Matyu 11
11
Dito nibon nito Juan nga Mammautisar ito edyan ne̍ Je̍sus
Luk. 7:18-23
1Ket ito nalpas to panangbilin ne̍ Je̍sus kadito sangapulu ket duwa nga adalan na, pimanaw antuni, nga nawe̍ kadiya kabangibang nga il-ili nga nangisursuru se̍ nangaskasaba.
2Ket to Juan nga Mammautisar nga uwed ka pagbaludan itun, nadamag na diya wangwanglen niya Kristu. Ket nangibon kadiya pasurut na nga nawe̍ nagsaludsud e̍ Je̍sus. 3Ket kinunen da ngarud e̍ Je̍sus, “Ikew ya naikari nga umbe̍t, winno uwed pekkem mas sabali nga padaanan mi?” kunen da.
4Ket kinunen ne̍ Je̍sus igida, “Sumoli kayu iya edyan ne̍ Juan, ket ibaga nu igina diya nagicna se̍ nasingen nu idi. 5Ibaga nu nga makasingen nin diya kulap, makadalanin diya lugpi, napalaingin diya agkukutel, se̍ makagicna ngin diya tuleng. Ket diya natey, napaungar dan. Diya nanumu nga toley, nakaskasabaan dan iya Makaparagsac nga Damag. 6Ket idi pe̍ ya ibaga nu e̍ Juan: ‘Maragsakan met ya toley nga madi agduwaduwa maipanggep iyaken,’ kunen nu,” kunen ne̍ Je̍sus.
To kunen ne̍ Je̍sus maipanggep ito Juan nga Mammautisar
Luk. 7:24-35
7Ket ito pumanpanawin dito pasurut ne̍ Juan, uwed kinunen ne̍ Je̍sus kadiya toltoley maipanggep e̍ Juan, nga kinunen na, “Ito nawe̍ kayu ito edyan ne̍ Juan ka away, nagan kad ya nawe̍ nu siningen? Nawe̍ kayu kad singen kuma ya isa nga tabagan nga kiwkiwaen belluut? Bekken met! 8Dikad ape̍ ngarud nga nawe̍ kayu siningen? Tasun masingen nu kuma kad ya isa nga toley nga nagkawwes ka napaw-is? Bekken met, ata diya agkawwes ka napaw-is, aged-edyan da met kadiya palasiyu nga baley diya ar-ari.
9“Dikad ape̍ ngarud nga nawe̍ nu siningen antuni? Nawe̍ kayu aya tasun singen nu kuma ya isa nga mammadtu? Ket bo! Tutu met yan. Ket ibagac dakayu nga nangnangruna pekkem ngem iya isa nga kadawyan nga mammadtu to nasingen nu antuni. 10Ta igina met ya kayat nga kagiyen nito naisurat iya Bibliya nga kunen na,
‘Agten idi:
Bilinec nad ya ibon ku nga mangipakaemmu
nga mawe̍ nga mon-ona ngem ikew,
ket isagana na ya dalan mu,’
kunen na iya Bibliya.
11“Tutu met yani: Awan pekkem naiyanac nga toley nga nadaydayaw ngem e̍ Juan nga Mammautisar. Ngem no maipanggep iya panangituray niya Nailangitan, pudnu met nga nadaydayaw pekkem ngem iyan nga dayaw ne̍ Juan ya kasasaad niya orey kanumuwan nga toley nga makipaglak-am iya panangituray niya Nailangitan. 12Ket nanipud ito nagparang nito Juan nga Mammautisar agingga ita mettas, sumilse̍let diya naagawa nga toley, tasun ipilit da ya pannakalak-am kuma niya beggi da iya panangituray niya Nailangitan. 13Ta diya padpadtu nga naisurat iya Bibliya nga kagkagi dito mammadtu itun se̍ ya Linteg nito Muyse̍s pe̍, ket agpaay amin diyan agingga ito timpu ne̍ Juan. 14Ket no gabay nu, patiyen nu ngarud nga e̍ Juan, itu mettas to E̍lyas nga nipadtu da nga umbe̍t. 15Ket dakayu nga uwed pannakaawat na, tandaanan nu kuma ngarud yan.
16“Ket nagan ngarud ya kustu nga pangiyarigac kadiya toltoley ita nga timpu? Ket agten da ngarud idi nin: Arig da ngas nga eb-ebbing nga agtutugew iya tindaan, nga pecpekkawan da diya kabulun da, nga kunen da, 17‘Nagpalpaldeng kami, ngem madi kayu met nagsallip. Naginsasangngit kami, ngem madi kayu met nagladingit.’
18“Agten ngarud iyan diya toltoley ita nga timpu. Ta nagparang nge̍ Juan, nga niparit na iya beggi na ya mangan se̍ uminum kadiya nangina, ket kunkunen met diya toltoley nga, ‘Nasairuwan met yan!’ kunen da. 19Ket nagparang ya Anac nga Naipatoley, nga mangmangan se̍ makiin-inum met nga gennung, ket kunkunen da manin, ‘Ahah! Narawet se̍ age̍ng-e̍nglew met yani, ket makigayyem met pe̍ kadiya agsingsingir ka buis se̍ diya managbasul,’ kunen da met nga sidedellaw. Ngem orey no agten iyan ya kunkunen da, ket emmu tida nga ya pudnu nga kinasirib, maipasingen met gapu kadiya naar-ariman,” kunen na.
Dito il-ili nga awan mamati
Luk. 10:13-15
20Ket itun, inel-elngan ne̍ Je̍susin diya umili kadito il-ili nga nangipasingnan na iya kaaduwan dito nakaskasdaaw nga inariman na. Ta diya toltoley kadiyan nga il-ili, madi da gabay ya agbabawi kadiya basbasul da. 21Ket kinunen na met, “Kackaasi kayu nga iKorasin se̍ dakayu nga iBe̍tsayda! Ta orey adu win diya nakaskasdaaw nga naipasingen dakayu kadiya ili nu, madi kayu latta nga agbabawi kadiya basbasul nu. Ket no dito iTiru se̍ iSidun kuma nga gennung ya nakaipasingnan diyan nga nakaskasdaaw, ket nalaka da lugud nga nipasingen nga agbabawi dan, nga agkawwes da ngarud ka nakatel nga luput se̍ aburan da kuma diya ulu da ka dapagin, gapu iya ladingit da.
22“Ket ibagac dakayu ya kinapudnu na, nga no iya timpu nad niya panangukum, nangnangruna nad nga kaasiyan ne̍ Apu Diyus dito iTiru se̍ iSidun ngem dakayu. 23Ket dakayu nga iKape̍rnaum, nagan ya ipagarup nu? Maidayaw kayu nad ngata ka langit? Bekken met! Maipasegged kayu lugud met iya pagtuukan diya natey. Ta orey dito iSuduma itun, no igida kuma ya nakaipasingnan dito nakaskasdaaw nga naariman enna ili nu, ket agpaut met pekkem agingga ita to ili da. 24Ket ibagac dakayu ya kinapudnu na, nga no iya timpu nad niya panangukum, nangnangruna nad nga kaasiyan ne̍ Apu Diyus dito iSuduma ngem dakayu,” kunen na.
Ya pagtalnaan nga e̍cde̍ ne̍ Kristu
Luk. 10:21-22
25Ket itun, nagkararag nge̍ Je̍sus nga kinunen na, “Agyaman nac ikew, Ama nga Apu niya langit se̍ ya lubung ngi. Agyaman nac ngarud, gapu ta nilimed mu didi nga banbanag kadiya uwed adal da se̍ kadiya mamasirib, ngem nipakaemmum nga gennungin kadiya kadawyan nas nga toley nga maiyarig ka ebbing nga awan pekkem adal na. 26Agten iyan ngarud ya wagas mu, Ama, ta itu met ya gabay mu,” kunen na.
27Ket kinunen manin ne̍ Je̍sus, “Nitalec niya Amac iyaken diya amin. Ket awan met makaem-emmu iya Anac, no di ngas ya Ama. Se̍ awan met makaem-emmu iya Ama, no di ngas ya Anac se̍ diya gabay ngas niya Anac nga pangipakaemmuwan igina.
28“Ket dakayu nga agrigrigat se̍ madagdagsennan, umbe̍t kayu kuma ngas iyaken, ta iyaken ya mange̍cde̍ ka pagtalnaan nu. 29Paituray kayu kuma ngarud iya paglinteggac, nga maiyarig ka sangul nu, ket agpaisuru kayu iyaken. Ta iyaken, natuluc se̍ napakumbaba ngac met. Dikad pe̍ no umbe̍t kayu iyaken, ket mapatalna kayu ngarud. 30Ta ya arig nga isangul ku, ket nalaka. Ket ya arig nga ipaagtuc, ket nalag-an,” kunen ne̍ Je̍sus.
Terpilih Sekarang Ini:
Matyu 11: YBT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1990 New Tribes Mission, Sanford, FL 32771-1487, USA.
Printed in the Philippines.
