Motíosi 4
4
Ohándá a gogona Yésusu
(Mél 1.12-13; Lók 4.1-13)
1Naá nnyimé hɔ́ɔlɔ́, gɔ́ɔ Giliíli ba Asaŋa ɛ ɛ́damɔ́ na Yésusu naá giolóo gá bodɛ́agadɛ́ go goŋaá ohándá a mo gogona hɔ́ɔ. 2Aŋa a mbaá ŋá a báa go dúmbie medúgú otíno áhandɛ́ a dɛ nyáá boóma, gɛ́hɛ́ go bɛa ncaná. 3Ohándá ba go mo gogona go báyɛkɛna a amɔ́ gɛ́hɛ́ a amɔ́: «Aáŋa#4.3 Aáŋa: go kikilidie gúncodío (háalá na naá gig. 6) Aŋa o lɔ́mɔ́. o lɛ́ Moɔnɔ́ ba Asaŋa, gálɛ́da adánɛ́ yáaya yá ɛ́ya manyáanya.» 4Kanɛ́ Yésusu go mo baga a amɔ́: «Bó lɛ́ ɔ́ŋɔ́ɔlú goŋaá: “Caá goana go manyáanya gɔ́ɔ mɔtɔ ɔ ɔyɔmɔ́, mɔtɔ ɔ ɔyɔmɔ́ go nogálɔ nuimée nɔ́ɔnɔ nó húmenemú naá nyuudé ná Asaŋa#4.4 Bicele 8.3.”.»
5Gɔ́ɔ ohándá ɛ ɛ́damɔ́ nɛhɛ́ naá Gimmúmpúu gá Tɛ́sɔnɔ, go mo búlugie naá tóndi ya Nnyaŋá ya Asaŋa 6a amɔ́ gɛ́hɛ́ a amɔ́: «Aáŋa o lɛ́ Moɔnɔ́ ba Asaŋa mammana, bécuméemú go cí; goakɛ́, bó lɛ́ ɔ́ŋɔ́ɔlú goŋaá: “A ŋgi íŋéné bɛɛ́ŋgɛlɛsɛ bɛ́hɛ́ bogaaga bá go go nɛ́hanɛha naá ɛmbɔ́gɔ yabɔ́, gɛgɔ́ndɔ́ gáhɔ gɛ́ dɛ kúkéné ɛdánɛ́#4.6 Ɛsagɔ 91.11-12.”.» 7Yésusu go mo gundie a amɔ́: «Bó lɛ́ tɔ́nɔ ɔ́ŋɔ́ɔlú goŋaá: “O do ná gogona Daadáa Asaŋa bahɔ#4.7 Bicele 6.16.”.»
8Ohándá go gɔnɔ go ɛ́da nɛhɛ́ naá giyéŋéŋkée gá ogɔndɔ, go mo dúfie mefuŋe má cí miimée na nigúmi ná má, 9a amɔ́ gɛ́hɛ́ a amɔ́: «Kaá go íŋéné buimée bɔ́ɔbɔ go amɔ́ kulene enúu go go mbúlugenye.» 10Gɔ́ɔ Yésusu a mo oyanamɔ́ a amɔ́: «Dómbá, Sátana! Mammana, bó lɛ́ ɔ́ŋɔ́ɔlú goŋaá: “Búlúgényée Daadáa Asaŋa bahɔ, o mo yɔgɔnɛnɔ, mɔ́ɔ mokáa#4.10 Bicele 6.13.”.» 11Gɔ́ɔ ohándá a mo dɛ́ɛnamɔ́. Bɛɛ́ŋgɛlɛsɛ go báyɛkɛna Yésusu, go ɛ́da go mo yɔgɔnɛnɔ.
Yésusu a dóogonyo Gɛnɔ́gɔ́ gá Cɔ́mɔ
(Mél 1.14-15; Lók 4.14-15)
12Aŋa Yésusu a mbɔɔ́ ɔ́bɔ́ goŋaá bá á gumbéné Sáŋa bá báá mo ágá naá ncíbo ya gɛaŋɔ́#4.12 Bá á gumbéné Sáŋa bá báá mo ágá naá ncíbo ya gɛaŋɔ́: Bó oyamɔ́ Sáŋa Begiyuminye. O bana 14.3, gɛ́hɛ́ go fadɛgɛna go go ɛ́da naá Gelilée. 13A lɛ́ kanɛ go gɛ́ga naá Násalɛdɛ, kanɛ́ gɛ́hɛ́ go ɛ́da lukumene naá Kapɛlɛnahɔ́mɛ, tɛ́sɔnɔ yɛ́ɛyɛ ɛ lɔ́mɔ́ naá cɔ́lɔ ya máŋɛ́ má Gelilée, naá gigísi gá cí gá Sábɔlɔŋɔ na Nɛfɛtáalɛ#4.13 Sábɔlɔŋɔ na Nɛfɛtáalɛ: bó lɔ́mɔ́ bɛcóa bá egúli áhandɛ́ naá odóɛ yá gɛdɔŋɔ gá Ɛ́sɛlahɛ́ɛlɛ.. 14Bó mbaá lɔmɔ́ báŋaáalú nɔ́ɔnɔ go goŋaá dogálɔ dá mbúsí ya Asaŋa, Iseyíi, dɔ́ɔdɔ dó ɛ́nanɛna:
15«Cí ya Sábɔlɔŋɔ, cí ya Nɛfɛtáalɛ,
gɛbala gá máŋɛ́,
gɛdɔŋɔ gɛ́ɛgɛ naá Yɔlɔdɛ́ŋɛ boayá búunú,
Gelilée mɔ́ɔnyɔ biinyí biinyí bá batɔ bɛ́ gɛ́gamɔ́ hɔ́ɔ!
16Gɛdɔŋɔ gɛ́ɛgɛ gɛ́ mbaá lɛ naá mbíno
gɛ́ ɛ́ ɛ́ná gɛantáanta gá gise!
Go batɔ báaba bá mbaá lɛ bɔ́ ɔyɔ naá duílilíe gɛdɔŋɔ gá nigúe,
gise gɛ́ á bóloodío#4.16 Iseyíi 8.23 — 9.1.!»
17Gó bayɛga naá gɛcamɛna gɛ́ɛgɔ, Yésusu go bayɛga go dúmenye a amɔ́: «Núgíe nɔnɔ gɛɔyɔ gɛ́nyɔ́#4.17 Gokikilidie gúncodío gó lɔ́mɔ́ núgíe nɔnɔ ndoŋá ɛ́na gɔnɔ́ bógoodóomú nɔnɔ bɛoba., goakɛ́ Bufuŋe bá mmoɛná bó á báyɛkɛ́ná!»
Odɔ́ŋɛ́nɔ yá behúúní bá busío
(Mél 1.16-20; Lók 5.1-11)
18Yésusu ɛ ɛnda naá cɔ́lɔ ya máŋɛ́ má Gelilée, gɛ́hɛ́ go ɛ́na bonóbí moɔbɔ́ báandɛ́, Símono, mɔ́ɔnyɔ bá dɔ́ŋɔnɔmɔ́ bá amɔ́ Píele, na ondimóní Andɛlɛ́ɛ, bá nɔɔnɔnɔ mafɔ́ɔ́dɔ́ɔ naá máŋɛ́. 19Gɛ́hɛ́ go bó oyana a amɔ́: «Mbienéemú nɔnɔ, nná nyó íyie bonóbí batɔ.» 20Bá báa lɛ gó dómba go síe bá báá cecúgíe mafɔ́ɔ́dɔ́ɔ mábɔ́, bá báá mo biené. 21Yésusu a á gɔnɔ́ báyɛkɛdɛna naá busío, go ɛ́na bahaŋa bá Sebedée báandɛ́; Sáakɛ na ondimóní Sáŋa. Bá mba lɛ́ naá gilué olɔŋɔ na isée babɔ́, bá gedegedie mafɔ́ɔ́dɔ́ɔ mábɔ́. Gɔ́ɔ Yésusu a bó dɔ́ŋɛnɔmɔ́. 22Bɔ́ɔbɔ tɔ́nɔ go dómba go síe isée babɔ́ na gilué, go mo biene.
Yésusu a dúmenye Gɛnɔ́gɔ́ gá Cɔ́mɔ naá Gelilée
(Mél 1.39; Lók 4.44; 6.17-18)
23Gɔ́ɔ Yésusu ɛ ɛ́damɔ́ ɛ ɛnda naá bɛdɔŋɔ bá Gelilée biimée, a húunenye naá nnyaŋá sábɔ́ sá mbósógólí, a dúmenye Gɛnɔ́gɔ́ gá Cɔ́mɔ gá Bufuŋe bá mmoɛná, e éŋugenye ɛgɔnɔ́, bɛnɛ́mɔ mbɔ́dɔ iŋkimée, naá gɛdɔŋɔ. 24Ufíno yɛ́hɛ́ go dómba go saa gɛdɔŋɔ gá Silíi giimée, bá báá lɛ gó ɛ́da go mo úlenine na bɔgɔnɔ́gɔnɔ mbɔ́dɔ iŋkimée na batɔ bá bɛgáda bá biliíli, buubí giti#4.24 buubí giti: mɔtɔ uŋkimée mɔ́ɔnyɔ a nómamɔ́ ogɔnɔ́ yá odóɛ, yó ŋanana goŋaá mɔtɔ o oba, a kúbe oŋgíso, a húmenye mbúcú., bɛcɛ́gɛlɛ: Yésusu a bó éŋugenye. 25Bitúu bitúu bá batɔ go mo bienene, bɛ́ ɛ́da go úlene naá Gelilée, naá gigísi gá cí gá Tɛ́sɔnɔ sɛ́ɔ́dɔ́, naá Yolósalɛmɛ, naá Yudée, na naá gigísi gá cí gɛ́ɛgɛ boayá búunú bá Yɔlɔdɛ́ŋɛ.
Terpilih Sekarang Ini:
Motíosi 4: YAS
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
