VAROMA 3
3
1Khulwa yako, Muyahudi ali nu vulahi shina, khuvira vandu vi tsimbia tsindi? Inoho vukhala shina vwa khunyolanga khurula khu shishevo? 2Ni kilikali, vukhala vuliho mu shia shindu shiosi! Lukhuraanga, Vayahudi, navo vaheelwa likhuva lia Nyasaye. 3Navutswa nikave karina, niiva valala khuvo vanyala khwambakhana khuva vasuuvilwa? Ni kilikali, khwambakhana khuva vasuuvilwa khwavo khwenokho, khunyala khwikalila Nyasaye khuvula khuva musuuvilwa? 4Shikali katoto tawe! Khutukha Nyasaye ave watoto, khali niiva shia mundu wosi nu muvehi. Khuli Mahandiko Matakatifu kavoolanga,
“Lwa ulomolomanga,
makhuva koko kamanyikhane khuva ku vulunji,
khandi ukuuri nu wakhakhalachilwa.”
5Navutswa ni shina shia khunyala khuvoola, niiva vutamanu vweru vukhonyanilanga khumanyinya ndi Nyasaye nu wi likhola liu vulunji? Kanyala khuva ndi Nyasaye akholanga shindu shitamanu, lwa akhusaalilitsanga? (Nomolomanga vutswa khuli vandu valomolomanga.) 6Shikali kario tawe! Niiva Nyasaye shiali wi likhola liu vulunji tawe, yakhanyala ndina khukhalachila vandu mu shivala?
7Navutswa nikave karina, niiva vuvehi vwanje vukhuminyanga Nyasaye, lwa vulombanga katoto keke khumanyikhana vulahi vwene? Shichila shina nzilililanga khukhalachilwa khuli mwoni? 8Shichila shina mbuli khuvoola, “Leshi khukhole vindu vitamanu, vulahi vumanyikhane”? Ni kilikali, vandu valala vakhunyekanga, lwa vavoolanga khwayechitswa vindu vilala viele! Valiitsa khukhalachilwa, khuli vatushili khukhalachilwa.
Mundu Avulakhuho wi Likhola liu Vulunji
9Khulwa yako, nu khuvoole shina? Khutsi Vayahudi, khunyala khuva khuli valahi vene muno khuvira vandu vi tsimbia tsindi? Shikali kario tawe! Mbele nimboli khale ndi vandu voosi ni vooni, vave Vayahudi nende vandu vi tsimbia tsindi. 10Khuli Mahandiko Matakatifu kavoolanga,
“Mundu avulakhuho wi likhola liu vulunji,
khali mulala avulakhuho.
11Mundu avulakhuho uli ni limanya,
khali mulala avulakhuho ukhavanga Nyasaye.
12Voosi vamala khukoyana,
voosi vakhola vindu vitamanu;
mundu avulakhuho wu kholanga malahi,
khali mulala avulakhuho.
13Lilomoloma liavo ni liu khulera likhutsa;
vakaatanga vandi mulilomoloma liavo.
Makhuva kavo nu ku khurishitsa,
kali khuli vutsiva vwi inzukha;
14Vayitsula vilaamo vilulu mulimoloma liavo.
15Ni vaangu mu likhola liavo khwiira;
16Vapomolanga nu khwononyinya
shia shindu shiosi havundu ha vavirilanga.
17Vakorwa khumanya injila yu khulera milembe,
18inoho khweka khuli vanyala khuha Nyasaye luyali.”
19Khulwa yako, khumanyi nunundi ndi shia shindu shiosi, shia malako kavoolanga shili khu vandu va malako kimililanga; khu mundu alivula khuva ni shindu shiavoola, lwa Nyasaye aliitsa khuva nakhalachilanga vandu voosi mu shivala. 20Mundu avulakhuho ukholwangwa khuva wi likhola liu vulunji imbeli wa Nyasaye, shichila akholanga ka malako kenyanga, lwa malako kachilanga mundu ava nu vucheli vu khumanya vwoni.
Khuli Nyasaye Akhukholanga Khuva Valunji Khuye
21Navutswa nunundi injila ya Nyasaye, akholelamu vandu khuva valunji imbeli wewe yakhamanyikhana. Shikali imanyikhane shichila malako tawe, khali niiva Malako ka Musa nende mechitso ka vaprofeti viahaana vushiahidi khulondokhanakhu. 22Nyasaye akholanga vandu voosi khuva valunji imbeli wewe, khuvirila mu lisuuvila mu Yesu Kristo. Nyasaye akholelanga ndio shia mundu wosi uli ni lisuuvila mu Kristo, shichila vwavukhani vuvulakhuho vwosi; 23lwa vandu voosi vakhola vwoni, khandi vali ihale wene khurula khu vukhumi vwa Nyasaye; 24navutswa nunundi vakholwa khuva valunji khuvirila mu shihanwa shi tsimbavasi tsietsie khuvirila mu Yesu Kristo, wu vakholanga khuva vavoholole. 25Nyasaye neye wamuhaana khuva khuli shihanwa shiu musango ku khurulitsaho vwoni, khuvirila mu lisuuvila shichila likhutsa lielie. Nyasaye yakhola ndio, khumanyinya ndi neye wi likhola liu vulunji. Mumatukhu kavira yali wayikhutsila, khandi yali nashili khuvukulakhu vandu khuva vooni. 26Navutswa mumatukhu kanu, Nyasaye aheenzeshitsanga vwoni vwavo, khu vamanyinya ndi neye wi likhola liu vulunji. Akholanga shia mundu wosi khuva wi likhola liu vulunji khuvirila mu lisuuvila mu Yesu.
27Khulwa yako, ni shina shichilanga nu khwichinjilila? Shindu shivulakhuho! Ni shina shichilanga nikakholekha? Kanyala khuva khushili mwoyo khulondokhana khu Malako? Shikali kario tawe, navutswa shichila khushili mwoyo khuvirila khu lisuuvila. 28Khutsilililanga khuvoola ndi mundu akholwangwa khuva wi likhola liu vulunji imbeli wa Nyasaye khuvirila mu lisuuvila; navutswa khuvula khulonda ka malako kenyanga. 29Kanyala khuva Nyasaye ni Nyasaye wa Vayahudi vonyene? Shiali khandi Nyasaye wa vandu vi tsimbia tsindi? Ni kilikali, ni Nyasaye wa vandu vi tsimbia tsindi, 30lwa Nyasaye ali mulala. Aliitsa khukhola Vayahudi khuva valunji imbeli wewe khuvirila khu lisuuvila liavo; khandi vandu vi tsimbia tsindi khuvirila khu lisuuvila liavo. 31Khulekhane na Malako, shichila lisuuvila yili? Shikali kario tawe! Khuluveka lundi, khutsililile khukhola ka malako kenyanga.
Terpilih Sekarang Ini:
VAROMA 3: LLLCATHOLIC
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© The Bible Society of Kenya, 2013