लूका 19
19
कर सोट्च जखायस
1येशू यरीहो सहरौ लाम छानार नुङ्ङन लेया। 2होला जखायस म्यार्मीन लेच काट जना धनी भर्मी लेया। होसे कर सोट्चको मध्याङ बाड्को हाकिम लेया। 3होचे येशूकी ङोस्की मीमन जाटा। तर होसे टेम्छ लेचबाटै र वास्टै भर्मीकुङ भीडै जाट्नाङ होचे येशूकी डाङ्की माह्योका। 4होटबाटै येशूकी ङोस्की खेरार काट अञ्जीरौ म्यार्टुङाङ काल्हा। येशू होसे न लाम छान्चै राम्हन लेया। 5होला टाह्राछ न्हुइङ येशूये ढेम्लाक ङोस्चै जखायसकी डेया, “ए जखायस, छिटो म्हाका झाल्नी! छीनी ङा नाकुङ इमाङ बास ङुले।” 6जखायस म्यार्टुङ लकीङ तुरुन्तै म्हाका झाला र माह्राङ्छै येशूकी लहो इमाङ आल्हा। 7इसे डाङार पट्ट न भर्मीको गन-गन जाट्चै डेकी ठाला, “इसे भर्मी च पापी भर्मीयो इमाङ टी बास ङुकी नुङ्ङने ट!” 8तर जखायस प्रभुओ अगाडि टोङ्हार डेया, “सेनी न हजुर, अब ङा लहो सम्पत्तियो आधा भाग गरीबकोलाक पुङ्ङ याल्हे। होटै सुकीर कर लैडीयार हीर लामे डेनाङ ङा होच्यो बुली गुणा ल्हेट्न याल्हे।” 9येशूये होसकी इट डेया, “छीनी इसे इमाङ मुक्ति राम्हने, हीजैडेनाङ जखायस र अब्राहामौ न मीजा हो। 10भर्मीयो मीजा म्हाट्चकोलाक पाकी र जीवाटाक्की डेम राछ हो।”
येशूये सुनौ सिक्कौ बारेयाङ डेच
(मत्ती २५:१४-३०)
11होसे भर्मीकै इसे कुरा सेमन लेनाङ येशूये अझै अर्को कुरा डेया हीजैडेनाङ होसको यरूशलेमौ खेरेप टाह्रामन्या, भर्मीकै चहिँ येशू यरूशलेम टाह्राछ बित्तिकै परमेश्वरौ राज्य तुरुन्तै राल्हे डेम आर्मीट्नन्या। 12होसकै डेया, “सुर काट जना धनी भर्मी लोस देशाङ नुङार राजा छानार ल्हेस्न राछ विचार जाटा। 13लहो दश जना नोकरकोलाक आर्घार होखुरीककी दश वटा सुनौ सिक्का याहार डेया, ‘ङा ल्हेस्न माह्राठर इसे सिक्का लकीङ व्यापार जाट्नी।’ 14तर होच्यो जनताकै होसकी माजाक्ङन्या। होटबाटै होखुरीकै होच्यो न्हुङ-न्हुङ इट डेम भर्मी बीर्न्हका, ‘होचे कान मीटाक राज जाट्च कान मामन्डीले।’
15 “होसे राजा छानार राहा र लहे पैसा याछ नोकरकोलाक लाहा लेठाङ आर्घाकी लैडीया। होटै व्यापार जाटार होखुरीकै कुडीक नाफा छ्युका डेम वार्खी मीमन जाटा। 16पहिला राछये इट डेया, ‘मालिक, नाकै याछ सिक्कै अर्को दश सिक्का र ङै कमडीमने।’ 17मालिकै डेया, ‘स्याबास! नाको मजुङ नोकर लेसा, नाको चेक्जाङ र विश्वासीलो छाना। अब नाकै दश वटा सहरौ अधिकार जाट्की डीन्ल्हे।’ 18अर्को राहार इट डेया, ‘मालिक, नाकै याछ सिक्कै अर्को बाङा सिक्का ङै कमडीमने।’ 19मालिकै होसकी डेया, ‘नाकै र बाङा सहराङ अधिकार जाट्की डीन्ल्हे।’ 20अर्कोये राहार इट डेया, ‘मालिक, ङोस्नी, नाकुङ सिक्का इला ले। होसे ङै रुमालाङ छ्याकार डामने, इला न ले। 21ङा नाकोखाटा बीह्रीया, हीजैडेनाङ नाको कठोर ले। ही माह्यामे होसे न ङेल्हे र ही माभेरेट्ने होसे न बटुलीले।’ 22मालिकै होसकी डेया, ‘नुओ मेङ्गेरौ बोलीये जाट्न नाङ्की ङा दोष लैडीले, ए दुष्ट नोकर! ही माह्यामे होसे न ङेछ, ही माभेरेट्न ने होसे बटुलीच ङा कठोर भर्मी हो डेम नीये वार्न्ह र 23ङौ पैसा नीये हीजै ब्याजाङ मालैडीया? ङा राहार होसे ब्याजखाटा डुप्च लेया।’ 24होचे होला खेरेप टोङ्छकोलाक डेया, ‘होसेखाटा लेच सिक्का लार दश सिक्का लेचकी याखी क्योट्नी।’ 25होखुरीकै डेया, ‘हजुर, होसेखाटा च दश सिक्का लेमै ले!’ 26मालिकै डेया, ‘ङा नाखुरीककी डेले, सुखाटा ले होसकी झन् वास्टै याल्हे, तर सुखाटा चेक्जा ले होसेखाटा लेच र स्याट्ले।
27 “‘तर ङा राजा छान्च मन मापर्च ङौ शत्रुकोलाक इला राकार होखुरीककी ङौ न म्याहासाङ साट्नी’!”
यरूशलेमाङ येशूकी स्वागत जाट्च
(मत्ती २१:१-११; मर्कूस ११:१-११; यूहन्ना १२:१२-१९)
28येशूये इसे कुरा डेम भ्याच न्हुइङ होसको होखुरीकुङ अघि-अघि यरूशलेमलाक नुङा। 29होसको बेथफागे र बेथानियो खेरेप जैतून डेच डाँडाङ टाहा। होटै होसकै लहो चेलाको मध्याङ नीस जनाकी इट डेम बीर्न्हका, 30“उ होसे अगाडियुङ लाङ्घाङ नुङ्नी। होला काट गधौ मीजा छ्याक्ङ डाच नाखुरीकै डुप्ले। होसे मीटाक चाहाँसम्म कुसे भर्मी र माकाल्न्हने। होसकी पीसाकार राक्नी। 31सुयेर ‘हीजै इसकी पीसाक्च?’ डेयार नाखुरीककी गीना डेनाङ, ‘प्रभुकी चहडीस्नने’ डेकी।”
32होसे बीर्न्हकाचको नुङा र होसकै होखुरीककी कुङ्च डेमन्या होङ्च न डुपा। 33होखुरीकै गधौ मीजा पीसाक्की पानाङ मेन मीमुरुङै होखुरीककी गीना, “नाखुरीक इसे गधौ मीजाकी हीजै पीसाक्च?” 34होखुरीकै डेया, “प्रभुकी इसे चहडीस्नने।” 35चेलाकै गधाकी येशू लेठाङ राका र लाहा लहो खास्टोको होसे मीटाक टाङा होटै येशूकी काल्हाका। 36होसको नुङ्चै जाट्नाङ भर्मीकै लहो खास्टोको लामाङ टाङ्ङ याहा।
37येशू जैतून डाँडौ ओह्रालो खेरेप टाह्रानाङ होसकोकी डुट्च पट्ट न भर्मीकै येशूये जाट्च अचम्मौ काम आर्मीटार होसे कामौ लागि माह्राङा र परमेश्वरौ जय-जयकार जाट्चै बाड्को स्वरै च्याक्की ठाला।
38“प्रभु परमेश्वरौ म्यार्मीनाङ राछ
राजा आशिष डुप्च हो।
स्वर्गाङ शान्ति र
प्रभु परमेश्वरौ महिमा अट छानै।”#भजनसंग्रह ११८:२५-२६
39होटै भर्मीकुङ भीड लकीङ फरिसीकै होसकोकी डेया, “ए गुरु ज्यु, नाकुङ चेलाकोलाक माच्याक्नी डेम हक्कारीनी।” 40तर येशूये डेया, “ङा नाखुरीककी डेले, इखुरीक माच्याका डेनाङ ल्हुङ्को र च्याक्ले।”
यरूशलेमौ भर्मीकोलाक डाङार येशू राप्च
41येशू यरूशलेम खेरेप टाह्रानाङ लहो अगाडि सहरकी डाङार होसको रापा। अनि इट डेया, 42“शान्ति डुप्की ही जाट्की पर्ले डेम छीनी र नीये वार्न्हाङ छान्च लेया! तर नीये मावाह्रा। 43अब नाङ मीटाक याङ्च दिन राल्हे, शत्रुकै नुओ वरिपरि घेरा काले। होटै पट्ट लकीङ न नाङ्की ठुनार डाले। 44नाङ र नाङ भित्री लेच मीजाकोलाक साट्न याल्हे। होखुरीकै काट ल्हुङ टकी अर्को ल्हुङ्की र बाँकी माडास्ले। हीजैडेनाङ परमेश्वरै नाङ्की जीवाटाक्की डेम राछ समयकी नीये माचीन्डीया।”
येशू परमेश्वरौ मन्दिराङ
(मत्ती २१:१२-१७; मर्कूस ११:१५-१९; यूहन्ना २:१३-२२)
45होटै न्हुइङ येशू परमेश्वरौ मन्दिर भित्री पर्या। होसकै मन्दिराङ लोम आर्लाम जाट्चकोलाक इट डेचै बाहिर छ्युका। 46होटै होखुरीककी डेया, “धर्मशास्त्राङ रीक्ङने, ‘ङौ इम प्रार्थनौ इम छान्ने’ तर नाखुरीकै च इसकी ‘डाकुकुङ अड्डा’ खास्नने।”#यशैया ५६:७; यर्मिया ७:११
47होसकै दिनै पीच्छी परमेश्वरौ मन्दिराङ शिक्षा याम्हन लेया। मुख्य पूजाहारीको, धर्मगुरुको र अरु शासककोखाटार होसकोकी साट्की पाम्या। 48तर होखुरीकै हीर मौका माडुपा। हीजैडेनाङ होला लेच पट्ट न भर्मीको होसकुङ शिक्षा सेकीयाङ मग्न लेया।
Terpilih Sekarang Ini:
लूका 19: EMGP
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2025 by Mother Tongue Translators Society and Wycliffe Bible Translators, Inc.
