Luk 1
1
Luke alaka sanguvu yedzi
1Kuŋwu Tofili,
Batu beyitsi bamikɨse ne utende mamvu mesuta tima ye besu. 2Bangu betende ni me besu beyuka ne batu bedze mebandu, beyene mamvu mamu ne mɨsa me bangu, ye bangu beyikwe belakɨsi be iwowe dze Nzambi. 3Nami ma yebise suŋwule mesi mesuta, yami meyene uve ne utende we Tofili mamvu mamu. 4Yayu nowe we yiba witi bilakɨsili bye belakɨse we byedzi ni umbu.
Betse dziya Zambatisi nivi
5Ndili ye Elodi edze kani we Zudee, yedze ne kani we ndaku ye Nzambi we kumvu Zakali, wangu edze ni we yimvu ye Abyase, ŋwadzi wedzi Zabeti edze ni we imbisa dze Alo. 6Bangu besi bole bedze ni batu betelee busu ve Nzambi, bangu bedze ne ukuuna mendonzi mesi ne bitsɨla byesi bye Kuŋwu Nzambi. 7Ni bangu bedze nde baana, ne Zabeti edze kumba, bangu besi bole bedze badzʉna.
8Vʉsa votu, Zakali edze ne upika sadzi ye Nzambi, yedze ni vʉsa ve yimvu ye bangu. 9Nda bekani be ndaku ye Nzambi bedze ne upika ne kala, ye betobo Zakali ne unyinzile se liyi ye ndaku ye Nzambi ye umpende, ne utsʉmba yila ye sulu nda ye paka. 10Ndili ye bedze ne utsʉmba yila ye sulu nda ye paka, batu besi bedze ituna bedze ne umbondo. 11Palikɨse, ye tuma we Nzambi eluma elaka Zakali nyulu, untele ne boko ye sangwe ye tsɨya ye Nzambi kwele ye bitsʉmba yila ye sulu nda ye paka. 12Ye Zakali eyene tuma we Nzambi ngazemoyi ya kwata wangu, yedzi eyene bongo. 13Tuma we Nzambi nedzi ati: «We nde yene bongo Zakali, umbondu ŋwowe Nzambi ayakwe, ŋwadzi wowe Zabeti atse dziya ŋwana we ibaka, we tse luka wangu kumvu ye Zan. 14We tse dze ne itsɨsa dzineni, ne batu beyitsi betse dze ne itsɨsa, ye bitse dziya ŋwana wowe. 15Ni wangu atse dze ni muutu we uneni busu ve Kuŋwu, wangu nde tse noto mekaka me melaku mesi me kamve. Fudzu ye Umpende yetse lundise wangu asake se moyi ŋwe mama wedzi. 16Wangu atse ye vʉtise baana be Izayeli beyitsi, kwele ye kuŋwu Nzambi we bangu. 17Wangu atse ya nda Muutu we Nzambi, ne fudzu ne singa ye Eli, ne uvʉtise milima mye betata kwele ye baana. Wangu atse yikwile milima mye batu be nde kuuna Nzambi, yayu bangu betsimene telee nda bekani. Wangu atse lakɨse batu bitse pika sadzi ye Kuŋwu.» 18Zakali asuŋwule ne tuma we Nzambi ati: «Me tse yiba nivi? Me ni dzʉnu, ne ŋwadzi wami dzʉnu.» 19Tuma we Nzambi akalule nedzi ati: «Me ni Gabɨlyele uŋdzanzi we Nzambi, wangu ni we meluma me, ne uya tanda we unsisili umve. 20Ni nda we mesuna me, wa kɨtse dze ni tsɨna. Wa kɨtse wowe si vʉsa ve mamvu mami me tanda we mamu mitse ya. Ee mami me tanda mamu metse ya ni ndili ye Nzambi etanda.» 21Ndili mene yayu, batu bedze ne ubuka Zakali ituna bangu bakima ne Zakali enyuŋwe se ndaku ye Nzambi. 22Ni ndili yedzi epula, wangu eke tuka vele wowe ne bangu ye bangu beyiba ati, Nzambi alaka Zakali yila se ndaku yedzi. Wangu edze ne uwowe ne bangu yani ne milemvu ayikwe tsɨna. 23Zakali amana pika sadzi, yedzi evʉtse sombo yedzi. 24Yumana vavu ŋwadzi wedzi Zabeti abapa dzimi, Zabeti asodze nyulu besunzi betanyi nde pula. Yedzi etanda ati: 25«Yene me kuŋwu mepika me, me dze ne sonyi busu ve batu bami, ni velolo Nzambi ayene me tsesi wangu ananguse me sonyi.»
Tuma we Nzambi aya tanda nda bitse dziya Zezu
26Zabeti adzi ne dzimi dze besunzi untuba, ye Nzambi eluma tuma wedzi we kumvu Gabɨlyele, se ngundu ye Ngalilee ye kumvu Nazaleti. 27Kwele ye ŋwana we ŋwatu we kumvu Maliya witse yikwe ŋwadzi we Zozefi. Zozefi edze ni we imbisa dze Davidi. 28Tuma we Nzambi anyinzile se ndaku ye Maliya anyusile wangu ati: «We dzi ne polo, Kuŋwu Nzambi adzi nowe.» 29Maliya ayene nganzemoyi, yedzi eyuka me tuma we Nzambi etanda wangu. Ye Maliya etanda ati: «Yedzi inyusile me tuu niyi?» 30Tuma we Nzambi ne Maliya ati: «We nde yene bongo, we dzi ne polo busu ve Nzambi. 31Me tanda we, we tse bapa dzimi, we tse dziya ŋwana we ibaka, we tse luka wangu kumvu ye Zezu. 32Wangu atse dze ni uneni, betse banga wangu ni Ŋwana we Nzambi we ikulu amene, kuŋwu Nzambi atse kaba wangu ukani ve koko wedzi Davidi. 33Wangu atse kʉma umbu ne umbu se ikaka dze batu be Izayeli likʉma ledzi nde tse siya.» 34Maliya ne tuma we Nzambi ati: «Me ni untsʉba, ni me tse bapa dzimi nivi?» 35Tuma we Nzambi nedzi ati: «Fudzu ye Umpende yetse ya kule yowe ne singa ye Nzambi we ikulu amene, yetse vʉngule we nda sisiŋwu, yayu Ŋwana wowe itse dziya atse dze ni umpende, betse banga wangu ni Ŋwana we Nzambi. 36Me tanda we, ne Zabeti we yali yowe adzi ne dzimi dze ŋwana we ibaka se udzʉnu, we batu besi bedze ne ubanga kumba, adzi ne dzimi dze besundzi untuba. 37Ni nde ye Nzambi iwata pika.» 38Maliya ati: «Me ni uŋdzanzi we Kuŋwu, Nzambi apika me nda mowe me tanda.» Ye tuma we Nzambi evʉtse.
Maliya atse yene Zabeti
39Bemana vavu, Maliya atse mesadzi mesadzi se bikudzi bye ngundu yotu ye Zuda. 40Maliya anyinzile se ndaku ye Zakali anyusile Zabeti. 41Ye Zabeti eyuka nda Maliya enyusile wangu, ŋwana anyingene se moyi, ye Fudzu ye Umpende ye lundise wangu. 42Zabeti awowe yanga yanga ati: «Nzambi akaba we meve tima ye baatu besi, akaba ne Ŋwana widzi se moyi ŋwowe. 43Me niza, we mama we kuŋwu wami iye yene. 44Yowe me nyusile me, ŋwana anyingene ne itsɨsa dzesi se moyi ŋwami. 45We dzi ne itsɨsa, nowe idzi ne ivʉkidze ne Kuŋwu, ne medzi etanda we metse ya.»
Limvu le Maliya
46Maliya ati:
«Me kʉmise Nzambi ne unlima ŋwami ŋwesi.
47Unlima ŋwami ŋwedzi se itsɨsa, utsɨna ne Nzambi unlungisi wami.
48Wangu ayivɨle me uŋdzanzi wedzi, we nde yulu.
Ee mendili mesi batu betse tanda me, we dzi se itsɨsa.
49Ni Nzambi we singa apika me mamvu meneni,
wangu ni Nzambi we umpende.
50Wangu adzi ne tsesi ye batu bikuuna wangu mendili mesi.
51Wangu apika ne singa yiyitsi,
batu bedze ne udzoko ati, bangu batakwe boko,
wangu apanza bangu.
52Wangu ananguse bekani se bibuma bye ukuŋwu,
Wangu atumbidze be uŋkuuna ikulu.
53Wangu akaba be nde untamvu, untamvu,
wangu avʉtise bedze ne untamvu meboko sazile.
54Wangu aya yamene batu be Izayeli bedzanzi bedzi.
wangu eke dzimbise ne ulaka meve medzi,
55Yedze si nda wangu edzika ndaka
ne bekoko be besu bekala, Ablaami
ne be imbisa dzedzi umbu ne umbu.»
56Maliya adze bane Zabeti besunzi besatu,
yedzi evʉtse sombo yedzi.
Nda bedziya Zambatisi
57Ndili ye Zabeti ye udziya ya kalwe, wangu adziya ŋwana we ibaka. 58Batu bidzi konedzi ne yali yedzi, beyuka ati, Kuŋwu apika wangu mamvu meve, ye bangu besi betsɨsa. 59Bemana dziya ŋwana, vʉsa ve uŋwambi bangu baya kwise ŋwana sakwe. Bangu bafumba luka ŋwana kumvu ye tata wedzi Zakali. 60Mama ati: «Nyee, kumvu ye ŋwana ni Zambatisi.» 61Bangu nedzi ati: «Nde muutu widzi ne kumvu yayu se yali yowe.» 62Ye bangu bewesile tata ne usuŋwule wangu ati: «Kumvu yowe iluka ŋwana niza.» 63Zakali adzuka liyi ye ibaya atende kumvu ye ŋwana ati: «Kumvu ye ŋwana ni Zambatisi.» Bangu besi bakima. 64Ndili mene mbotu, Zakali wedze tsɨna awowe, yedzi ekʉmise Nzambi. 65Batu bedze tima yayu bayene bongo, ne batu bedze se ilongo dze Zudee dze bikudzi, bedze ne uwowe ne mamvu mamu mesi. 66Besi bedze ne uyuka mamvu mamu babata se milima mye bangu, ye bangu betse ne uwowe ati: «Ayu ŋwana atse dze nivi?» Singa ye Nzambi yedzi nedzi umbu amene.
Limvu le Zakali
67Fudzu ye Umpende yalundise Zakali tata we ŋwana.
Yedzi ewowe nda Muutu we Nzambi ati:
68«Yakayi bekʉmise Kuŋwu Nzambi, we batu be Izayeli.
Nedzi iya yamene batu bedzi, ne lungise bangu.
69Wangu akaba besu unlungisi we singa, we imbisa dze Davidi uŋdzanzi wedzi.
70Yedzi ni medzi etanda ne kala ne Batu be Nzambi bemipende.» 71Wangu etanda ati:
«Wangu atse lungise besu se meboko me batu biwunda besu, ne be nde tondo besu.
72Wangu edze uve ne bekoko be bebe, velolo avele yivɨle umbatsi ve ndimvu ve umpende, ve bangu bekuta.»
73Yedze ni ndaka ye Nzambi edzika ne koko we besu Ablaami.
74Wangu ekuta ndaka nedzi ati: «Me tse pinule baana bowe se meboko me batu biluna bangu,
yayu bangu betse tuka bondo me nde yene bongo.
75Bangu betse tuka dze mipende, ne telee
busu vami masi mesi me lɨbiku le bangu.»
76Zakali avele tanda ati:
«We ŋwana wami betse banga we ni Muutu we
Nzambi we ikulu amene. We tse landa busu
ve Kuŋwu ne uyebise wangu peyi.
77Yene mowe itse tanda ne batu bedzi,
Nzambi alungise beyi, aboloko beyi mamvu mebi.
78Ee Nzambi we besu adzi ni kate uve amene.
Wangu aluma besu ukwalala viyinga ikulu nda musa ŋwibala ne suka.
79Ni ŋwangu ŋwetse ya nanguse batu bidzi se pinzi ne udzika bangu se ukwalala
ne bidzi ne bongo ve lɨku. Yayu ŋwangu ŋwe bapa bebe se peyi ye itavu.»
80Ŋwana anene ne sayi ne sayi ayikwe butu, wangu adze ni se ikanye, nzii ne vʉsa vedzi ebanda ne utandaka misisili mye Nzambi ne batu be Izayeli.
Terpilih Sekarang Ini:
Luk 1: WUM
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
