KADADDIYAN 19
19
Dusana Sodom
1E bakto malaekat se kadhuwa gella' napa' ka Sodom e baja asar e are jareya, Lud teppa'na ju'-toju' e labang sakethengnga kottha. E bakto nangale'e malaekat se kadhuwa jareya, Lud manjeng, laju nyander ka seddi'anna. Sanapa'na ka seddi'anna, Lud laju asojud, 2pas mator, “Ngereng eatorana lenggi ka compo', guste. Diggal abdidalem se aladinana. Junandalem abacco e compo', pas kelem e ka'dhissa'. Lagguepon kengeng abungo gu-laggu, pas nerrossagi parjalanan.”
Malaekat se kadhuwa jareya adhabu, “Enja', sakalangkong. Dina sengko' ngenebba e lon-alon bai.”
3Lud ce' maksana, daddi dhi-budhina se kadhuwa jareya nyepper ka bengkona Lud. Lud nyoro la-kabulana agabay roti se ta' eragi'i. Saellana mare eparanta, tamoy se kadhuwa jareya laju adha'ar.
4Sabellunna tamoy se kadhuwa jareya maso' asareya, reng-oreng Sodom ngeppong bengkona Lud. Sakabbinna lalake'an, towa ngodha tadha' se ceccer padha noro' ngeppong. 5#Kim. 19:22-24 Reng-oreng jareya aera' ka Lud, oca'na, “Kemma tamoyya ba'na se ngenep e dhinna' rowa? Mara duliyan pakalowar, passra'agi, ekapolonga tedhung bi' sengko' kabbi, ekambuliyana.”
6Lud kalowar, tape labangnga bengkona eparapet dhari lowar, 7pas ngoca' ka reng-oreng Sodom jareya, oca'na, “Tan-taretan, ampon ja' sapaneka. 8Kaula andhi' ana' babine' kadhuwa, gi' padha paraban. Diggal ana' kaula ganeka bai bi' kaula ebagiya ka sampeyan, epakadiya ponapa sareng sampeyan, kasokanna. Tape tamoy kaula ja' le'-ole', sabab kaula wajib ajaga kasalameddanna reng-oreng ka'issa'.”
9Tape reng-oreng jareya ngoca' ka Lud, “Mara menggir! Ba'na reya neng e dhinna' oreng manca, me' nya'-bannya' caca. Mara menggir! Mon enja', ba'na eajara epalebbiya berra' dhari tamoyya rowa!” Lud pas ejungka'agi. Reng-oreng jareya laju arebbu'an se narja'a labang. 10Tape bi' tamoy se kadhuwa gella' Lud etaja' epakadhalem. Labangnga bengkona pas ekanceng dhari dhalem. 11#2To. 6:18 Reng-oreng se badha e lowaranna labangnga epabuta kabbi, daddi padha ta' nangale'e e dhimma labangnga.
Lud nyengga dhari Sodom
12Tamoy se kadhuwa rowa adhabu ka Lud, “Sapa'an balana ba'na? Ana' lalake'an ban babine'an, manto ban la-bala laenna se badha e kottha reya, ajak kabbi, giba nyengga dhari dhinna', 13kottha reya bi' sengko' epamosna'a. PANGERAN la meyarsa serrona oreng parkara tengkana oreng kottha reya se talebat juba'na; sengko' reya eotos dha' enna' epakon matompes kottha Sodom reya.”
14Daddi Lud pas entar ka bakalla ana' babine'na se kadhuwa, oca'na, “Mara jaga, duli nyengga dhari kottha reya, sabab kottha reya epamosna'a bi' PANGERAN.” Tape bakalla ana'na se kadhuwa jareya padha nyangka Lud pera' agaja'.
15E bakto para' seyang malaekat se kadhuwa gella' makon Lud sopaja duliyan, dhabuna, “Mara duliyan! Giba binena ban ana' babine'na se kadhuwa jareya, sopaja ba'na ta' noro'a mate polana kajahadanna kottha reya.” 16#2Ptr. 2:7 Lud gi' mangmang. Tape PANGERAN neser ka Lud jareya; daddi bi' tamoyya se kadhuwa gella' Lud ban binena sarta ana' babine'na se kadhuwa padha etonton egiba ka lowarra kottha jareya. 17Malaekat se settong adhabu, “Duli berka' mon ba'na terro salamedda! Ja' atole, ban ja' ambu e Cora Yordan. Terros buru ka gunong, me' olle ba'na ta' mate.”
18Lud mator, “Adhu, guste, ampon abdidalem sabala ka'dhinto ja' pakon buru ka gunong. 19Lerres Junandalem ampon nolong abdidalem dhari babaja pate. Namong gunong ka'dhissa' gi' ce' jauna, dhaggi' abdidalem gi' ecapo' jugan sareng balai ka'dhinto, mate sabellunna napa' ka ka'dhissa'. 20Mangken oladi, ka'dhissa' badha kottha ne'-kene', se ta' pate jau dhari ka'dhinto. Kadi ponapa manabi abdidalem buru ka ka'issa' saos, me' olle salamet?”
21Malaekat jareya adhabu, “Iya mara, parnyo'onanna ba'na jareya bi' sengko' ekabbulana. Kottha jarowa ta' epatompessa. 22Mara duliyan, berka'! Mon ba'na gi' ta' dha' essa', sengko' gi' ta' ngenneng apa-rapa.”
Daddi kottha jareya enyamae Zowar,#19:22 Zowar: Nyama reya monyena padha ban oca' Ibrani se artena “kene'”. artena kottha kene'.
Sodom ban Gomora epatompes
23Are la moncar e bakto Lud napa' ka Zowar. 24#Mat. 10:15, 11:23-24; Luk. 10:12, 17:29; 2Ptr. 2:6; Yud. 7 PANGERAN laju matoron ojan balirang se rabbang ka kottha Sodom ban Gomora. 25Kottha se dhadhuwa' jareya epaancor, bariya keya sakabbinna Cora Yordan ban sakabbinna pandhudhu'na sarta sakabbinna bu-tombuwanna. 26#Luk. 17:32 Tape binena Lud atole, laju aoba daddi cangga dhari buja.
27Kalagguwanna gu-laggu Ibrahim dhing-ngendhing ka kennengnganna se ngadek e ajunanna PANGERAN ba'ari'anna. 28Ibrahim nondhu' ngoladi ka baba, ka kottha Sodom ban Gomora ban sakabbinna Cora Yordan. Ibrahim ngoladi okos dhari tana jareya, tadha' bidana ban okossa tomang se talebat rajana. 29Tape e bakto Allah maancor tha-kottha e cora kennengnganna bengkona Lud rowa, Allah teptep emot ka Ibrahim, daddi Lud laju etolong epaburu sampe' salamet.
Asal molana oreng Mo'ab ban oreng Amon
30Sarrena Lud tako' se terrosa enneng e Zowar, daddi pas ngalle ka pagunongan, abareng ban ana' bine'na se kadhuwa, pas terros enneng e dhalem guwa e jadhiya. 31Ca'na ana'na se sareyang ka ale'na, “Eppa' la towa, ban sanagara reya tadha' oreng lalake' se ekenneng kalake sengko' ban ba'na sopaja andhi'a ana'. 32Daddi mara eppa' pamabu'; mon la mabu', ba'na ban sengko' pas tedhung ban eppa', me' olle sengko' ban ba'na bisa andhi' ana', materros toronanna eppa'.” 33E malem jareya eppa'na epangenom anggur sampe' mabu'. Saellana jareya, ana'na se sareyang pas tedhung ban eppa'na, tape eppa'na ta' apangrasa.
34Kalagguwanna, ana' se sareyang gella' ngoca' ka ale'na, “Malemma sengko' tedhung ban eppa'; dhaggi' lem-malem mara pamabu' pole, pas gante ba'na tedhung ban eppa'. Daddi sengko' ban ba'na pas padha bisa andhi' ana'.” 35Daddi e baja malem Lud epamabu' pole bi' na'-ana'na. Saellana jareya ana'na se nomer dhuwa' pas apolong tedhung ban eppa'na, tape Lud ta' apangrasa. 36Kalaban cara se kantha jareya ana'na Lud se kadhuwa jareya ngandhung dhari eppa'na dibi'. 37Se sareyang rembi' lalake', enyamae Mo'ab. Mo'ab jareya se daddi bangatowana bangsa Mo'ab#19:37 Mo'ab: Nyama reya monyena padha ban oca' Ibrani se artena “dhari tang rama”. se sateya reya. 38Ana'na se nomer dhuwa' rembi' lalake' keya, enyamae Ben-Ami,#19:38 Ben-Ami: Nyama reya e dhalem basa Ibrani artena “ana'na tang bala”, ban monyena akantha oca' Ibranina “oreng Amon”. se daddi bangatowana bangsa Amon se sateya reya.
Terpilih Sekarang Ini:
KADADDIYAN 19: MAD
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk