मत्ती 15
15
न-गोडाम सेपाकु दुथाम येशूका सीट्मिडिम
(मर्कूस ७:१-१३)
1येरूशलेमलाम कोङनिम फरिसीमिम नुङ यहूदीकु डु़म्ला सीपा पातु़म्रीमिम येशूकाडा रोम्डिमा र्वाम्डी, 2“हेङा इनीमा सीसिपामिमका बेप-पापमिमका बेम्खेम्डिम होम्साका मेबोमिमिम? हेङालोने मेर्मिमका पोमु ङादो उनी ल्वा मेसो़ल्मिवा।”
3येशूका मेर्मिमलाई र्वाम्डी, “गानी वो हेङा इनी बेप-पापमिमका बेम्खेम्डिम होङङा बोमु लागि माम्चु़नीकु डु़म्ला होङङा मेबोनिमिम? 4हेङालोने माम्चु़नीका र्वाम्डिम बु, ‘त्वाकु माम-पापलाई डोक्पु बेनी, मा माम-पापलाई वाइतो बेट्पा मु़चु़ सेन्मुङा बासी।’#प्रस २०:१२; २१:१७; व्य ५:१६; लेवी २०:९ 5लावो मु़चु़मिमका उनी माम-पापलाई, ‘गो मेख्लो़निनी, हेङालोने गो गानीलाई हाम ग्वानिनी र्वाङडोम ने माम्चु़नीलाई ग्वाक्पु र्वाक्साका कसम पेउतोम बु’ र्वाक्साका सीनी। 6आरेसाका मेर्मिमका उनी माम-पापलाई डोक्पु बोमु मेबासी र्वाक्पा गानी सीनी। इनी बेप-पापमिमका बेम्खेम्डिम डु़म्ला होङङा बोमु लागि माम्चु़नीकु सिजेम गानी फाल्निम बु। 7पाखालामका जो़पा लिसिक्पा ए मु़चु़नी, यशैयाका इनीमा दुथाम आरेसाका माम्चु़नीलाम जो़पाङा जेस्ताम रेछा:
8‘ओर्मिम मु़चु़का गोलाई उनी सिका कोङङा डोक्पु बोङिमी,
लावो उनी न-गो ने गोडाम होनोवा बु।
9हाम ना हामका मेर्मिमका आमा सो़रलोले बोमी,
मु़चु़का बनेम्डिम डु़म्ला कोङङा मेर्मिमका सीमी’।”#यशै २९:१३
10येशूका सेर्पा मु़चु़लाई उनीमाडा रेट्मिडिमा र्वाम्डी, “गो हाम र्वाङु, थो़निमा थेसिथेट्नी। 11सिलामका हाम हु मेरामका मु़चु़लाई मेसेपा मेबु़, लावो सिलामका हाम ल्वा पाखानो लु, मेरामका मु़चु़लाई मेसेपा बु़।”
12मेकोतिमा सीसिपामिम रोम्डिमा गुमीलाई र्वाम्डी, “गानी र्वाक्निम ल्वाका फरिसीमिमकु थो़म्बोकडा दुड्डु़ र्वाक्पा गानी चनिम मिबु?”
13लावो येशूका र्वाम्डी, “कोङनिमका मेख्लियु़वाम विरुवा बुलु़मिम होङङा, उनीमा साखाम मान्थिका सीमिमिम मु़चु़मिमकु सीसिलाई पाह्रीलाम आमा पापका हाम ना हामकाम दु़म्बेन्मी। 14मेम्मिमका मेर्मिमकामथो़ न-मेसोमी। मेर्मिम ने मिक्सीका मेल्वापामिमलाई क्रिपा मिक्सीका मेल्वापामिम सो़। मिक्सीका मेल्वापाका मिक्सीका मेल्वापालाई क्रियु़ माला निफिङा पोलु़मगोयु़ वाम्ची।”#लूक ६:३९
15पत्रुसका येशूनुङ र्वाक्ता, “गानी मालो र्वाक्निम सीसि-सो़म्दीकु दुथाम जो़होमका थेसिथेन्बेट्किनिका।”
16गुमीका र्वाम्डी, “हाम आथावो गानी थेसिमेथेट्निवाम? 17गानी हाम पोनी, मेराम सिलामका ख्वाचेपगोयु़ ल, मा पाखा लु। 18लावो गानी जेनिमिम ल्वा न-गोलामका लु, मेरामका गानीलाई मेसेपा दु़म्बेनी। 19हेङालोने न-गोलामकाङा मेजो़पा न, मु़चु़ सेट्पा, नाम्सु़रु़, वाङमी मेसेमनुङ अम्बाल्पा, खुपा, लिमा थेट्पा, मा डक्साका जेपा ल्वामिम लुमी। 20ओर्मिम ल्वाका गानीलाई मेसेपा दु़म्बेनी। ल्वा मेसो़ल्साका पोनिमिमका मेसेपा मेदु़म्नी।”
वाङसामा मेसेमकु थो़र
(मर्कूस ७:२४-३०)
21मेकोतिमा येशू मे गालीललामका जेजु़थो़म टुरोस नुङ सीदोन इलाकाथो़ लम्डी। 22मेराम क्षेत्रडाम कोले कनानी वाङसामा मेसेम येशूकाडा रोक्तामा येत्तो आरे र्वाक्ताम-र्वाक्तामङा बु़डु़, “ङाचो़, दाऊदकु तारापाचो़#१५:२२ मसीहकु नङ।, गोडला न-थो़म रेम्बेनी, आमा जाउमोचो़ मुनाङका हुप्डु़मा छो़म दु़खा ग्वाक्तु़म बु।” 23लावो येशूका गुलाई हाम वो मेर्वाक्मिवा। उनी सीसिपामिमका आरे र्वाम्डिम र्वाम्डिमङा बेम्डी, “ओ मेसेमलाई थु़र्सोट्नी, हेङालोने ओरामका इकी चङचङ स्याका-स्याका र्वाहोम बु।”
24येशूका मे मेसेमलाई र्वाम्डी, “दाम्पा भेन्दामिम होङङा दु़म्पा इस्राएलीमिमकाडा कोङङा माम्चु़नीका थु़र्ङिडिमिम।”
25मे मेसेम आथावो येशूकाडा रोक्तामा क्रचु़खुम बेत्तो र्वाक्ता, “ङाचो़, गोलाई ख्लो़ङिनी।”
26गुमीका र्वाम्डी, “गो गाना वाङसामालाई ख्लो़न्नी माला पापका उ चो़च्चो़मिमकु सो़बेम रोडु़मिमा उ ख्लेबामिमलाई पोमु ग्वाकु़मिम होप्मामङा दु़म। मेम बोमु जो़पा मेदु़म।”
27मे मेसेमका र्वाक्ता, “गानी र्वाक्निम ने आच्छाङा ङाचो़, लावो ख्लेबामिमका वो उनी नेमहपकु टेबलकु गोयु़ आल्पा सो़बेमकु फ्वाक्चो़लमिम ने पोमु ल्वामी नी।”
28मेकोतिमा येशूका मे मेसेमलाई र्वाम्डी, “ए छापा, इमा थो़र छो़म डोक्पु बु। गाना र्वाक्नाम होङङा दु़म्नु़।” मेम्मा मे मेसेमकु जाउमोचो़ मेराम थारीकाङा सस्ल्याड्डा।
हापा मु़चु़लाई येशूका सबेट्मिडिम
(मर्कूस ७:३१–८:१०)
29येशू मेलामका गालील दिरिदिनकु सो़पलाम दु़म्तो लम्डी। मेम्मा पोप्चङडला लम्डिमा बाम्डी। 30खेल सोक्पा, मिक्सीका मेल्वापा, मेचापा, सि मेजेपा, मा वाङमिम हापा मु़चु़लाई रेसाका छो़म सेर्पा मु़चु़ येशूकाडा रोम्डी। मेर्मिमका मे नो़पा मु़चु़मिमलाई येशूकु ङादोडा गट्मिडी, मा गुमीका मेर्मिम खोत्लेलाई सबेट्मिडी। 31सि मेजेपामिम जेम्डिम, मेचापामिम नु़म्डिम, खेल सोक्पामिम लाम्दिम्डिम, मिक्सीका मेल्वापामिमका मिक्सीका ल्वापा दु़म्मिडिम ल्वाम्डिमा मु़चु़मिम ङाङाया दु़म्मिडी। मेम्मा मेर्मिमका इस्राएलकु माम्चु़नीकाम नङ कोम्डी।
येशूका ब्ल धु़मसङ (४,०००) मु़चु़मिमलाई पोमु ग्वाम्डिम
(मर्कूस ८:१-१०)
32मेकोतिमा येशूका उनी सीसिपामिमलाई येट्मिडिमा र्वाम्डी, “ओर्मिम मु़चु़मिमडाम आमा थो़म भ्रो़। ओर्मिम गोनुङ बुमिमिम आनेप सुलेम दु़स्ता, मा ओर्मिमनुङ पोमु-डुमु हाम वो मिबु। ओर्मिमलाई मान्जाङा थु़र्सोमु आमा न मिबु, मेएँ माला ने, क्रु़मका उनी न दाममा लाम्दीडा घ्लो़बुम्सिमी।”
33उनी सीसिपामिमका गुमीनुङ र्वाम्डी, “आकोम सेर्पा मु़चु़लाई खोहोम सो़बेम पोमु ग्वामु सु़ वो मेबाट्पा ओराम खोमडा बालामका डार्मु मा?”
34येशूका मेर्मिमनुङ हिलाबेम्डी, “गानीनुङ सो़बेम हाले बु?” मेर्मिमका र्वाम्डी, “येतले सो़बेम नुङ कोले-नले याक्केतो ङो बु।”
35येशूका सेर्पा मु़चु़लाई बायडा गन्बेट्मिडी। 36गुमीका मे येतले सो़बेम नुङ ङो झेट्मिडिमा माम्चु़नीलाई आलासो़ ग्वाम्डी, मा फ्वाक्चो़ल बेम्डी। मेम्मा गुमीका सीसिपामिमलाई ग्वाम्डी, मा मेर्मिमका मु़चु़मिमलाई दो़म्साम्डी। 37मेर्मिम खोत्लेका पेम्डिमा खोम्डी। चङडा घ्लेट्पा फ्वाक्चो़लमिम सीसिपामिमका डो़म्डिलो येतले खचा दु़स्ता। 38मेसिन्डा पेपामिम मेसेममिम नुङ चो़च्चो़मिम डिसाका ब्ल धु़मसङ (४,०००) वोस्चो़मिम बाम्डी। 39मेकोतिमा येशूका सेर्पा मु़चु़लाई मेर्मिमकु नेम थु़र्मिडी। मेम्मा गुमी कुबी-बोक्साडला हुम्डिमा मगादान इलाकाथो़ लम्डी।
Terpilih Sekarang Ini:
मत्ती 15: THUL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Wycliffe Bible Translators, Inc. All rights reserved.
