Matyo 12
12
Yeso loʼ Mûkəbii ə tsuʼu inaʼ
(Mak 2.23-28; Luk 6.1-5)
1Ambə n tsuʼ inaʼ u Təjuu u loʼ wə, Yeso nsə dzûmə tə wi n bwey tsəghə tɔɔlə ndòw n sum wə asaŋ u loʼ wə, dzəŋ n zabə dzûmə tə wi tey. Sey, ghə n kaʼ ni kpey fə tow wə asaŋ. 2Ambə ghə̂ tə Falasi a koʼ tsunə ghəə ghən, ghə n dza ndòw tə̀ wi nə̀, “Koʼo ndòw, dzûmə tə tə̀ ghəŋŋə ghəə zey laŋ kə dii way nə̀ a i ghəŋŋə n tsuʼ inaʼ.”
3Tə n beeli ndòw ghə dza nə̀, “Ghaa ka kam tɔŋɔ koʼ n màʼlə K-a-zə̀ ghəə ghey fɔ̀ɔ Devid nsə ghə̂ a wi ghə â ghəŋənə n nəŋə zey dzəŋ â zabənə wi ə? 4Tə â nyi ndòw n ndaw Kəzə̀, ney kɔʼ baa K-a-zə̀, zə̂ ghi ghə̂ a wi ghə, loʼ sey nə̀ laŋ kə dza nə̀ a khə kə ghə fɔɔngili ni zə̂ baa kə tii kə. 5Nkee ghaa ka kam tɔŋɔ koʼ tsə n laŋ u Mushi nə̀ n tsuʼu mə inaʼ n dzəm, ghə fɔɔngili n dzəŋi kə ndaw Kəzə̀ i nii zə n Yerosalem a ndzəmə bwulə maʼa kəlaŋ, laŋ kə n ka kwu ghə ə? 6N dza bə tə̀ ghaa nə̀, wù loʼ loʼ fa tə tsəghəshinə Ndaw Kəzə̀ i nii zə n Yerosalem. 7Abə ghaa mə khənə ghəə zey ghɔɔmə zən i dzanə nə̀, ‘N ləghə nə̀ ghə̂ ghə i khə sî i kwɔɔlə zə n kow ghə̂ ghə, a kad way kə nə̀ ghə i fəələ maʼlə wə tə̀ mə,’ i diinə, ghaa mə way ni saʼa wù nə̀ wɔɔ a wi a zownu.
8N təŋkey, Waa Weynum loʼ Mûkəbii tsuʼ inaʼ.”
Yeso baŋŋə wù nə̀ kpii kə wi kə n tə̀ghə̀ doʼo
(Mak 3.1-6; Luk 6.6-11)
9Ambə Yeso nuu tsunə n luʼu key, tə n ndòw n Ndaw Kədzəŋi ə ghə̂ a Təjuu. 10Wù loʼ n loʼ fu nə̀ kpii kə wi kə n tə̀ghə̀ doʼo. Ghə̂ a loʼ ghə n loʼ fu, ghə n kəŋənə jìi ni gaʼ ighəə n tow kə Yeso tə̀ ghə kwu wi. Sey ghə n bəb tə̀ wi nə̀, “Laŋ kə diinu nə̀ a khə ni baŋŋə wù n tsuʼ inaʼ ə?”
11Yeso n beeli ndòw ghə dza nə̀, “Abə wù ghaa u loʼ u khənə njì ə wi, njì ə tii chi bwu nyi tsunə nə kəbùʼ n tsuʼ inaʼ, tə î ndòw shiələ nuulə shiə kɔʼɔ bənu ə, nkee tə i shiələ way ə? 12Wù tsəghəshi njì, sey, laŋ kə bəghəmnu nə̀ a i ghəŋə ndzuŋ n tsuʼ inaʼ.” 13Sey tə n dza ndòw tə̀ wù wey wɔɔ kə wi kə â təghə doʼonə nə̀, “Naalə shi ndòw wɔɔ kə kə̀.” Wù tii n naalə shi ndòw soʼo. Wɔɔ kə tii kə n daŋŋə taw doʼo dzəŋŋə bə tə̀ a loʼ kə loʼ key. 14Ghə̂ a tə Falasi ghə n fəd nuu shi ndòw bii, ndòw kaʼ ni saalə nghee tə̀ ghə loʼ ni wey Yeso tii.
Yeso loʼ wù kəfwaʼ wey Zə̀ kə sàynə
15Ambə Yeso keeli tsunə nə̀ falasi tə bii wi, tə n nuu tsu fu. Nɔɔ kə aghə̂ kə n nuu ndòw soʼo n bàa wi. Tə n baŋŋə ghə̂ ghey ghə a dzaŋanə adzəm. 16Nghee tə baŋŋə kɔʼnə ghə sey, tə n kee tsəʼlə ndòw kəlaŋ tə̀ ghə nə̀ kə ghə nə dzanə tə̀ ghə̂ a loʼ ghə. 17Tə â ghəŋə sey ni luulə tsu ghɔɔmə zey Wù tûm Kəzə̀ Ayzaya â dza naŋanə nə̀,
18“À wən loʼ wù kəfwaʼ wuŋ n sày kɔʼnə,
N ngii ləghə wi, fə̀ŋ zuŋ ngii duʼlənu ghi wi.
Mə î kuu tsuu zay kuŋ n kow wi,
Tə i naʼlə ghəə zey i loʼ tsətsəghə tə̀ ghə̂ ghən ghə way ghə̂ a Təjuu ghə.
19Tə î bàŋŋə ghɔɔmə way,
Tə i buʼlə way bɔŋ mə.
Wù nə̂ zow soʼo way dzə̀ ə wi n faabə tə jìi.
20Tə i khəm maʼa way dzaŋ wey u mbvəd doʼonə,
Tə i nəm maʼa soʼo way daa key kə nəmmə ndòwnə.
Tə i buu doʼo way ni dəm ni koʼ nə̀ ghəə ghey a loʼnə tsətsəghə, a təm zə̂ ghəə ghey a way tsətsəghə.
21Sey nə̀, ghə̂ ghən ghə way ghə̂ a Təjuu ghə adzəm loʼ ni khə nə̀ ghə loʼ ibəghəshi n zəd i wi.”
Falasi tə dza nə̀ Yeso khə daʼa kə Belzebul
(Mak 3.20-30; Luk 11.14-23)
22Ghə̂ a loʼ ghə n boʼo bə wù loʼ n səə Yeso nə̀ tə n fəb doʼo, ghɔɔmə soʼo way, bòʼ nə̀, zay kə bwu kə â loʼ n kow wi. Yeso n baŋŋə tsu wi, tə n kaʼ dzəŋŋə ndow ni kəm ghɔɔmə, koʼo soʼo təluʼu. 23Dzuu zə n ngii zum aghə̂ adzəm, ghə n bəbə n wû i ghə nə̀, “À wən sə̀ loʼ Waa Fɔ̀ɔ Devid mɔ?”
24Nghee tə ghə̂ a tə Falasi a kee zow tsunə sey, ghə n dza, “À teeli loʼ Belzebul, tɔŋŋə də̀ŋ kə zay u bwu wə, kə fuunə ghə̂ fən n daʼa kə nə̀ tə i dzum shiə zay u bəbə wə tii.”
25Yeso n khə ghə zey ghə moʼlənə n fə̀ŋ tə ghə, sey, tə n dza tə̀ ghə nə̀, “Naʼ zey i dzawwə doʼonə, təmə baalə tsam n wû u wi, i nə sàʼànu. Naʼ i loʼ i way nkee ndaw i loʼ zə, i bəghəm dzəŋi way n wû i ghə, ghə tsuu bwuu way. 26Abə Satan dzùm shiənə Satan, i sey dii nə̀ tə dzawwə doʼonu n wû u wi. Fɔɔ u wi wə î sə̀ təmi ngee? 27Abə N dzùm shiənə zay u bwu wə n daʼa key Belzebul fuunə tə̀ mə, ghə̂ a ghaa a kee dzùm shiə n daʼa kə ghaa kə? À loʼ ghə, ghə î saʼanə ghaa. 28Abə n dzùm shiənə zay u bwu wə n daʼa kə zày K-a-zə̀, i sey dii nə̀ fɔɔ u Kəzə̀ wə n bə tə̀ ghaa. 29Wù way dzə ni khəm nyi n ndaw wù wey tə khənə daʼa kə, tə ndzəm boʼo nuu fə̂ u wi, nə̀ tə ka wi kwu kow naŋa tsu dzə nə ubaʼ.
30Wù wey tə tey way ghi mə, tə sey zuulə bàalə mə. Wù wey tə gaamə way mə ni bəghə, tə sey saʼa maʼanu. 31Sey, n dza bə tə̀ ghaa nə̀, Zə̀ kə î neyzəənu ghəə a bəbə ghey adzəm ghə̂ a ghəŋŋənə nsə a ghey ghə dzanə n kow wi, tə way ni kee neyzəə koʼ wù wey tə tsayyənə Zay kə Zow kə. 32Wù wey tə dzanə ghəə a bəbə ghə n kow Waa Weynum, ghə i neyzəənu bəb i wi zə, abə wù kee dzanə ghəə a bəbə ghə n kow Zay kə Zow kə, ghə i neyzəə koʼ way bəb i wi zə nya nkee tə̀ mbi nə bə may.”
A koʼo keeli fəkaʼ n ndzoʼo tam wey fə məənə
(Luk 6.43-45)
33Yeso n dza kpiʼi ndow tə ghə nə̀, “Abə kaʼ fə nyim dzɔbənə, fə məə bə tam u dzuŋu wə, abə fə nyim dzɔbə way, fə məə bə tam u bəbə wə, bòʼ nə̀, a koʼo keeli kə fəkaʼ n ndzoʼo tam wey fə məənə. 34Zuu tə bəbə tə tə̀ a loʼ ghaa! Ghaa loʼ ngee ni khəə ghəə a dzuŋu ghə nə̀ ghaa loʼ ghə̂ a bəbə ghə ə? N təŋkey wù bɔɔmə khəə shiə bə kə ghəə ghey a luu doʼonə n fə̀ŋ ə wi. 35Wù dzuŋu u khəə shiə bə kə ghəə a dzuŋu ghey a nyì doʼonə n fə̀ŋ ə wi. Wù bəbə n khəə shiə bə kə ghəə a bəbə ghey a nyì doʼonə n fə̀ŋ ə wi. 36N dza bə tə̀ ghaa nə̀, n tsuʼ fey Zə̀ kə i saʼanə mbi tii, kay wù î fuu taŋ n ghɔɔmə tə bəbə tey tədzəm tə shi koʼ bə dzənə n dzuu i wi, 37bòʼ nə̀, a loʼ kə n ghɔɔmə tey tə â shi bənə n dzuu zə, ghə i neynə ni saʼ wɔ ni koʼ nə̀ wə khənu chɔd wə nkee wə khə way chɔd wə.”
Ghə̂ a bəb Yeso n tsəə
(Mak 8.11-12; Luk 11.29-32)
38Sey ghə̂ a dii a kəlaŋ a loʼ ghə nsə ghə̂ a tə Falasi ghə n dza tə̀ Yeso nə̀, “Wù dii, a ləghə nə̀ wə dii bə ghey n tsəə i loʼ zə.” 39Yeso n kee beeli ndòw ghə nə̀, “Bəbə bəbə tə aghə̂ nsə ghə nəb ityim a num tə tən, ghə bəbə bə tsəə tə̀ mə, mə i tsəm dii way ghaa n tsəə i loʼ zə, a may kə tsəə zey zə â shinə tə̀ wù tûm Kəzə̀ Jona. 40N təŋkey, tə̀ Jona â doʼonə n nəghə wə itsəghə nə ntsuʼu ntəghə, Waa Weynum î doʼlə soʼo ntsuʼu ntəghə n fə̀ŋ ə ghəlikətsə. 41N tsuʼ fey Zə̀ kə î saʼanə mbi tii, ghə̂ a naʼ i Ninive ghə i təmi tiilə bòʼ ghaa, n təŋkey, ghə mâ kwey nuu bə fə̀ŋ tə ghə tə n ghəə a bəbə ghə n nəŋə zey Jona â naʼlənə tûm Kəzə̀ tə̀ ghə. Sey, n fa dza bə tə̀ ghaa nə̀, wù loʼ loʼnu fa nya tə tsəghəshinə Jona. 42N tsuʼ fey Zə̀ kə î saʼanə mbi tii, Naʼtum ə naʼ i Sheba î təmi tiilə bòʼ ghaa, n təŋkey, tə â nuu nay bə n naʼ i wi ni bə zəllə tɔb u Solomun tə â loʼnə də̀ŋ kə, wù loʼ u loʼnə fa tə tsəghəshinə Solomun, ghaa u way ni zow tə̀ wi.”
Fən dzəŋŋə i zay kə bwu kə
(Luk 11.24-26)
43Yeso n dza nə̀, “Abə zay kə bwu kə nuu shi tsunə n kow wù, kə n bwey ngəə tsəghə ndòw luʼu tə zummə tə, kə kəŋənə luʼu kə zayyə kə. Abə kə kee kəŋ kìi tsunə luʼu kə zayyə kə, 44kə n dza tsu n wû u wi nə̀, ‘N ndòw dzəŋŋənu n ndaw zuŋ zey n mə nuu shi bənə tii.’ Sey, abə tə dzəŋŋə bə koʼ bə ndaw tii i zum zə nə̀ ghə n zəd, bayyə naŋa tsu. 45Tə n daŋŋə nuu dzəŋŋə ndòw, ndòw ney bə zay u bəbə u loʼ wə usəghəmbəghə, u bəb tsəghəshinə wi, ghə n bə muu nyi bə fu. Ghəə a wù tii ghə n kəm bəb tsəghəshi tsu nghee a mə loʼnə tii sə̂ i sə. À wən loʼ nghee zə î doʼlənə tii ghi ghə̂ a bəbə ghən n num tə tən.”
Này Yeso nsə waazə a wi ghə
(Mak 3.31-35; Luk 8.19-21)
46Nghee tə̀ Yeso nam ghɔɔmənə ghi ghə̂ ghey, nay wi ghi waazə a wi ghə n bə təmi tsu bii, kəŋə jìi ni ghɔɔmə ghi wi. 47Wù loʼ fu tii n dza ndòw tə̀ wi nə̀, “Này wə ghi waazə ghə a tey bii, ghə ləghə ni ghɔɔmə ghi wɔ.”
48Yeso n beeli ndòw wi nə̀, “Này wuŋ loʼ ndee? Waazə ghuŋ a loʼ ghə ndee?” 49Ambə tə bəb tsunə sey, tə n daŋŋə sɔʼ dii ndòw dzûmə tə wi dza nə̀, “À wey loʼ này wuŋ nsə waazə ghuŋ ghə. 50Wù wey tə ghəŋŋənə ghəə ghey Bày wuŋ idəŋ ləghənə, tə sey loʼ waazə wuŋ u num wə, waazə wuŋ u zən wə nsə này wuŋ.”
Terpilih Sekarang Ini:
Matyo 12: WEH
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2022 CABTAL
