Sɩngre 40
40
A Zozɛf bilga zãmsd bi-bees roogã pʋga
1Bõn-kãensã fãa loogr zugẽ, daar a yembre, Ezɩpt rĩmã bõn-yũudlã kɩta, ne a rɩɩbã yel-gɛtã beega b soaalã sẽn yaa Ezɩpt rĩma. 2Ezɩpt rĩm a Faarõ sũur yika ne a sõgen-kãensã b yiibã: Yaa sõgen-kãsengã sẽn yaa bõn-yũudlã kɩtã, ne rɩɩbã yel-gesg taoor soabã. 3La rĩma kɩtame tɩ b yõg-b n kẽng gũudbã naab zakã sẽn be bi-bees roogã zak pʋgã. La b kẽes-b-la zĩig ninga b sẽn dag n pag a Zozɛfã. 4Bi-bees roog gũudbã naab rɩka bãmb n gũnug ne a Zozɛfe, t'a sõng-ba. La bãmb zĩnda bi-bees roogã pʋg n kaoos bilfu. 5Daar a yembre, yʋn-yɛng pʋgẽ, Ezɩpt rĩmã bõn-yũudl kɩtã ne a rɩɩbã yel-gɛtã sẽn dag n be bi-bees roogã, zãmsa zãmsdo. La ned kam fãa zãmsd yaa toore, t'a bilgrã me yaa toore. 6La vẽkembeoog yibeoogo, a Zozɛf waa bãmb nengẽ, la a mikame tɩ bãmb nensã gãnemame. 7Woto, a Zozɛf soka Faarõ sõgen-kambã sẽn be ne yẽnda bi-bees roog a soaalã zakẽ wã n na n bãng a võore. Yẽnda sok-b lame yaa: «Yaa bõe tɩ yãmb nensã gãnem dũndã a woto?» 8Bãmb leoka yẽnda yaa: «Tõnd zãmsa zãmsdo, la ned ka be sẽn na n bilg tõnd a võor ye.» A Zozɛf yeela bãmb yaa: «Ka Wẽnnaam n so bũmbã fãa bilgr la? Togs-y maam yãmb zãmsdã.»
9Bõn-yũudl kɩtã togsa a Zozɛf a zãmsdã n yeel yaa: «Mam zãmsdã pʋga, mam yãndame tɩ reezẽ tɩɩg n be mam taoorã. 10La reezẽ tɩɩgã rag n tara wil a tãabo. La a tobame n ning puudu, n wom reezẽ-gĩn sẽn bɩ n mooge. 11La Faarõ bõn-yũudlã wamd dag n bee mam nugẽ. La mam dɩka reezẽ-gĩnã n wẽk a koomã n ning Faarõ bõn-yũudlã wamdẽ, n dɩk wamdã n kɩs Faarõ t'a reege.» 12A Zozɛf yeela yẽnda yaa: «Ad yãmb zãmsdã bilgri: Wil a tãabã wilgda rasem a tãabo. 13Keta rasem a tãabo, tɩ Faarõ yiis yãmb n zẽk y zugu, n leb n lebs yãmb y tʋʋmdã pʋga. La yãmb na n leb n kõo Faarõ a bõn-yũudlã wa yãmb sẽn dag n maand pĩndã, y sẽn wa n yaa bãmb bõn-yũudl kɩtã. 14La mam kota yãmb tɩ y sã n wa n be y sũ-noogã pʋga, bɩ y tẽeg mam yelle, n maan-m neere, n gom ne Faarõ mam yelle, n kɩt tɩ b yiis-m do-kãngã pʋga! 15Bala, b yõka maam Ebre nebã tẽngẽ tall n wa ka, la kaanẽ wã me, b kẽesa maam bi-bees roog tɩ m yaool n ka maan baa fɩ ye!» 16Rɩɩbã yel-gesg taoor soabã sẽn yãnd tɩ zãmsdã bilgr yaa sõama wã, a yeela a Zozɛf yaa: «Sã n yaa ne mam zãmsdã pʋga, mam yãame tɩ mam tʋka pet a tãab sẽn pid ne buri. 17La peoog ning sẽn tɩ be-a hal zugẽ wã, yaa rɩɩb nins fãa rɩɩb yel-gɛtbã sẽn segend n kõt Faarõ n dag n be beenẽ. La bõn-yɩgdɩ n wa n dɩ rɩɩbã sẽn be peoogã pʋg mam zugẽ wã.» 18A Zozɛf leoka yẽnda n yeel yaa: «Ad fo zãmsdã bilgri: Pet a tãabã mamsda rasem a tãabo. 19Ade, keta rasem a tãabo, tɩ Faarõ zẽk fo zug tɩ loog f sẽn date, la b na n luula foom ra-luk zugu, tɩ bõn-yɩgdɩ rɩ fo nemdã.» 20Rasem a tãabã daare, rag n yaa Faarõ rogem tẽegr daare, b maana tigr tʋmtʋmdbã fãa yĩnga. Faarõ kɩtame tɩ b yiis a bõn-yũudlã kɩtã ne a rɩɩb yel-gɛtã n kẽes a tʋmtʋmdbã sʋka. 21Rĩm a Faarõ leb n lebsa bõn-yũudl kɩtã a tʋʋmdã pʋga, tɩ yẽnda leb n kɩt Faarõ a bõn-yũudlã. 22La a kɩtame tɩ b luul rɩɩb yel-gɛtbã taoor soabã wa a Zozɛf sẽn dag n bilg a zãmsdã võor to-to n kõ-a wã. 23La bõn-yũudlã kɩtã ka tẽeg a Zozɛf yell ye. Yẽnda yĩma a Zozɛf yelle.
Terpilih Sekarang Ini:
Sɩngre 40: MPBU
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Moore Bible © Bible Society of Burkina Faso, 2014.