VAROMA 1
1
1Ninzi Paulu, murumishi wa Yesu Kristo, warovolwa khuva murumwa, khandi nalaangwa na Nyasaye khwilwatsa Ivanjeli ya Nyasaye.
2Ivanjeli neyo yali ni yalaakwa mumatukhu kakhale na Nyasaye, khuvirila mu vaprofeti veve, khuli kahandikwa mu Mahandiko Matakatifu 3khulondokhana khu Mwana wewe, uli mwitsukhulu wa Daudi, mu vandu vu lwivulu, khuli vandu vivulwangwa; 4khulondokhana khu liiva lielie liu vutakatifu, yamanyinywa khuvirila mu tsingulu tsinyishi khuva Mwana wa Nyasaye, lwa yamwisimushitsa khurula mu likhutsa. 5Khwanyola tsimbavasi khuvirila muye khuva murumwa, khwenya khulomba vandu vi tsimbia tsindi, khumenya khulondokhana khu lisuuvila shichila lira lielie. 6Khali munyi, muli valala khuvo, lwa mwalaangwa khuva va Yesu Kristo.
7Khulwa yako, mbandichilanga munyi voosi, vamuli mu litaala lia Roma, va Nyasaye yayaanza, khandi namulaanga khuva vandu veve mwene.
Nyasaye, uli Tata nende Mwami weru Yesu Kristo vamulolele tsimbavasi khandi vamuhe milembe.
Lisaala lia Paulu liu Khusanditsa Nyasaye
8Lukhuraanga, sanditsanga Nyasaye wanje, khuvirila mu Yesu Kristo shichila munyi voosi, lwa vandu voosi shia havundu hosi mu shivala vahulilanga makhuva khulondokhana khu lisuuvila lienyu. 9Nyasaye neye mushiahidi wanje ndi mbolanga katoto. Nyasaye neye wa ndumishilanga nu mwoyo kwanje kwosi, lwa nzilwatsanga Ivanjeli khulondokhana khu Mwana wewe. Nyasaye wamanya ndi mwitsushitsanga shia khase khosi, 10mu lisaala lianje. Ndevanga ndi niiva Nyasaye alayaanza nikanyalikha, nyala khumuchendelelakhu. 11Ndi na maluhu ku khumulolakhu, khwenya khusanga na munyi shihanwa shirulanga khu Roho, khumukhola khuva ni tsingulu -- 12nakhwo khuvoola, inzi nende munyi, khutinyilitsane khuvirila mu lisuuvila lia shia mulala. 13Vasuuvili vashianje, khutukha mumanye ndi nakanakana hali khanyishi khwitsa khumuchendelela, navutswa shindu shiamboha lung'anyi shia khase khosi, khwenya khuvula khumuchendelela. Nyenyanga nyole khandi valondi khurula mu munyi, khuli ndi navo mu vandu vi tsimbia tsindi. 14Ndi nu muhinzilu ku khukhonya vandu voosi, vave Vaguriki inoho vandu vi tsimbia tsindi, vandu vasoma inoho vandu vashili khusomakhu. 15Ndi nu vuha vu khumwilwatsilakhu khandi Ivanjeli, munyi vamumenyanga mu litaala lia Roma.
Ivanjeli ya Yesu ili ni Tsingulu
16Mbulakhu tsisoni tsiosi, lwa nzilwatsanga Ivanjeli. Nayo tsingulu tsia Nyasaye, tsiu khuhonyinya shia mundu wosi uli ni lisuuvila, lukhuraanga Vayahudi nende vandu vi tsimbia tsindi khandi. 17Ivanjeli imanyinyanga makhuva khulondokhana khuli Nyasaye akholanga vandu khuva valunji imbeli wewe: nu khuvirila mu lisuuvila khurula muliraanga khutukha mulimalilikha. Khuli Mahandiko Matakatifu kavoolanga, “Mundu wa Nyasaye akholi khuva wi likhola liu vulunji, neye uliitsa khuva mwoyo khuvirila mu lisuuvila.”
Vandu Voosi ni Voni
18Nyasaye umali khumanyinya vurima vwevwe khurula mwikulu khulondokhana khu vwoni nende vutamanu vwosi vwa vandu vakholanga khwikalila katoto. 19Nyasaye avasalilitsanga, lwa vamanya shia shindu shiosi havulavu khulondokhana khuye, shichila Nyasaye mwene neye wavamanyinya havulavu. 20Khurula Nyasaye naloonga likulu nende lilova, liiva lielie liu khuvula khulola, khali tsingulu tsietsie tsi mihika ni mihika nende liiva lielie litakatifu, viamala khulolekha havulavu; vilolekhanilanga mu vindu viosi via Nyasaye yalomba. Khulwa yako, vandu venavo vavulakhu shivune shinyala khuchila vihonoloshe! 21Khali niiva vamanya Nyasaye, vambakhana khumuha luyali inoho khumusanditsa lwa ali Nyasaye; navutswa tsinganakani tsiavo tsiali tsiasuluhala, khandi vwoongo vwavo nu vukoyana. 22Vikholanga vali nu vusitsa, navutswa ni vayiingwa; 23Vukhala vu khusaala khu Nyasaye uli mwoyo mihika ni mihika, vasaalanga khu vifwanani vialombwa khusasa likoondo liu mundu utushili khukhutsa, inoho manyonyi inoho tsinyama inoho vindu vimolanga hasi.
24Khulwa yako, Nyasaye wavalekha vakhole vindu vi shifwavi via vikombanga khukhola mu mioyo chiavo; khandi vakholelananga vene mu mivili chiavo vindu viu khuheelelana tsisoni. 25Vakalukhanyinyanga katoto, khulondokhana khu Nyasaye khukwa vuvehi; nivasaala khandi nivarumishila vilombe via Nyasaye yaloonga, vukhala vu khusaala khu Muloonji mwene, utushili khwitsominywa mihika ni mihika! Amina.
26Lwa vakholanga ndio, Nyasaye wavalekha mu likomba liavo liu khuvalerela tsisoni. Khali vakhali vavo vakonanga na vakhali vandi, vuchila khukona na vasatsa vavo. 27Khali vasatsa vakholanga malala mele, shichila valekhanga khukona na vakhali vavo; khali vakona vene khuvene. Vandu vasatsa vakholanga vindu vi tsisoni na vasatsa vandi; khwilerela vene lisalilitswa khurulana khu vikholwa vitamanu via vakholanga.
28Lwa vandu yava vambakhananga khutsililila khulonda vucheli vwatoto khulondokhana khu Nyasaye; Nyasaye wavalekha valonde tsinganakani tsiavo tsingoyanu, nu khukhola vindu via vatushili khuvula khukhola. 29Vayitsula vwoni vunyishi lukanu, vutamanu, vung'wang'wa, miima chindi mitamanu minyishi lukanu na lukanu; imbotokha yayitsula muvo, ni viiri, vayaanza khukwana, ni vakaati, khandi vikombelanga vandi vindu vitamanu. Ni vamoonyi; 30khandi valomoloma vindu vitamanu khu vandi; vayambakhana khuyaanza Nyasaye; vanyekanga vandi, vayilola, khandi vayichinjilila; vakanakananga tsinjila tsinyishi lukanu na lukanu, tsia vanyala khukholelamu vindu vitamanu; vayambakhana khuha vivuli vavo luyali; 31vavula tsinganakani tsiu mukari tsindahi; vayambakhana khurweshitsa lilaaka liavo; khandi valekha khulolela vandi malahi inoho khuvavela tsimbavasi. 32Vamanya ndi Malako ka Nyasaye kavoolanga ndi vandu vamenyanga limenya khuli lienelo vatukhananga khukhutsa. Khali ndio, shikali vatsilililanga khukhola vindu vienevo vionyene tawe; navutswa khali vayaanzanga vandu vakholanga vindu khuli vienevo.
Terpilih Sekarang Ini:
VAROMA 1: LLLCATHOLIC
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© The Bible Society of Kenya, 2013