Matius 5
5
Yesus momadahan borokat
(5:1-12)
(Luk. 6:20-23)
1Timpu Yesus moniant urakng banya' nantai, Sio noi' ko pucu' bukit. Sio dudu' di santai ongko boko murid-Nyo datakng ko Sio. 2Lalu Sio mongajar sia'. Kato-Nyo,
3“Diborokaticam urakng inyo jaro di hadapan Allah,
obai sia' nantai anggota koluarga Koraja'an Sorugo!#5:3: Koluarga Koraja'an Sorugo ia'an urakng inyo pocayo obai Yesus nantai Rajo Inyo Dijanjian Allah huatan hidup di babah kuaso-Nyo.
4Diborokaticam urakng inyo bulikng,
obai sia' paca'an dikongkanti'i nononyo.
5Diborokaticam urakng inyo rondah hati,
obai sia' paca'an mowarisi bumi.
6Diborokaticam urakng inyo kotakan rindu hidup bondar di hadapan Allah.
Sia' diborokati obai sia' paca'an tokosih nononyo.
7Diborokaticam urakng inyo salu' agatn urakng bukai,
obai Allah paca'an salu' agatn sia'.
8Diborokaticam urakng inyo suci hatinyo,
obai sia' paca'an moniant Allah nononyo.
9Diborokaticam urakng inyo mombaba' damai,
obai Allah paca'an monyobut sia' boko poana'an-Nyo.
10Diborokaticam urakng inyo didorako'i obai hidup bondar di hadapan Allah.
Sia' diborokati obai sia' nantai anggota koluarga Koraja'an Sorugo!
11Diborokaticam urakng inyo dihanyam, didorako'i, dituduhan inyo jahat obai kaitn pocayo ko Aku. 12Joman komai, boko nabi Allah pan dipoulahan sama'an nantai jam. Jadi, rindakng-rigahcam obai kaitn paca'an bodapat upah bosar di sorugo!”
Boko murid Yesus samo sama'an garapm ongko torakng
(5:13-16)
(Mrk. 9:50; Luk. 14:34-35)
13“Kaitn ni'in garapm dunia. Apo aman garapm monjadi taba'i, co mungkitn dipulah mancitn agi'. Garapm nantai kinyo boguno agi'. Ongko, garapm nantai dibuakanmo ongko ditonja' urakng.#5:13: Tiat catatan mongona'i garapm di Lukas 14:34-35.
14Kaitn ninam torakng dunia ni'in. Samo sama'an kota di pucu' bukit inyo co mungkitn toombakan. 15Damo samo sama'an pompolitoan. Aman ado urakng inyo monokil pompolitoan, io kinyo monungkau'inyo agatn roga'. Sobali'nyo, io molota'annyo di tompat tobuka' oca' monoraki somuo urakng di dalapm rumah nian. 16Porbuatan boi' kaitn samo sama'an torakng. Jadi, kaitn gola' bulah koboi'an di hadapan urakng oca' sia' ulih moniant nantai. Lalu sia' paca'an momuji Allah Bopai kaitn di sorugo.”
Yesus mongajar mongona'i Hukupm Torat
(5:17-48)
(Luk. 6:27-36)
17“Jangannam kaitn bopikir obai Aku datakng pakai' mombalakan pomandiran Allah dalapm Buku Suci, ia'an, somuo porintah huatan poraturan Allah inyo ditulis Musa dalapm Hukupm Torat huatan somuo inyo ditulis boko nabi. Apo, Aku datakng oca' la'apo inyo totulis di dalapm Buku Suci ditopati. 18Dinga'anbo ni'in: Somanah ija' ado langit huatan bumi, co nyiant la'apo pan inyo paca'an dihilakan doi' Hukupm Torat, biar pan sobuti' hurup damo sobuti' titik, sampai somuonyo tojadi. 19Obai nantai, aman ado urakng inyo mohilakan salah sobuti' Hukupm Torat nantai, biar pan porintah nantai dianggap kinyo pontikng, huatan io mongajar urakng bukai jam pakai' mohilakannyo, ongko io paca'an dianggap kinyo pontikng di dalapm Koraja'an Sorugo. Apo aman ado urakng inyo molabuhan somuo porintah Allah huatan mongajar urakng bukai pakai' molabuhannyo, io paca'an dianggap pontikng di dalapm Koraja'an Sorugo. 20Dinga'anbo ni'in: Kaitn gola' hidup bujur bondar di hadapan Allah, lobih daripado boko guru agama Yahudi, huatan lobih daripado pomimpitn agama Yahudi doi' kolompok Farisi. Aman cado, kaitn kinyo paca'an mansu' ko dalapm Koraja'an Sorugo.”
Jangan godi agatn somadikan kaitn
(5:21-26)
21“Kaitn udah mondinga' pomandiran Allah ni'in inyo dionju' ko angki-bayatn kito: Jangan mombunuh;#5:21: Doi' buku Koluaran 20:13 huatan sotiap urakng inyo mombunuh gola' dihukupm.#5:21: Doi' buku Ulangan 5:17 22Apo Aku moonju' porintah ni'in ko kaitn: Sotiap urakng inyo godi agatn somadikannyo gola' dihukupm. Sotiap urakng inyo mohayam somadikannyo gola' dibaba' ko hadapan kolompok pomimpitn agama Yahudi inyo kotakan bokuaso pakai' dihukupm. Sotiap urakng inyo moningkau urakng bukai budu paca'an dihukupm dalapm api noraka. 23Obai nantai, aman umpamonyo kaitn mombaba' posombahan ko pucu' mesbah tompat monyorahan posombahan di tongahlamanan Rumah Allah. Apo di su'utn, kaitn toingant, ado somadikan kaitn inyo sakit hati agatn kaitn. 24Tinggalan ja'am posombahan nantai di muka' mesbah. Botula'cam mongomboi'i hubukan holu'ai agatn somadikan kaitn nantai. Hoyu' lopas nantai bobali' pakai' moonju' posombahan nantai. 25Damo umpamonyo, aman ado urakng inyo monuduh kaitn. Soboi'nyo kaitn bodamai agatn io watu kaitn tongahan dalapm pojalatan ko pongadilan. Aman cado, io paca'an momoso kaitn pakai' dibaba' ko hadapan hakipm. Ongko, hakipm nantai paca'an monyorahan kaitn ko potugas pongadilan. Potugas nantai paca'an momansu'an kaitn ko dalapm ponjara. 26Dinga'anbo kaitn co paca'an koluar doi' dalapm ponjara sobolupm kaitn mombayar somuo kamuh kaitn nantai.”
Jangan bomporajoan dalapm hati kaitn
(5:27-30)
27“Kaitn udah mondinga' pomandiran Allah ni'in: Jangan bomporajoan.#5:27: Doi' buku Koluaran 20:14 huatan buku Ulangan 5:18. 28Apo Aku moonju' porintah ni'in ko kaitn: Jangan sampai lolaki borotian botina' ongko honda' bomporajoan agatn io inyo bukainyo bininyo. Aman lolaki nantai molabuhannyo, boroti io udah bomporajoan dalapm hatinyo. 29Aman mato kanan kaitn bulah kaitn bodosa, cungkilcam huatan buakancam mato nantai! Obai, lobih boi' kaitn kohilakan salah sobuti' anggota bukakng-tubuh kaitn daripado soluruh bukakng-tubuh kaitn dibuakan ko dalapm noraka nononyo. 30Damo aman longan kanan kaitn bulah kaitn bodosa, tota'cam huatan buakan longan nantai! Obai, lobih boi' kaitn kohilakan salah sobuti' anggota bukakng-tubuh kaitn daripado soluruh bukakng-tubuh kaitn dibuakan ko dalapm noraka nononyo.”
Jangan saya'
(5:31-32)
31“Ado jam pomandiran Allah ni'in: Sotiap laki inyo monyaya' bininyo gola' moonju' surat kotorakan saya' ko bininyo.#5:31: Doi' buku Ulangan 24:1-4. Tiat catatan di Lukas 16:18. 32Apo Aku moonju' porintah ni'in ko kaitn: Siku' urakng lolaki inyo monyaya' bininyo aman bukai obai bininyo bomporajoan io mombulah bininyo bomporajoan huatan urakng inyo kawitn agatn botina' inyo disaya' nantai bomporajoan jam.”
Jangan bulah kotumbukan
(5:33-37)
33“Kaitn udah mondinga' pomandiran Allah ni'in jam inyo dionju' ko angki-bayatn kito: Jangan mombalakan sumpah kaitn. Apo labuhancam somuo sumpah kaitn di hadapan Tuhatn.#5:33: Doi' buku Imamat 19:12, buku Bilangan 30:2, ongko Ulangan 23:21. 34Apo Aku moonju' porintah ni'in ko kaitn: Jangan bosumpah obai la'apo pan. Jadi, jangan bosumpah obai sorugo, obai sorugo samo sama'an tahta Allah. 35Jangan bosumpah obai bumi, obai bumi samo sama'an tompat kotonja'an kaki Allah. Jangan bosumpah obai Yerusalem, obai Yerusalem nantai kota umputn Allah, Rajo inyo Maho Kuaso. 36Jangannam jam bosumpah obai kopala' kaitn, obai kaitn co bokuaso bulah solamba'i pan hubatn damo rambut hitapm. Bayo Allah inyo ulih molabuhan nantai. 37Aman kaitn bopandir ‘Au’, padahan ‘Au’ ja'am. Aman kaitn bopandir ‘Cado’, padahan ‘Cado’ ja'am. Jangan momadahan lobih doi' nantai obai inyo lobih doi' nantai boasal doi' Rajo Sitatn.”#5:37: Timpu joman nantai, ado boko urakng inyo bosumpah obai banya' hal pakai' monguat'an janji sia'. Agatn songajo, sia' kinyo bosumpah obai Allah oca' sia' kinyo gola' monopat'i janji sia'. Apo Yesus mongatoan somuo janji sobondarnyo ia'an janji di hadapan Allah. Jadi, aman urakng bulah janji agatn masud kinyo monopat'i janji nantai, sobondarnyo nantai jahat.
Jangan mombalas kojahatan
(5:38-42)
(Luk. 6:29-30)
38“Kaitn udah mondinga' pomandiran Allah ni'in: Mato gonti mato. Gigi gonti gigi. #5:38: Doi' buku Koluaran 21:24, buku Imamat 24:24 huatan buku Ulangan 19:21. 39Apo Aku moonju' porintah ni'in ko kaitn: Jangan mombalas urakng inyo molabuhan kojahatan ko kaitn. Umpamonyo, aman urakng monompilikng pipi kanan kaitn sorahan jam pipi kiba' kaitn pakai' ditompilikngnyo. 40Aman urakng minto baju dalapm kaitn, onju' jam baju luar kaitn. 41Aman ado urakng inyo momoso kaitn bojalatn sojouh so pal, bojalatncam bosamo agatn io sojouh duo pal.#5:41: Timpu joman nantai, projurit Romawi ulih momoso urakng biaso pakai' momikul bobatn projurit nantai. 42Aman ado urakng inyo mominto sosuatu ko kaitn, onju' jam! Damo aman ado urakng inyo honda' mominjapm sosuatu doi' kaitn, jangan monula'nyo.”
Kasihicam musuh kaitn
(5:43-48)
(Luk. 6:27-28, 32-36)
43“Kaitn udah mondinga' porintah Allah ni'in: Kasihicam sosamo kaitn#5:43: Doi' buku Imamat 19:18 huatan bonci'cam musuh kaitn. 44Apo Aku moonju' porintah ni'in ko kaitn: Kasihicam musuh kaitn. Bodoacam pakai' urakng inyo mondorako'i kaitn. 45Obai, Allah Bopai kaitn di sorugo monunju'an kasih-Nyo ko somuo urakng. Sio monumbuhan matoari pakai' urakng inyo jahat huatan urakng inyo boi'. Sio bulah hujatn turutn pakai' urakng inyo hidup bondar huatan urakng inyo hidup kinyo bondar di hadapan-Nyo. Jadi, aman kaitn botindak sama'an Sio, kaitn paca'an monjadi boko poana'an-Nyo. 46Aman kaitn mongasihi bayo boko urakng inyo mongasihi kaitn, nantai bukainyo sosuatu inyo istimewa sampai cucu' mondapat hormat. Obai boko ponagih pajak inyo jahat bulah ubo nian jam. 47Aman kaitn monyampaian salapm bayo ko boko somadikan kaitn mo, nantai bukainyo porbuatan inyo lobih boi' doi' urakng bukai. Obai boko urakng inyo bolupm mongonal Allah bulah ubo nian jam.
48Obai nantai, jadicam kotakng boi', samo sama'an Bopai kaitn di sorugo ia'an kotakng boi'.”
Terpilih Sekarang Ini:
Matius 5: TBDS
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
