OBUCHACHILO 8
8
Omuyembo kweifula okhuhwa okhwa
1Mana Nyasaye niyetsulila Noa nende tsisolo nabulimo nende emiruko chiosi echia yali ninachio muliaro. Kho nakhola omuyeka okhuhutsa khushialo, nako amaatsi nikachaaka okhukhamulukha. 2Amaatsi akafuutuukhanga okhurula hasi weliloba nikalekha okhufuutuukha, khandi amatirisha komumaleesi nikekala. Ifula niyilekha okhukwa, 3nako amaatsi nikatsiililila okhukhamulukha khushialo khulwa tsinyanga eshikhumi shilala nende amakhumi karano. 4Khunyanga yomusaafu mumwesi kwekhumi namusaafu, okhurula omuyembo kwamaatsi nikubaho, eliaro lierenjekha khubutenje bweshikulu shia Ararati. 5Mana amaatsi nikatsiililila okhukhamulukha. Ne inyanga yambeli yomwesi kwekhumi, obutenje bwebikulu bwachaaka okhulolekha.
6Olunyuma lwetsinyanga amakhumi kane, Noa yekula litirisha khwisisi lie eliaro, 7ne naruma likhookho okhutsia elwanyi, ne shiliachelela tawe. Liabotokhana butswa okhuula olwa amaatsi kakhamulukha khushialo. 8Kho naruma lihusi okhulola nikaba mbu, amaatsi kakhwele khushialo. 9Ne okhuba mbu, amaatsi ako kali nikashiyembile khushialo, lihusi elo shilianyoola habundu, halinyala okhuyeela ta, kho nilichelela muliaro. Mana Noa nanyiila omukhonokwe, natiila lihusi elo ne nalikalusia muliaro. 10Noa yaliindakhwo khulwa tsinyanga tsindi musaafu, mana naruma khandi lihusi elo elwanyi weliaro. 11Lihusi elo liachelela khungoloobe, nilichinjile lisaafu liomuseituni omutoro khumunwa kwalio. Kho Noa namanya mbu, amaatsi kakhamulushe khushialo. 12Mana naliinda tsinyanga tsindi musaafu, khandi naruma lihusi elwanyi, ne nililachelelakhwo khandi tawe. 13Khunyanga yambeli yomwesi kwambeli, Noa nali nemiyika ebikhumi bisasaba namulala, amaatsi kali nikakhamulushe khushialo. Mana Noa nafwimbula eshilama shieliaro, nahenga eyi nende eyi, ne nalola mbu, eshialo shisangalaale. 14Khunyanga yamakhumi kabili namusaafu, eyomumwesi kwakhabili, eshialo shiali nishimalile okhuuma shiosi.
15Mana Nyasaye naboolela Noa ari, 16“Iwe nende omukhasiwo nende abasianibo halala nabakhasi babwe, murule elwanyi weliaro. 17Murulemwo nende ebindu biosi ebili mwoyo, amanyonyi, tsisolo nende buli shindu shiosi eshimoolanga khushialo mbu, biibulane nibiba ebinji muno khushialo.” 18Kho Noa halala nomukhasiwe, nende abasianibe halala nabakhasi babwe, nibarula muliaro. 19Mana buli isolo, nende buli shindu eshimoolanga khwiloba nende buli linyonyi, buli shindu eshichendanga khushialo, eshisaatsa neshikhasi nibirula elwanyi weliaro.
Noa akholela Nyasaye omusango
20Mana Noa niyombashila OMWAMI Nyasaye eshimalilo shiemisango, nabukula khubuli isolo isiiye nende linyonyi lisiiye, ne nabisamba biosi pe khushimalilo shiemisango. 21Olwa OMWAMI Nyasaye yahunyilisia isaakakha, ne niyimuchamisia, yaboola mumwoyokwe ari, “Shindililaamilakhwo khandi liloba eshilaamo shiobubi khulwa obumayanu bwomundu ta, shichila okhurula mubwanabwe, amaparoke namamayanu. Kata shindilimululakhwo khandi buli shindu eshili mwoyo shinga olwa ndakhola tawe. 22Shinga olwa eshialo shilatsiililla okhubaho, ebise shibilachweyanga okhubaho ebiokhuraaka nende ebiokhuchesa ebiraache, ebiomunyiri nende ebiomubasu, ebieifula nende ebieshimiyu, ebieshilo nende ebieshiteere tawe.”
Terpilih Sekarang Ini:
OBUCHACHILO 8: OLUPR
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk