावा। 16जे हों इ शुभ समाचार उपरे बिसवास करी आउर बपतिस्मा जल संस्कार लेवी, परमेश्‍वर उके उकर पाप केर सजा से बचाई, मगर जे बिसवास नी करी उके परमेश्‍वर सजा देई। 17जे आदमीमन मोर उपरे बिसवास करबैं उमन के इ चमत्कार चिन्हा देखाएक केर अधिकार परमेश्‍वर बटले देवल जाई उमन मोर नाँव लेई के भूतमन के निकलाबैं, उमन नवाँ-नवाँ भाषा बोलबैं, 18अगर उमन के साँपमन हों चाइब देबैं तो उ मनक बिष से उमन के कोनों नोकसान नी होवी, उमन के जहर हों पियाय देबैं फिन भी उमन नी मोरबैं, उमन बेमरियामन केर उपरे हाँथ रखबैं, आउर उमन ठीक होई जबैं।”

यीशु केर स्वरग में उठाल जाएक

(लूका 24:50-53; खा.चेला.का. 1:9-11)

19जब यीशु अपन चेलामन के इ सोउब गोइठमन के बतालक तब परमेश्‍वर उके स्वरग में उठाय लेलक आउर उ परमेश्‍वर केर संगे राइज करेक लगिन उकर भतखाइया बटे आदर केर साथ बाइठ गेलक। 20आउर यीशु केर चेलामन सोउब ठाँव में जाय-जाय के आदमीमन केर माझे इ शुभ समाचार केर परचार करलैं, आउर प्रभु यीशु उमन के काम करेक केर शक्ति देलक आउर उ मनक चमत्कार केर काम इ साबित करते गेलक कि उ मनक संदेश सच हेके। आमीन।

Terpilih Sekarang Ini:

मरकुस 16: SCK

Highlight

Kongsi

Salin