Matio 7
7
Bɔ̌ ìn ba̍ tìh pùn tù-ɛ
(Luu 6.37-38, 41-42)
1Jusu la̍a̍, “Mɔ̀ bɔ̌ nyɔ̍ duuh tìh pùn tù-ɛ, nɛ̀ Nyɔsoa se̍ mɔ̀ tìh pùn tù mu̍ ke. 2Dɛ̍nu̍ɛ, ka mɔ̀ nu̍-a nyɔ̍ duuh tìh pùn tù-ɛɛ, kǎ Nyɔsoa-a mu̍ mɔ̀ tìh pùn tù-ɛ nu̍ ke. Dbee dɛ̍ mɔ̀ nyǐ-a nyɔ̍ duuh-ɛ, dbee dɛ̍ laa̍ bo Nyɔsoa-a mu̍ mɔ̀ nyǐ ke. 3Tu̍ fɔ̌ jɛ nɛ-a dě ìn jlǐh-ɛ, dɛ̍nu̍ nɛ̀ gbɛ̀n ɛ̍ ja̍ wɛ̀ àn gbɛ̀n ìn ba̍ naɛ sɛɛɛ̍n ja̍ dě ɔ̍ jlǐh ɛ? 4Dɛ̍nu̍ nàɛ̀ tu̍ fɔ̌ nɛ-a dě ìn jlǐh-ɛ, wɛ̀ ìn poe ɛ̍ kɛ̍n i̍ wɛ̀ nàa̍ ìè ìn ba̍ naɛ sɛɛɛ̍n dě ɔ̍ jlǐh sà ke̍ ɛ? 5Mɔ̀ la ɔ̀ nɛ-a mɛɔ sɔɔ̌n wɔ̍ɔ̍n-ɛ, sà nàɛ̀ tu̍ fɔ̌ nɛ-a dě ìn jlǐh-ɛ ke̍ sàǐtòò. Nɛ̀ àn mu̍ i̍ jě nmɔ jii̍, wɛ̀ ìè ɔ̍ naɛ sɛɛɛ̍n dě ɔ̍ jlǐh sà-a dǔ.
6“Dɛ̍ ɛ̀ kɔn-a dǒ Nyɔsoa we̍-ɛ, mɔ̀ bɔ̌ ɛ̍ gbèᵻ nyǐ-ɛ. Mɔ̀-a jɛ nyǐ ɛ̍ i̍h-ɛ, i̍h-a mu̍ kwa̍ i̍ bǐi sǔh i̍h iě mɔ̀ nmu̍. Nɛ̀ mɔ̀ bɔ̌ mɔ̀-a pɛ̀ɛ̀ dɛ̍ᵻ ìh gbǎ-a dɛ̍kɛ̍n-ɛ dǒ be̍e̍ᵻ jǔ i̍ po̍-ɛ, i̍h se̍ i̍h-a dɛ̍ i̍ juo. Ɛ̍ tìh-ɛ, i̍h-a mu̍ i̍h kɛ̍n i̍ na sǔh.”
Nyɔ̍ ɔ̀ pɔ̀n-a dɛ̍ i̍-ɛ bo Nyɔsoa-a nyǐ ɛ̍
(Luu 6.31; 11.9-13)
7Ɔ̍ la̍a̍, “Mɔ̀ jbǎ dɛ̍, nɛ̀ ɛ̍ mu̍ mɔ̀ kwa̍a̍ gbǎ. Mɔ̀ pɔ̀n dɛ̍ i̍, nɛ̀ mɔ̀-a mu̍ ɛ̍ jě. Mɔ̀ bla̍ gbaba, nɛ̀ ɛ̍ mu̍ pɔ̀ni dǒ mɔ̀ we̍. 8Dɛ̍nu̍ɛ, nyɔ̍ jɔ jbǎ-a dɛ̍-ɛ, nɛ̀ ɛ̍ gbǎ ɔ̍ kwa̍a̍. Nɛ̀ nyɔ̍ ɔ̀ pɔ̀n-a dɛ̍ i̍-ɛ, nɛ̀ ɔ̍ jě ɛ̍. Nɛ̀ nyɔ̍ ɔ̀ bla̍-a gbaba-ɛ, nɛ̀ ɛ̍ mu̍ pɔ̀ni dǒ ɔ̍ we̍. 9Nyɔ̍we̍ bo ɔ̀ kɔn jǔ jɔ̍gbau jbǎ-ɛ ɔ̍ blèe̍, wɛ̀ ɔ̍ nyǐ ɔ̍ sɔɔ̌ gbo̍ ɛ? 10Àe̍e̍ pò ɔ̍ jbǎ-ɛ ɔ̍ smìɛ̍-ɛ, nɛ̀ ɔ̍ mu̍ ɔ̍ sɛ̍ nyǐ ae? 11Mɔ̀ɔ̍ juh kɔn gblɛ̍n nyni-a jii̍-ɛ, pò mɔ̀ juo mɔ̀-a nynuu̍ dɛ̍ᵻ chɛ̀ nyǐ-ɛɛ, jɛ nɛ̀ mɔ̀ Baa Nyɔsoa nɛ-a dě ja̍i̍wlɔ̀-ɛ, ɔ̍ bo ɔ̀ se̍ nyɔ̍ jbǎ-ɛa ɔ̍ dɛ̍ᵻ chɛ̀-ɛ nyǐ mu̍ ae?
12“Dɛ̍ mɔ̀ jbɛɛ-a nyɔ̍ iě-a mɔ̀ pùn nu̍-ɛ, ɛ̍ bo mɔ̀ iě nyɔ̍ pùn nu̍ ke. Ɛ̍ bo ɛ̀ nu̍ Nyɔsoa-a telě, wɛ̀ ɔ̍ tu̍owli po̍ nyɔ̍ poe ɛ̍ nǎ dɛ ke.”
Gbàɛ̍gbà wɔ̍n sɔɔ̌sɔ bo ìè we̍ pa̍-ɛ
(Luu 13.24)
13Jusu la̍a̍, “Gbàɛ̍gbà wɔ̍n ɛ̀ nɛ-a sɔɔ̌sɔ-ɛ, ɛ̍ bo mɔ̀ iě dě di̍i̍ jii. Dɛ̍nu̍ɛ, gbàɛ̍gbà wɔ̍n jɛ bɛ̌-a we̍ i̍-ɛ, ɛ̍ wìè se̍ gba̍-a kma. Ɛ̍ tìh-ɛ, nyɔ̍ dɔu-a gba̍ wìè-a chɛ̀. Jɛ ɛ̍ gba̍ nyɔ̍ dě kàn nɛ̍ di̍i̍. 14Jɛ gbàɛ̍gbà wɔ̍n jɛ nɛ-a sɔɔ̌sɔ-ɛ, ɛ̍ wìè-a gba̍ nyɔ̍ dě kmɔ̌ chɛ̀ɛ̌chɛ̀ di̍i̍. Jɛ ɛ̍ kma gba̍-a. Ɛ̍ tìh-ɛ, nyɔ̍ wei bo ùh-a gba̍ ɛ̍.”
Tu̍-a buǒ bo nyɔ̍-a juo-e tu̍ i̍
(Luu 6.43-44)
15Ɔ̍ la̍a̍, “Mɔ̀ nu̍ nɛnɛ̌ dǒ Nyɔsoa-a tu̍owli po̍ nyɔ̍-a si̍h naɛ we̍. Pò u̍h ja dǒ nyɔ̍ we̍ ji̍ sàǐtòò-ɛ, nɛ̀ u̍h gbɛ̍n tìh i̍ ka blawɛ̌-ɛ. Jɛ nɛ̀ u̍h wɔ̀ gbɛ̍n-nmi̍i̍ dě u̍h di̍i̍ ka. 16U̍h-a nu̍-dɛ̍ᵻ bo mɔ̀-a mu̍ u̍h i̍ juo-e. Mɔ̀ se̍ wiǎ tu̍ jě mu̍ ɛ̍ iě tòmai-a buǒᵻ po̍. Nɛ̀ mɔ̀ se̍ mukwa̍ pei jě mu̍ i̍h iě gbòu̍gbò-a buǒᵻ po̍ ke. 17Tu̍ chɛ̀-a po̍ buǒᵻ chɛ̀. Nɛ̀ tu̍ sɔ̀n-a po̍ buǒᵻ sɔ̀ɛ̀n. 18Tu̍ chɛ̀-ɛ po̍ tu̍ sɔ̀n-a buǒᵻ. Tu̍ sɔ̀n wɔ̍-ɔ po̍ tu̍ chɛ̀-a buǒᵻ ke. 19Ɛ̍ tìh-ɛ, tu̍ jɛ se̍-a buǒᵻ chɛ̀ po̍-ɛ, nɛ̀ ɛ̍ mu̍ dba̍-ɛ, wɛ̀ u̍h iě ɛ̍ jlǐh po̍. 20Nɛ̀ɛ̍, u̍h-a nu̍-dɛ̍ᵻ bo mɔ̀-a mu̍ u̍h i̍ juo-e.”
Nyɔ̍ kli̍hgbɛ̍ se̍ dě Nyɔsoa we̍ nyni̍ mu̍
(Luu 13.25-27)
21Jusu la̍a̍, “Ɛ̍ se̍ nyɔ̍ kli̍hgbɛ̍ ùh-a nu̍-a, ‘Joi, Joi-ɛ,’ ùh se̍ dě Nyɔsoa-a kmɔ̌ wlu̍ i̍ kɔn la nyni̍ mu̍. Jɛ nyɔ̍ ɔ̀ mu̍-a ǐn Baa nɛ-a dě ja̍i̍wlɔ̀-ɛ, ɔ̍ wlùh nu̍-ɛ, ɔ̍ bo ɔ̀ mu̍ deě nyni̍. 22Ti̍ sàwi̍h sì ti̍-a mu̍-a nyni̍ dǒ Nyɔsoa jǔ-ɛ, nɛ̀ nyɔ̍ dɔu-a mu̍ ǐn dǎ, ‘Joi, Joi, ɛ̍ se̍ àɔ̀ mɔ̀ à se̍ Nyɔsoa-a tu̍owli po̍ dǒ àn nynɛ̌ kɛ̍n, wɛ̀ à se̍ nyɔ̍ jeědih de̍e̍ i̍ sà ae? Ɛ̍ se̍ àɔ̀ due laa̍ à se̍ jbaɛdih po̍ dǒ àn nynɛ̌ kɛ̍n dɛ ke ae?’ 23Nɛ̀ ǎn mu̍ ka dǎ dě u̍h we̍, ‘Mɔ̀ɔ̍ gblɛ̍n sɔ̀ɛ̀n nu̍ nyɔ̍. Ǐn se̍ mɔ̀-a dɛ̍ i̍ juo, mɔ̀ sì ǐn jii̍.’ ”
Nyɔ̍ ɔ̀ wɔ̌n-a Jusu-a wlu̍ i̍-ɛ, nɛ̀ nyɔ̍ ɔ̍ wɔ̀ ɛ?
(Luu 6.47-49)
24Ɔ̍ la̍a̍, “Ɛ̍ tìh-ɛ, ìh la ǎn bla̍-aɛ, nyɔ̍ ɔ̀ wɔ̌n-a ǎn wlu̍ i̍-ɛ, nɛ̀ ɔ̍ wɔ̀ di̍i̍ i̍ flɔn nyɔ̍ ɔ̀ po̍-a ɔ̍ gbò dǒ sɔɔ̌ kɛ̍n-ɛ. 25Iě nǐ dba̍, wɛ̀ tègbè tè. Wɛ̀ poɔ dɔu ji̍ dǒ gbò laa̍ kɛ̍n, jɛ ɛ̍ se̍ blu̍. Dɛ̍nu̍ɛ, ɔ̍ poe ɛ̍ dǒ sɔɔ̌ kɛ̍n dɛbo.
26“Jɛ ìh la ǎn bla̍-aɛ, nyɔ̍ ɔ̀ se̍-a ǎn wlu̍ i̍ wɔ̌n-ɛ, nɛ̀ ɔ̍ wɔ̀ bo-nyɔ̍ ɔ̀ po̍-a ɔ̍ gbò dǒ penɔ̍ɔ̍ kɛ̍n-ɛ. 27Wɛ̀ nǐ dba̍, iě tègbè tè. Wɛ̀ poɔ dɔu ji̍ dǒ gbò laa̍ kɛ̍n, iě ɛ̍ blu̍. Wɛ̀ ɛ̍ waɛ i̍ flɛ̀ɛ̌nflɛ̀ɛ̌n.”
Gbǐh nɛ dě Jusu-a nǎ po̍-ɛ de̍e̍
(Maɛ 1.22)
28Ti̍ Jusu wɔ̀-a ìh la bla̍-aɛ, sɔ ɔ̍ nǎ po̍-ɛ wlǔh i̍ nyɔ̍ tlùgbei̍ laa̍ de̍e̍. 29Dɛ̍nu̍ɛ, ɔ̍ se̍ u̍h-a telě nǎ poe nyɔ̍ wɔ̀. Jɛ ɔ̍ nǎ poe-ɛ blě tùn.
Terpilih Sekarang Ini:
Matio 7: KDNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
The New Testament in Western Krahn published as KU̍O̍ DELEE © The Bible Society in Liberia, 1999.
