यूहन्ना 12

यीशु री जाघा में इत्र पाऊणा

(मत्ती 26.6-13; मरकुस 14.3-9)

1यीशु फसहा री छआ धियाड़ी पहिले बैतनिय्याह में आउअ ज़खे लाजर, जोह यीशु मुअंदे मे जिऊंद करू थी। 2तखे त्या तेऊबै खांणा तयार करू; होर मार्था सेवा करदी लागी दी थी, होर लाजर त्यामें एक, जोह तेऊ संघे रोटी खांदअ बेठदअ थी। 3तेबा मरियमे जटामांसी रा आधा सेर इत्र बहू मेहँगा तेल आँणी करे तेऊरी जाघा में लेसु, होर आपणी ज़टा संघे यीशु री जांघा टुशी; होर इत्रा री खुशवू संघे सारअ घर शोभलअ होऊ। 4पर तेऊरे चेले मेज़ा का यहूदा इस्करियोती ना रअ एक चेलअ जोह तेऊ ढाकणे बझयालण आलअ थी, बोलदअ लागअ, 5यह इत्र चीणी शअ दीनारा में बेचीं करे कंगाला बे किबे नांई दिना? 6तेऊ यह गलअ ऐतकी तणी बोली कि तेऊ कंगाला री चिन्ता थी, ऐतकी तणी कि सह चोर थी, होर तेऊ सेटा त्यारी झोली रहंदा थी, होर त्यामें जोह पाऊंदा थी, सह काढ़ा थी। 7पर यीशु ये बोलू, तेऊ रहंणे देआ। तेऊ मेरे गाड़ने री धियाड़ी बे डाहंणे देआ। 8किबेकि गरीब सदा तमे संघे रहंदा, पर हाऊं तमे संघे सदा नांई रहंणअं।

लाजरा रे बिरुद षड्यन्त्र

9जेबा यहूदी री बडी भीड़े ज़ाणु कि सह तखे साहा, तेबा त्या सीधी यीशु री बजा का नांई आए पर ऐतकी तणी भी आए कि लाजरा हेरे, जोह तेऊ मुएंदे मे का जिऊंदअ करू थी। 10तेबा प्रधान याजक लाजरा मारने री भी स्कीम बणाई। 11किबेकि तेऊरी बेजा का बहू यहूदी भी नाठे होर यीशु पैंदे बुशाह करू।

यरूशलेम में बिजय प्रबेश

(मत्ती 21.1-11; मरकुस 11.1-11; लूका 19.28-40)

12दूजी धयाडी बहू लोके जोह पर्बा बे आउए दे थी, यह शुणु कि यीशु यरूशलेमा बे ईहंणअं। 13ऐतकी तणी त्याहे खजूरा री डाली करी होर तेऊ संघे मिलदे निकते, होर पुकादे लागे, होशाना! धन्य इस्राएला रअ राजा, जोह परमेश्वरा रे ना का ईहंदा। 14जेबा यीशु गादी रअ शोहरू भेटअ; तेबा सह तेऊ पेंदे बेठअ, जेड़ा लिखुदा साहा, 15हे सिय्योना री शोहरिए नांई डरे; हेर, तेरअ राजा गाधे रे शोहरू पेंदे बेशी करे ईहंदा। 16तेऊरे चेले याह गला पहिले नांई समझी, पर यीशु री महिमा प्रकट होई तेबा त्या याद आई कि या गला तेऊरे बारे में लिखिदी थी, होर लोके तेऊ संघे एउ तरहा रा ब्यबहार करू।

17तेबा भिड़ा रे त्याहे लोके गुआही दिंनी, जोह तेऊ वक्ते तेऊ संघे थी, तेबा तेऊ लाजर कब्रा मेज़ा का शादी करे मुएंदे का जिऊंदअ करू। 18ऐतकी तणी लोका तेऊरे स्वागता बे आऊए, किबेकी त्याहे शुणु, कि तेऊ यह हेरानी आली निशाण रिहाई। 19तेबा फरीसी आपु में बोलू, सोचा ठीक कि थारे किछे नांई बणदा। हेरा, संसार तेऊ पीछे होई चालू।

यूनानी रा यीशु लोडणं

20जोह लोका तेऊ पर्बा में नमस्ते करदे आउए दे थी, त्यामें कुछ यूनानी थी, 21त्याहे गलीला रे बैतसैदा में रहंणे आले फिलिप्पुसा सेटा इच्छी करे प्रभु यीशु का बिनती करी, महाराजा, हामे यीशु संघे मिलणा चाहंदा। 22फिलिप्पुसे इच्छी करे अन्द्रियासा बे बोलू, तेबा अन्द्रियास होर फिलिप्पुसा सेटा नाहीं करे यीशु बे बोलू। 23ऐता पैंदे यीशु तयाबे बोलू, सह बक्त आउआ कि मणशा रे शोहरू री महिमा हो। 24हाऊं तमाबे सच-सच बोला कि तेबरे तणी गिहू रअ दाणअं जमीना में पड़ी करे नांई मरदअ, सह केलअ रहंदा; पर जेबा मरा, तेबा सह बहू फला आणा। 25जोह आपणे प्राणा शोभला प्यारे जाणा, सह तेउ खोउंदा, होर जोह ऐऊ संसारा में आपणे प्राणा अप्रिय जाणा, तेउ अनन्त जीबना री तणी तेऊरी रक्षा करणी। 26अगर कोई मेरी सेवा करे, तेबा महा पीछे हूँणे; होर ज़खे हाऊं साहा, तखे मेरअ सेबक भी हूँणअं। अगर कोई मेरी सेवा करे, तेबा बापू तेऊरा आदर करणा।

क्रुसा री मउती रा इशारा

27ऐबा मेरी आत्मा परेशान साहा। ऐतकी तणी ऐबा हाऊं कैह बोलू? हे बापू, महा ऐसा घड़ी का बचा? किबेकि हाऊ एसी बजा का एसा घड़ी में पूजअ आसा। 28हे बापू, आपणे ना री महिमा कर। तेबा यह स्वर्गा का आकाशबाणी होई, मांई तेऊरी महिमा करी दी आसा, होर भी करणी। 29तेबा जोह लोका खड़े होई करे शूणदे लागदे थी, त्याहे बोलू कि बादल गरजू। दूजे बोलू, कोई स्वर्गदूत तेऊबै बोलू। 30ऐता में यीशु बोलू, यह शब्द महा बे नांई आंधअ, पर तमाबे आउअ दअ साहा 31ऐबा एउ संसारा रा न्याय हुँदा, ऐबा ऐऊ संसारा रअ सरदार काढणअं; 32होर अगर धरती पैंदा का उछटअ चढ़ाऊणअं, तेबा सभे आपु सेटा बे खीचणे। 33ऐडा बोली करे तेऊ यह प्रकट करू कि सह केडी मऊती मरणअं। 34ऐता में लोके तेऊबै बोलू, हामें व्यवस्था री यह गल शूणी दी साहा कि मसीह सदा रहंणअं, तेबा तूह किबे बोला कि मणशा रअ शोहरू उछटे में चड़ाऊणअं जरूरी साहा? यह मणशा रअ शोहरू कुण साहा? 35यीशु तयाबे बोलू, ज्योति ऐबा थोड़ी देरी तणी तमा मेंझे साहा। जेबरे तणी ज्योति तमे संघे साहा तेबरे तणी जिंदगी चलाउन्दे लागा, ऐडा ना होए कि निहारा तमा घेरे; जोह निहारे में हाँडा सह नांई ज़ाणदअ कि केसी हांडणा। 36जेबरे तणी ज्योति तमे संघे साहा, ज्योति पेंदे बुशाह करा कि तमे ज्योति रे शोहरू बणा। याह गल्लां बोली करे यीशु नाठअ होर त्याह का गोज़ी रहू।

यहूदी रा अबुशाह में बणी रहंणा

37या गला बोली करे यीशु नाठअ होर त्याका गोझी रहू, तेऊ त्यारे सामने एतरे चिन्ह रिहाई, तेबा भी त्याहे तेऊ पेंदे बुशाह नांई करू; 38कि नबी यशायाह भविष्यद्वक्त रा बचन पूरा हो जोह तेऊ बोलू हे परमेश्वर, कासुये महारे समाचारा रा बुशाह करू? होर परमेश्वर रा भुजबल कासु पैंदे प्रकट होऊ दा? 39एसा बजा का त्या बुशाह करी नाँई सके, किबेकि यशायाह यह भी बोलुदाआ। 40तेऊ त्यारी आछी काणी, होर त्यारा मन पाका करू; कई ऐढा नांई होए कि होर मना का समझ, होर फिरे, होर हाऊं त्या ठीक करे। 41यशायाह या गला ऐतकी तणी बोली कि तेऊरी महिमा हेरी, होर तेऊरे बारे में गला करी। 42तेबा भी सरदारा मेज़ा का बहू कै तेऊ पेंदे बुशाह करू, पर फरीसी री बजा कअ प्रकटा में नांई मनदे थी, कई ऐडा होए कि त्या प्रार्थना घरा मेंज़ा का काडे। 43किबेकि मणशा री महिमा त्याह परमेश्वरा री प्रशंसा का ज्यादा प्यारी लागा थी।

यीशु रे बचन न्याय रा आधार

44यीशु पुकारी करे बोलू, जोह महा पेंदे बुशाह करा, सह महा में नांई पर मेरे भेजणअ आले में बुशाह करा। 45होर जोह महा हेरा, सह मेरे भेजणआले हेरा। 46हाऊं संसारा में ज्योति होई करे आउअद, कि जोह कोई महा में बुशाह करी करे निहारे में रहे। 47अगर कोई मेरी गला शूणी करे नांई मने, तेबा हाऊं तेऊ दोषी नांई डाहंदअ; किबेकि हाऊं संसारा बे दोषी ठराऊणे बे नांई, पर संसारा रे उद्धार करने बे आउअद साहा। 48जोह महा तुच्छ जाणा होर मेरी गला ग्रहण करदा तेऊ दोषी ठराऊण आल़ एक ही साहा मतलब जोह बचन मांई बोलुदअ, तूह पिछले धयाडे सह दोषी ठराऊणअं। 49किबेकी मांई आपणी तरफा का गला नांई करी; पर बापू जूणी हाऊं भेजु तेऊ महा बे आज्ञा दिनी दी कि कैह-कैह बोलू? 50होर हाऊं जाणा कि तेऊरी आज्ञा अनन्त जीबन साहा। ऐतकी तणी जोह कुछ हाऊं बोला, हेरी बापू महा बे बोलुदा तेडा ही बोला।

Terpilih Sekarang Ini:

यूहन्ना 12: ISJNT

Highlight

Kongsi

Salin