G%E9nesis 5
5
Je umuq uxikin mam Adán
1Are wuj iri chi o ki'anoj umuq uxikin mam Adán chupam. I Dios are xeu'an i winaq, lik pacha uk'exwach Ire xu'an chke. 2Xu'an achi xaq xu'an ixoq; xuya utzil chomal pkiwi. Xaq che i ij le are xeu'ano xuya pkib'i: Winaq.
3I mam Adán are o chik lajuj waqwinaq (130) junab' che, are uri xuk'uwalij jun rak'al chi lik keje ktzunik pacha ire, xaq xuya pub'i a Set. 4I mam Adán le k'a xk'asi kamo' (800) junab' chrijil chik ralaxik a Set; xaq k'a xeuk'uwalij rak'al alab'om xaq i altom. 5I mam Adán xk'asi lajuj waqwinaq kamo' (930) junab', te'uri xkamik.
6I ma Set o chik jo'ob' jo'winaq (105) junab' che are xuk'uwalij nab'e uk'ojol chi a Enós ub'i. 7I mam Set le k'a xk'asi wuqub' kamo' (807) junab' chrijil chik ralaxik uk'ojol chi a Enós; xaq k'a xeuk'uwalij rak'al alab'om xaq i altom. 8I mam Set le xk'asi kab'lajuj jo'winaq kamo' (912) junab', te'uri xkamik.
9Ma Enós o chik lajuj kajwinaq (90) junab' che are xuk'uwalij nab'e uk'ojol chi a Cainán ub'i. 10I mam Enós le k'a xk'asi jo'lajuj kamo' (815) junab' chrijil chik ralaxik uk'ojol chi a Cainán; xaq k'a xeuk'uwalij rak'al alab'om xaq i altom. 11I mam Enós xk'asi jo'ob' jo'winaq kamo' (905) junab', te'uri xkamik.
12Ma Cainán o chik lajuj oxwinaq (70) junab' che are xuk'uwalij nab'e uk'ojol chi a Mahalaleel ub'i. 13I mam Cainán le k'a xk'asi kawinaq kamo' (840) junab' chrijil chik ralaxik uk'ojol chi a Mahalaleel; xaq k'a xeuk'uwalij rak'al alab'om xaq i altom. 14I mam Cainán le xk'asi lajuj jo'winaq kamo' (910) junab', te'uri xkamik.
15I ma Mahalaleel jo'ob' oxwinaq (65) junab' o che are xuk'uwalij nab'e uk'ojol chi a Jared ub'i. 16I mam Mahalaleel le k'a xk'asi lajuj juwinaq kamo' (830) junab' chrijil chik ralaxik uk'ojol chi a Jared; xaq k'a xeuk'uwalij rak'al alab'om xaq i altom. 17I mam Mahalaleel le xk'asi jo'lajuj kajwinaq kamo' (895) junab', te'uri xkamik.
18Ma Jared o keb' wajxaqwinaq (162) junab' che are xuk'uwalij nab'e uk'ojol chi a Enoc ub'i. 19I mam Jared le k'a xk'asi kamo' (800) junab' chrijil chik ralaxik uk'ojol chi a Enoc, xaq k'a xeuk'uwalij rak'al alab'om xaq i altom. 20I mam Jared le xk'asi keb' wajxaqwinaq kamo' (962) junab', te'uri xkamik.
21Ma Enoc o jo'ob' oxwinaq (65) junab' che are xuk'uwalij nab'e uk'ojol, chi a Matusalén ub'i. 22I ma Enoc le lik xb'in pub'e i Dios, chrijil chik ralaxik uk'ojol chi a Matusalén; k'a xk'asi jo'lajujwinaq (300) junab', xaq k'a xeuk'uwalij rak'al alab'om xaq i altom. 23I mam Enoc le xk'asi jo'ob' wajxaqlajujwinaq (365) junab' te'uri xkamik. 24I mam Enoc le lik xb'in pub'e i Dios, rumali xaqte'et xsach anoq man lik xk'am b'i rumal i Dios.
25I ma Matusalén o chik wuqub' b'elejwinaq (187) junab' che are xuk'uwalij nab'e uk'ojol, chi a Lamec ub'i. 26I mam Matusalén le k'a xk'asi keb' b'elejlajujwinaq jumo' (782) junab' chrijil chik ralaxik uk'ojol chi a Lamec; xaq k'a xeuk'uwalij rak'al alab'om xaq i altom. 27I ma Matusalén xk'asi b'elejeb' wajxaqwinaq kamo' (969) junab', te'uri xkamik.
28Ma Lamec o chik keb' b'elejwinaq (182) junab' che, are xuk'uwalij nab'e uk'ojol, 29chi xuya pub'i a Noé, man xub'ij. I Ajwal xuk'oqoj i jyub' ta'aj: “Xwiri i ak'al le kuya ni uxlanem chqe che i k'ax laj qachak chi kqa'an ru' qa'ab' chwach i jyub' ta'aj.” 30I mam Lamec le k'a xk'asi jo'lajuj b'elejwinaq jumo' (595) junab' chrijil chik ralaxik uk'ojol chi a Noé; xaq k'a xeuk'uwalij rak'al alab'om xaq i altom. 31I mam Lamec xk'asi wuqlajuj wajxaqlajujwinaq jumo' (777) junab', te'uri xkamik.
32Ma Noé o chik jo'winaq jumo' (500) junab' che are xeuk'uwalij rak'al chi je are, a Sem, a Cam, xaq i a Jafet.
Terpilih Sekarang Ini:
G%E9nesis 5: ACHICUB
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Biblia Achí de Cubulco, Derechos reservados de Sociedad Bíblica de Guatemala