यूहन्ना 19
19
मृत्यु दण्डा री आज्ञा
1ऐता पैंदे पिलातुस यीशु बे कोड़े लाई करे। 2सपाही कांडे रअ मुकट गुंधी करे तेऊरे मुंडा में डाहू, होर तेऊबै बैजनी रगा रे झिकड़े पनेहीं, 3होर तेऊ सेटा इच्छी करे बोलदे लागे , हे यहूदी रे राजा, नमस्ते! होर तेऊबै थप्पड़ भी बाही। 4तेबा पिलातुस भी बाग़े निखली करे लोका बे बोलू, हेरा, हाऊं तेऊ तमा सेटा बे भी बाग़े आणा; की तमे ज़ाण कि मांई तेऊमें किछे दोष नांई हेरू। 5तेबा यीशु कांडे रअ मुकट होर बैजनी रगा रे झिकड़े बानी दे बाग़े काहडू; होर पिलातुस तयाबे बोलू, हेरा, यह मणश! 6जेबा प्रधान याजका होर प्यादे सह भाल़ु, तेबा जोरे करे बोलू, तेऊ क्रुसा में चढ़ा, क्रुसा में! पिलातुसे तयाबे बोलू, तमे ही एऊ नी करे क्रुसा में चढ़ा, किबेकि महा तेऊमें किछे दोष नांई हेरू। 7यहूदीये तेऊबै उतर दिंना, महारी भी व्यवस्था साहा तेसा कनुना रे साबे जरूरी मारने रे लायक साहा, किबेकी यह आपणे आपा बे परमेश्वर रअ शोहरू बणुदअ। 8जेबा पिलातुस यह गला शूणी तेबा होर भी डरू, 9होर भी किले मितरा बे नाठअ होर यीशु बे बोलू, तूह कंदकअ साहा? पर यीशु तेऊबै किछे भी उतर नांई दिंना। 10ऐता में पिलातुसे तेऊबै बोलू, महा बे किबे नांई बोलदअ? कैह तूह नांई ज़ाणदअ कि ताह छाडने रा अधिकार महा साहा, होर ताह क्रुसा में चढ़ाऊंण रा अधिकार भी महा बे साहा। 11यीशु उतर दिंना, अगर ताहबे उझे का नांई दिंदे, तेबा तेरा महा पैंदे किचे अधिकार नांई हूँदा; ऐतकी तणी जूणी हाऊं ताहका ढाकणे बझयाल़ु तेऊरा पाप ज़ादा साहा।
12ऐता में पिलातुस सह छाड़नअं चाहू, पर यहूदी जोरे-जोरे करी बोलू, अगर तूह ऐऊ छाड़लअ, तेबा तूह रोमना रे कैसर राजे रअ दोस्त नांई आन्धअ जोह आपु वे राजा बोला, सह सम्राटा रा बिरोध करा। 13या गला शूणी करे पिलातुस यीशु बाग़ा बे आणु होर तेसा जागहा चबुतरअ थी, जोह इब्रानी में गब्बता कहलाऊंदा, होर सह तखे न्याय रे आसणा पेंदे बठअ। 14यह फसह री त्यारी री धयाड थी, होर छह घंटे रे लगभग। तेबा तेऊ यहूदी बे बोलू, हेरा थारअ राजा। 15पर त्या जोरे -जोरे बोलू , निंह! निंह! तेऊ क्रुसा में चडाह! पिलातुस तयाबे बोलू, कैह हाऊं थारे कैसर राजा क्रुसा में चडाऊ? प्रधान याजके उतर दिंना, केसरा छाडी माहरअ होर कोई राजा नांई आन्दअ। 16तेबा तेऊ यीशु त्याहरे हाथे सोंपु कि तेऊ क्रुसा में चढाए।
क्रुसा में चडाऊंणअं
(मत्ती 27.32-44; मरकुस 15.21-32; लूका 23.26-43)
17तेबा त्याहे यीशु नींऊं, होर सह आपणें क्रुस चुआकी करे तेसा जागा तणी बाग़े नाठअ, जोह खोपड़ी री जागहा होर बोला इब्रानी में गुलगुता। 18तखे त्याहे तेऊ होर तेऊ संघे दुई होरा मणश भी क्रुसा पैंदे चढ़ाई, एक ओरी होर पोरी, होर मज़े यीशु। 19पिलातुस एक दोष चिट्ठी लिखी करे क्रुसा में लाई, तेता में यह लिखूदा थी, “यीशु नासरी यहूदी रअ राजा।” 20यह दोष पत्र बहू यहूदी पढू, किबेकि सह जागा ज़खे यीशु क्रुसा में चढ़ाऊ थी, सह नगरा सेटा; होर पत्र इब्रानी होर लतीनी होर यूनानी में लिखुदा। 21तेबा यहूदी रे प्रधान याजक पिलातुसा बे बोलू, यहूदी रअ राजा नांई लिखे पर यह कि तेऊ बोलू, हाऊं यहूदी रअ राजा साहा। 22पिलातुस उतर दिंना, मांई जोह लिखू, सह लिखू।
23तेबा सैनिके यीशु क्रुसा पेंदे चड़ाई छेकू, तेबा तेऊर झिकड़े नी करे चार भाग करी, हर सैनिका बे चार भाग, होर कुरती भी नी, पर कुरती बिन सिअन उझे का उंधे तणी बूणुद थी। 24ऐतकी तणी त्याह आपु में बोलू, हामा यह नांई चिरणं, पर ऐतकी चिठ्ठी पाऊणी कि यह कासकअ हूँणअं। यह ऐतकी तणी होऊ कि पवित्र शास्त्रा में जोह बोलुदा सह पूरा हो, त्याहा मेरे झिकड़े आपु में बांडी होर मेरे झिकड़े पेंदे चिठ्ठी पाई।
25पर सैनिक ऐडा ही करू यीशु रे क्रुसा सेटा तेऊरी आमा, होर तेऊरी आमा री बहीण, क्लोपासा री बेटड़ी मरियम, होर मरियम मगदलेनी खड़ी, थी 26जेबा यीशु आपणी आमा, होर तेऊरे चेले जासू संघे सह प्रेम डाहंदा थी, सेटा खडूदअ हेरू तेबा आपणी आमा बे बोलू, हे नारी, हेर यह तेरअ शोहरू साहा। 27तेबा तेऊरे चेले बोलू, यह तेरी आमा साहा। होर तेहू वक्ता का तेऊ चेले सह आपणे घरा बे नीई ।
यीशु री मऊत
(मत्ती 27.45-56; मरकुस 15.33-41; लूका 23.44-49)
28ऐता बाद यीशु यह जाणी करे कि ऐबा सबे कुछ पूरा होई छेकू, ऐतकी तणी जोह पवित्र शास्त्रा में बोलुदा पूरा हो, बोलू, हाऊं शोखअ साहा। 29तखे सिरके रअ भरूद एक भाड़अ डाहुदअ थी, त्याहे सिरके में शगी दे स्पंज जुफे पेंदे डाही करे तेऊरे मुहे लाऊ। 30जेबा यीशु सह सिरका लउ, तेबा बोलू, पूरा होऊ; होर मुंड़ झुकाई करे प्राण छाडी।
बरछे संघे बिनणा
31यह सब्ता री ध्याडी का पहिली ध्याड थी, यहूदी धर्मगुरु यह नांही चाहंद थी शरीर बश्यागा री ध्याडी क्रुसा पैंदे लटकी रहे, किबेकी सह बश्यागा री ध्याड जाचा री एक बडी ध्याड थी, तेबा त्याहे पिलातुसा का बिनती करु की त्या लोका री टागा चोडनी, होर त्यारअ शव तखा का दूर करनअ। 32तेबा सैनिक इछी करे त्या मणशा मेंज़ा का पहिल री टांगा चोडी तेहुकी दूजे री भी, जोह तेऊ संघे डाकू क्रुसा में चड़ाई दे थी; 33पर जेबा यीशु सेटा इछी करे हेरू कि यह मरी छेकू तेबा तेऊरी टांगा नांई चोडी। 34पर सैनिका मेंज़ा का एकु तेऊरअ पंजर बिनु, होर तेताका तेभरी लोहू होर पाणी निकता। 35जूणी यह हेरू, तेऊ गुआही दिंनी, तेऊरी गुआही सच्ची साहा; होर सह जाणा कि सह सच बोला कि तमे भी बुशाह करा। 36या गला ऐतकी तणी होई कि पवित्र शास्त्रा में जोह बोलुदा सह पूरा हो, तेऊरअ कासी भी हाडकअ नांई चोड़नअं। 37तेऊकी एकसा जागहा पवित्र शास्त्र में यह लिखुदा, जोह त्याहे बिनु, तेऊ पेंदे त्या नजर करणी।
युसुफा री कब्रा मे यीशू डाहणअ
(मत्ती 27.57-61; मरकुस 15.42-47; लूका 23.50-56)
38या गला बाद अरिमितिया रे यूसुफ जोह यीशु रअ चेलअ थी, पर यहूदी री डरा का ऐसा गला छपाई डाहंडा, पिलातुस बिनती करी कि सह यीशु रे शफा नी सका। पिलातुस तेऊरी बिनती शूणी, होर तेऊ इछी करे यीशु रअ शव नीऊं। 39निकुदेमुस भी, जोह पहिल यीशु सेटा बे राची नाठअ, पज़ाह सेरा रे लगभग मिलाऊदा लोबान होर अगरु आणु। 40तेबा त्याहे यीशु रअ शव नीऊं, होर यहूदी रे गाड़ने री रीति रे साबे सह खुशबू द्रव्य संघे झिकड़े में लपेटू। 41तेसा जागा ज़खे यीशु क्रुसा में चडाऊ, एक बारी, होर तेसा बारी में एक कब्र, जासू में कधी कोहे नांई डाहू। 42एतकि तणी यहूदी री त्यारी धियाड़ री बजा का त्याहे यीशु तेथी में डाहू, किबेकि सह कब्र नेड थी।
Terpilih Sekarang Ini:
यूहन्ना 19: ISJNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
