Matu 28
28
Yezu vo'ore
(Maki 16.1-10; Luki 24.1-12; Yɔn 20.1-10)
1Vo'ohego daarɛ la n tole la, pɔhega dabeha ayopɔi pɔhega daarɛ bulika, ti Mɛɛri Magedalin la Mɛɛri ayima la, kiŋɛ ti ba bihɛ yɔɔ la. 2Ba yeti ba bihɛ ti tiŋa la miim mɛ. Se'ere en sɔi la, Daana suŋera en ze'ele saazuo sige na bilege yɔɔ kugere la lebe pooren, zi'a de zuo. 3Suŋera wa nyagere mɛ wuu saa bugum la, ti a lɔgerɔ pelege kerikeri wuu sakuga la. 4Dabeem en sãɛ ba la zuo, ti gureba la gbi' pabegɛ ana wuu ba ki mɛ la. 5Gee suŋera la yele pɔgehi la yeti, “Da zɔ ya dabeem. Mam mi' ti ya eere la Yezu ti ba kpa' la. 6A ka boi ka'lam, se'ere en sɔi la, a vo'e mɛ, wuu en daa pun yele se'em la. Wa'am ya na bihɛ zi'an ti ba daa biŋe en la. 7Kiŋɛ ya kalam ta yele a zahereba la yeti, Yezu vo'e a kum la puan. ‘Yelemɛŋerɛ, a boi ya nɛŋa yɛ'a Galilii ha. Bilam ti ya wan ta nyɛ en.’ Mam sɔɔleŋa en ŋwana bo' ya.” 8Bala ti ba bahɛ yɔɔ la zi'an kalam la dabeem, la pupeelum kãtɛ, zɔ ta yele a zahereba la. 9Ba yeti ba bihɛ ti Yezu en bala tu'uhɛ ba yeti, “Suma'afum bɔna la ya” ti ba kiŋɛ paaɛ en, gurɛ a nama, Na'ahɛ en, 10Ti Yezu yele ba yeti, “Da tari ya dabeem, kiŋɛ ya ta yele n suurɔ la ti ba kiŋɛ Galilii. Bilam ti ba wan nyɛ mam.”
Gureba la nuurɛ
11Pɔgehi la n ye'ehe la, ti gureba la basɛba kɛ̃ tiŋa la puan ta yele malema kiinduma la sɛla woo en iŋɛ la. 12Ti Malema kiinduma duma la n sɔhɛ la yizuto kiinduma la ba'ahɛ la, ba za'a ku la nuurɛ ti ba bo' pɛntiireba gu'ureba la ligeri zo'e zo'e, 13gee yele ba yeti, “Ta yele ya ba yeti, ‘A zahereba la n wa'am yu'uŋɔ na zu en kiŋɛ se'em ma'a ti guum zɛɛ tumam la.’ 14Ti ŋwana wa han lu Timbihega daana la tuban, tumam wan nyɛ en, gee gu' ti daaŋɔ da paaɛ ya.” 15Ŋwana ti ba to'e ba ligeri, gee iŋɛ ban pa'ali ba se'em la. Yuuduma kelum tɔgera yele dina wa mɛ la zina.
Yezu tum a Zahereba
(Maki 16.14-18; Luki 24.36-49; Yɔn 20.19-23; Tuuma 1.6-8)
16 #
Mat 26.32; Mak 14.28 Ti a zahereba pia la ayima la kiŋɛ Galilii, zoore se'ere ti Yezu pa'alɛ ba la. 17Ba nyɛ en la, ba na'ahɛ en mɛ, gee basɛba bu'uri mɛ. 18Ti Yezu paaɛ ba na, yele ba yeti, “Paŋa za'a en boi saazuo ha, la timpaberɛ wa zuo dikɛ bo' la mam. 19#Tuum 1.8 Bala, kiŋɛ ya timpaberɛ wa zuo za'a, la ya maahum zahereba bo' mam. Sɔ ya ba ko'om doohe, Sɔ la, la Dayua la, la Fa'a Sia yu'urɛ puan, 20gee pa'alɛ ya ba, ti ba nana sɛla woo ti mam bo' nuurɛ ti ya ita la. Gee tɛri ya ti, mam boi la ya mɛ saŋa woo, ta paara tiŋa wa ba'ahegɔ saŋa.”
Terpilih Sekarang Ini:
Matu 28: GBTP
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Gurenɛ New Testament © The Bible Society of Ghana, 2020.
