मत्ती 7
7
फोकोकी दोष माय्हानी
(लुका ६:३७-३८,४१-४२)
1येशूये फेरी डेया, “फोकोकी दोष मालैडीनी होटबाटै नाखुरीक र दोषी माठहरीस्ले।” 2हीजैडेनाङ नाखुरीकै कुटजाट्न अरुकी दोषी ठहरीले, होटजाट्न न नाखुरीक र दोषी ठहरीस्ले। नाखुरीकै अरुकी कुटजाट्न जाप्ले, होटजाट्न न नाखुरीककी र जाप्ले। 3“हीजै नाको अरु भर्मीयो मीमीकुङ कसीङ्गर चहीँ डाङ्ले, टर नाकुङ लहो मीमीकाङ लेच मुढा चहीँ हीजै थाहा माडीन्ल्हे? 4लहो मीमीकुङ मुढा माडाङ्चये अरु भर्मीकी कुटजाट्न डेकी य्होक्ले, ‘ङाकी नुओ मीमीकुङ कसीङ्गर डोन्की योहो’? 5ए कपटीको! पहीला लहो मीमीकुङ मुढा डोन्नी, टब अरुओ मीमीकीङ कसीङ्गर डोन्की नाकै छ्याङ्गै डाङ्की य्होक्ले।
6“ही ठोक पवित्र ले होसे चीउकोलाक माय्हानी हीजैडेनाङ होचे ल्हेसार नाखुरीककी न झम्टडीस्ले। र लहो मोटीको वाककुङ अगाडी माल्होनी, नभा च होखुरीकुङ मीकुये पीचीले।
ङेन्ही, पानी र ढ्वाक-ढ्वाक जाट्नी
(लुका ११:९-१३)
7“ङेन्ही र नाखुरीककी याल्हे, पानी र नाखुरीकै डुप्ले, ढ्वाक-ढ्वाक जाट्नी र नाखुरीकुङ लागी गालाम फोस्ले। 8हीजैडेनाङ सुये ङेल्हे होसकी याल्हे, सुये पाले, होचे डुप्ले, सुये ढ्वाक-ढ्वाक जाट्ले, होच्यो लागी गालाम फोस्ले। 9ही नाखुरीक मध्याङ कुसे बोइ औँला लहो लेन्जा मीजै रोटो ङेन्हाङ ल्हुङ याल्हे? 10की डीस्या ङेन्हाङ होसकी बुल याल्हे? 11होटबाटै नाखुरीक दुष्ट छानार च लहो मीजा कोलाक सेछ ठोकको याखी वार्ल्हे डेनाङ, झन स्वर्गाङ लेच नाखुरीकुङ बोये कुडीक वास्टै जाट्न होसकोखाटा ङेछकोलाक मजुङ ठोकको याल्हे।
12“भर्मीकै नाखुरीक खाटा कुङ्च व्यवहार जाट्ख्यौ डेच नाखुरीक मीमन जाट्ले, नाखुरीकै र होखुरीक खाटा होङ्च न व्यवहार जाट्नी। हीजैडेनाङ मोसौ व्यवस्थाङ र अगमवक्ताकै याछ मुख्य शिक्षाको इसे न हो।
मार्जा गालाम र मार्जा लाम
(लुका १३:२४)
13“मार्जा गालाम लकीङ भीत्री पर्नी, हीजैडेनाङ बाड्को गालाम र फराकीलो लामै च नरकाङ टाहाक्ले र इसे लामीङ नुङ्चको च वास्टै छान्ले। 14टर मार्जा गालाम र अप्ठ्यारो लामै जीवनाङ टाहाक्ले। इसे लाम डुप्चको चहीँ ठोरै छान्ले।
भर्मी होच्यो कामलकीङ न चीन्डीले
(लुका ६:४३-४६; १३:२५-२७)
15“झुटा अगमवक्ताको लकीङ होसीयार छान्नी। होखुरीक चहीँ भेडै ल्याक्च न रुप लार राल्हे, टर भीत्री चहीँ बीर्हीमसेच सीलाको ल्याक्च न छान्ले। 16नाखुरीकै होखुरीककी होखुरीकुङ काम लकीङ चीन्डीले। ही जुकर्याकौ म्यार्टुङाङ अङ्गुर स्याले र? न ट सीउँडीयो म्यार्टुङाङ अन्जीर न स्याले। 17होटजाट्न न पट्ट न सेछ म्यार्टुङै सेछ न मीस्या स्याटाक्ले। टर मासेछ म्यार्टुङै मासेछ न मीस्या स्याटाक्ले। 18सेछ म्यार्टुङै मासेछ मीस्या स्याटाक्की माय्होक्ले, न ट मासेछ म्यार्टुङै सेछ मीस्या स्याटाक्की य्होक्ले। 19सेछ मीस्या मास्याटाक्च पट्ट न म्यार्टुङको चेयार फुस्ले, होटै म्हेयाङ लोम्ह काले। 20होटजाट्न न होसे झुटो अगमवक्ताकोलाक होखुरीकुङ काम लकीङ न चीन्डीले।
21“ङाकी ‘प्रभु, प्रभु’ डेच पट्ट न स्वर्गौ राज्याङ पर्की माडुप्ले। सुये स्वर्गाङ लेच ङौ बोयो इच्छा अनुसार काम जाट्ले होखुरीक मट्टै स्वर्गौ राज्याङ पर्की डुप्ले। 22न्यायौ डीनाङ ङाकी वास्टै जनै डेले, ‘प्रभु, ए प्रभु, ही कानै नाकुङ म्यार्मीनाङ अगमवाणी माङाका र? नाकुङ म्यार्मीनाङ भूतको माखेट्डीया र? कानै नाकुङ म्यार्मीनाङ वास्टै अचम्मौ कामको माजाटा र?’ 23अनी होडीक बेला ङा होखुरीककी डेले, ‘ए दुष्ट काम जाट्चको, ङा नाखुरीककी माव्हार्ले, ङा लकीङ लोस नुङ्नी!’
नीस खाल्या जग
(लुका ६:४७-४९)
24“होटबाटै सुये इसे ङौ वचन सेयार होसे अनुसार काम जाट्ले, होसे चहीँ काट बुद्धि लेच भर्मी ल्याक्च न हो, होचे लहो इम चट्टान मीटाक खासा। 25अनी नामास राहा, भल राहा, नाम्सु क्योसा र होसे इमाङ ठोका, टर होसे इम माफुटा। हीजैडेनाङ होसे इम चट्टान मीटाक खास्नन्या। 26टर सुये इसे ङौ वचन सेयार मामन्डीले, होसे चहीँ काट जना मुर्ख भर्मी ल्याक्च न हो, होचे लहो इम बालुवा मीटाक खासा। 27नामास राहा, भल राहा, नाम्सु क्योसा र होसे इमाङ ठोका र होसे इम फुटा।”
28येशूये इसे कुरा डेम भ्यारखीङ भर्मीकुङ भीड होसकुङ शिक्षा सेयार छक्क पर्या। 29हीजैडेनाङ होसकै होखुरीककी धर्मगुरुकै लेखा होइन टर अधिकार लेच भर्मीये लेखा न पाहाक्न्या।
Terpilih Sekarang Ini:
मत्ती 7: EMGP
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2024 (Active), Wycliffe Bible Translators, Inc. All rights reserved.
