यूहन्ना 17
17
आपु यीशु री बड़ी प्रार्थना
1यीशु या गला करी होर आपणी आछी सरगा फेरा बे चुआकी करे बोलू, हे बापू, सह घड़ी आई पूजी; आपणे शोहरू री महिमा कर कि शोहरू भी तेरी महिमा करे, 2किबेकी तांई तेऊबै सभी प्राणी पैंदे अधिकार दिंना, कि जोह तांई तेऊबै दिंना त्या सभी बे अनन्त जीबन दे। 3होर अनन्त जीबन यह साहा कि ताह सीधी ऐकु सच्चे परमेश्वर होर यीशु मसीह, जोह तांई भेजू, ज़ाणा। 4जोह काम तांई माँहबे करने बे दिना, तेऊ पूरा करी करे मांई तेरी महिमा धरती पेंदे करी दी साहा। 5ऐबा हे बापू, तूह आपु संघे मेरी महिमा तेसा महिमा संघे करे जोह संसारा बणाऊंणे का पहिले, मेरी तांई संघे थी।
आपणे चेले री तणी प्रार्थना
6मांई तेरा ना त्या मणशा पेंदे प्रकट करू जूणा तांई संसारा मेंज़ा का महा बे दीना। त्या तेरे, जोह तांई महा बे दीना, होर त्याह तेरे बचन मनी। 7ऐबा त्याहे जाणु कि जोह कुछ तांई महा बे दिंना सह सबे तेरी तरफा का साहा; 8किबेकी जोह वचन तांई महा बे दिने, मांई तयाबे पजेरी, होर त्याहे त्या ग्रहण करी, होर सच-सच जाणु कि हाऊं तेरी तरफा का आउअद साहा, होर बुशाह करू कि तांईए ही हाऊं भेजु। 9हाऊं त्यारी तणी बिनती करा; संसारा री तणी बिनती नांई करदअ पर त्याही बे जुणा तांई महाबे दिने, किबेकि त्या तेरे साहा; 10होर जोह कुछ मेरा साहा, होर याह का मेरी महिमा प्रकट होई। 11महा ऐबा संसारा में नांई रहंणा, पर या संसारा में रहंणे, होर महा ताह सेटा बे ईहंदा। हे पवित्र बापू, आपणे तेऊ ना का जोह तांई महाब दिना, त्यारी रक्षा करे कि त्या हामा बराबर एक हो। 12जेबा हाऊं त्याह संघे थी, तेबा मांई तेरे तेऊ ना का, जोह तांई महा बे दिंना जोह त्यारी रक्षा करी। मांई त्यारी चकौसी करी, होर बिनाशा रअ शोहरू छाडू त्या मेंज़ा का कोहे भी नष्ट ना होई ऐतकी तणी जोह पवित्र शास्त्रा में बोलुदा सह पूरा हो। 13ऐबा हाऊं ताह सेटा बे इच्छू, होर या गला संसारा बोलू, कि त्या मेरी खुशी आपु में पूरा पाए। 14मांई तेरअ बचन तयाबे पजेरू; होर संसारे त्याहे संघे बइर करू, जेड़अ कि हाऊं संसारा रा नांई आंधह, तेडअ ही सह भी संसारा रअ नांई आंन्धअ। 15हाऊं यह बिनती नांई करदअ कि तूह त्या संसारा का चुआके; पर यह कि तूह त्या तेऊ दुष्ट का बचाई डाहे। 16जेढअ हाऊं संसारा रअ नांई आंन्धअ, तेढअ त्या भी संसारा रे नांई आंन्धए। 17सत्य रे साबे त्या पवित्र करे तेरअ बचन सचअ साहा। 18हेर तांई हाऊं संसारा में भेजु तेहडे ही मांई भी त्या संसारा में भेजी; 19त्यारी तणी हाऊं आपणे आपा बे पवित्र करा, कि त्या भी सचाई रे साबे पवित्र करी लोड़ी।
सभी बिश्बासी बे प्रार्थना
20“हाऊं सीधी याही री तणी बिनती नांई करदअ, पर त्यारी तणी भी जोह याहा रे बचना रे साबे महा पेंदे बुशाह करना, 21कि त्या सबे एक हो; पिता जेडअ तूह महा में साहा, होर हाऊं ताह में साहा, तेहडे ही त्या हामा में हो, जासू का संसार बुशाह करे कि तांई ही हाऊं भेजुदअ साहा। 22सह महिमा जोह तांई महा बे दींनी मांई तयाबे दींनी, कि तेहडे ही एक हो कि हामें एक साहा, 23हाऊं त्यामें होर तूह महा में कि त्या सिद्ध होई करे आपु में एक होए, होर संसार ज़ाणा कि ताँईं ही हाऊं भेजु, होर तांई मांई संघे प्रेम डाहू तेहडा ही त्याहे संघे डाहू। 24हे बापू, हाऊं चाहंदा कि जूणा तांई महा बे दिने, ज़खे हाऊं साहा तखे त्या भी मांई संघे हो, कि त्या मेरी तेसा महिमा हेरे जोह तांई महा बे दींनी, किबेकि तांई संसारा री उत्पति का पहिले मांई संघे प्रेम डाहु। 25हे धर्मी बापू, संसारे हाऊं नांई ज़ाणु, पर मांई तूह जाणु; होर त्याहे भी जाणु कि तांई ही हाऊं भेजु। 26मांई तेरा ना तयाबे खोजू होर खोज़दअ रहलअ कि जोह प्रेम ताह मांई संघे थी, सह त्यामें रह, होर हाऊं त्यामें रहू।”
Terpilih Sekarang Ini:
यूहन्ना 17: ISJNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
