Matiyu 17

Isa kɛɲa ka jɛlɛma teme

Malɛkɛ 9.2-13; Luka 9.28-36

1Tele wɔɔlɔ timin kɔ, Isa ka Piyɛli ni Janguba ni a dɔɔni Yohana kili ka taa ai le ai ta fan tini jaan dɔ kɔkan. 2Ai ka to je, Isa kɛɲa ka jɛlɛma ai ɲana. A ɲakɔlɔla ka mɛnɛn gbesekele iwo tele, ado aa faanilu ka gbɛ pepe iwo kɛnɛya. 3Wo kɛ, Nabi Musa ni Nabi Iliya ka bɔ gbɛ la ai ɲakɔlɔ. Wolu ni Isa tɛɛ kumala i ɲɔɔ fɛ. 4Wo ye Piyɛli bolo, a k'a fɔ Isa yɛ, a vɛɛ: «Ǹ Kuntii, a bɛnyine m'i to jan. Ni i ka diɲa, ǹ kɛtɔ gbaa sawa lɔla: i ta kelen, Nabi Musa ta kelen, ani Nabi Iliya ta kelen.»

5 # Matiyu 3.17; 12.18; Malɛkɛ 1.11; Luka 3.22. # 2 Piyɛli 1.17, 18. Piyɛli ka to kumala, sanbiliya mɛnɛnnin ka na ka bilin ai kunna. Kumakan dɔ ka bɔ sanbiliya lɔ, a vɛɛ: «Ǹ diyanan Denkɛ le ne, min yi ǹ kɔnɔlɔdiyala bubale. Ài y'ài tolomalɔ a la.»

6Wo mɛn Isa kɔbiladennu bolo, ai k'ai ben duu ma k'ai kun mabilin siyan boloma. 7Kɛɛ Isa k'i madon ai la k'a bolo tuu ai la. A vɛɛ ai yɛ: «Ài wuli, ài kà siyan.» 8Ai k'ai ɲa lawuli mingɛ, ai ma mɔɔ ye fɔ Isa kelen.

9Isa nu jiitɔla tini la, a k'ai jamali, a vɛɛ: «Ài na min yena, ài kà wo fɔ mɔɔ suu suu yɛ bene, fɔ Mɔɔnivin Tanin v'i wulila ka bɔ saya lɔ.»

10Isa kɔbiladennu k'a maɲininga, ai vɛɛ: «Mindɛ lɔ seliya kalanmɔɔlu y'a fɔla ko Nabi Iliya le ka kan ka na kunfɔlɔ le?»

11Isa k'ai javi, a vɛɛ: «Tuɲa le, Nabi Iliya ka kan ka na ka ko bɛ lɔbɛn. 12#Matiyu 11.14.Ǹ'a fɔ ài yɛ, Nabi Iliya vɛ ban nala, kɛɛ mɔɔlu tɛɛ m'a lɔn, mafɔ ai k'ai sawonanko bɛ kɛ a la. Wo boloɲa kelen ma, Mɔɔnivin Tanin fana tɔlɔyatɔle ai bolo.» 13A kɔbiladennu k'a ɲaye wo le lɔ ko a tɛɛ kumala ai yɛ ka bɛn Makolikɛba Yaya ya ko le ma.

Isa ka den dɔ lakɛnɛya teme, fɔlifɔli jangalo tɛɛ min na

Malɛkɛ 9.14-29; Luka 9.37-43

14Isa nu seikɔnin jama ma, kɛ́ dɔ ka na k'i majii Isa kɔlɔ, a vɛɛ: 15«Ǹ Kuntii, hena ǹ denkɛ la, kamasɔlɔn a vɛ tɔlɔya bubale fɔlifɔli jangalo bolo. A v'a minala kotan, waate siyama lɔ a yi benna taa la, niwotɛ ji lɔ. 16Ǹ nanin a le i kɔbiladennu fɛ, kɛɛ ai do ma se a lakɛnɛyala.»

17Isa vɛɛ ai yɛ: «Àilu limaniyabalilu ni mɔɔ filininnu! Ǹ'i to ài tɛma k'àiya ko mina m̀ ma haan fɔɔ waate mindɛ? Na denni le ǹ fɛ jan.» 18Isa ka jina majaman mingɛ, jina ka bɔ denni lɔ. A do ka kɛnɛya telemanin.

19Wo kɔ, Isa kɔbiladennu ka na k'a maɲininga ai ta fan, ai vɛɛ: «Mindɛ lɔ ǹu ma se jina wo gbɛnna?»

20 # Matiyu 21.21; Malɛkɛ 11.23; 1 Kolɛntikalu 13.2. Isa vɛɛ ai yɛ: «Ài ma se kamasɔlɔn àiya limaniya le dɔɔyanin. Ǹ'i tuɲa fɔ ài yɛ, hali ni àiya limaniya buɲa jate ka kɛ iwo mutaadi kolo, ài yi sene a fɔla tini min yɛ ko a yi bɔ a nɔ lɔ ka taa, a do yi taale. Ài tɛnala kolila ko ko la. 21[Kɛɛ jina min suu tɛ se bɔla mɔɔ lɔ, ni ài ma sun don ka Ala dali.]»

Isa ka aa saya ni a wuliko fɔ kɔtunun

Malɛkɛ 9.30-32; Luka 9.43-45

22Isa kɔbiladennu bɛ k'ai ladɛn mingɛ Galile koovi lɔ, a k'a fɔ ai yɛ, a vɛɛ: «Mɔɔnivin Tanin yi don bolo le ma mɔɔlu bolo, 23minu kɛtɔ a faala. Kɛɛ tele fila a sawana, a wulitɔ ka bɔ saya lɔ.» Kuma wo k'a kɔbiladennu niilafin bubale.

Lɔhɔlɔmabonba kɔnzɔn salako

24Isa ni a kɔbiladennu ka se Kapɛlɛnamu so kɔnɔ mingɛ, lɔhɔlɔmabonba kɔnzɔnminabalu k'i madon Piyɛli la k'a maɲininga, ai vɛɛ: «Jalasa àiya kalanmɔɔ tɛ lɔhɔlɔmabonba kɔnzɔn salala?» 25Piyɛli vɛɛ ai yɛ: «Aan, a a salala.»

Piyɛli ka don bon na mingɛ, Isa vɛɛ a yɛ kunfɔlɔ le: «Simɔn, i miliya lɔ, dunuɲa masakɛlu yi kɔnzɔn minala jene la? Aiya jamanadennu, baa lonalu?» 26Piyɛli k'a javi, a vɛɛ: «Lonalu.»

Isa vɛɛ a yɛ: «Wo lɔ saa, aiya jamanadennu sen tɛ wo lɔ. 27Kɛɛ mɔ kà mɔɔ minu ɲagba. Wo lɔ, i yi taa loifiliya lɔ kɔɔ lɔ. I vɛ jɛɛ kunfɔlɔ min minala, i yi wo da laka k'a lɔfɛlɛn. I kɛtɔ wɔligbana dɔ yena a da. Wo vɛ kɛla, i yi taa wo di ai ma, ka wo kɛ ǹu mɔɔ fila ya kɔnzɔn ne.»

Terpilih Sekarang Ini:

Matiyu 17: MBT2023

Highlight

Kongsi

Salin