Pewaliana 15
15
Dandina Pueꞌ Ala pe hi Abara, dandi noniuꞌ pemuleꞌana
1Katoꞌo mehupaꞌmo pohawaꞌne Pueꞌ pe hi Abara i lali haꞌanu peponoꞌokiꞌi, “Abara inioꞌko motehuꞌ, Akumola labamu, haromu hingkiꞌ kodeꞌ mpololeke.” 2Hi Abara mehoniꞌ, “O Pueꞌ Ala, hawaꞌi uwaꞌ dumbuꞌne ipaꞌanikiꞌa, alaꞌ hawaꞌi uwaꞌ anaꞌka hei ane mahiꞌa intu to hingkiꞌ mamporasiꞌa lumangku iomo hawiꞌku hi Eliese, toDamasi tiꞌo.” 3Notiꞌi womo hi Abara, “Hawaꞌakae Ipaꞌani pemuleꞌa, horiana haduo hawiꞌku tiꞌo hingkiꞌ mantorimo rasiꞌ ka aku.” 4Angkana mehupaꞌ pohawaꞌne Pueꞌ pe io, waheꞌe, “Toaꞌ tiꞌo hawaꞌi hingkiꞌ mantorimo rasiꞌ ka ingko angkana anaꞌmu hadoduomu, iomo haduo anaꞌntomaꞌani. Iomo to mantorimo lekiꞌna lumamu.” 5Katoꞌo Pueꞌ Ala mangkomi hi Abara mesuwu hei mohawaꞌ, “Amo dewae penoaꞌ pe laniꞌ hei ihaꞌmo betueꞌ-betueꞌ, ane ibiaꞌi iꞌihaꞌ, watoꞌomola koworiꞌne pemuleꞌamu.” 6Katoꞌo mepoꞌohimo hi Abara pe Pueꞌ Ala, hei alaꞌ tiꞌo Pueꞌ Ala mantorimoꞌi mewali toaꞌ to mononto i pampeꞌeleNa. 7Mohawaꞌ womo Pueꞌ pe io, “Akumo Pueꞌ Ala, to mangkomiko molai ka Ur-Kasdi to hingkiꞌ mampaꞌaniko woiꞌ peꞌohaꞌa hieꞌe iꞌompui.” 8Notiꞌi hi Abara, “O Pueꞌ Ala, ka imboreꞌi kubahaꞌi, koꞌakune tumpune?” 9PohawaꞌNa pe io, “IroakimoꞌA hambaꞌa gapiꞌ lunaro to hangko tolu ntoꞌa, hambaꞌa gimba laki to hongkoꞌ tolu ntoꞌa, hambaꞌa kokou hante hambaꞌa anaꞌna tinti merpati.” 10Noroamo lekiꞌna tiꞌo nopopenomba pe Pueꞌ Ala, nobongkaꞌ dolaꞌ dua, katoꞌo noporia podolaꞌ-dolaꞌane tiꞌo noꞌandaꞌ momehinoroi, angkana tinti-tinti tiꞌo hawaꞌi nobongkaꞌ. 11Ikopengkotoꞌunalu tinti to mangka bauꞌ mataꞌ itoꞌo, katoꞌo nobue hi Abara. 12Ikohingkiꞌ pentoriꞌnalu ando, turu leꞌo mpiiꞌmo hi Abara. Katoꞌo mehupaꞌ komokorindi to mekototehuꞌi. 13Pohawaꞌna Pueꞌ pe hi Abara, Notiꞌi “Ibahaꞌmo mpuꞌu pemuleꞌamuhi hingkiꞌ mewalihi toaꞌ to mehupaꞌ i haꞌanu woiꞌ peꞌohaꞌa to hawaꞌi roꞌompui, hei iohi hingkiꞌ nipohawiꞌhi hei nipopoꞌioꞌiohi, 400 ntoꞌa komoruene. 14Angkana roboꞌ ngkodeꞌ to hingkiꞌ mampohawiꞌhi, hingkiꞌ Kuhuku, hei uko tiꞌo iohi hingkiꞌ molai hei mangkomi lumara to woriꞌ. 15Angkana hingkiꞌ nolouko pe peꞌuluamu hante moromiꞌ, ingko hingkiꞌ mahiko i tempo popuhiꞌmo wilolumu. 16Angkana pemuleꞌamu to kaꞌiba hingkiꞌ mahuliꞌhi i hieꞌe, hinewowoꞌena handoaꞌi tempona Aku mobue toAmori mesuwu ka woiꞌ hieꞌe, ane makajamoꞌi kokodakene waliara honiꞌihi wae intu Kuhuku.” 17Ikopentoriꞌnamo ando hei mokorindimo, katoꞌo noꞌokiꞌ tandi to meꞌoroꞌ hei huluꞌ to mamua to moliu i lumbuna bauꞌ to nibongkaꞌ tiꞌo. 18I ando tiꞌomola Pueꞌ Ala mampoꞌuwaꞌ podandi pe hi Abara hei mohawaꞌ, “Pe pemuleꞌamu Kupaꞌanihi woiꞌ peꞌohaꞌa hieꞌe, mepongka ka uwai Masiri wute pe uwai to kodeꞌ tiꞌo, uwai Epara. 19Iomo woiꞌne toaꞌ toKeni, toKena, toKadomo, 20toHet, toPeris, toRepai, 21toAmori, toKanaꞌa, toGirigasi hante toYebusi.”
Terpilih Sekarang Ini:
Pewaliana 15: LAILJE
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2017 Indonesian Bible Society (Lembaga Alkitab Indonesia)