Yoa. 1
1
Akirot ŋina ka akiyar
1Anakisyakinet, ayai Akirot; arukito Akirot ka Akuj, arae Akirot Akuj. 2Ŋinapei anakisyakinet arukito iŋes ka Akuj. 3Abu Akuj tosub ŋiboro daadaŋ aneni keŋ; kerae tomam iŋes, pa kesubunitae idiobore. 4Ayai akiyar daadaŋ neni keŋ, arae akiyar ŋin akica aŋuna a ŋituŋa. 5Ecai akica ŋin anakiryonut, nai nyilouna akiryonut akica.
6Ayai ekile ŋolo eyakuunitae aneni ka Akuj, ŋolo anyaritae Yoana. 7Abunit iŋes akiteyenun ŋituŋa ŋakiro ŋuna ka akica, ikotere tonupyata daadaŋ aneni keŋ. 8Pa arae Yoana akica, nai abunit iŋes akiteyenun ŋakiro ŋuna ka akica. 9Akirot iŋes arae akica ŋina a kire, ŋina abuni nakwap acaikin ŋituŋa daadaŋ.
10Ayai Akirot nakwap, tosub Akuj akwap aneni keŋ, nai nyeyenuna akwap iŋes. 11Abu iŋes bu lore keŋ, nai apotu ŋituŋa keŋ nyijaut iŋes. 12Nai ŋulu daadaŋ apotu kijaut iŋes, tonupa ekiro keŋ, abu iŋes inak ikes apedor ŋina ruworet ŋidwe ŋulu ka Akuj. 13Pa aruworosi ikes ŋidwe ŋulu ka Akuj alopite a ŋolo sek euriyere ŋituŋa, anagogoŋu ka anacamit a ituŋanan, nai Akuj alope iŋes abu kituruwo ikes ŋidwe keŋ.
14Bu Akirot toruwor ituŋanan, oruko ka isua. Aanyun isua apolou keŋ, apolou ŋina aryamuni iŋes aneni ka Akuj Papa ikwapei Lokoku keŋ ŋolo donupei ka eleleba neni keŋ ajokis ka ŋuna a kire.
15Kiteyenu nai Yoana iŋes tocelu tema, “Iŋes lo ŋolo abala ayoŋ erworo ebe, ‘Ebunit alokaku kaŋ, nai epol iŋes akilo ayoŋ, anerae ayai iŋes eriŋa tari nyeuruuna ayoŋ.’”
16Analalau a ŋina ka ajokis keŋ, ikiterereŋ iŋes iwon daadaŋ, ikitoropikinit iŋes iwon ŋarereŋisyo. 17Abu Akuj ikiinak iwon Ŋikisila kisitoru neni a Moses, nai ajokis keŋ ka ŋuna a kire, isitorunit neni a Yesu Kristo. 18Emam ituŋanan eanyunit Akuj; nai Lokoku ŋolo donupei ŋolo erae epei ka Papa, iŋes ikitaanyu iwon Akuj.
Ŋae erae Yoana Ekebatisan?
(Mat. 3:1-12; Mar. 1:1-8; Luk. 3:1-18)
19Erae na akiteyenunet a Yoana ŋina a kire apaki ŋina eyakiyaryata ŋikarikok a Ŋiyudayan ŋisacaradotin ka Ŋilepei neni keŋ akiŋit iŋes atemar, “Ŋae iyoŋ?” 20Nyewou Yoana aboŋokin ikes ŋakiro. Kirwor pa iwuait, nai ileereete tema, “Meere ayoŋ Kristo.” 21Kiŋita nai ikes iŋes temasi, “Ŋae nai iyoŋ? Eliya a?” Toboŋok Yoana ikes tema, “Meere.” Kiŋita nabo temasi, “Irae iyoŋ ekadwaran a?” Toboŋok iŋes tema, “Meere.” 22Kiŋita nai ikes iŋes temasi, “Ŋae iyoŋ? Itemokino isua oyaa aboŋokinet kon neni a ŋulu ikiyakuunito isua. Anu ikilimokini iyoŋ isua aŋuna kon?” 23Toboŋok Yoana ikes aŋakiro a ŋuna koloŋ kirworit ekadwaran Isaya ebala,
“Ayoŋ etoil a ituŋanan a ŋini ecela analoŋisat ebala,
‘Kisidiiryata erot ŋolo ke Ekapolon!’ ”
24Kiŋita ŋulu eyakito Ŋiparisayon iŋes temasi, 25“Kaanukiro nai ibatisaa iyoŋ ŋituŋa, erae pa kirae iyoŋ Kristo, Eliya kori ekadwaran?” 26Toboŋok Yoana ikes tema, “Ebatisae ayoŋ a ŋakipi, nai alokidiŋ kus eyai ipeituŋanan ŋini eriŋa iyes nyeyenuna. 27Iŋes ebuni alokaku kaŋ ka nyitemokino ayoŋ tari alacakin ŋarukanes ŋuna a ŋamuk keŋ.”
28Etiyasi ŋun daadaŋ alotaun a Betania, alo Kide aŋolol Yorodan, neni ebatisaa Yoana ŋituŋa.
Erae Yesu Imesek ŋini ka Akuj
29Akoloŋit ŋina atupakini ŋin, kiŋolik Yoana ebunit Yesu neni keŋ, ido tolimu tema, “Kiŋolikisi Imesek ŋini ka Akuj, ŋini elemari asecit ŋina ka akwap. 30Iŋes lo ŋolo abala ayoŋ erworo ebe, ‘Ebunit alokaku kaŋ, nai epol iŋes akilo ayoŋ, anerae ayai iŋes eriŋa tari nyeuruuna ayoŋ.’ 31Pa ayeni ayoŋ apaki ŋin atemar arae iŋes ŋae; nai abu ayoŋ ebatisa a ŋakipi, ikotere itoodikinor iŋes ŋituŋa ŋulu a Isirael.”
32Kiteyenu Yoana ŋuna abu iŋes kiŋolik tema, “Abu ayoŋ eŋolik Etau ŋolo ka Akuj ebuni anakuj ikoni akuri, min neni keŋ. 33Ariŋa jik ayoŋ pa ayeni iŋes, nai abu Akuj, ŋina ekeyakuunit ayoŋ akibatis a ŋakipi, okolimok tema, ‘Ituŋanan ŋini iŋolikini iyoŋ Etau ŋolo ka Akuj ebuni anakuj, min neni keŋ, iŋes ŋolo ebuni akibatis a Etau a ŋolo Asegan.’ 34Adau tokona ayoŋ akiŋolikin ka eketeyenik iyes atemar erae iŋes Lokoku ka Akuj.”
Ŋikiyakia a Yesu ŋulu esyaunak
35Akoloŋit ŋina atupakini ŋin, awuasi nabo Yoana ka ŋikasyomak keŋ ŋiarei anenipei. 36Kiŋolik iŋes Yesu elosi, tolimok ŋikasyomak keŋ tema, “Kiŋolikisi Imesek ŋini ka Akuj.”
37Ani iirarete ŋikasyomak ŋuluarei ŋakiro ŋun, kiwuapakis ikes Yesu. 38Kiŋoliya Yesu kaku, kiŋolik ikes iwuapito iŋes, kiŋit tema, “Nyo iwarito iyes?” Toboŋokis ikes temasi, “Rabbi (iŋes atemar Eketataman)! Ai eyai ekonire?”
39Toboŋok Yesu ikes tema, “Potu, ido ianyunete.” Toloto nai ikes, toanyut neni eboiyo iŋes, toruko ka iŋes akoloŋit ŋin. Aapiyarit apaki ŋin ŋisaae ŋitomon ŋulu ka apaaran.
40Epei a ŋuluarei a ŋulu aris kiirasi ŋakiro a Yoana ka kiwuapakis Yesu, arae Anderia lokaato a Simoni Petero. 41Abu Anderia kisyau aryamun Simoni lokaato keŋ, tolimok tema, “Ikiryamu isua Messia” (iŋes atemar Kristo). 42Yau iŋes Simoni neni a Yesu. Kitek Yesu Simoni, tolimok tema, “Ikwa irae iyoŋ Simoni, lokoku a Yoana a? Ikinyarao iyoŋ tokona Kepa” (iŋes atemar ataaba kori Petero a Ŋagirik).
Tonyarau Yesu Pilipo ka Nasaniel
43Akoloŋit ŋina atupakini ŋin, totyaku Yesu alosit nakwap a Galileya. Kiryamun iŋes ka Pilipo, tolimok tema, “Kiwuapakinae ayoŋ.” 44Arae Pilipo ka Anderia ta Petero ŋulu alo Betesaida. 45Kiryamunos nai Pilipo ka Nasaniel, tolimok Pilipo iŋes tema, “Ikiryamu isua iŋes ŋolo egirit Moses ŋakiro keŋ Lokisila, ŋolo daŋ igirito ŋikadwarak ŋakiro keŋ. Erae iŋes Yesu ŋolo a Nasaret, lokoku a Yosepu.”
46Tolimu Nasaniel tema, “Epedori mono idiobore ŋini ajokan alomun alo Nasaret a?” Tolimok nai Pilipo iŋes tema, “Bua, ido toanyu!”
47Ani iŋolikini Yesu Nasaniel ebunit neni keŋ, tolimok ŋikasyomak keŋ tema, “Erae lo Esiraelit ŋolo a kire! Emam amodiyo aneni keŋ!” 48Kiŋit Nasaniel Yesu tema, “Ikiyenuni iyoŋ ayoŋ ikwaani?” Toboŋok Yesu iŋes tema, “Eriŋa tari Pilipo nyenyarauna iyoŋ, aris ayoŋ kakaanyuwa iyoŋ alokwap ebobore.” 49Toboŋok Nasaniel tema, “Eketataman, irae iyoŋ Lokoku ka Akuj ka irae Erwosit ŋolo a Isirael.”
50Tema Yesu, “Inup iyoŋ tokona aŋuna alimunio ayoŋ atemar akaanyuwarit iyoŋ alokwap ebobore a? Ibuni iyoŋ aanyun ŋakiro ŋuna apolok nooi akilo ŋun.” 51Kiyatak iŋes tema, “Akalimokini ayoŋ iyes kire atemar, iŋolikinete iyes nakuj eŋaara ka ŋimalaikan elosete kidiama ka eponito kwap neni a Lokoku a Ituŋanan.”
Terpilih Sekarang Ini:
Yoa. 1: NIB2008
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Ngakarimojong Interconfessional Bible © Bible Society of Uganda, 2008.
