VAROMA 5
5
Nyasaye Akhukholanga khuva Valunji Imbeli wewe
1Lwa khwakholwa khuva valunji imbeli wa Nyasaye khuvirila mu lisuuvila, khuli ni milembe na Nyasaye khuvirila mu Mwami weru Yesu Kristo. 2Khuvirila mu lisuuvila, khwanyola injila yu khulolelwa tsimbavasi tsia Nyasaye khuvirila mu Yesu, tsichilanga nunundi nu khuva mwoyo. Khwichinjililanga mu lisuuvilitswa lia khuli nalio, liu khusanga mu vukhumi vwa Nyasaye! 3Shikali ni kenako konyene tawe, navutswa khwichinjililanga mulinyakhana lieru, lwa khwamanya ndi linyakhana lileranga vwitsumishitsi, 4khandi vwitsumishitsi vuleranga mwiima mulahi; mwiima mulahi kuleranga lisuuvilitswa. 5Shikali lisuuvilitswa lichilanga nu khukhutsa mwoyo tawe, shichila Nyasaye wa khuha vuyaanzi vwevwe mu mioyo chieru khuvirila mu Roho Mutakatifu, wa yakhuha.
6Lwa khwali nu khushili vateteshele, Kristo yakhutsila vooni mu inyinga indahi yali niyarovolwa. 7Shikali nu vutoro mundu khukhutsila mundu wi likhola liu vulunji tawe; navutswa haundi, mundu anyala khukhutsila mundu mulahi. 8Navutswa Nyasaye yakhumanyinya vuyaanzi vwevwe, shichila lwa khwali nu khuli vooni, Kristo yakhukhutsila! 9Khulwa yako, nunundi khwakholwa khuva valunji khuvirila mu likhutsa lia Kristo, ni hali khanga khanyishi, khaliitsa khukhuhonyinya khurula mu vurima vwa Nyasaye! 10Khwali vatsiku va Nyasaye; navutswa wa khulomba nunundi khuva valina veve khuvirila mu likhutsa liu Mwana wewe. Lwa khuli nunundi valina va Nyasaye, kali havulavu ndi Kristo aliitsa khukhuhonyinya hali khanyishi khuvirila mu vulamu vwevwe. 11Shikali ni kenako konyene tawe; navutswa khuli nu vuyaanzi khandi mu Nyasaye khuvirila mu Mwami weru Yesu Kristo, umali nunundi khukhukhola khuva valina va Nyasaye.
Liavukhana Livulaho hakari ha Adamu nende Kristo
12Khuli lwa vwoni vwanyolekha mu shivala khuvirila khu mundu mulala; khandi likhutsa nilinyolekha shichila vwoni, vandu voosi mu shivala, vakhutsanga shichila vakhola vwoni. 13Ni kilikali, vwoni vwali mu shivala malako nikashili khuhaanwa; navutswa ha Malako kavula, vwoni shiuvunyala khuvaho tawe. 14Nikhali khuraanjila mumatukhu ka Adamu khutukha mumatukhu ka Musa, likhutsa lia yamiha vandu voosi mu shivala, khali vandu vali nivashili khukholakhu vwoni, khuli vwa Adamu yakhola.
Adamu yali khuli shimanyilu khu Kristo, wamanya niyitsa inyuma. 15Navutswa shikali shihanwa shia vutswa, shili khuli vwoni tawe. Niiva vandu vanyishi vakhutsa khuvirila khu vwoni vu mundu mulala yakhola, ni hali khanga khanyishi kha valiitsa khunyola tsimbavasi tsia Nyasaye, khandi shihanwa shia vutswa shi tsimbavasi tsiu mundu mulala Yesu Kristo, aliitsa khulolela vanyishi. 16Khuli nu vwavukhani, hakari hi shihanwa shia Nyasaye nende vwoni vu mundu mulala yakhola. Lwa mundu mulala yakhola vwoni, khwali ni likhalachilwa “Liukhukhola vutamanu”; navutswa vandu vanyishi nivakhakhola vwoni, Nyasaye yahaana shihanwa shieshie, “Shiukhuvula khukhola vutamanu!” 17Ni kilikali ndi khuvirila mu vwoni vu mundu mulala yakhola, likhutsa liaraanga khwamiha khuvirila mu mundu mulala mwenoyo. Navutswa ku mundu mulala, uli Yesu Kristo yakhola kali ni tsingulu tsinyishi khuvira vwoni vu mundu mulala yakhola! Voosi vanyolanga mu vunyishi tsimbavasi tsia Nyasaye, khandi vakholwa khuva valunji mu vuvoholole, valiitsa khwamiha mu vulamu khuvirila mu Kristo.
18Khulwa yako, lwa vwoni vu mundu mulala yakhola vwachila vandu voosi mu shivala nivakhalachilwa, nindio khandi shikholwa shiu mundu mulala wi likhola liu vulunji yakhola shichilanga vandu voosi ni vavohololwa, khandi nivanyola vulamu. 19Lwa vandu voosi vakholwa khuva vooni, shichila mundu mulala yambakhana khulonda malako, nindio khandi voosi valiitsa khukholwa khuva valunji imbeli wa Nyasaye khuvirila mu mundu mulala walonda malako.
20Malako kahaanwa khu vandu vatsililile khukhola mu vunyishi vutamanu; navutswa ha vandu vakholanga mu vunyishi vwoni, naho havundu hi tsimbavasi tsia Nyasaye tsinyolekhanga mu vunyishi. 21Khulwa yako, lwa vwoni vwamiha khuvirila mu likhutsa, nindio khandi tsimbavasi tsia Nyasaye, tsiamihanga khuvirila mu likhola liu vulunji khutukha mu vulamu vwi mihika ni mihika khuvirila mu Mwami weru Yesu Kristo.
Terpilih Sekarang Ini:
VAROMA 5: LLLCATHOLIC
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© The Bible Society of Kenya, 2013