VIKHOLWA 25
25
Paulu Yanila Ahilwi khu Mwami wa Roma
1Matukhu kavaka nikakhavira, lwa Fesito yali niyakhatukha mu lusomo lwenolo, yarula mu litaala lia Kaisaria natsia Yerusalemi. 2Vasalisi vakali nende vimilili va Vayahudi vamuvoolela makhuva ku khuyaala Paulu. Vavoolela Fesito 3nayaanza avalerele Paulu mu Yerusalemi; vali valombi vucheli vu khumwiirila khunjila. 4Navutswa Fesito yavachipa, “Paulu ukumilwi khuli muvohe mu litaala lia Kaisaria; khandi inzi mwene nakalukhayo vwangu yuvu. 5Lekha nzi na vimilili venyu valala mu litaala lia Kaisaria, khuyaalila mundu uyu iweneyo, niiva ukholi shindu shitamanu shiosi.”
6Lwa Fesito yali niyakhamenyakhu navo khumatukhu munane inoho likhomi, yakholomokha natsia mu litaala lia Kaisaria. Litukhu lialondakhu, yasimukha natsia niyikhala mushiina shia vakhalachilamu vandu, navoola Paulu alerwimu. 7Lwa Paulu yatukhaho, Vayahudi vali nivaruli Yerusalemi vasinjila ni vamuvotokhana, nivaraanga khuvoola vindu vitamanu khulondokhana khuye, via vakhaywa khwivaala ni katoto. 8Navutswa Paulu yishinga mwene navoola, “Shili khukholakhu shindu shitamanu khulondokhana khu Malako ka Vayahudi inoho khu Litempeli inoho khu Mwami wa Roma.”
9Navutswa lwa Fesito yali ni lienya liu khuyaanzitsa Vayahudi, yareeva Paulu, “Wenyanga utikulushi Yerusalemi khutsia khuyaalilwayo imbeli wanje khulondokhana khu vindu vitamanu via vavooli wakhola?”
10Navutswa Paulu yachipa, “Sinjile nunundi imbeli wi shiina shiu Mwami wa Roma, havundu ha vanzalila. Khuli lwa yivi mwene umanyi vulahi vwene, shili khukholelakhu Vayahudi shindu shiosi shitamanu. 11Niiva nyala khuva nakhola shindu shitamanu, shinyala khuchila khalachilwi likhutsa, shinyala khwambakhana khwiirwa tawe. Niiva Vayahudi vangatilanga, mundu avulakhuho uli nu vunyali vu khumbila khuvo. Nanilanga khu Mwami wa Roma.”
12Lwa Fesito yali namali khushelenyinya na vandu vi Shikhaalo shieshie, yavoola, “Wanili khuhilwa khu Mwami wa Roma. Khulwa yako, ulahilwa khu Mwami wa Roma.”
Fesito Yalomoloma khu Mwami Aguripa
13Lwa matukhu mati kali nikakhavira, Mwami Aguripa nende Berinike vatukha mu litaala lia Kaisaria khwinjilitsa Fesito. 14Lwa vali nivamenyayo khumatukhu manyishi, Fesito yivaalila Mwami Aguripa vindu viachilanga Paulu nayaalwa. Yavoola, “Khuli nu mundu hanu wa Felikisi yalekha niyavohwa mucheela. 15Lwa nasimukha ninzia Yerusalemi, vasalisi vakali nende vasakhulu va Vayahudi vambolela makhuva khulondokhana khuye, nivenyanga mukhalachili. 16Navutswa navavoolela ndi khutsi Varoma khuvulakhu mwiima ku khuhaana mundu wosi wa vayaalanga nashili khwakana na vandu vamuyaalanga mumoni namoni; khandi aheelwi vwiyangu vu khwishinga mwene khu ka vavoolanga khulondokhana khuye. 17Lwa vatukha hanu, mbulakhu vwiyangu vwosi vwa nakoritsa; navutswa khulitukhu lialondakhu, nikhala mushiina nimbana lilako mundu mwenoyo alerwimu. 18Lwa vandu vamuyaalanga vasinjila valomolome, shivamuyaalakhu shichila vindu vitamanu via nasuuvilanga valavoola khulondokhana khuye tawe. 19Navutswa vavirana mulilomoloma naye khulondokhana khu idini yavo; khandi khulondokhana khu mundu wali niyakhutsa walaangwangwa Yesu, nikhali wa Paulu yali wamenya navoolanga ashili mwoyo. 20Nakorwa khuli nyala khurunishitsa manye vulunji vwa makhuva kenako. Khulwa yako, nareeva Paulu niiva anyala khuhuchilila khutsia khuyaalilwa Yerusalemi. 21Navutswa Paulu yanila; yareeva alindwi khutukha lwa Mwami wa Roma amukhalachila khulondokhana khu vindu vichilanga nivamuyaala. Yahaana lilako alindwi khutukha lwa muruma khu Mwami wa Roma.” 22Mwami Aguripa yavoolela Fesito, “Inzi mwene nyenyanga khuhulilakhu ku mundu uyu avoolanga.”
Fesito yamuvoolela, “Ulamuhulila mukamba.”
23Litukhu lialondakhu, Mwami Aguripa nende Berinike vinjila mu inzu ya vayaalilanga nu luyali lunyishi halala na vimilili va vasikali nende vimilili va vandu vi litaala likali. Fesito yahaana lilako, ma Paulu nalerwamu. 24Fesito yavoola, “Mwami Aguripa, halala na vandu voosi va khuli navo hanu, mulolanga mundu uyu! Vayahudi voosi vambolele vindu vitamanu khulondokhana khuye mu Yerusalemi khandi mu litaala lia Kaisaria munu, nivalaanjililanga ndi avuli khutsililila khuva mwoyo. 25Navutswa shinanyolakhu shindu shitamanu shia yali nakholi, shinyala khuchila akhalachilwi likhutsa tawe. Lwa mwene yanila ahilwi khu Mwami wa Roma, mbiritsi khumuruma mu litaala lia Roma. 26Navutswa mbulakhu shindu shiosi shiatoto shianyala khuhandichila yivi Mwami wa Roma khulondokhana khuye. Khulwa yako, muleri imbeli wenyu munyi voosi; khandi khushila muno imbeli wowo, yivi Mwami Aguripa, khu lwa urunishitsa vindu vienevo nyole shianyala khuhandika. 27Ndolanga nu vutamanu khuruma muvohe khu munyi, vuchila khwivaala vulahi vwene kachilanga nivamuyaala.”
Terpilih Sekarang Ini:
VIKHOLWA 25: LLLCATHOLIC
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© The Bible Society of Kenya, 2013