GENESIS 3
3
Sualnak Kong
(Rom 5.12-21)
1 Bawipa Pathian nih a sermi saram hna lakah rul hi a zer bik. Rul nih cun minu kha a thawh i, “Dum chung i a ummi thingthei hi a zeihmanh nan ei lai lo tiah Pathian nih an ti taktak hna maw?” tiah a hal. #Biat 12.9; 20.2
2Nu nih cun, “Dum laifang i a ummi thingthei khi dah ti lo cu, 3dum chung i a ummi thingthei vialte hi azeipaoh kan ei khawh ko hna,” tiah a leh. “Pathian nih khi thing khi cu a tlai nan ei lai lo, a tongh zong nan tawng lai lo, nan tongh ahcun nan thi lai, a kan ti,” tiah a ti.
4Rul nih cun, “Cucu ahmaan lo; nan thi lai lo. 5Pathian nih cu bantukin a ti cu, kha thingthei nan ei ahcun nan ei cangka in amah bantukin hngalhnak nan ngei ve lai i a ṭha le a ṭhalo kha nan hngal ve lai ti a hngalh caah a si,” a ti.
6Nu nih cun thingkung cu mithlang ngai a si le a thei cu mitthi ngai a si kha a hmuh tikah a fimmi si cu zeitluk in dah a nuamh hnga ti kha a ruat. Cucaah a thei cu a lawh i a ei. Cun a va zong kha tlawmpal a pek ve i a ei ve. 7An ei dih cangka in hngalhnak kha an vun hmu i taklawng an si kha an i hngal; cucaah theipi hnah kha an i ṭhit i an i hruk.
8Cu ni zanlei sang ah cun Bawipa Pathian cu dum chung i aa chawh kha an theih i thing lakah khan an i thup. 9Sihmanhsehlaw Bawipa Pathian nih cun mipa cu a vun auh i, “Khuazei ah dah na um?” tiah a ti. 10Mipa nih cun, “Dum chung i naa chawh thawng kha ka theih i taklawng ka si caah ka thin a phang, kaa thup,” tiah a leh.
11Pathian nih cun, “Aho nih dah taklawng na si cu an chimh?” tiah a hal. “Ei hlah tiah kan timi thei kha na ei dahra?” tiah a ti. 12Mipa nih cun, “Na ka serpiakmi nu nih khan thei cu ei awkah a ka pek i ka ei,” tiah a leh.
13 Bawipa Pathian nih minu cu a thawh i, “Zeicahdah hihi na tuah?” tiah a hal. Minu nih cun, “Rul nih a ka hlen i a ka eiter,” tiah a leh. #2Kor 11.3; 1Tim 2.14
Pathian Nih Dan A Tat Hna
14Cun Bawipa Pathian nih rul cu
a thawh i,
“Hi ruangah hin nangmah cu
dantat na si;
hi chiatsernak hi nangmah lawng nih
na in lai.
Atu thawk hin na paw in
na lawn cang lai i
na eimi rawl cu leidip a si lai.
15Nangmah le nu cu nan i hua lai,
a tefa le na tefa cu ral an si lai.
Mi nih na lu kha rial an in zuam lai i
nang nih an kedil kha cuk naa zuam ve lai,” a ti. #Biat 12.17
16Cun minu cu a thawh i,
“Fa na pawinak i harnak na inmi kha ka karhter lai,
fa na hrinnak i fahnak na inmi kha ka karhter lai;
asinain na va cu na duh ṭhiamṭhiam ko lai i
amah cu na cung bawi a si lai,”
a ti.
17Cun Adam#3.17 ADAM ti min hi Hebru holh ah cun minung tinak a si. cu a thawh i,
“Na nupi bia na ngaih i
ei hlah kan timi thei kha na ei caah vawlei hi
nangmah ruangah chiatserh a si lai.
Na ei khim rawl hmuhnak dingah
na nun chung fak piin rian na ṭuan
a hau lai.
18Hlingbur le belh kha an kho tung lai i
ramlak thingram kha na ei
a hau lai. #Heb 6.8
19Rawl na hmuh khawhnak dingah,
vawlei i na kir ṭhan hlan tiang,
thlan hripi puak in na cawl a hau lai;
Nangmah cu, cu vawlei cun
sermi na si.
Leidip na si i leidip ah
na kir ṭhan lai,” a ti.
20Mipa nih a nupi cu a min ah Evi a sak, zeicahtiah amah cu minung vialte nu a si. 21Cun Bawipa Pathian nih Adam le a nupi cu saphaw hnipuan a serpiak hna i a aihter hna.
Adam le Evi A Dawi Hna
22Cun Bawipa Pathian nih khan aa thawh i, “Atu cu mipa hi a ṭha le a ṭhalo a hngalh ve cang caah kanmah bantuk a si cang. Cucaah cun nunnak thingkung hi a banh sual lai i a thei hi a ei lai i zungzal in a nung sual ko lai,” a ti. #Biat 22.14 23Cucaah Bawipa Pathian nih khan Eden dum chung cun a ṭhawl i amah a sernak vawlei kha thlawh awkah a kalter.
24Pathian nih mipa cu a chuah i Eden dum nichuahlei kamah khan cherubim vancungmi hna le zei ti lei paoh i aa mer khomi mei vainam kha a chiah hna. Annih nih cun nunnak thingkung kha ahohmanh nih naih kho hna hlah seh tiah an cawngh.
Terpilih Sekarang Ini:
GENESIS 3: HCL06
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Lai (Hakha) Common Language Bible © Bible Society of Myanmar 2006