Jua 3
3
Kjesuu kju̱ xta̱ xi ꞌmí Nikodemo̱
1-2Ngu xta̱ fariseo̱ xi ꞌmí Nikodemo̱, xi sian tetjunre xu̱ta̱ judio̱, jichutꞌajñúre Kjesuu ku ku̱i̱cha kitsúre̱:
—Chji̱ne, yájni nga Namiña Diuu̱ kitsingiyári nga ndiukakuyéjni, nga̱tꞌa tsuꞌyájí xi mare̱ tsiꞌin najmi xi mári ku majín kúcha ñaꞌan bixuya, tsa Namiña Diuu̱ jí xi kitsjuári kui ngaꞌñu.
3Ku̱i̱cha kitsú Kjesuu:
—Kju̱a̱xikjainni, tsa ngu xu̱ta̱ mejínre nga tjukja tjatse, najmí ni̱tjin sku̱e̱ ngande jmá kjibatexuma Namiña Diuu̱.
4Nikodemo̱ tsinengiyáre̱ Kjesuu:
—Kúcha kuma̱ nga te̱ tsínni ngu xu̱ta̱ xi je changa. A ma nga te̱ basꞌénni ngingudiya ngaya nda̱ba̱ kjindiꞌe naꞌe̱n.
5Ku̱i̱cha skengi Kjesuu:
—Kjuaxikjáinni, tsa tjin xi tsínjin nga̱tꞌaꞌe ndijua kju̱ nga̱tꞌaꞌe Ngayaꞌa̱sen, majín basꞌen ngande jmá batexuma Namiña Diuu̱. 6Ngieje xu̱ta̱ nga xu̱ta̱ nga̱sunde tjukjatꞌáre; ta̱nga xi kjindiꞌe Namiña Diuu̱ Ngayaꞌa̱sen tukja. 7Nga tu kuají ngatumári tsa kuaxíra nga tsubáre tukjániña ngingu ndiya. 8Tujma nga mejénre faꞌa tjo̱, nditsa nuꞌyejíri kúcha fane, yijí jmá ndiba kute̱ yijí jma nga fue. Tekuácha mataꞌin ngieje xi tukjáre Ngayaꞌa̱senꞌen Namiña Diuu̱.
9Te̱ tsinengiyáni Nikodemo̱:
—Kúcha kuma najmi xi tjibixí.
10Ku̱a̱cha kitsú Kjesuu:
—Jí xi ꞌñu bejínri ngieje na̱xi̱nanda Israe nga chjíneji. 11Kjuaxikjáinni nga yájni najmi xi tjinukjuájni, nga̱tꞌa je kuyájni; ta̱nga jún sꞌejinjínjnu najmi xi bixujni. 12Tsa sꞌejinjínjnu nga xiyájnu najmi xi chja̱ nga̱sunde, átu̱ kjaꞌmí tsa najmi xi chja̱ ndiu̱jmi xiyájnu. 13Kje ngují xi fichú ndiu̱jmi, tujma ántsa xi kꞌi̱a̱ jíndibaꞌan, xi Kjindiꞌe xu̱ta̱ nga̱sunde.
14»Xukúcha kitsikisitjen ye̱ kicha siné Moise kꞌi̱a̱ nangi kixí, ku tekuácha án, xi Kjindiꞌe xu̱ta̱ nga̱sunde, tekuácha tsubáre nga kꞌa nikisitjénna, 15ngieje xu̱ta̱ xi sꞌejínre nga̱tꞌaꞌna najmí ni̱tjin kjue kju̱a̱mijñachunꞌen.
16»Tuxi ndá kitsitjo xu̱ta̱ nga̱sunde Namiña Diuu̱, ku kitsjua Kjindi tjunꞌe̱n, nga̱tꞌa ngieje xi sꞌejínre nga̱tꞌana najmí ni̱tjin nga ꞌmé, tusátse sakúre kju̱a̱mijñachun nguxikaꞌa. 17Kuijí xá kitsingiyana Namiña Diuu̱ tsa xu̱ta̱ nga̱sunde tsijéna, tusáni kju̱a̱ꞌekꞌátsjengiꞌan.
18»Xi sꞌejínre nga̱taꞌna, nga án xi Kjindiꞌe Namiña Diuu̱ꞌan, najmí ni̱tjin nga Namiña Diuu̱ tsijere. Ta̱nga tsa tjin xi sꞌejinjínre je kisakungi jee, nga̱tꞌa kisꞌejinjínre nga̱tꞌaꞌe xi Kjindi ngu tutuꞌe Namiña Diuu̱. 19Ku ku̱a̱cha tsitsjé kju̱a̱ Namiña Diuu̱: án xi jiꞌiꞌan kui nga̱sunde, ku án kui ndiꞌi xi fatꞌae jmanga jñu, ta̱nga xu̱ta̱ xi kju̱a̱xaba máre ñaꞌán jñu skabe ndiꞌi xi majínre tsitsejénña. 20Ngieje xu̱ta̱ xi najmi xaba tsiꞌin chꞌore ndiꞌi xi tsiꞌasénña, ku tsitiñajínre yajo̱ꞌe, nga̱tꞌa mejínre nga bitjutsejen najmi xi inchatsiꞌin. 21Ta̱nga xi najmi kju̱a̱xikjain mejénre tsitiñare ndiꞌi yajo̱ꞌe, nga̱tꞌa mejénre nga ngatubé xu̱ta̱ nga tsikitjusún ngieje kju̱a̱kixiꞌe Namiña Diuu̱.
Ku̱a̱cha kitsuya Jua xi Batenda nga̱tꞌaꞌe Kjesuu
22Nga je kumá kui najmi, Kjesuu kiju ja xi kjibakuyáre̱ nangi Judea̱, ku kꞌi̱a̱ kisꞌendu chu̱ba̱ ni̱tjin jma ite̱nda xu̱ta̱. 23-24Kui ni̱tjin tuku kjia fueji nduya Jua xi Batenda, ku tekuácha kjibatendá xu̱ta̱ ngande xi ꞌmí Eno̱n, tiñare ngande xi ꞌmí Sali̱m. Tuxi ꞌñu tjin ndijua ngande Eno̱n, ku xu̱ta̱ mangitsjai Jua nga̱tꞌa mejénre nga kui batenda.
25Ku jaskan ja xi kjibakuyáre̱ Jua jutijú ngu xta̱ judio̱, nga̱tꞌaꞌe kúcha tsubáre nga tsitsjé yajo̱ꞌe xu̱ta̱ ngixku̱n Namiña Diuu̱. 26Jaskan kikasere̱ Jua ku ku̱i̱cha kitsúre̱:
—Jí kua Chji̱ne, a fuetsjénri nga̱tꞌaꞌe kui xta̱ xi kikꞌenijmi̱jni ngu ni̱tjin, xi jña tijñanjnu ngundatiu ndana Jordan. Ku kjatꞌei kui xta̱ tekuácha kjibatendá ku tuxi fichitꞌáre xu̱ta̱.
27Ku̱a̱cha skengi Jua:
—Tsuꞌyájí xi ma tsiꞌin ngu najmi tsa Namiña Diuu̱ xi tsjuají kju̱a̱. 28Nga̱tꞌa jún ndá kinuꞌyájnu nga anjín xi jajínna Namiña Diuu̱ xi kju̱a̱ꞌikꞌatsjengíjnu, ta̱nga án tjun kiningiyána nga kui, ku án xi tjen kju̱a̱ꞌikꞌendaꞌna ndiya kui.
29»Kjia nga ma ngu kju̱a̱bixantsja#3.29 Kju̱a̱bixantsja: ku tekuácha kju̱a̱bixuntsja bixú., xke xi bixantsja, ku xta̱ xi ndá yaꞌa xke tsjua mare̱ nditsa tu ndaꞌetse tꞌere. Kikjua tsjua tjínna kjatꞌei, nga̱tꞌa je kꞌui kitjián xi jajín Namiña Diuu̱ xi kju̱a̱ꞌikꞌatsjengiña. 30Kuí xi tsubáre nga ꞌñu nichjiꞌe ngisa, tukꞌuajíre̱ nga án.
31»Kjindiꞌe Namiña Diuu̱ ndiu̱jmi jíndiba, ku kuí xi ꞌñu chjiꞌe ngisa tukꞌuajíre̱ nga ñá xi nangi tjimasúnña, ku kuitsa najmi xi kjima nga̱sunde tjinukju̱a̱yáña. Xi ndiba ndiu̱jmi kuí xi ꞌñu chjiꞌe ngisa, 32Ku najmi xi kube ku tsitꞌe ndiu̱jmi kuitsa xi kju̱a̱jikꞌenijmi. Ta̱nga ngingu najmi, kjinma xu̱ta̱ xi sꞌejinjínre én xi tsuya. 33Ta̱nga tsa tjin xi sꞌejínre nga̱tꞌaꞌe, tsibé yajo̱ꞌe nga kju̱a̱xikjain én xi tjitsúña Namiña Diuu̱, 34nga̱tꞌa nga chja̱ Kjindiꞌe Namiña Diuu̱, tekuíni Namiña Diuu̱ xi tjichja, nga̱tꞌa Namiña Diuu̱ kitsjuáre̱ ngieje ngaꞌñu Ngayaꞌa̱sen.
35»Namiña Diuu̱, xi Nami, ku tjore̱ Kjindiꞌe, ku kitsjuáre̱ ngaꞌñu nga kui tsiꞌin manda ngieje nga̱sunde. 36Xi sꞌejínre nga̱tꞌaꞌe Kjindiꞌe Namiña Diuu̱ sakúre kju̱a̱mijñachun nguxikaꞌa, ta̱nga xi tꞌeꞌenjínre̱ Kjindiꞌe Namiña Diuu̱ sakujíre kju̱a̱mijñachun, tusani jee tsjuare Namiña Diuu̱.
Terpilih Sekarang Ini:
Jua 3: MZI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
México © Sociedad Bíblica de México, A.C. AÑO
