Marko̱ 3
3
Jesuu̱ kitsindaya ngu xu̱ta̱ nga ni̱tjin xubato
(Mt 12.9-14; Lk 6.6-11)
1Ku Jesuu̱ te̱ tsasꞌenni ni̱ngu̱xi̱. Ku kꞌi̱a̱ kjitjián ngu xta̱ xi ni̱ma̱ tsja.
2Inchabase ꞌmáre̱ Jesuu̱ xu̱ta̱ fariseo̱ tsa tsindaya kui xta̱ nga ni̱tjin xubato, tuxi manga batejené nga̱tꞌa tjitsixá nditsa ni̱tjin nikjaya.
3Jesuu̱ kitsúre̱ kui xta̱ xi ndáji tjínre: «Tisitjen ku ngabasenꞌe̱n ngieje xu̱ta̱ tisi̱n.»
4Ku kjia tsinengiyare̱ xu̱ta̱ xi kꞌi̱a̱ tjima: «Mí xi ndá ma ñaꞌan nga ni̱tjin xubato: A najmi xi ndátjin a xu najmi xi ndáji tjin. A nga nindaya̱ ngu xu̱ta̱ a xu̱ nga nikꞌen»
Ta̱nga ngují xi skengire. 5Niꞌyú tsasére Jesuu̱ ngieje xu̱ta̱ xi jatjíandaire ku nga kube nga tuxi taja ku tjójire xikjin, tuxi ndusín kumáre. Kui nga ku̱i̱cha kitsúre̱ xta̱ xi ndáji tjínre: «Tjentei ndsaji.»
Skexinga tsja kui xta̱, ku kundaya tsja.
6Itju xu̱ta̱ fariseo̱ ngaya ni̱ngu̱xi̱ ku tjeꞌñu kitsingujínre yajo̱ꞌe xu̱ta̱ xi yajajo̱ Erode̱ xta̱xá xi batexuma; ku jña tsaꞌángire nga ꞌyenda kúcha tsiꞌinre nga tsikꞌen Jesuu̱.
Kjibaku ku tjitsindaya xu̱ta̱ Jesuu̱
7-8Jesuu̱ jña kijíni kju̱ ja xi kjibakuyáre̱ tsꞌua chincha tsé. Tuxi kjín xu̱ta̱ tjimatjengíre, ngieje xi je tsitꞌe najmi xi mare̱ ñaꞌan. Xu̱ta̱ xi chja̱ nangi Ngalilea̱ kju̱ xi chja̱ Judea̱, xi chja̱ na̱xi̱nanda Jerusalen ku Idumea̱. Tjín xi jíndiba ngundatiu ndana xi ꞌmí Jordan, kju̱ xi tjoña mare̱ na̱xi̱nanda xi ꞌmí Tiro̱ kju̱ Sido̱n.
9Nga̱tꞌa tuxi kjínma xu̱ta̱, tsinengire̱ Jesuu̱ ja xi kjibakuyáre̱ nga ngatꞌenda ngu tsutsu je, tuxi kꞌiají batené xu̱ta̱ kjin. 10Nditsa je kjín xu̱ta̱ xi je kitsindaya, tuku kjinma xi ndáji sindure xi kꞌi̱a̱ jatjíandaire ku mejénre nga kjingajun tuxi mandaya.
11Nga be Jesuu̱ ngayaꞌasen xaba, tuxi bixú nangi ku kjindia: «¡Jí xi Kjindiꞌe Namiña Diuu̱ jí!»
12Ta̱nga Jesuu̱ tuxi ꞌñu kuatsure xu̱ta̱ nga ngují xi ngatsuyare̱ ꞌyáni kui.
Tejó xu̱ta̱ jajín Jesuu̱ xi batetsajo enꞌen
(Mt 10.1-4; Lk 6.12-16)
13Jaskan Jesuu̱ kua kitsúre̱ xu̱ta̱ xi tjimatjengíre nga jña nga ngatijin ngu na̱xi̱. Nga je jña sindu ngieje, 14tejó xiꞌin jajín xi mejénre nga jña ꞌbema ku nga kuixi fuetsuyasún én tjatse xi tsuꞌbájo̱. Ku xu̱ta̱ xi batetsajo enꞌen kitsikꞌin 15ku kitsjuáre̱ ngaꞌñu nga ꞌbatsjé xindajin ngajín yajo̱ꞌe xu̱ta̱.
16Kui ja xi tejó jajin Jesuu̱: Ximo, kui xi Pe kitsúre; 17Santia ku Jua, nistiꞌe Sebedeo̱, xi Boanerge̱ kitsikꞌin, xi mejénre tsu «kjindiꞌe cha̱ꞌo̱n»; 18Jandre̱, Lipe̱, Bartolome̱, Mateo̱, Santia tiꞌe̱ Alfeo̱, Tadeo̱, Ximo xi mejénre nangiꞌe̱ kju̱ 19Juda̱ Iskariote̱, xi jaskan nga jatjijúnre Jesuu̱.
Jesuu̱ ku xi siantetjunre xindajin
(Mt 12.22-32; Lk 11.14-23; 12.10)
20Nga je ku̱i̱cha kitsiꞌin Jesuu̱ kijíni niꞌyaꞌe. Ta̱nga tuxi kjínma xu̱ta̱ xi te̱ kutku̱ni, ku kuí kju̱ ja xi kjibakuyáre̱ janda kuꞌajíre nga tsakjien. 21Nga tsitꞌe xu̱ta̱ꞌe Jesuu̱ najmi xi tjitsiꞌin, kikangitsjai nga mejénre nga faju, nga̱tꞌa inchatsú nga je kutsabére.
22Ta̱nga chjine Kju̱a̱kixiꞌe Namiña Diuu̱ xi jichú Jerusalen, ku̱i̱cha inchachja̱: «Kui xta̱ Belsebu̱ kjitje̱jún, xi siantetjunre xindajin. Tsa najmi ngaꞌñu xi tjitsjuáre Belsebu̱, kuajícha ma nga mangatjengire̱ xindajin ngajín yajo̱ꞌe xu̱ta̱.»
23Kui nga tsichjare Jesuu̱ ku ku̱i̱cha kitsuyáre̱:
«A ma nga te kuini Xindajin ꞌbatsjé subá yajo̱ꞌe. 24Tsa xu̱ta̱ xi tjin ngu na̱xi̱nanda tekuini xikjin kjanjun, tucha̱n nga chaja kui na̱xi̱nanda. 25Tsa xu̱ta̱ xi chja̱ ngu nganiꞌya tekuini kjanjun xikjin, tekuácha tucha̱n nga chaja kui xu̱ta̱ xi ngu nganiꞌya. 26Kutsa Xindajin tekuini kjanjun yajo̱ꞌe, tekuini tsikjie subá na̱xi̱nanda jmá kjibatexuma.
27»Tsa tjin xi mejénre cheje tsiꞌin ngu niꞌya xi tjínre ngaꞌñu ndia̱ꞌe, tjún ꞌbetaꞌñu kui xta̱.
28»Kju̱a̱xikjáinni Namiña Diuu̱, tsichatꞌáre xu̱ta̱ xi tjínre ngieje tku̱ya jee, ku ngieje najmi xi ndáji ꞌbeꞌa tsꞌua; 29Ta̱nga najmi ni̱tjin tsichatꞌáre xi ꞌbetꞌare Ngayaꞌasen xi Tsjé. ¡Kui najmi xi najmi ni̱tjin nga sakure kju̱a̱nichatꞌa!»
30Ku̱a̱cha kitsú Jesuu̱ nga̱tꞌa kubéni nga chjine Kju̱a̱kixiꞌe Namiña Diuu̱ inchatsikjo nga ngayaꞌasen xaba tjínre.
Naꞌen Jesuu̱ kju̱ jatsꞌe kju̱ ndichja
(Mt 12.46-50; Lk 8.19-21)
31-32Nga ku̱a̱cha kjima, jichú naꞌen kju̱ ja tsꞌe̱ kju̱ ndichja̱ janda niꞌya jma nga kjitjián, ta̱nga kjindetsin kisꞌendu ku kitsingiyare̱ én nga ngandiba. Xu̱ta̱ xi sindundaire Jesuu̱ kitsuyáre̱:
—Nári, tsꞌéji kju̱ ndichjaji sindu kindetsin, ku mejénre nga jí chjajóri.
33Ta̱nga ku̱i̱cha tsinengiyare̱ Jesuu̱:
— Ta̱nga nga xikju̱a̱xikjain, ꞌyáni xi naꞌna̱ ku xi tsꞌeꞌan ku xi ndichja̱ꞌan.
34Jaskan, tsasére̱ ngieje xu̱ta̱ xi sindu ngandaiꞌe̱ ku ku̱i̱cha kitsú:
—¡Kui xi naꞌna̱, tsꞌeꞌan ku ndichja̱ꞌan jún! 35Nga̱tꞌa kju̱a̱xikjain nga xi tꞌeꞌenre Namiña Diuu̱ kui xi tsꞌeꞌan, ndichja̱ꞌan ku naꞌna̱.
Terpilih Sekarang Ini:
Marko̱ 3: MZI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
México © Sociedad Bíblica de México, A.C. AÑO
