मत्ती 7
7
दोष नी लगाएक केर शिक्षा
(लूका 6:37-38,41-42)
1यीशु फिन आगे कहलक, “दोष ना लगावा, ताकि परमेश्वर तोहरे उपरे हों दोष ना लगाओक। 2काले कि जे लेखे तोहरेमन दोसर मनक उपरे दोष लगावला, ओहे लेखे परमेश्वर हों तोहर उपरे दोष लगाई आउर जे लेखे दोसरमन से ब्यवहार कराला, ठीक ओहे लेखे परमेश्वर हों तोहर संगे ब्यवहार करी। 3तोंय काले अपन बिसवासी भाई केर छोटका-छोटका गलतीमन के देखिसला, जबकि तोंय खुद तोर जिंदगी केर बड़का-बड़का गलतीमन के नी देखिसला। 4जब तोर में हें बड़का पाप अहे तो तोके खुद से कम पाप वाला आदमी केर मदइत करेक केर कोशिश नी करेक चाही। 5हे ढोंगी पहिले तोंय खुद केर बड़का गलतीमन के सुधराय ले, फिन तोंय अपन बिसवासी भाई केर छोटका-छोटका गलतीमन के देइख के उके सुधराएक में मदइत करबे।
6जेमन परमेश्वर केर संदेश के नी सुनेक चाहैना, उमन के ना सुनाबा। एइसन आदमीमन के परमेश्वर केर संदेश सुनाएक कुकूरमन केर आगे पवितर चीज के फेकेक जइसन चाहे सुवइरमन केर आगे मोती के फेकेक जइसन अहे, उमन सिरिफ उके गोड़ से रवाइंद देबैं आउर पलाइट के तोहर उपरे हमला करबैं।
परमेश्वर से माँगेक आउर पावेक केर शिक्षा
(लूका 11:9-13)
7तोहरेमन के जे चाही उके परमेश्वर से माँगा उ तोहरेमन के देवी, जेके तोहरेमन खोजबा, उ तोहरेमन के भेटाई, ठोकठोकाबा, तो तोहर लगिन दुरा खोलल जाई। 8काले कि जे केऊ माँगेला, उके मिलेला आउर जे खोजेला उके भेटायला आउर जे दुरा ठोकठोकायला, उकर लगिन दुरा खोलल जायला।
9तोहरेमन में से कोन एइसन आदमी हेके, अगर अपन बेटा उकर से रोटी माँगेला तो उ अपन बेटा के पखना देवेला? 10या मछरी माँगेला, तो उके साँप देवेला? 11जब तोहरेमन खुद बुरा होई के, अपन छउवामन के बेस चीजमन के देवेक जानाला, तो तोहर स्वरगीय आबा अपन माँगेक वालामन के बेस चीजमन के काले नी देवी? 12से लगिन तोहरेमन दोसरमन से अपन लगिन जइसन ब्यवहार चाहाला, तइसनेहें तोहरेमन हों दोसरमन संगे ब्यवहार करा, काले कि मूसा केर नियम आउर परमेश्वर केर संदेश के बताएक वालामन केर शिक्षा केर अर्थ एहे हेके।
सहज आउर कठिन डहर केर शिक्षा
(लूका 13:24)
13तोहरेमन नान दुरा से परमेश्वर केर राइज में ढूकेक केर कोशिश करा, काले कि जे फाटक चाकर अहे आउर जे डहर में हिंठेक सहज अहे, उ बिनाश बटे लेई जायला आउर ढेइर आदमीमन एहे डहर से ढुकैना। 14जे दुरा नान आउर जे डहर में हिंठेक कठिन अहे उ जुग-जुग केर जिंदगी बटे लेई जायला, आउर थोरेक आदमीमन इ दुरा आउर डहर से ढुकैना आउर जुग-जुग केर जिंदगी के पावैना।
आदमीमन केर अपन काममन से चिन्हाएक
(लूका 6:43-44; 13:25-27)
15झूठा संदेश देवेक वालामन से सावधान रहबा, उमन भेड़ीमन केर भेष धाइर के तोहर ठिना आवैना, मगर हकीकत में उमन नोकसान पोंहचाएक वाला भेड़ियामन नियर रहैना। 16तोहरेमन उ मनक काम के देइख के उमन के चीन्ह लेबा। का आदमीमन झूँड़ से अंगूर, या काँटा झूँड़ से अंजीर फार तोरैना? 17एहे नियर हरेक बेस आदमी बेस काम करेला आउर बुरा आदमी बुरा काम करेला। 18बेस आदमी बुरा काम नी करी आउर बुरा आदमी बेस काम नी करी। 19जे आदमी बेस काम नी करेला, उके परमेश्वर छाँइट लेई आउर नरक केर आइग में साइज देवी। 20से लगिन तोहरेमन उमन केर काममन के देइख के उमन के चीन्ह लेबा।
21जे आदमीमन मोके, हे प्रभु! हे प्रभु! कइह के हकायना, उमन में से सोउब आदमीमन स्वरग राइज में जाएक नी पारबैं, मगर ओहे आदमीमन जाबैं जेमन मोर स्वरगीय आबा केर इच्छा लेखे जिंदगी बितायना। 22जे दिन न्याय होवी, उ दिन ढेइर आदमीमन मोर से कहबैं, ‘हे प्रभु, हे प्रभु, का हमरे तोर नाँव से भविष्यवाणी नी करली? तोर नाँव से भूतमन के नी निकलाली आउर तोर नाँव से ढेइर चमत्कार केर काम नी करली?’ 23सेखन मोंय उमन से सोझे कइह देमूँ कि ‘मोंय तोहरेमन के कहियो नी जानलों कि तोहरेमन मोर हेका। हे बुरा काम करेक वाला आदमीमन, मोर ठिना से चाइल जावा।’
बुद्धिमान आउर मूरख आदमी
(लूका 6:47-49)
24जे आदमी मोर इ गोइठमन के सुइन के उकर मोताबिक चलेला, से उ बुद्धिमान आदमी नियर अहे, जे अपन घर केर नेव चट्टाइन उपरे खोदलक। 25आउर जब पानी आलक, बाढ़ आलक आउर आँधी चललक आउर उ घर से बजड़ालक, मगर उ घर नी धाँसलक, काले कि उ घर केर नेव चट्टाइन उपरे रहे। 26मगर जे आदमी मोर इ गोइठमन के सुनेला आउर उकर मोताबिक नी चलेला, से उ मूरख आदमी नियर अहे, जे अपन घर बालू में बनालक। 27आउर जब पानी आलक, बाढ़ आलक, आउर आँधी चललक आउर उ घर से बजड़ालक तो उ घर धाँइस के बरबाद होई गेलक।”
28जब यीशु इ गोइठमन के कइह सिरालक, तो हूवाँ जेतना आदमीमन उकर उपदेस के सुनलैं सोउबमन ताजुब होई गेलैं। 29काले कि यीशु उमन के मूसा केर नियम के सिखाएक वालामन नियर निहीं मगर इ लेखे सिखात रहे कि उके सिखाएक केर अधिकार अहे।
Terpilih Sekarang Ini:
मत्ती 7: SCK
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Sadri Bible by The Love Fellowship is licensed under Creative Commons Attribution-ShareAlike 4.0 License.
