यूहन्ना 17
17
यीशुये री खास याजकीय प्राथना अपणे खातर
1यीशु अपणे चेलयां ने ये गल्लां बोलणे ते बाद, स्वर्गा खौ देखीने गलाणे लगया, “मेरे पिता सै वगत आईगरा अपणे पुत्रा री महिमा कर, इस खातर भई पुत्रा रे जरिये तेरी महिमा हो। 2तैं मिन्जो सारयां लोकां पर अधिकार दित्तिरा, भई हऊँ तिन्हां सब्बीं जो अनन्त जीवन देऊं। 3कने अनन्त जीवन येआ, भई लोक तिस इकलौते सच्चे परमेशरा जो पैहचाणो, कने सै मिन्जो यनि यीशु मसीह जो बी पैहचाणो, तिस्सो जे तिने भेज्जीरा। 4सै जे काम्म तैं मिन्जो करने जो दित्तिरे थे, तिन्हां सब्बीं जो पूरा करीने, संसारा च मैं तेरी महिमा कित्ती। 5हुण तू, हे पिता अपणिया उपस्थितिया च मिन्जो तिसा महिमा ते महिमामय कर, सै महिमा जे मेरी संसारा रिया सृष्टिया ते पैहले तुहां सौगी थी।
अपणे चेलयां खातर
6“तैं तिन्हां लोकां जो जे संसारा चते चुणीने मिन्जो दित्या, तिन्हांजो मैं तेरे बारे च दस्या। सै सारे तेरे थे पर तैं सै लोक मिन्जो देईते, कने तिन्हें तेरे उपदेशा रा पालन कित्या। 7हुण सै जाणाँ ये भई सारियां चिज़ां सै जे तैं मिन्जो दित्ति रियां, सै तेरते इ आई रियां। 8काँह्भई मैं तिन्हांजो सैई सन्देश दित्या सै जे तुहें मिन्जो दित्तिरा था, कने सै तिस्सो ग्रहण करीने सच्चीजो ये जाणीगे भई हऊँ तेरे लाते आईरा। कने तिन्हें ये विश्वास कित्या भई तैंई मिन्जो भेज्जिरा। 9हऊँ तिन्हांरे खातर प्राथना करया राँ। हऊँ संसारा रे खातर नीं, पर तिन्हांरे खातर प्राथना करया राँ, सै जे तैं मिन्जो सौंपीरे, काँह्भई सै तेरे। 10सै जे किछ मेरा, सै तेरा कने सै जे तेरा सै मेरा। हऊँ तिन्हां च महिमामय हुया। 11हुण मांह इस संसारा च नीं रैहणा, पर सै संसारा ची रैहणे, कने पवित्र पिता, हऊँ तेरे लौ आया रां, तू अपणिया सामर्था ने तिन्हांरी हिफाजत कर, तिसते जे सै इक हुईजो तियां जे अहें इक ये। 12तदुआं तक जे हऊँ तिन्हांने सौगी रैया, तेरे तिस नौआं रिया सामर्था ते सै जे तैं मिन्जो दित्तिरी, मैं तिन्हांरी हिफाजत किति, कने तिन्हेंजे अपणे खातर भटकणा हि चुणया तिन्हांजो छड्डीने तिन्हां च कोई बी नाश नीं हुआ, ताकि पवित्रशास्त्रा च जो किछ लिखिरा सै सच्च ओ। 13पर हुण हऊँ तेरले आया रां। ये गल्लां हऊँ संसारा च हुंदे हुए गलाया राँ, भई सै मेरे आनन्दा ने पूरे भरी जो। 14मैं तेरा सन्देश तिन्हांजो दस्या, पर संसारा रे लोकें तिन्हांते नफरत कित्ती, काँह्भई सै संसारा रे नींये, तियां जे हऊँ संसारा रा निआं। 15हऊँ ये प्राथना नीं करदा भई तू तिन्हांजो संसारा ते कड्डी दे, पर ये प्राथना करया राँ, भई तू शैतान्ना ते तिन्हांरी हिफाजत कर। 16सै संसारा रे नींये, इयां इ तियां जे हऊँ संसारा रा निआं। 17तू सच्चाईया ते तिन्हांजो पवित्र कर#17:17 पवित्र कर या अपणे खातर लग कर। तेरा वचन सच्चा। 18तियां जे तैं मिन्जो इस संसारा च भेज्या, तियां इ मैं बी तिन्हांजो इस संसारा च भेज्जीरा। 19इसरे फायदे खातर हऊँ अप्पूँजो तिन्हांरे खातर समर्पित कराँ, ताकि सै बी सच्चाईया रे जरिये समर्पित हुई जाओ।
सारे विश्वासियां खातर
20“हऊँ सिर्फ इन्हां इ चेलयां रे खातर प्राथना नीं करया राँ, पर तिन्हां खातर बी सै जे तिन्हांरा सन्देश सुणीने माह पर विश्वास करगे। 21ताकि सै सब इक हुई जाओ; हे पिता परमेशर, तियां जे तू मांह चा कने हऊँ तेरे चा; तियां इ सै बी अहां च इक ओ ताकि तिसते जे संसारा रे लोक ये विश्वास करो भई मिन्जो भेजणे औल़ा तूई आ। 22तैं मिन्जो सै जे महिमा दित्ति, सै मैं तिन्हांजो दईती, भई तियां जे अहें इक ये, तियां इ सै बी इक हुईजो। 23मांह तिन्हां च रैहणा कने तू मांह च, भई सै पूरे तरीके ने इक हुईजो, तिसते जे संसारा जो ये पता लगी जो, भई मिन्जो तैंइ भेज्या, कने तुहें तिन्हांने बी तेढ़ा इ प्यार कित्या, तेढ़ा जे तैं माहने कित्या।”
24“हे पिता! सै लोक जे तैं मिन्जो दित्तिरे, मेरी ये इच्छा इ भई तित्थी जे हऊँ आ तित्थी सै बी रौ, काँह्भई सै मेरिया तिसा महिमा जो देक्खी सक्को सै जे तैं मिन्जो दित्ति। काँह्भई संसारा रिया सृष्टिया ते पैहले तू मिन्जो प्यार कराँ था।
25“हे धर्मी पिता, संसारा रे लोकें तिज्जो नीं जाणया, पर हऊँ तिज्जो जाणाँ, कने ये चेले बी जाणाँ ये भई तैं मिन्जो भेज्जिरा; 26मैं तिन्हांजो दस्या भई तू कुण आ, कने मांह लगातार दसदे रैहणा, ताकि जिस तरिके ने तैं मेरने प्यार कित्या, तियां इ सै दुज्यां जो प्यार करी सक्को, कने हऊँ बी तिन्हांच बणीरा रऊँ।”
Terpilih Sekarang Ini:
यूहन्ना 17: KFSNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
This work is licensed under Creative Commons Attribution-ShareAlike 4.0 License.
