Matana Enjil 10
10
Bag. 10.
1Ter wide tenna hirani diminde owingarigi uwedtaïrrigi gudragi tidirsum, newertichi nijisigi osirw an, wide ode malegi gengirw an, widegon jagadkane malegon. 2Ishinbuli diminde owingarina ericnigon in teran: Koyaldi Siman teran Butrus an a weran, wide Andrawuskon tenna timbes, Yagub Zabadina todton, wide Hana timbeskon, 3Filibuskon, wide Bartulamawuskon, Tumagon, Matagon makisdi, Yagub Halfana todton, wide Labawuskon Tadawus an aweran, 4Siman Kanandiy an awerangon, Yahuda Isharyutiy an awerangon, tekki bisellimel.
5Ingu diminde owingarigi Yesu ishinirsum wide weseirsum in wereged:
„Umachina darbir jumenwe. Wala Samarandichina medinechir tomenwe. 6Ama malen owollo juwe Israeln egedi tuhebulinai. 7Iri juburungon beshirewe, wide wewe: ‚Simechina mulki awtanossum an.’ 8Odiligon gengirwe. Dieligi agiswe. Barasked erbuligi taharewe. Newerti milichigi oswe. Sudir iri arsun. Sudirgon tidirwe.“
9„Wala dehebbekki seyemenwe, wala fadagi, 10wala sharti gelegi, inna amajedichir, wala busug wekki darubna jiradilo, wala kade owigi, wala taragachigi, wala wichir wekki. Mine jeligi aawil tenna keregi wersin.“
11„Widegon medine werro wala neja werro tokrun, uru nalwe tidder daligi. Tir on hugebukran, teddo kewidwe bellunbokon. 12Wide kar torunna kello tekki salamewe. 13Ter kay on inna salamgi hugebukin, inna salam ter kan dogor weleser agad. Ter kay on hugebumenkin, inna salam irg abidi wider agad. 14Irgi geblemenilgon wala inna weregi gijirmenilgonna karton bolosirgi inna osichina eskedti tekk abidi tubwe. 15Aleged irgi wetidirrin, Sadumgon wide Gamuragonna ariddogor hon beltakkikanin dinadna ugrosir man medinen dogor.“
16„Ahan ai irgi egedi nawre aïshinirrin jelegina seler. Erigkattanwe āya nawite. Wide dullanwe mine nawite.“
17„Ama zolirton inn achigi gobirwe. Mine irgi mijlesir bitolundurran. Wide tinna jamachir bitukirkandan. 18Widegon bisugtakkikandun walichigon origonn owollo anna jiradilo, tindogochir wide umachin dogor shehaday an. 19Irgi selimeranna kello wekkongi hememenwe, mine wala minged bibaindungi. Man lehdayen irgi bitirtakkikanin, tekked bibaindun. 20Mine ir termunun bibainili. Ama intimbabna newerti teran irged bibainin. 21Wide timbes timbeski diarkir bijaginkanin, wide timbab tenna todti. Wide tonigon tirgi uskelin dogor bimbellan wide bibeirran. 22Wide bitisitakkikandun malerton, ann erina jiradilo. Ama agabkon himler, in bidukitakkikanin.“
23„Irgi medine werroton turosirkiran, owittigir dososwe. Mine, irgi aleged awetidirrin, elgon iri Israelna medinechigi bajkirmendungon, zolna tod bitan.“
24„Hiran tenna arifdogor dulmunum, wala nugud tenna tirtin dogor. 25Hirangi kefen tenna arifki durekkin, wide nugudton tenna tirti galgankin. Tir on kana tirtigi Balazabulg an uwekokran, won saï kottekki tenna kan idigi buwemendan?“
26„Tirgi iri sarkimenwe! Mine bokibul wekkon bikewidmunum bel tameningon, wala masmasar wer gijrarkiyir bikewidmunum. 27Ai irgi dulumar awetidirringi, tekki ugrosna seler wewe. Wide iri ulgir agijirrungi kan dogorton uwewe.“
28„Sarkimenwe jitagi abeligi. Mine newertigi eske belimnan. Ama inin dogor sarkiwe jitagon newertigongi berosirrigi jehenebir eskergi bunduririlgi.“
29„Won kawirtetod owigi bariza owiged ajanmina? Jngurton wekkon ardir adigirmunum inn abon erigna masir. 30Ama irg ankin, inna urina sirkon teran male idir daburan. 31Kidir sarkimenwe. Iri kawirte digrin dogoged komboriy erun.“
32„Aiged girelna tirti ogjin owollo, aigon tekked bigirerin abo simechir daln owollo. 33Aigi ogjin owollo gubilgi, aigon tekki bigubrin abo simechir daln owollo.“
34„Inn ergir wemenwe ai gendarna jiradilo ariddogor tasingi. Ai gendarna joro takomnim, ama shagi luferi an. 35Bagarki undurri an tasim ogijkon timbabkonna barer, burugon tinengonna barer, wide todn engon tinogogonna barer. 36Wide zolna aduwigon tenna kan id teran.“
37„Timbabki wala tinengi andogor dolil aigi hugebumnum. Tenna todti wala tenna burugi andogor dolil aigi hugebumnum. 38Tenna berki soke injed wide aigi tebaemenil aigi hugebumnum. 39Tennewertigi elil bidabrin, anna jiradilogon dabril belkanin.“
40„Irgi jamegril aigi jamegirsinkirim. Aigi jamegrilgon aigi ishinelgi ajamegrin. 41Nebi wekki jamegril nebikanena jiradilo, nebi werna keregi barkanin. Sewa wekki jamegril sewagidna jiradilo, sewagidti aawilina keregi barkanin. 42Aleged irgi wetidirrin, ingu kinatonirton wekki essi dibite orokel wekki igidilna tirtina ajr bidabkanmunum.“
Terpilih Sekarang Ini:
Matana Enjil 10: XNZ1912
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Published by the British and Foreign Bible Society in 1912.
