Matiyu 9
9
1Miyi yōempe ra bōt mōemtorīleki ra nimōte eni. 2Miroradūmūtōri pugi sĭ neteme neturumurō, miyi yemalē ra nesūvlok eni; ĭm Iesū yemokesi tavniri enirora memenūwi pugi neteme neturumurō memokū, Avūg, avosūwi; ofielentug kĭk sat sū enugkĭk.
3Im nugkoneme ōvun Somūl dūmūsepen enūwi ūnōwanda mūmōkū, Iyi onūwi nam sat. 4Im Iesū yemelavenūri tarūsū enirora memenūwi memokū, Kūmontarū sat ūnōwami irantie? 5Itokowo tnoinū ĭtemelepon, worenūwi magkū, Ofilentugkĭk sat sū enugkĭk; kū, Etūok mavan? 6Kō ma kĭmi kwagkili Netni eni neteme horog ra nemap worefielentugi satsū, iyi yōmenūwi pugi neteme neturumūro memokū, Etūok empĭ nesūvlok enugkĭk ĭm peve ra nimo enugkĭk. 7Miyi yemtūok mempe ra nimo eni. 8Mov numpūn lō dūmōkesi mūmavlugi, mumūvietivesep Nōbū mori yemovunora ōveteme horog sugkū.
9Im Iesū yōmavango memokesi sĭ neteme yemetesep ra nūrū worevi muni, nin eni Matĭyū, memenūwi pugi memokū, Uri yaū; miyi yemtūok memūri.
10Im pol sugkū yemtesĭgi ūnisog nimo, sikat ōvun lĭvsaū nalekon mōvun nareki sat dūmūvelum mūmūtesĭgi dal Iesū mōvun nūrie eni. 11Mōvun Faresi dūmōkesi mūmūnūwi punora ōvun nūrie eni mūmokū, Tavsogi enugkĭmi umneni dal ōvun lĭvsaū nalekon mōvun nareki sat irantie? 12Im Iesū yemorĭgi memenūwi punora memokū, Ōveteme horĭgives, ūtūmnakĭugi sĭ neteme tavū; irora wokon mori umnamarat. 13Kō ūve mūkili fan nam ugi imo, Ya umnakĭugi togesoveli memagkū mōmū aremī ra sakrifĭs; ĭt ya otūvelum worovrokonda ōvun tanepo mampīeves nōwanda, kō ōvun nareki sat.
14Mōvun nūrie eni Yōane dūmūvelum pugi mūmūtagkeli mūmōkū, ka kemlandūnesepen netevokom, mōvum Faresi sugkū, mōvun nūrie enugkĭk ūtūmuntovokom, irantie? 15Im Iesū yemenūwi punora memokū, Ravensīeme eni retepon wandĭgumpūnū pol sugkū asūon dal irora, kū? Kō nempugon ampelum mampĭ asūon mori marokonda, penūri irora wontovokom. 16Tawi sĭ umanteri nevlugkon ĭtevaū ran tan nemas ĭterōvot; nagkū sugkū imo yemeterigi woresumpat amti mōmentevaseri mōmū temas. 17Mōveteme ūtūmwosĭlĭgo wīn ĭtevaū ūnisog ōvun nokolistan numpūmetūo, kūentawi wampulet ĭm wosĭlĭgi wĭn ratilat, ĭm wonteavtĭti ōvun nokolĭstan; irora ūmwosĭlĭgi wĭn ĭtevaū ūnisog ōvun nokolĭstan ĭtevaū, mūmnafinte dūrū sū.
18Polekū iyi yemenūwi imosū punora, sĭ nivūo yivelum memtevita iran, memenūwi memokū, Okemas netūg ĭtnasiven; kō elum metipe nokopmū iran miyi amūrep.
19Im Iesū yemtūok memūri iyi, mōvun nūrie eni sugkū. 20Im sĭ nasiven mori yamarat ugi nilūonde nevisū twelv, yivelum kitan memsugkori navlūtni semplaūon eni; 21ĭt iyi yemesepen enūw ūnōwan memokū, Nagkū ya osugkori wokon navlūtni semplaūon eni ampiēōwara yaū.
22Im Iesū yemelagkaū memokesi iyi memenūwi pugi memokū, Nasiven, avosūwi; tavniri enugkĭk ovkĭkēō-wara; marimago yeviēōwara nasiven mori.
23Im pol sugkū Iesū yive ūnisog nimo eni nivūo memokesora ōveteme dūmneli mōvun naviran dūmūtugi, iyi yemenūwi punora memokū, Uve ilat; 24ĭt iyi ĭtnumpōkon otūmas, iyi umnalēepo. 25Mirora dūmagipĭ iran. Im pol sugkū yemsatevokonda ilat iyi yive ūnisog memelekavi nokoven eni, mitnumpōkon yemtūok; 26ĭm narĭgi imo yēmokumpelĭgi nūrū sū yūi.
27Im Iesū yōmavango mōveteme endūrū nĭmtēi dūmūri iyi, mūmūvrugi mūmūnūwi mūmōkū, Netni eni Dēvĭd, togesovolokam. 28Im pol sugkū iyi yive ūnisog nimo ōveteme nĭmtei mori dūmūlvelum pugi; ĭm Iesū yemtagkelora memokū; Kūmuntavnirĭgi yaū faneteme worumpi imo kū? Mirora dūmūnūwi mūmokū, Monokowo, Novsūromon. 29Miyi vemsugkori nimĭnda mōmenūwi memokū, Eti irami sugkū tavniri enugkĭmi; ĭm nimĭnda dūtĭpelah. 30Im Iesū yemwalivat ūnōwanda memenūwi memokū, Ufĭnte kimi ma tawi sī neteme agkili ugi. 31Kō irora dūmūve roflmūvietivesep iyi ra nūrūfū yūi.
32Im polekū irora pūtūratumpeni ilat, dūmūtori pugi eĭ neteme nōwampat, im sĭ naviatĭndi yive iran. 33Im pol sugkū yemteveleguni naviatĭndi yam neteme nōwampat: mov numpūn lō dūmavlugi mūmūnūwi mūmōkū, Dūpmūtōkesi sugkū imo ra Isrēel. 34Kō ōvun Faresi dūraū-nūwi mūmōkū, Iyi umantevelegunora ōvun naviatĭndi ugi natemonōk enirora ōvun naviatĭndi.
35Im Iesū yemnavan mempe ra sĭti sū ĭm nimōte sū memtavsokonda ōvun netevokontū ūnisog ōvun nimo tavsogi enirora, memtorenūwisah nam navosavos ugi lō, mumkororĭgives ōvun namarat mōvun netevūlūl omwisū dal ōvun netevokontū.
36Miyi yemokesora ōvun numpūn lō memtogesovelora popōwo irora tawi faneteme ĭm dūmūremlemlū, irora sugkū ōvun pugipugi ĭm tawi nefĭnte enirora. 37Miyi yemenūwi punora ōvun nūrie eni memokū, Novūan tamas kō ōveteme woralekon semsimugi tawi sikat; popōwo imo sugkū, 38wosenĭgi Novsūromon eni novūan mori ma Iyi ontamūlora ōvun nasemnūok ran denūok eni.
Terpilih Sekarang Ini:
Matiyu 9: ERGNT79
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Erromangan New Testament © British and Foreign Bible Society, 1909,1979.
