Matiyu 9

Isa ka falifaamatɔ dɔ lakɛnɛya teme

Malɛkɛ 2.1-12; Luka 5.17-26

1Isa ka don kulun kɔnɔ ka kɔɔ tɛɛ ka taa se a fɛso. 2Wo waate kelen nɔ, mɔɔ dɔlu ka na falifaamatɔ dɔ le a fɛ, min lanin tɛɛ dɛvɛ kan. Isa k'aiya limaniya ye mingɛ, a k'a fɔ jangalotɔ yɛ, a vɛɛ: «Ǹ den, i jei kà tɛɛ. Iya julumbulu lɔ vɛ koto.»

3Seliya kalanmɔɔ dɔlu v'a fɔla ai jɛlɛ ma, ai vɛɛ: «Kɛ́ min yi Alalafeyakan ne fɔla!» 4Isa tɛɛ k'ai miliya lɔn. A do vɛɛ ai yɛ: «Mindɛ lɔ miliya yon wo suu y'ài josokun nɔ? 5A yi di? K'a fɔ: ‹Iya julumbulu lɔ vɛ koto,› niwotɛ k'a fɔ: ‹I wuli i yi taama,› wo fila lɔ, mindɛ le fɔ diyanin? 6Kɛɛ do, fɔ ài y'a lɔn a see yi Mɔɔnivin Tanin yɛ ka julumbulu lɔkoto dunuɲa.» Wo fɔ Isa bolo, a vɛɛ falifaamatɔ yɛ: «I wuli, i iya dɛvɛ ta ka taa iya bon na.»

7Kɛ́ do k'i wuli ka taa aa bon na. 8Jama ka wo ye mingɛ, ai ka siyan. Ai do ka Ala tanu, kamasɔlɔn ale le na seetiiya min suu dila adamadennu ma.

Isa ka Matiyu kili teme

Malɛkɛ 2.13-17; Luka 5.27-32

9Isa ka bɔ je ka taa. A timintɔla, a ka niisɔɔnminaba dɔ siinin ye niisɔɔnminaya lɔ, min tɔɔ tɛɛ ko Matiyu. Isa do vɛɛ a yɛ: «Bila ǹ kɔ.»

Matiyu do k'i wuli ka bila a kɔ.

10 # Luka 15.1, 2. Wo kɔ, Isa ka to dɔnnikɛya lɔ Matiyu ya bon na, niisɔɔnminaba ni julumbutɔ siyama ka na dɔnnikɛya lɔ Isa ni a kɔbiladennu fɛ. 11Wo ye Falisilu bolo, ai k'a fɔ Isa kɔbiladennu yɛ, ai vɛɛ: «Mindɛ lɔ àiya kalanmɔɔ yi dɔnni kɛla niisɔɔnminabalu ni julumbutɔlu fɛ?» 12Isa ka wo mɛn mingɛ, a k'ai javi, a vɛɛ: «Kɛnɛyabatɔ mako tɛ basibɔba la, mafɔ jangalotɔ. 13#Matiyu 12.7.Kuma min sɛvɛnin kitabu kɔnɔ, ài yi taa ài mili wo kɔlɔ ma, ko: ‹Henandeya diyanin vɛ ǹ yɛ ka timin kolofen salaka la.› Kamasɔlɔn m̀ ma na mɔɔ telenninu kiliko lɔ, mafɔ julumbutɔlu.»

Ai ka Isa maɲininga sundonko ma teme

Malɛkɛ 2.18-22; Luka 5.33-39

14Wo kɔ, Yaya kɔbiladen dɔlu k'i madon Isa la k'a maɲininga, ai vɛɛ: «Ǹu ni Falisilu deinin sundonna. Mindɛ lɔ i kɔbiladennu tɛ sundonna?»

15Isa k'ai javi, a vɛɛ: «A yi di? Ka kɔɲɛfa to a tɔvalu dafɛ kɔɲɛmalɔ lɔ, jalasa a tɔvalu yi sene ai ɲakɔlɔ silila? Kɛɛ lon dɔ natɔ, mɔɔlu kɛtɔ kɔɲɛfa bɔla ai tɛma. Wo lon ne, ai kɛtɔ sundonna.

16«Mɔɔ tɛ faani kula kulunkulun tala ka faani kɔlɔ labalin a le, niwotɛ faani kula kɛtɔ faani kɔlɔ masamana k'a fala. A do falaɲa kɛwonyatɔle ka timin a kunfɔlɔ ta la. 17Wo boloɲa kelen ma, mɔɔ tɛ gbɛ kula kɛla gbɛbɔlɔ kɔlɔ lɔ. Niwotɛ, a fununtɔ ka bɔlɔ te ka gbɛ bɛ bɔn. Mɔɔ yi gbɛ kula kɛla gbɛbɔlɔ kula le lɔ. Wo vɛ kɛla, fen fen tɛnala tiɲala wo lɔ.»

Moso jangalotɔ ni ɲamɔɔ denmoso

Malɛkɛ 5.21-43; Luka 8.40-56

18Isa ka to wo fɔla, Jahudiyalu ya ɲamɔɔ dɔ ka na k'i majii a kɔlɔ, a vɛɛ: «Ǹ denmoso vɛ sa yi ne. Kɛɛ i vɛ nala k'i bolo la a kan, a yi wulile.» 19Wo fɔ, Isa ni a kɔbiladennu k'i wuli ka bila a kɔ. 20Wo k'a talan, moso jangalotɔ dɔ tɛɛ je, min tɛɛ vɛ san tan ni fila (12) kɛ maa jangalo lɔ. Moso wo ka na Isa kɔma, k'a bolo tuu aa faaniba dagbolo la. 21A tɛɛ a fɔla a kɔnɔ, a vɛɛ: «Hali ni ǹ ka se m̀ bolo tuula aa faaniba la gbu, ǹ'i kɛnɛyale.» 22Isa k'i ɲa tilimin mingɛ ka moso ye a kɔma, a vɛɛ a yɛ: «Ǹ denmoso, i jei kà tɛɛ. Iya limaniya v'i lakɛnɛya.» Moso do ka kɛnɛya telemanin.

23Isa senin ɲamɔɔ ya bon na, a ka fulefɔbalu ye je, ani jama min mangan ba tɛɛ bɔla. 24A do vɛɛ ai yɛ: «Ài y'ài mataa. Singbilini sanin tɛ, a yi sunɔɔ le lɔ.» Wo fɔ Isa bolo, ai ka jɛlɛbɔ a lɔ. 25Ai ka jama labɔ mingɛ luu ma, Isa ka don bon na, ka singbilini su mina a bolo ma. Singbilini do k'i wuli. 26Ko wo mangan ka jɛzɛn koovi wo fan bɛ lɔ.

Isa ka ɲagbɛ fila ɲa laka teme

27Isa bɔtɔla je, ɲagbɛ kɛ́ fila v'i wulila ka bila a kɔ gbanɔ le, ai vɛɛ: «Dawuda Bɔzɔn! Hena mɔ la!»

28Isa ka don mingɛ bon na, ɲagbɛ fila wolu k'i madon a la. Wo lɔ, Isa vɛɛ ai yɛ: «Ài limaniyanin k'a fɔ ǹ'i sene ài ɲa lakala?»

Ai do vɛɛ: «Aan, Kuntii, mɔ limaniyayine wo ma.»

29Wo fɔ ai bolo, Isa k'a bolo tuu ai ɲa la, a vɛɛ: «Ka bɛn àiya limaniya ma, wo yi kɛle ài yɛ.» 30Wo kɛ, ai ɲa la ka ka. Isa k'a fɔ ai yɛ k'a magbeleya, a vɛɛ: «Ài kà ko min fɔ mɔɔ suu suu yɛ.» 31Kɛɛ ai do ka bɔ ka Isa mangan lajɛzɛn koovi wo fan bɛ lɔ.

Isa ka bobo dɔ lakɛnɛya teme

Luka 11.14-15

32Kɛ́ fila wolu bɔtɔla, mɔɔlu ka na kɛ́ dɔ le Isa fɛ, jina tɛɛ vɛ min kɛ bobo le. 33Isa ka jina gbɛn mingɛ, bobo wo vɛ kumala. Jama ka kawakoya, ai vɛɛ: «Wo ɲɔɔzii tɛɛ ma kɛ ba Isilan jamana lɔ feu!» 34#Matiyu 10.25; 12.24; Malɛkɛ 3.22; Luka 11.15.Kɛɛ Falisilu vɛɛ: «Jinalu ya kuntii le na see dila a ma fɔsa a yi jinalu gbɛn k'ai bɔ mɔɔlu lɔ.»

Jama hena ka Isa mina teme

Malɛkɛ 6.6, 34; Luka 8.1

35 # Matiyu 4.23; Malɛkɛ 1.39; Luka 4.44. Wo waate, Isa tɛɛ timintiminna so ni toodalu bɛ la ka mɔɔlu kalan aiya Aladalibonnu la, ka Samakan Kein lase ka bɛn Ala ya masaya ma, ani ka jangalotɔ suu bɛ lakɛnɛya. 36#Malɛkɛ 6.34.A ka jama ye mingɛ, ai hena k'a mina, kamasɔlɔn ai ma tɛɛ vɛ gbolo k'ai fanga ban, iwo saa minu bilanin ai jɛlɛ ma, saakunnasiiba tɛ minu la. 37#Luka 10.2.Wo lɔ saa, Isa vɛɛ a kɔbiladennu yɛ: «Malo mɔnnin lɔwalanin bubale, kɛɛ do a kaliba ma siya. 38Wo ma, ài yi Sɛnɛtii madiya ko a yi baaledennu lɔ malo kalila aa sɛnɛ lɔ.»

Terpilih Sekarang Ini:

Matiyu 9: MBT2023

Highlight

Kongsi

Salin