Matiu 11
11
Tioni e itema so kelele mupalusi'a tatisaipeliou se'i so itali'i noxou Iesua
1Ioxe, Iesua mupelototosi'a tatisaiÂpeliou 12 ne mukalu la anu mulutu mulai no taotaoni no anu xale lia ne so muvotovotone'i tamitema mo mulalanu Mosinge vaikalaou noxi'a.
2La Tioni e itema so u'oxonu kelele a muxolu no lakalavusu xe muloÂmusou a'alosou xaixai noxou Kalaisiti e mu'oxonu ne. Laso anu mupalusi'a tatisaipeliou milai so itatali'i noxou. 3Ioxe, mixali noxou Iesua mukalu la mivulunu tali'i noxou Tioni aloxo 'o, “Nini itema Mosinge muvavalimasou e texoxoÂmaiou o tautitiou evilela masi a uaosio?” 4La Iesua mukoline'i lexe, “Ngingi ngalivu la ngaa'alou Tioni no anu mimi e ngemaisou mo ngelomusou 'o. 5Xo tamitema ane ie'i mutomu la imaleila. Xe ane'i ane tava'a musoisoli la imuaÂmua'isi. Xe tamitema so siki lepelesi la vasime'a malemalengala. Xe ane'i ane sangali'a mutomu la ilolomula. Xe se'i ane misoisoli la itulutulu imaulila. Xe tamitema ta'oloxola la ilomusou votovotosou vaikala laixe. 6La anu laixe noxou itema aneva ulopalaleli mo usasalo uasi.”
7Ioxe, tatisaipeliou Tioni a miluÂtu so ilivu la Iesua musoko'u so uvikala lamana so Tioni noxi'a tamitema latala ne aloxo 'o, “No voxo loxo ngelailai no xale lia esi'esi la ngesaxisou mi ma'ia? Ngesaxisou itema pelesou loxo lele'i ane sivo utaotaonu? 8O masi axova, ngelai so ngasaxisou itema lavulutiou lailaixe? Ai ngalomu, tamitema ane ivilasi no anu mimi lailaixe, ne ane'i ixoxolu no tasi'a takingisi. 9O masi ngelai so ngasaxisou mi ma'ia, polopeti vile, ne? Ani, ngesaxisou polopeti vile ane. Ia avikalangengi lexe polopeti anene uua'ulixa'a tapoloÂpeti mukaÂlusi. 10Xo anu mosou e vaikalaou Mosinge uvikalasou lexe, 'NaloÂmu, eni apalusou itemaxeli vile no laxuneni so ulanu vaikalaxeli. Anu u'uli noxine so ulalaxinu vote'iÂsine.' 11Eni avikalangengi manina aloxo 'o. No taine'i tatemanu lialia mukaÂlusi, la Tioni e itema so u'oxonu ilixo so kelele uua'ulixa'a avile. Ia no voxo so Mosinge molu u'uli laxune'i tamitemaou no tualasou xe ena'ei noxi'a ualasou vitanisi, la uua'uÂlixu Tioni ane.
12La oto'oto musoko'u no voxo loxo Tioni e itema so u'oxonu kelele mulanu vaikala la mune'e muxali vaimomo 'o. Oto'oto ne mu'avuti xo tamitema so su xavine'i so i'una ixolu no voxo ane Mosinge molu u'uli laxune'i tamitemaou no tualasou. Laso maixene tu'umaxusou tavu'alo a muxali 'oe. 13Xo tapolopeti mukalusi xe no lavuku so lo ane'i milanu vaikala so pela'a xo mo mune'e muxali noxou Tioni. 14Laso loxo opongengi uloxu la ngakasou vaikala ano'o lexe manina. Vaikalai'a e milemolu so Elaitia e lexe une'e, la anene mivikalasou Tionisi ane. 15Itema loxo sangalou la ulomuxu vaikala ano'o.”
16La Iesua muvikala aloxo 'ola, “A'oxonu latilovo so apala'anixu ilixone'i tamitema so vaimomo 'o axova? E aloxo 'o. Ane'i loxo tamolomolo ixoxolu no loxomala mo i'ava noxi'a tamenexi'a lexe, 17'Nexi tetausou mavusinge ia ngingi ngalei uasi. Xe nexi tetalingalele ia ngingi ngatama uasi.' 18Xo Tioni anu itema so u'ani mo uie uasi. Sila ngingi ngevikala lexe, 'Iu, ulenu masua uxolu noxou to ne!' 19Mo vaimomo 'o Itema ane molu noxou Mosinge a muxali mo u'ani mo uie. Sila ngingi ngevikalasou lexe, 'Ngamaisou anu itema so vune mo ulavusou usipaki. Xe anu vaitami'a tamitema so itaxusou taxisi oli'a tamitema so susu to!' Ngingi ngalavusou ngavikala axone ia tamitema ane ilomuxu vaikalasou lavulavu u'asi'asi noxou Mosinge la xaixai noxi'a umaxa'u lexe vaikala ne manina ane.”
Anu uxali masua manina noxi'a ane'i ane ixiunu mo i'isalilinoxu opone'i uasi
20Ioxe, anu muxavutalanu taoÂtaoni se'i e anu mu'oxonu sosovo so xavi tapiena no anu la tatemanu ixiunu mo i'isalilinoxu opone'i uasi. Laso anu musoko'u so uvikala lamana so ilixo masua noxi'a tamitema anene. 21La muvikala lexe, “Auo, anu uxali masua manina noxinge ne Kolasini, mo uxali masua manina noxinge ne Vetisaita to. Xo loxo sosovo so xavi muxali no taoni ne Taili mo Saitoni a loxo muxali no taingengi ne la ane'i masi mixiunu mo mi'isalilinoxu opone'i tateimo. Xe axone la masi a isakinu lavalava so tama mo ipeipenu lomulo no kisi'a so imaxa'u mama'u so susu noxi'a. 22Ia no voxo so Mosinge ukolinu susu la tu'umaxu ane uxalisinge la uua'ulixu ane noxi'a Tataili xe Tasaitoni. 23Xe ngingi TakapeÂniamu, ngingi nga'oxo lexe nga'itingengi so ngaxali no tualaÂsou Mosinge, ne? Uasisi ane, ngingi ngasu'a ulu'e no tanixu solisi ane! Xo loxo sosovo so xavi uxali tatei ne Sotomu a loxo anene muxali noxinge 'o la anu tuala ne masi a uxoxolusio. 24Laso maixene avikalangengi lexe no voxo so Mosinge ukolinu susu la tu'umaxu ane uxalisinge la uua'uÂlixu ane noxi'a Tasotomu.
Iesua muvikala lamana lexe tamitema ixalisou ma'ila a noxousi
25Ioxe, no voxo ne la Iesua muvikala aloxo 'o, “Papao, nini Tatananu tualasine mo lialia 'o. Eni a'itinu ualasine xo nini netalumeu mimi ano'o noxi'a tamitema so lavulavu xe takeleva. Ia a nepaÂla'anixu noxi'a tamitema pelesi'a a loxo takeakeasi 'o. 26E Papa, muxali aloxo 'o xo mumulinu masaxa noxine u'isalilisi.” 27La Iesua muvikala aloxo 'ola, “Mamilo mupilixinu mimi mukalusi no avolo 'o. La itema vile ulavusou Olu uasi, Momusi ulavusou. Xe itema molu ulavusou Momu uasi, Olusi xe ane'i ta'ei upela'axu Momu no anu masaxa noxou, la ilavuÂsousi.
28Laso ngingi tamitema ane ngatotosa no anu mimi tu'umaxu ngatavalenu ne, ngingi mukalusi ngane'e noxilo xo eni alosinge ma'ila a. 29Vaikalaxeli ne anu loxo lapalanga imulaxu no xolaÂne'i takau so ilapunu mimi no anu. Laso ngingi nga'italongengi so ngatavulenu lapalanga noxilo axone mo ngano'u lavulavu noxilo. Xo eni ilixoleli se'isisi mo alavuÂsou alu'eleli so opoleli lexa noxi'a tamitema. Laso loxo ngane'e noxilo la ngingi ngaxaÂlisou ma'ila no anu ulengengi. 30Xo lapalanga e amulaxu no laxasinge ne anu se'isisi noxinge xe mi e alosinge so ngatavulenu ne anu papaxexusi.
Terpilih Sekarang Ini:
Matiu 11: ATA
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Copyright 1999 New Tribes Mission, Sanford, FL 32771-1487
