MATÌÙT 3
3
Yohanet ima pelaginapì lagaike mene a'nogo nen hagatì lagaike wene
(Mrk.1:1-8; Luk.3:1-9,15-17; Yoh.1:19-28)
1Atì'nogo hagasukwasik oba nen he, at Yohanet ima pegalinapì lagaike mene a'nogo, o Yurea leimo apùnì le'ma atoma wagaikesik wene yakùlisìkì logolìk, yì'nogo ìkì lagaike:
2“Kain pogot oba mene awe a'ma hinegein a'nogo yogotak arat hinegein. Halok he, weak hagatì lagep mene heraksìlìk hinoabùt hebela'ni o,” ìlùk yogoisìkì lagaike. 3#Yes.40:3 Atì ìkì lagaike atì re, at Yesaya Ala ane yogoisìkì lagaike mene a'nogo nen yogoisìkì logolìk he,
“Ap aike o leimo apùnì le'ma atoma ane wai ìkì logolìk he,
Eiga! Ninoe Etagepogot wesiginkwe, kwe hanorogo tegelhìk, kolo mene higit hogo yatìk,
ìkì logoni o, ìlùk waisìlì'logo,”
ìlùk Yesaya nen ìkì lagaike a'nogo, at Yohanet ebeat wagaike atì. 4Wagaikesik, leimo apùnì le'ma atoma logolìk, wam unta esi mene ìkogo re, asu laberìgìk, ogat mene nokologo agauak hagarogo re, pagaluk ìkìgik, ìkì logolìk sùpùrùk na hak he, pulue mene nìkìk, kin amusu ekama mene nìkìk, ìkì lagaike. 5Atì'nogo were'ma re, it apùnì o kota Yerusalem en, o propinsi Yurea aike obogat en, i Yoretan esakokwe atoma obogat en, at oba atogosi waga lagaukwa. 6Wìrìk he, yì weak tì weak hagatì lagaukwa mene hukalogo heraksikenem, i Yoretan ima pegalinapì lagaike. 7Atì'nogo hagato were'ma, it ap Parìsi mene he'nakìt inom, ap Saluki mene he'nakìt inom, inebe logolegat ima pelaginabuagalùk he, at oba waganem yì'nogo yogoisìkì lagaike:
“Hit walo nen tagokwe mene yoma sanì! Hit he, Ala a'mage apik lagagin a'nogo hinoba hikenem hese elok logoin ìlùk sa nen yogohisikomo. Mea o. 8Halok he, hina'la ebethìlìk, weak hagatì lagep mene heraksìlìk, hinepe hebelarìk hagasusak meneat higit hogo hagatì logoino o. 9An nen he, at Ala nen Aberaham againapùrì negen haga'lasuagalùk helep yì mene elok hagasusagat o, ìlùk yogohisìgì atì nen, hit hina'la nen he,
Aberaham atì nit ninopase, ìlùk akagùp o. 10E ero lapok eken hano mene itì'lek halok, mùkogo etumo laksagalùk posie e omaken oba hangsek motok werek o,” ìlùk yogoisasike.
11Atì'nogo yogoisasikesik aike mel yogoisasike:
“Hit weak hagatì lagep mene heraksìlìk hinepe eberogoat hebelaga ìlùk, an nebe yekerek nomame lek mene nen we ima pelakhinapì lagì. Mene re, at kain omame apik mene hobuk wesigin o. At ebe kain omame apik atì nen he, an nebe yekerek mene nen esok agùt yelik mene wolok lasak meaat. At en ima pelakhinabu hak, Ala Areagùn inom, etu inom, hinoba pelakhei wesigin o. 12Gandum eken holusak hesik wabùn oba hurogo lakhegein mene, at esewerek mene ekimo werek atì. Tegelusak oba higit asi waga halok, hano mene halok, tegelogo hikerek oba hanoma hìgìk, apùpùleke halok etu nogolusak le'ma a'nogo ba laksìgìk, ìgìn o,” ìlùk yogoisasike.
Yohanet en Yesùt ima pelakhesike wene
(Mrk.1:9-11; Luk.3:21-22)
13Yohanet en wene a'nogo yogosiko were'ma, at Yesùt ima pelakhouagalùk o Kalilea nen i Yoretan esakoma were'ma oba lagaikomo re, 14at en he,
“An nen ima pelakhabusak mea ù. Hat en an ima pela'nabusak meneat he, an noba wagen yoma rì!” ìlùk yogosike. 15Yogosikomo re, at Yesùt en he,
“An pela'nabusagat o. At Ala nenat yì hesik tì hesik atì'nogo hagasuagalùk akikerek higit hogoat haga'nabusak o,” ìlùk isikomo re,
“Ì o,” ìlùk 16ima pelakhesikomo re, yegelogo lagai wesigin ha'ma re, pogot healogo Ala Areagùn sùe pel hùke mene ot oba labok i pi waganem eileken hasike. 17Labok i pi wagaikomo re, Ala ane pogot oba nen,
“Naput netawì e. Noba lìok ike o,” ìlùk ane pelakhei wagaike.
Terpilih Sekarang Ini:
MATÌÙT 3: LAIDNI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
