Mark 4
4
Woju Wiċaṡa Wan Ṫaƞtaƞhaƞ Woiyaċin
(Matthew 13.1-9; Luke 8.4-8)
1Galilee ble aglagla Jesus ake wauƞspewiċakiye. Ok̇aƞṡniyaƞ ohomni kawitayapi na lila wiċotapi ċaƞke wata waƞ ogna iyotake. Wata ki mniċokata okaġe na oyate ki ohuta el najiƞpi. 2Wiyaċiƞpi uƞ wauƞspewiċakiye taku ota na lewiċakiye:
3“Namaḣʹuƞpo! Tohaƞ wiċaṡa waƞ iyayiƞ na woju. 4Woju su mak̇a yublupi el okalahe iċuƞhaƞ, huƞġe ipayeḣya hiƞḣpaye, ċa ziƞtkala ahiyu na ṫebyapi. 5Huƞġe iƞyaƞ ohan mak̇a c̄onala ohan hinḣpaye. Mak̇a mahetuyaḣci iċaġe ṡni ċa su ki oḣ'ank̇oya iċaġe. 6Hehaƞl wi hinaṗiƞ na waiċaġela kʹuƞ ak̇ate, ċa eċiƞ ak̇atin na ohute ki mahetuya iyaye ṡni ċa oḣʹaƞk̇oya napuze. 7Huƞġe su kʹuƞ waptaye ohaƞ hiƞḣpaye, ċa waptaye ki eha iċaġiƞ na wojupi hena paok̇aƞ ṡniye ċa ehaṡ wojupi hena suṫuƞ ṡni. 8Tk̇a huƞġe su mak̇a waṡte el hiƞḣpaye, na wojupi ki iċaġin na naḣca na suṫuƞ. Opawinge isam, samya iċaġe welo.”
9Ċa Jesus heye, “Naḣʹuƞpo, le, nuġe niyuk̇aƞpi heċi haƞ!”
Woiyaċiƞ Ki Taku K̇api Ki
(Matthew 13.10-17; Luke 8.9, 10)
10Jesus iṡnala uƞ hehaƞ etan naḣʹuƞpi hena ihakab-unpi ki ob hipi na wiyaċiƞpi hena tanyankel iyunġapi. 11“Niye woslolye waƞ Wak̇aƞṫaƞka ṫawokiċuƞze ṫaƞtaƞhaƞ nicʹupelo,” Jesus awiċayupte. “Tk̇a uƞma hena, ṫaƞtaƞhaƞ uƞpi ki hena, wiyaċiƞpi uƞ ec̄ela wanaḣʹuƞpelo, 12ho ċa,
‘Waƞyaƞkapi na pipiya iwanyankapi
kʹeyaṡ takuni ablezapi ṡni;
tanyan anaġoptaƞpi na anaġoptaƞhaƞpi
kʹeyaṡ takuni okaḣniġapi ṡni,
eċiƞ heċuƞpi haƞtaƞṡ, Wak̇aƞṫaƞka etkiya igluhomnipi ki
waḣtanipi kʹuƞ hena ewiċakiktuƞjiƞ kta.’”
Jesus Woju Wiċaṡa Wan Ṫaƞtaƞhaƞ Wiyaċiƞye He Yuiyelakota
(Matthew 13.18-23; Luke 8.11-15)
13Hehaƞl Jesus iwiċayuƞġe, “Le wiyaċiƞye ki oyakaḣniġapi ṡni hwo? Le oyakaḣniġapi ṡni haƞtaƞṡ tohaƞḣc̄i wiyaċiƞye waƞjiḣc̄i oyakaḣniġapi kta hwo? 14Su wokalapi na wojupi kʹuƞ he Wak̇aƞṫaƞka ṫawooyake kʹuƞ he e. 15Wooyake ki le su eya ċaƞku isakib hiƞḣpaye hena e; lena oyate ki naḣʹuƞpi, tk̇a waƞċagna Wak̇aƞ-ṡic̄a hiyu na wooyake waƞ ojupi kʹuƞ hena yuḣeyab iċu. 16Oyate uƞma hena su kʹeya mak̇a ṡic̄a el iḣpeyapi kʹuƞ iyeċec̄api. Wooyake naḣʹuƞpi kʹuƞ hehaƞ waƞċagna iyokipiya ic̄upi. 17Tk̇a mahetuyaḣc̄i ic̄upi ṡni, na lila ṫehaƞḣc̄i yuha yapi ṡni. Ho ċa tohaƞl wakiṗapi hantanṡ wooyake le yuṡnapi na waƞċagna enakiyapi. 18Oyate uƞma hena su kʹeya waptaye ohaƞ iḣpeyapi kʹuƞ hena iyeċec̄api sʹeleċec̄a. Lena wooyake naḣʹuƞpi hena epi, 19tk̇a le wiċoni ṡic̄e, wijic̄a waṡtelakapi, na taku iyuha ċiƞpi sʹa, uƞ ok̇aƞpi ṡni na wooyake kʹuƞ he akaḣpeya ahiyupi, na etaƞhaƞ uƞ takuni suṫuƞ ṡni. 20Tk̇a wiċoni lel taku ṡice hena na wijica waṡtelakapi he na taku iyuha ċinpi sʹa, lena un wooyake kʹun hena awaċinpi ṡni na akaḣpeya iḣpeyapi na etanhan takuni suṫun ṡni. Eyaṡ huƞḣ wooyake ki naḣʹuƞpi kʹun hena, ic̄upi, na su wayuotapi: Huƞġe wikc̄emna yamni, huƞġe wikc̄emna ṡakpe, na huƞġe opawiƞġe kigle yuotapi.”
Ṗetijaƞjaƞye Waƞ Wakṡiṡkokpa Iyoḣlateya He
(Luke 8.16-18)
21Ho Jesus ake heye: “Tohaƞḣc̄i tuwe ṗetijaƞjaƞye waƞji au na wakṡiṡkokpa naiƞṡ oyuƞke oḣlate egle hwo? Leċel eċuƞ so? Ṗetijaƞjaƞye oegle ki el egle so? 22Taku naḣma glepi ki yuṫaƞkal ahiyupi kta, na takuḣc̄i akaḣpapi ki hena yublec̄api kta. 23Nuġe luhapi heċihan! Naḣ'unpo!"
24Nakuƞ leċel ewiċakiye: “ Taku nayaḣʹuƞpi ki hena anaġoptanpo! Wooṗe kʹeya un tuwe wiċalasupi ki hena Wak̇aƞṫaƞka inṡʹeya un niyasupi kta na iyeṡ lila suta ktelo. 25Wiċaṡa waƞ taku yuha ki he isamya wakʹupi kta; wiċaṡa waƞ takuni yuha ṡni ki he taku c̄onala wayuha ki hena ekeyaṡ kipi ktelo.”
Su Iċaġe Ṫaƞtaƞhaƞ Woiyaċinye
26Jesus iyopteya waeye: “Wak̇aƞṫaƞka ṫawokiċuƞze ki leċel iyeċec̄a, wiċaṡa waƞ mak̇a el su okala iyeċeca. 27Haƞhepi ċaƞna iṡtime, kikta na aƞpetu opta ṫok̇aƞl ṡkinciye eċuƞhaƞ woju ki suṫuƞ na iċaġe. Tk̇a tokeṡke heċetu kihaƞ slolye ṡni. 28Mak̇oċe ki eċa wojupi hena iċaḣye na suṫuƞkiye; oṫokaheya ape ki nuṡnuṡyela hinaṗe na hehanl hute ki iċaġin na hehaƞl ehakeḣc̄i suṫuƞ. 29Tohaƞtu waƞ wojupi ki hena suṫuƞ ki hehaƞl woju wiċaṡa ki hiyu na glak̇an yelo.”
Woju Su Waƞ Ċikʹala Eyapi Ċa Wiyaċinye
(Matthew 13.31, 32, 34; Luke 13.18, 19)
30“ Wak̇aƞṫaƞka ṫawokiċuƞze tokca kʹuƞ unkeyapi kta hwo?” Jesus wiyuƞġe. “Taku wiyaċiƞye uƞkʹuƞpi na uƞyuiyeskapi kta hwo? 31Mak̇asitomniya itimahel el su wan ihaƞkeya ċikʹala ċa oju. 32Iwatohaƞyaƞ iċaġe na ihaƞkeya ċaƞ ṫaƞka ki he e. Aletka ki lila ṫaƞkiƞkiƞyaƞ ċaƞke ziƞtkala ki ahiyu na oiyohaƞzi ki el wahoḣpi kaġapi.”
33Jesus ṫawooyake ki un oyate ki wahokuƞwiċakiye, wiyaċiƞye uƞma ki leċec̄a ota ki uƞ; tona okaḣniġa okihipi kʹuƞ hena owiċakiyake. 34Wiyaċiƞye ċola wowiċakiyaka ċiƞ ṡni, tk̇a iṡnala ihakab-unpi obtu ċaƞna taku ki iyuha okaḣniḣwiċakiye.
Jesus Oṡic̄ec̄a Waƞ Yuablakela
(Matthew 8.23-27; Luke 8.22-25)
35He aƞpetu ki iḣtayetu iċuƞhaƞ Jesus ihakab-unpi ki lewiċakiye, “Uƞkiyayapi na ble ki ak̇otaƞhaƞ uƞyaƞpi ktelo.” 36Ċa ok̇aƞ ṡni kʹuƞ iḣpeya iwiċayayapi; ihakab-unpi ki wata el iyotakapi, hel Jesus ehaƞni yaƞke, na kiċi iyayapi. Wata uƞma kʹeya nakuƞ hel najiƞpi. 37Lila oṡic̄ec̄a waƞ woblu hiyu na mnikakiċipehaƞhaƞ hiyu na wata ekta okapsuƞ, ċa mni uƞ ojula tk̇a. 38Jesus wata ilazataƞhaƞ opiicʹiye, ipahiƞ kiṫuƞ na iṡtime. Yuƞk̇aƞ ihakab-unpi wiċaṡa ki yuḣic̄api na lekiyapi, “Wauƞspekiya, le unṫ'api kte kihaƞ, tok̇ayakiye ṡni hwo?”
39Jesus najiƞ hiyayiƞ na ṫate ki hekiye, “Waḣwala yo!” na mnikakiċipehaƞhaƞ ki hewiċakiye, “Owaƞjila yaƞka po!” Yuƞk̇aƞ ṫate ki akisni, na lila ablakela. 40Hehaƞtu ċa Jesus hewiċakiye, “Takuwe nihiƞnic̄iyapi hwo? Wowic̄ala ċola nahaƞḣc̄i yauƞpi hwo?”
41Ho tk̇a lila wak̇okiṗapi, na lekiċiyapi, “Wiċaṡa ki le tuwe hwo? Ṫate na mni ki ekeyaṡ oiye naḣʹuƞpelo!”
Terpilih Sekarang Ini:
Mark 4: LKTNT20
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© American Bible Society
