लुका 21
21
के सिका बेबालको भेति
(मर्कु 12:41-44)
1येसु खाङलाउ आधिमि धनि द्याङगेलाइ ता-ताइको भेति मुन्दिरको दान बाकसता ह्वाका तिङहि। 2वा एमि गरिब के सिका बेबालहेङ इन्ता न्हे ताका तामाको थुरि ह्वाका तिङहि। 3येसु दोअ्हि, जातिङ भारि का नेलाइहेङ दोअ्खा, उङको गरिब के सिका बेबाल आरु झाराङ खाङतेङ हेन्जा पिका हि। 4का एसा दोअ्खा हाइपालिपानु आरुते ताइको दाइका धनसो आधे चढाइका हि कालाउ इदोइ के सिका गरिब बेबाल चाहि गरिब जेङतेङ बुङ ताइको खाचोको भाअ्सिङ चालाइका ताका चाढाइहि!
न्हुसोको लोका दिनाको चिन्हागेलाइ
(मति 24:1-41; मर्कु 13:1-31)
5आधिमि चात्यागेलाइ मुन्दिरको बिसोइता काथा दोअ्काताङ हिघाहि। इम्बालाइ दोअ्हि, रेम-रेम्का उन्ठुइसो बानाइका इङको एनोङ सुन्दर परमेस्वरको मुन्दिर हि। इङको मुन्दिरता, परमेस्वरहेङ चढाइका इङको रेम-रेम्का आनेमानेगेलाइ खाङसु। 6कालाउ येसु दोअ्हि नेलाइ जेदोङ तिङतेङ हिसुन्हा गोताङ आनेमानेदोङ नासातेङ हानाङ, कालाउ इन्सिका सोमोइ ल्वाङ जेलाउ एनोङ उन्ठुइता भेनेङ उन्ठुइ माह्याङ, इङको गोताङ भाअ्पातावा।
7कालाउ वाको चात्यागेलाइ येसुहेङ हिअ्हि, गुरु ज्यु इदोइ गोताङ हेलाउ जेनाङ? कालाउ इङको काथा जेङलि तोमलाउ केलाइ हेसा थाहा गिलि द्वाङ?
8येसु दोअ्हि, जागितेङ हिसु, नेलाइहेङ हासु बुङ धाताइलि माद्वाको। हाइपालिपानु हेन्जा द्याङगेलाइ काङको मिङ ल्होतेङ ल्वावा कालाउ इम्बालाइ द्वावा का दोङ ख्रिस्ट सोमोइ चेम्ताङ लोका हि, दोअ्तेङ द्वावा इम्बालाइको लेसारा मापिताइसु। 9जेलाउ नेलाइ धुम कालाउ धुमगेलाइको जोग्रेकागेलाइको बिसोइता हिङस्वाना माअ्थिसु हाइपालिपानु इदोइ घाटानागेलाइ जेङलि गोयाङ, कालाउ आम्तिम चाहि ओदोङ घुरि माजेनाङ।
10जेलाउ येसु इम्बालाइहेङ दोअ्हि, एनोङ जातिको बिरोधता भेनेङ जातिको द्याङगेलाइ बिरोध पावा कालाउ एनोङ सारभि भेनेङ सारभिको बिरोध पावा। 11बा-बार्का भुइचाल हानावा, कालाउ जोसो ओसोङ लालाइगिल्लावा, कालाउ माहामारि ल्वावा। बादेलता थिलि गोइका घाटानागेलाइ जेनावा कालाउ स्वर्गसो बा-बार्का चिन्हागेलाइ जेनावा।
12कालाउ इदोइ घाटानागेलाइ जेङलि खान्तेङ लाम्फा द्याङगेलाइ काङको मिङको कारन नेलाइहेङ रिमावा, साताइयावा कालाउ चाउघारा साअ्गेलाइता चुम्पुतेङ द्वालिहोइ म्हेतावा कालाउ झ्यालखानाता ह्वातावा। आरोङ इम्बालाइ नेलाइहेङ राजा कालाउ बार्का हाकिमगेलाइको आगाता जाअ्पावा। 13कालाउ इदोइ पाहासो काङको बिसोइता जेदोङ दोअ्लि गोइका इङको मौका बुङ निङस्वाना। 14नेलाइ ताइमिहेङ बान्चिपालिको भाअ्सिङ हाइ दोअ्लि गोयाङ इङको बिसोइता चिन्ता पालि मागोइयाङ। 15हाइपालिपानु का नेलाइहेङ इसिका काथागेलाइ घुरिपालि बुद्दि प्याङका, कि नेलाइको बिरोधिगेलाइको नुइ तुपापियाङका। 16नेलाइको आबा-आमाइ, दादा ओनेगेलाइ, ताइकोगेलाइ, कालाउ सानाइतिगेलाइ सुधाङ नेलाइहेङ प्रसासनता चुम्पावा, कालाउ इम्बालाइ नेलाइसो आधिमिहेङ सेअ्तावा बुङ। 17झाराङ काङको मिङको कारन नेलाइहेङ खाङलि माकितावा। 18कालाउ बुङ इदोइ गोताङ काथाहोइ नाङको पुरिङको एनोङ बुङ पुसुङ माहुलाङ। 19नेलाइको खाङधुरिको कारनहोइ इदोइ गोताङ बिपतिगेलाइसो प्रान बान्चियावा।
यरुसेलेम सहर नासाका
(मति 24:15-21; मर्कु 13:14-19)
20जेलाउ नेलाइ यरुसेलेम सहरहेङ द्यापाहाङ सिपालाइहोइ गोराइका निङस्वाना। कालाउ नेलाइ थाहा गिअ्स्वाना कि यरुसेलेम सहरको बिनासको बेला चेम्ताङ लोका हि। 21जेलाउ यहुदिया जिल्लाता हिकालाइ तिकार भारि खाअ्ताको, कालाउ सहर लिता हिकालाइ बाहार खाअ्ताको, कालाउ बाहार देरा भारि हिकालाइ सहर लिता मादुलाको। 22हाइपालिपानु इङको दिनागेलाइ जेलाउ परमेस्वर ताइको द्याङगेलाइहेङ साजाइ पियाङ केलाइको धर्मसास्तरता लेखेका गोताङ काथागेलाइ पुरा जेनावा। 23इङको सोमोइ उङको बेबालाइको भाअ्सिङ थिलि गोइका जेनाङ जाइ गान्धि तेअ्का हि कालाउ ओबालाइको भाअ्सिङ जाइ दोङ जामालहेङ दुदु चुपाका हि! ओबालाइ खाअ्लि हेन्जा मुसकिल जेनावा। इङको सारभि भरि मेनाङ दुख कस्ट जेनाङ कालाउ उङको द्याङगेलाइ ह्रुता क्रोड जेनाङ। 24आधिमि द्याङगेलाइहेङ सिपालाइसो सेअ्तावा, आधिमिहेङ कैदि बानाइतेङ गोताङ सारभिगेलाइता चुम्पावा। यरुसेलेमको पबित्तरो सहरता खान्धुराइ यहुदिगेलाइको बेला माजेङपा भरि इम्बालाइको पाइतालाहोइ याङगिल्तेङ हिगिल्लावा।
25माअ्थिसु बेला, तालि, फुरुगेलाइता बुङ चिन्हागेलाइ घाटानागेलाइ घतेयावा। कालाउ प्रिथिबिता गोताङ जाति-जातिगेलाइ आपतता परियावा। समुन्द्रको साल्काका गुरगुराइयावा कालाउ उल्ला-उल्लातेङ लोका साल्कागेलाइसो गोताङ सारभिगेलाइ सङकटता परियावा। 26द्याङगेलाइ थिचोङतावा, सुमिङता एला हाइ जेनाङ वाला दोअ्तेङ पिरहोइ इम्बालाइ झाका लोनावा, आकासको सरबुङगेलाइ हेङगालाइन्हावा। 27कालाउ न्हुसो द्याङगेलाइ का द्याङको चानहेङ सरबुङ कालाउ बार्का महिमा दोफा बादेल ह्रुता लोकाताङ पाका तिङनाङ। 28जेलाउ इदोइ गोताङ काथागेलाइ लाम्फा जेङलि तेनावा, कालाउ तियार जेङसु कालाउ हाउसाइसु, हाइपालिपानु नेलाइहेङ धेमाङ परमेस्वर बान्चिपाङ।
लाब्राको सिङसो सिक्स्या
(मति 24:32-35; मर्कु 13:28-31)
29कालाउ न्हुसो येसु इसिका एनोङ निङपिका काथा दोअ्हि इदोइ गोताङ सिङगेलाइहेङ खाङसु, लाब्राको सिङ याको भाअ्सिङ रेम्का उधाहरन। 30जेलाउ इङको आरोङ दोरावा कालाउ सिङको दालेङगेलाइ दोरतेङ भार्लि तोमावा, नेलाइहेङ थाहा जेनावा कि ग्रिस्म रितु भेरपाङ लोहि। 31एन्साङ पातेङ जेलाउ नेलाइ इदोइ काथागेलाइ जेङका तिङस्वाना, कालाउ नेलाइहेङ या थाहा जेनाको कि परमेस्वरको सासन भेरपाङ लोलि तोम्का हि दोअ्का गिसु।
32का नेलाइहेङ जातिङ भारि दोअ्खा, इदोइ पुस्ताको द्याङगेलाइ जेलाउ थेकापा बान्चितेङ ह्यावा कालाउ इदोइ गोताङ घाटानागेलाइ घतियावा। 33आकास कालाउ प्रिथिबि माअ्तेङ हानावा, कालाउ काङको बचन मोअ्तेङ मान्हाङ।
34चङख हिसु, नाङको सोमोइ भोग-बिलासता, नासातावा कालाउ इदोइ सुमिङको चिन्तागेलाइता खेर माथाइगिल। हाइपालिपानु का इङको दिनाता नेलाइ माचिताइका बेलाता ल्वाङका। 35हाइपालिपानु एसापा दोङ सारा प्रिथिबिता हिकालाइ झाराङ ह्रुता इदोइ ल्वाङ। 36कालाउ चङख हिसु, आइ लागिका इदोइ गोताङ थिलि गोइका काथागेलाइसो बान्चिलि कालाउ का द्याङको चानको आगाता न्यायको दिनाता जाअ्लि योग्य जेङलिको भाअ्सिङ दिनाङ प्रार्थाना पातेङ हिसु।
37दिनाङ-दिनाङ येसु मुन्दिरता सिक्स्या पिघाहि, कालाउ न्हिसिन्ता चाहि यरुसेलेम सहरसो बाहार ओल्हेतेङ जैतुन दोअ्का तिकारता बासा हिलि हानिघाहि। 38दिनाङ ह्रिमा हेन्जा द्याङगेलाइ वाको सिक्स्या हिङलि मुन्दिरता लोघाखे।
Terpilih Sekarang Ini:
लुका 21: DHINT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
